Monday, February 28, 2011
අභියෝග වලට වෛර නොකළ යුතුයිFebruary 28, 2011 06:00 pm
එල්ල වන අභියෝග හා බාධා කිරීම් වලට වෛර නොකළ යුතු බව ජනාධිපති මහින්ද රාජපක්ෂ මහතා පවසයි.
එකී අභියෝග හා බාධා කිරිම් අපව ශක්තිමත් කරනා බවත්,එබැවින් එකී අභියෝගයන් සතුටින් බාරගත යුතු බවත් ජනාධිපතිවරයා පෙන්වාදෙයි.
ජනාධිපතිවරයා මේ බව සඳහන් කර සිටියේ අද(28)පන්නිපිටිය ධර්මපාල විද්‍යාලයේ නව පිහිනුම් තටාකය පාසල් දරු දැරියන්ට පවරාදීමේ උත්සව අවස්ථාවට සහභාගී වෙමිනි.
උගතමනා ශිල්පය රජ මැතිදුන්ටවත් අත්පත් කර ගත නොහැකි බවට වන ආප්තෝපදේශයද ජනාධිපතිවරයා විසින් මෙම අවස්ථාවේදී සිහිපත් කරන ලදී.
බාලවිය යළිත් අත්පත් කරගත නොහැකි බැවින් අධ්‍යාපනයට නිසි තැන ලබා දී මැනවින් අධ්‍යාපනය හැදෑරීම,ක්‍රීඩා කෞෂල්‍යයන් පෙන්වීම හා ප්‍රගුණ කිරීමද ඉතා වැදගත් බව ජනාධිපතිවරයා සඳහන් කළේය.
පෞද්ගලික ඔසු සැල් වැටලීම ඇරඹෙයිFebruary
දිවයින පුරා පිහිටි පෞද්ගලික ඔසුසැල් සහ විලවුන් අළෙවි කරන මධ්‍යස්ථාන වැටලීමේ වැඩපිළිවෙළක් ක්‍රියාත්මක කිරීමට විලවුන් උපකරණ හා ඖෂධ පිළිබඳ ජාතික අධිකාරිය තීරණය කර තිබේ.
විශේෂයෙන්ම තත්ත්වයෙන් බාල ඖෂධ හා විලවුන් උපකරණ අළෙවි කිරීම , ගබඩා කිරීම මෙන්ම ඖෂධ අළෙවියේ දී නියමිත ප්‍රමිතීන්ට අනුව කටයුතු නොකිරීම යන කරුණු මුල් කර ගෙන මෙම වැටලීම් සිදු කිරීමට නියමිතය.
ඇතැම් පෞද්ගලික ඔසුසැල් පුහුණු ඖෂධවේදියෙකුගේ සේවය නොමැතිව පවත්වාගෙන යන බවත් ආහාර ද්‍රව්‍ය සහ ඖෂධ එකම ශීතකරණයක් තුළ ගබඩා කිරීම ද දැක ගත හැකි බවත් සෞඛ්‍ය අමාත්‍යාංශය පෙන්වා දෙයි.
විලවුන් උපකරණ සහ ඖෂධ පිළිබඳ ජාතික අධිකාරිය මඟින් පසුගිය වසරේ වැටලීම් 239ක් සිදු කර ඇති අතර එයි 203ට එරෙහිව නඩු පවරා රුපියල් මිලියන 2ක මුදලක් දඩ වශයෙන් අය කර ගෙන තිබේ
ශ්‍රී ලංකා මහ කොමසාරිස් කාර්යාලය එපා කියූ 400 ක් අත්අඩංගුවට
ඉන්දියාවේ,චෙන්නායිහි පිහිටි ශ්‍රී ලංකා මහ කොමසාරිස් කාර්යාලය වසා දමන ලෙස ආණ්ඩුවට බල කරමින් විරෝධය පෑ දකුණු ඉන්දීය දේශපාලනඥයින් වන වයිකෝ,පී.නැදුමාරන්,පාණ්ඩියන් ඇතුළු 400 ක පමණ පිරිසක් අත්අඩංගුවට ගෙන තිබේ.
