Thursday, December 30, 2010
කඩිනමින් සංවර්ධනය විය යුතු අංශ වලට ප්‍රමුඛත්වය දිය යුතුයි
කඩිනමින් සංවර්ධනය විය යුතු අංශ හෝ ස්ථාන නිවැරදිව හඳුනාගෙන ඒ සඳහා ප්‍රමුඛත්වය දී කටයුතු කිරීම අත්‍යවශ්‍ය බව ජනාධිපති මහින්ද රාජපක්ෂ මහතා පවසයි.
අදාළ සංවර්ධන කටයුතු සඳහා ප්‍රමාණවත් ප්‍රතිපාදන නිසිකලට ලබාදීමට ඊට සම්බන්ධ ආයතන කටයුතු කළ යුතු බව ජනාධිපතිවරයා පෙන්වා දෙයි.
මාතර නව නගර සංවර්ධන සැලැස්ම පිළිබඳ අද(30) පෙරවරුවේ අරලියගහ මන්දිරයේ පැවති විශේෂ සාකච්ඡාවකදී ජනාධිපතිවරයා මේ බව කියා සිටියේය.
මාතර නව රෝහල් සංකීර්ණය ඉදිකිරීම, ප්‍රධාන මාර්ග සහ අතුරු මාර්ග පුළුල් කිරීම, නිල්වලා ගංඟා නිම්නය සංවර්ධනය කිරීම ඇතුළු කරුණු කිහිපයක් සම්බන්ධයෙන් මෙහිදි සාකච්ඡා වී තිබේ.adaerana.lk
ඩෙංගු රෝගයට ගොදුරු වූවන්ගේ සංඛ්‍යාව ශීඝ්‍රයෙන් පහළට
2009 වසරට සාපේක්ෂව මේ වසරේදී ඩෙංගු රෝගයට ගොදුරු වූවන්ගේ සංඛ්‍යාව ශීඝ්‍රයෙන් පහළ බැස ඇති බව සෞඛ්‍ය අමාත්‍ය මෛත්‍රීපාල සිරිසේන මහතා පවසයි.
පසුගිය වසරේ නොවැම්බර් මාසයේදී ඩෙංගු රෝගීන් එක් දහස් අටසිය විසි හය දෙනෙකු වාර්තා වු අතර ඉන් 21 දෙනෙකු මියගොස් ඇති බව අමාත්යවරයා පෙන්වා දෙයි.
එහෙත් මේ වසරේ නොවැම්බර් මාසයේදී වාර්තා වු ඩෙංගු රෝගීන් ගණන 645ක් වන අතර මියගොස් ඇත්තේ තිදෙනෙකු පමණක් බව ද අමාත්යවරයා සඳහන් කළේය.
මේ වසරේ දෙසැම්බර් මාසය තුළ ඩෙංගු රෝගීන් සිව් දෙනෙකු මියගොස් ඇති අතර පසුගිය වසරේ එම මාසය තුළ වාර්තා වු මරණ සංඛ්‍යාව පනහකි. adaderana.lk
මාතර නගරාධිපති ඉල්ලා අස්වෙයි
මාතර නගරාධිපති උපුල් නිශාන්ත මහතා සිය ධූරයෙන් ඉල්ලා අස්වී තිබේ.
අද(30) උදෑසන තම ඉල්ලා අස්වීමේ ලිපිය අදාළ බලධාරීන් වෙත ලබාදුන් බව අද දෙරණ කළ විමසීමකදී උපුල් නිශාන්ත මහතා පැවසුවේය.
මීට කළින් තමා නගරාධිපති ධූරයෙන් ඉල්ලා අස්වීමට අදහස් කළ ද තමාට එරෙහිව පරීක්ෂණ කමිටුවක් ක්‍රියාත්මක වීම හේතුවෙන් එම තීරණය නොගත් බව උපුල් නිශාන්ත මහතා කියා සිටියි.
කෙසේ වෙතත් ඊයේ(29) වන විට අදාළ පරීක්ෂණ කොමිසමට තමා විසින් ලබාදීමට නියමිව තිබු ලිඛිත දේශනය ලබාදුන් බව ඔහු පවසයි.adaderana.lk
රාජ්‍ය සේවක වැටුප් 5% න් ඉහළ නගියි
ලබන ජනවාරි පළමු වැනිදා සිට සෑම රාජ්‍ය සේවකයෙකුගේම වැටුප 5% න් ඉහළ දැමීමට සහ රුපියල් 600ක ජීවන වියදම් දීමනාවක් ලබාදීමට රජය පියවර ගෙන තිබේ.
