නීති විරෝධි ලෙස අත්අඩංගුවට ගෙන රඳවා සිටින ජනරාල් සරත් ෆොන්සේකා මහතා වහාම නිදහස් කරන ලෙස රජයට බල කරමින් දැවැත්න උද්ඝෝෂණයක් පැවැත්වීමට කටයුතු සංවිධානය කර ඇති බව ජනතා විමුක්ති පෙරමුණ පවසයි. මේ අනුව හෙට (16) සවස 3.00 ට බොරැල්ල කැම්බල් පිටියෙන් ආරම්භ වන දැවැත්න පාගමනකින් මෙම විරෝධතාවය ආරම්භ කිරීමට නියමිතය.
මේ සම්බන්ධයෙන් අප කළ විමසීමකදී ජනතා විමුක්ති පෙරමුණේ ප්‍රචාරක ලේකම් හිටපු පාර්ලිමේන්තු මන්ත්‍රී විජිත හේරත් මහතා මෙසේ පැවසීය.
"මේ රජය ප්‍රජාතන්ත්‍ර විරෝධී ලෙස මේ රටේ ජාතික වීරයෙක් වුණු ජනරාල් සරත් ෆොන්සේකා මහතා අත්අඩංගුවට අරන් තියෙනව. දැන් මේ රටේ ක්‍රියාත්මක වෙන්නේ ෆැසිස්ට් පන්නයේ පාලනයක්. මේ ක්‍රියාමාර්ගයන්ට එරෙහිව අපි එකතු වෙන්න ඕනෙ.
මේ වෙන කොට මේ රටේ මහ නායක ස්වාමීන් වහන්සේලා ප්‍රමුඛ පූජණිය මහා සංඝ රත්නයත් ඉල්ලා තිබෙනව ජනරාල් නිදහස් කරන්න කියල. නමුත් ඒ ගැන ඉඩිමහින් මේ වෙනකම් කිසිදු තැකීමක් කර නැහැ. ඒ වෙනුවට මේ ඉල්ලීම කරපු වගේම, ඒ වෙනුවෙන් මැදිහත් වෙලා ඉන්න ස්වාමීන් වහන්සේලාට හා විහාරස්ථානවලට පහර දෙමින් සිටිනවා.
ඒ විතරක් නෙමෙයි මේ වෙන කොට ජනරාල් සරත් ෆොන්සේකා මහතා නිදහස් කරන්න කියල අපි උද්ඝෝෂණ ගණනාවක් පැවැත්වුවා. නමුත් මේ සෑම අවස්ථාවකටම පාහේ පොලිසිය පහර දුන්නා. ඒ විතරක් නෙමෙයි මේ සෑම අවස්ථාවකදීම මැරයොත් පහර දුන්න. මේ කිසිව වෙලාවක පොලිසිය මැරයින්ට විරුද්ධව කටයුතු කළේ නැහැ.
මේ සියලු කරුණූවලින් පැහැදිලියි මේ වෙන කොට මේ රටේ ප්‍රජාතන්ත්‍රවාදය බරපතල ලෙස උල්ලංඝණය වෙලා කිය. මෙයට එරෙහිව ජනතා විමුක්ති පෙරමුණ විදියට අපි හෙට කොළඹදී දැවැන්ත උද්ඝෝෂණයක් සංවිධානය කරල තියෙනව. මේ රටේ ප්‍රජාතන්ත්‍රවාදය අගයන සියලුම ජනතාවට අපි ආරාධනා කරනව අපිත් එක්ක එකතු වෙන්න කියල"
0 comments:
Post a Comment