මෙම විරෝධතා පා ගමන සඳහා අවසර ලබා ගෙන නොතිබීම හේතුවෙන් මෙම පිරිස අත්අඩංගුවට ගෙන ඇති බව ඉන්දීය පොලීසිය සඳහන් කර තිබේ.
ඉන්දීය එම්.ඩී.එම්.කේ පක්ෂ මහ ලේකම් වයිකෝ ගේ සහභාගිත්වයෙන්,පී.නැදුමාරන්ගේ නායකත්වයෙන් තවත් දේශපාලන පක්ෂ හා සිවිල් සංවිධාන ගණනාවක සහභාගිත්වයෙන් මෙම විරෝධතාවය පැවැත්වූ බව ඉන්දීය මාධ්‍ය උපුටා දක්වයි.
එල්.ටී.ටී.ඊ නායක වී.ප්‍රභාකරන්ගේ මව වූ පාර්වතී අම්මාල් මිය ගේ සොහොනට බලු මළකුණු ගෙන විත් දැමීමට විරෝධය පාමින් ඉන්දියාවේ ශ්‍රී ලංකා මහ කොමසාරිස් කාර්යාලය අසල විරෝධතාවයක් පැවැත්වීමට දකුණු ඉන්දීය ද්‍රවිඩ නායකයින් තීරණය කර තිබුණු බව ඊයේ සඳහන් කෙරිණි.
ඒ අනුව අද(28)චෙන්නායි,මයිලපූර්හි තාගේෂ්වර උද්‍යානයෙන් විරෝධතා පා ගමනක් ආරම්භ කෙරුණු අතර එය ශ්‍රී ලංකා මහ කොමසාරිස් කාර්යාලය දක්වා පැමිණ තිබේ.
පාර්වතී අම්මාල් මිය ගේ අදාහන කටයුතු සිදු කළ දින රාත්‍රීයේ කිසියම් වූ සන්නද්ධ පිරිසක් විසින් වෙඩි තබා මරා දමන ලද බල්ලන් තිදෙනෙකුගේ මළ කුණු සොහොනට ගෙනවිත් දමා තිබු බව මාධ්‍ය මගින් අනාවරණය කෙරිණි.
මෙම සිදුවීම ම්ලේච්ඡ ක්‍රියාවක් බවත්,මෘත දේහය දහනය කළ සොහොන මැදින් වාහනයක් එහා මෙහා පදවාගෙන ගොස් තිබීම නිසා මිනී අළු විසිරී තිබුණු හෙයින් ඇගේ මරණය වෙනුවෙන් නිසි පරිදි චාරිත්‍රානුකූලව අවසන් කටයුතු සිදුකරන්නට අවස්ථාව නොලැබුණු බවත්ද්‍රවිඩ ජාතික සන්ධානයේ පාර්ලිමේන්තු මන්ත්‍රී එම්.ඒ ශිවාජිලිංගම් මහතා මීට පෙරාතුව ප්‍රකාශ කර තිබිණි.
කෙසේ වෙතත් මෙම නින්දිත ක්‍රියා මාර්ගයට එරෙහිව දකුණු ඉන්දියාවේ පිහිටි ශ්‍රී ලංකා මහ කොමසාරිස් කාර්යාලය ඉවත් කරගත යුතු බවට බල කරමින් අද දිනයේ විරෝධතා පා ගමන සංවිධානය කර තිබිණි.
නාම යෝජනා පත්‍ර ප්‍රතික්ෂේපයට බලපෑ හේතු වාර්තාවක් අධිකරණයට
පළාත් පාලන මැතිවරණය සඳහා ඉදිරිපත් කළ නාම යෝජනා පත්‍ර ප්‍රතික්ෂේප කිරීම් වලට එරෙහිව ඉදිරිපත් කර තිබූ පෙත්සම් විභාග කිරීම සඳහා අභියාචනාධිකරණය අද(28) දින නියම කර ඇත.