මීට අදාළ චක්‍රලේඛය රජයේ සෑම ආයතන ප්‍රධානියෙකු වෙතම යොමු කර ඇති බව රජයේ ප්‍රවෘත්ති දෙපාර්තමේන්තුව සඳහන් කරනු ලැබීය.adadera.lk
විද්වත් කමිටුවට වීසා දීමට සූදානම් -නමුත් සාක්ෂි දීමට පමණයි
ශ්‍රී ලංකාවේ සිවිල් යුද ගැටුම් පැවති කාල සීමාව තුළි සිදුවූ බව කියන මානව හිමිකම් කඩවීම සම්බන්ධව උපදෙස් ලබාගැනීම සඳහා එක්සත් ජාතීන්ගේ මහ ලේකම් බැංකි මූන් මහතා විසින් පත්කරන ලද ත්‍රිපුද්ගල විද්වත් කමිටුවට වීසා ලබාදීමට සූදානම් බව ජනමාධ්‍ය හා ප්‍රවෘත්ති අමාත්‍ය කෙහෙළිය රඹුක්වැල්ල මහතා පවසයි.
නමුත් අදාළ කමිටුව ශ්‍රී ලංකාවෙහි විමර්ශන කටයුතු සිදුකිරීමට විරුද්ධ බවත්, උගත් පාඩම් හා ප්‍රතිසන්ධානය පිළිබඳ කමිටුව වෙත ඔවුන් සාක්ෂි ලබාදීමට පැමිණෙන්නේ නම් පමණක් එම කමිටුවට ශ්‍රී ලංකාවට පැමිණීමට වීසා ලබාදෙන බව ද ඔහු සඳහන් කර ඇත.
අද(30) රජයේ ප්‍රවෘත්ති ප්‍රවෘත්ති දෙපාර්තමේන්තුවේ පැවති කැබිනට් මණ්ඩල තීරණ දැනුම්දීමේ මාධ්‍ය හමුවට එක්වෙමින් රඹුක්වැල්ල මහතා මෙම අදහස් පළ කළේය.adaderana.lk
ප්‍රවාහන ගැටලු වලට විසඳුම් දෙන්න ගමින් ගමට යයි
ප්‍රවාහන ක්ෂේත්‍රයේ ජනතාව මුහුණ පා ඇති ගැටලු පිළිබඳ ගමින් ගමට ගොස් ජනතාව මුණ ගැසෙමින් ඒවාට විසඳුම් ලබාදීමේ නව වැඩපිළිවෙලක් ප්‍රවාහන අමාත්‍යාංශය ආරම්භ කර තිබේ.
ප්‍රවාහන අමාත්‍ය කුමාර වෙල්ගම මහතාගේ සංකල්පයකට අනූව මෙම වැඩපිළිවෙල ක්‍රියාවට නංවා ඇති බව අමාත්‍යාංශය සඳහන් කරනු ලැබීය.
පාසල් සිසුන්, රජයේ සේවකයින් මෙන්ම එදිනෙදා මහමග ගමන් ගන්නා ජනතාව ප්‍රවාහනය සම්බන්ධව විවිධ ගැටලු වලට මුහුණපාන බවට හඳුනාගෙන ඇත.
බොහෝ බස් ඩිපෝ කළමනාකරුවන් කළමනාකරණය පිළිබඳ දක්වන අඩු සැලකිල්ල මෙවැනි ගැටලු බොහෝමයකට හේතුවී ඇති බව ප්‍රවාහන අමාත්‍යාංශය පවසයි.adaderana.lk
කැන්සාස්හි වෙඩි තැබුමකින් මෙරට ශිෂ්‍යයෙක් මියයයි
අමෙරිකාවේ කැන්සාස් නගරයේ පිරවුම්හලක් මංකොල්ලකෑමට තැත්කළ මංකොල්ලකරුවන්ගේ වෙඩි පහරකට ලක්ව එරට අධ්‍යාපනය ලැබූ ශ්‍රී ලාංකික ශිෂ්‍යයෙකු මරණයට පත්ව ඇත.
මෙසේ මරණයට පත්ව ඇත්තේ 25 හැවිරිදි සුජේන්ද්‍ර අමරසිංහම් නැමති එම පිරවුම්හලෙහි ලිපිකරුවෙකු ලෙස සේවය කළ තරුණයෙකි.
මෙම සිදුවීමෙන් මිනිත්තු 20ට පමණ පසු එම පිරවුම්හලට පැමිණි පාරිභොගියකු විසින් තුවාලකරු දැක අදාළ සිද්ධිය පිළිබඳව පොලීසියට දැනුම් දී තිබේ.