අදාළ පෙත්සම් අද කැඳවූ අවස්ථාවේදී මැතිවරණ කොමසාරිස්වරයා විසින් නාම යෝජනා පත්‍ර ප්‍රතික්ෂේප කිරීමට බලපෑ හේතු දැක්වෙන වාර්තාවක් අධිකරණයට ඉදිරිපත් කළේය.
මැතිවරණ නීති කඩකිරීම් වලට අදාළව ඉදිරිපත් වූ චෝදනා වර්ග 11 ක් යටතේ එම ප්‍රතික්ෂේප කිරීම් සිදුකර ඇති බව ඒ පිළිබඳව අධිකරණයට කරුණු ඉදිරිපත් කළ නියෝජ්‍ය සොලිස්ටර් ජෙනරාල් ශවේන්ද්‍ර ප්‍රනාන්දු මහතා සඳහන් කළේය.
ඒ පිළිබඳව වර්ගීකරණයක් දැක්වෙන වාර්තාවක් ද අධිකරණයට ඉදිරිපත් කර ඇති අතර අධීකරණය මෙම නීති කඩකිරීම් පිළිබඳව සොයාබලා සුදුසු තීන්දුවක් ලබාදිය යුතු බව නියෝජ්‍ය සොලිස්ටර් ජෙනරාල්වරයා අධිකරණයෙන් ඉල්ලා සිටියේය.
ඒ අනුව ඉදිරිපත් වූ කරුණු සලකා බැලූ අභියාචනාධිකරණය අදාළ පෙත්සම් සියල්ල මාර්තු මස 08, 21, 22, 23, 28 සහ 29 යන දිනවල විභාග කිරීමට තීන්දු කරනු ලැබීය.
බදුල්ල -පස්සර නාය යාම තවදුරටත් -ප්‍රවේශම් වන්නැයි ඉල්ලයි
බදුල්ල - පස්සර මාර්ගයේ දෙකේ කණුව ප්‍රදේශයේ පවත්නා නාය යෑම් අවදානම් තත්ත්වය තවදුරටත් ක්‍රියාත්මක වෙමින් පවතින බව ජාතික ගොඩනැගිලි පර්යේෂණ සංවිධානය පවසයි.
නාය යාමට ලක්වන ප්‍රදේශයේ පස් මහමාර්ගයට වැටීමේ ඉඩකඩක් පවතින බැවින් රිය පදවන්නන් ප්‍රවේශම් විය යුතු බව එම සංවිධානය පෙන්වා දෙයි.
මේ වන විට නාය යෑම් අවදානමට ලක්ව ඇති නිවාස හයක පදිංචිකරුවන් ඉන් ඉවත් කිරීමට ද කටයුතු යොදා ඇත.
අදාළ ප්‍රදේශයේ තිබු වතු රෝහලක්, දේවස්ථානයක්, ළමා සංවර්ධන මධ්‍යස්ථානයක් ඇතුළු ගොඩනැගිලි කිහිපයක් මෙම නාය යෑම් අවදානමට ලක්ව ඇති බව සඳහන්ය.
ලිබියාවේ ශ්‍රී ලාංකිකයින් 36 ක් යළි දිවයිනට February 28, 2011 12:17 pm
ලිබියාවේ පවතින නොසන්සුන්කාරී වාතාවරණය හේතුවෙන් එහි සේවයේ නියුක්තව සිටි ශ්‍රී ලාංකිකයින් 36 දෙනෙකු මේ වන විට දිවයිනට ගෙන්වා ගෙන ඇතැයි විදේශ සේවා නියුක්ති කාර්යාංශය පවසයි.
ඊයේ(27) දිනයේ පුද්ගලයින් නව දෙනෙකු සහ අද(28) අලුයම තවත් පුද්ගලයින් පිරිසක් දිවයිනට පැමිණි බව එම කාර්යාංශය සඳහන් කරනු ලැබීය.
ඔවුන් මෙරටට ගෙන්වා ගැනීම සඳහා ගුවන් ටිකට් පත් විදේශ සේවා නියුක්ති කාර්යාංශය මගින් ලබාදී තිබේ.
දිවයිනට පැමිණි ශ්‍රී ලාංකිකයින් මනා සෞඛ්‍ය තත්ත්වයෙන් සිටින බවත් මේ ආකාරයෙන් ලිබියාවේ සිරවී සිටින තවත් ශ්‍රී ලාංකිකයින් මෙරටට ගෙන්වා ගැනීම සඳහා කටයුතු යොදා ඇති බවත් විදේශ සේවා නියුක්ති කාර්යාංශය සඳහන් කරයි.
තමිල් අරුසකච්චි තනිව තරගකර දිනුවොත් දේශපාලනයෙන් සමුගන්නවාFebruary 28, 2011 11:03 am
නැගෙනහිර පළාත සඳහා ඉලංගෙයි තමිල් අරුසකච්චි පක්ෂය තනිව තරගකර ජයග්‍රහණය කළහොත් දේශපාලන ජීවිතයෙන් සමුගන්නා බව එම පළාත් මහ ඇමති ශිවනේසතුරෙයි චන්ද්‍රකාන්තන් මහතා පවසයි.
මඩකළපුව නගරයේ රුපියල් කෝටි 07 .5 ක වියමින් ඉදිකරන ලද නව බස් නැවතුම්පළ විවෘත කිරීමේ අවස්ථාවට එක්වෙමින් ඔහු මේ බව සඳහන් කළේය.
මධ්‍යම රජය සමග එක්ව කටයුතු කරන එකම පක්ෂය සිය පක්ෂය පමණක් බව ද අමාත්‍යවරයා ප්‍රකාශ කළේය.
නැගෙනහිර පළාතට සංවර්ධනය සහ බලය ලබාගත හැක්කේ මධ්‍යම රජය සමග එක්ව කටයුතු කළහොත් පමණක් බව ද චන්ද්‍රකාන්තන් මහතා අවධාරණය කර සිටියේය.
ජනතාව තුළ ආවේගයක් ඇතිකරන දේශපාලනයක නිරතවුවහොත් ජනතා මතය වෙනස්විය හැකි බව හෙතෙම වැඩිදුරටත් අවධාරණය කර සිටියේය.
හර්ෂ අබේවික්‍රම නව ගුවන් හමුදාපති ධුරයේ වැඩ බාරගනියිFebruary 28, 2011 10:36 am
එයාර් මාර්ෂල් හර්ෂ අබේවික්‍රම මහතා සුළු මොහොතකට පෙර 13 වන නව ගුවන් හමුදාපතිවරයා ලෙස නිල වශයෙන් සිය ධුරයේ වැඩ බාර ගනු ලැබීය.
ශ්‍රී ලංකා ගුවන් හමුදාවේ 13 වැනි ගුවන් හමුදාපතිවරයා ලෙස එයාර් මාර්ෂල් හර්ෂ අබේවික්‍රම මහතා පසුගිය දා පත්කරනු ලැබීය.
විශ්‍රාම ලබන ගුවන් හමුදාපති එයාර් චීෆ් මාෂල් රොෂාන් ගුණතිලක මහතාට සුබ පැතීම සඳහා කොළඹ ගුවන් හමුදා මූලස්ථානයේ දී ඊයේ(07) උත්සවයක් පැවැත්වුණි.
එහිදි ගුවන් හමුදාපතිවරයාට අයත් නිල යෂ්ටිය නව ගුවන් හමුදාපති එයාර් මාර්ෂල් හර්ෂ අබේවික්‍රම මහතාට පිරිනැමීම සිදුවිය.
ගුවන් හමුදාපතිධුරයෙන් විශ්‍රාම ලැබීමෙන් අනතුරුව එයාර් චීෆ් මාර්ෂල් රොෂාන් ගුණතිලක මහතා මෙතෙක් වැඩ බැලූ ආරක්ෂක මාණ්ඩලික ප්‍රධානී තනතුරේ පිහිටුවීමට රජය තීරණය කර තිබේ.
මහින්ද සමරසිංහ අද එක්සත් ජාතීන්ගේ මානව හිමිකම් කොමිසම අමතයිFebruary 28, 2011 09:47 am
අමාත්‍ය මහින්ද සමරසිංහ මහතා අද(28) එක්සත් ජාතීන්ගේ සංවිධානයේ මානව හිමිකම් පිළිබඳ කොමිසමේ 16 වන සැසිවාරය ඇමතීමට නියමිතය.
එම සැසිවාරය මේ දිනවල ජිනිවාහිදි පැවැත්වෙයි.
මෙම සැසිවාරය සඳහා සහභාගී වීමට ශ්‍රී ලංකාවෙන් නියෝජිත පිරිසක් පසුගියදා පිටත්ව ගියේය.
නීතිපති මොහාන් පීරිස් මහතා ඇතුළු නියෝජිත පිරිසක් මීට සහභාගී වී සිටින අතර එක්සත් ජාතීන්ගේ ජිනිවා කාර්යාලයේ ශ්‍රී ලංකා නිත්‍ය නියෝජිත ෂෙනුකා සෙනවිරත්න මහත්මිය ද සමුළුවට එක්ව සිටියි.
ශ්‍රී ලංකා දූත පිරිස එක්සත් ජාතීන්ගේ මානව හිමිකම් කොමසාරිස් නවනීදන් පිල්ලෙයි සමඟ මෙරට වත්මන් තත්ත්වය පිළිබඳ සාකච්ඡා කර ඇති බව ද සඳහන්ය
ඇන්ඩෲ විජේසූරිය ගුවන් හමුදා මාධ්‍ය ප්‍රකාශක ධුරයටFebruary 28, 2011 08:59 am
ඇන්ඩෲ විජේසූරිය මහතා නව ගුවන් හමුදා මාධ්‍ය ප්‍රකාශක ධුරයට පත්ව තිබේ.
ජනක නානායක්කාර මහතා ආරක්ෂක මාණ්ඩලික ප්‍රධානීගේ ලේකම් ධුරයට පත්වීමත් සමග ඇන්ඩෲ විජේසූරිය මහතා මෙම ධුරයට පත්ව ඇත.
ජනක නානායක්කාර මහතා ආරක්ෂක මාණ්ඩලික ප්‍රධානීගේ ලේකම් ධුරයට පත්වීමත් සමග ඇන්ඩෲ විජේසූරිය මහතා මෙම ධුරයට පත්ව ඇත.
ඡන්ද කටයුතු වලට රාජ්‍ය දේපළ දුන්නොත් ගාස්තුවක් අය කළ යුතුයිFebruary 28, 2011 08:20 am
කිසියම් දේශපාලන පක්ෂයක මැතිවරණ කටයුතු සඳහා රාජ්‍ය දේපළ ලබාදෙන්නේ නම් ඒ සඳහා අනිවාර්යෙන්ම ගාස්තුවක් අය කළ යුතු බව මැතිවරණ කොමසාරිස්වරයා රාජ්‍ය ආයතන ප්‍රධානීන්ට උපදෙස් ලබාදී තිබේ.
අදාළ දේපළ ලබාදිය යුත්තේ දේශපාලන පක්ෂ විසින් ඒවා ඉල්ලුම් කරණු ලබන අනුපිළිවෙල අනුව බව ද මැතිවරණ කොමසාරිස් දයානන්ද දිශානායක මහතා චක්‍රලේඛයක් මගින් දැනුම් දී ඇත.
මැතිවරණ ප්‍රචාරක කටයුත්තක් සඳහා රාජ්‍ය දේපළ ඉල්ලා සිටිය ද එය ලබාදීම ප්‍රතික්ෂේප කරන්නේ නම් ඊට හේතුව ලේඛනගත කර ඉදිරිපත් කළ යුතු බව ද එමගින් දැනුම් දී ඇති බව සඳහන්ය.
කිසියම් දේශපාලන පක්ෂයක මැතිවරණ ප්‍රචාරක කටයුතු සඳහා රජයේ දේපළ නොමිලයේ ලබාදීම රාජ්‍ය දේපල අයථා ලෙස පරිහරණය කිරීමක් ලෙස සලකනු ලබන බව ද මැතිවරණ කොමසාරිස්වරයා පවසයි.
රජය හා දෙමළ ජාතික සන්ධාන තවත් සාකච්ඡාවක් හෙටFebruary 28, 2011 08:15 am
දෙමළ ජාතික සන්ධානය සහ රජය අතර තවත් සාකච්ඡාවක් හෙට(01) පැවැත්වීමට නියමිතය.
රජය සමග පවත්වන මෙම සාකච්ඡාව සඳහා ප්ලොට් සංවිධානයට ද ආරාධනා කිරීමට දෙමළ ජාතික සන්ධානය තීරණය කර තිබේ.
ප්ලොට් සංවිධානයට මෙම සාකච්ඡා සඳහා ආරාධනා කළ ප්‍රථම අවස්ථාව මෙය වන අතර ඊ.පී.ඩී.පී. සංවිධානයට ද මෙම සාකච්ඡා සඳහා ආරාධනා කිරීමට තීරණය කර ඇති බව දෙමළ ජාතික සන්ධානයේ වව්නියාව දිස්ත්‍රික් ප්‍රධානියෙකු අද දෙරණට සඳහන් කළේය.
උතු‍රේ වැසියන් නැවත පදිංචි කිරීම, ඉඩම් අහිමි වූ වැසියන් සහ යාපනයේ ධීවරයින් මුහුණ දෙන ගැටලු පිළිබඳ මෙහිදි දීර්ඝ වශයෙන් රජය සමග සාකච්ඡා කරන බව ඔහු ප්‍රකාශ කළේය.
පොලිස් ඩිෆෙන්ඩරයට අයෙක් බිලි-4 ට තුවාල
බදුල්ල-කොළඹ ප්‍රධාන මාර්ගයේ සන්නස්ගම ප්‍රදේශයේදී පොලිස් සේවා වනිතා ඒකකයේ ප්‍රධානීන් පිරිසකට ආරක්ෂාව සපයමින් ගමන්ගත් ඩිෆෙන්ඩරයක් අනතුරට පත්වීමෙන් එක් පුද්ගලයෙකු ජීවිතක්ෂයට පත් වී තවත් සිව් දෙනෙකු තුවාල ලබා ඇති බව පොලිස් මාධ්‍ය ප්‍රකාශක,පොලිස් අධිකාරී ප්‍රිශාන්ත ජයකොඩි මහතා පවසයි.
අද කතරගම ප්‍රදේශයේ පැවති උත්සවයකට සහභාගී වූ මෙම පිරිස යළි කොළඹ බලා එමින් සිටියදී සන්නස්ගම ප්‍රදේශයේදී ඩිෆෙන්ඩරය යතුරුපැදියක ගැටී පාරෙන් ඉවතට ඇදී ගොස් තිබේ.
එහිදී යතුරුපැදියේ ගමන්ගත් පුද්ගලයා ඩිෆෙන්ඩරයට යටවී මිය ගොස් ඇති අතර තුවාල ලැබූ සිව් දෙනා රත්නපුර රෝහලට ඇතුළත් කර ඇති බව රෝහල් ආරංචි මාර්ග පවසයි.
පොලිස් විශේෂ කාර්ය බලකායේ තිදෙනෙකු මෙන්ම තවත් සිවිල් වැසියෙකු තුවාල ලැබූ පිරිසට අයත් බව සඳහන් වේ.
පොලිස් සේවා වනිතා ඒකකයේ සභාපතිනිය ලෙස කටයුතු කරනු ලබන්නේ පොලිස්පති මහින්ද බාලසූරිය මහතාගේ බිරිඳ හෙයින් ඇයට ආරක්ෂාව සපයමින් ධාවනය වූ ඩිෆෙන්ඩරය මෙලෙස අනතුරට ලක්ව ඇති බව නිල නොවන ආරංචි මාර්ග සනාථ කර