තුවාල ලැබූ ශිෂ්‍යයා රෝහලට ඇතුළු කිරීමෙන් පසු මරණයට පත්ව ඇති බව ද සඳහන්ය.
සිද්ධිය සිදුවී මිනිත්තු කිහිපයට පසු එම ස්ථානයට පාරිභෝගියකු පැමිණ ඇති අතර ඔහු තුවාල ලබා සිටි සුජේන්ද්‍ර රෝහලකට ඇතුළු කිරීමට හෝ පොලීසිය වෙත දැනුම් දීමට උත්සාහ නොකර පිරවුම්හලෙන් මුදල්ද සොරකම් කරගෙන අදාළ ස්ථානයෙන් පලා ගොස් ඇති බව ද විදෙස් මාධ්‍ය වාර්තා කරයි.
වෙඩි තැබීමේ සිද්ධියට සැකකරන පුද්ගලයාගේ හා මුදල් රැගෙන පලා ගිය පාරිභෝගිකයාගේ ඡායාරූප පිරවුම්හලෙහි නිරීක්ෂණ පද්ධතිය හරහා හඳුනාගැනීමට පොලීසියය හැකියාව ලැබී තිබේ
වෙඩි තැබූ පුද්ගලයා විසින් පිරවුම්හලෙහි වූ භාණ්ඩ කිහිපයක් රැගෙන පලාගොස් ඇති අතර මුදල් සොරාගෙන ගොස් නොමැති බව ද සඳහන්ය.
සිද්ධියෙන් මරණයට පත්වූ සුජේන්ද්‍ර අමරසිංහම් කැනාස් නගරයේ මිෂුෂුරි විශ්ව විද්‍යාලයේ විද්‍යුත් හා පරිගණක ඉංජිනේරු විද්‍යාව පිළිබඳව අධ්‍යාපනය ලබමින් සිට ඇති අතර මාස 3 ක පමණ කාලයට සිට එම පිරවුම්හලෙහි සේවය කර ඇති බව ද විදෙස් මාධ්‍ය වාර්තා කරයි.adaderana.lk
ලංකා, ශ්‍රී ලංකාට මාරුවෙයි
"සිලෝන්" යන නමින් ඇරඹෙන සියලුම රජයේ ආයතනවල නාමයන් වෙනස් කිරීමට රජය තීරණය කර තිබේ.
ඊයේ(29) පැවති කැබිනට් මණ්ඩල රැස්වීමේ දී මෙම තීරණයට එළඹි බවයි රාජ්‍ය පරිපාලන හා ස්වදේශ කටයුතු අමාත්‍ය ඩබ්ලිව්. ඩී. ජේ. සෙනවිරත්න මහතා ප්‍රකාශ කළේය.
තවමත් සිලෝන් යන නම භාවිත වීම නොගැළපෙන බවත්, ජාත්‍යන්තර සම්මේලන වලදී පවා මේ වනවිට අපේ රට හඳුන්වනු ලබන්නේ ශ්‍රී ලංකාව ලෙස බවත් ඒ පිළිබඳව අද දෙරණට අදහස් දැක්වු අමාත්‍ය ඩබ්ලිව්. ඩී. ජේ. සෙනවිරත්න මහතා සඳහන් කළේය.
එම වැඩපිළිවෙල ක්‍රියාත්මක කිරීම සඳහා අවශ්‍ය සැලසුම් මේ වන විටත් ආරම්භ කර ඇති බව ද ඔහු ප්‍රකාශ කළේය.
සිලොන් යන නාමය භාවිත වන අවස්ථා හා ආයතන පිළිබඳව හඳුනාගෙන එය ශ්‍රී ලංකා ලෙස වෙනස් කිරීමට බලාපොරොත්තු වන බව ද හෙතෙම කියා සිටියේය.adaderana.lk
වව්නියාව බන්ධනාගාර සිද්ධිය ගැන පුළුල් පරීක්ෂණයක්
වව්නියාව බන්ධනාගාර රැඳවියන් අතර ඇතිවු නොසන්සුන්තාව සම්බන්ධයෙන් පුළුල් පරීක්ෂණයක් ආරම්භ කර ඇතැයි බන්ධනාගාර කොමසාරිස් ජනරාල් වී. ආර්. ද සිල්වා මහතා පවසයි.
ඊයේ පස්වරුවේ රැඳවියන් දෙපිරිසක් අතර දැඩි නොසන්සුන්තාවයක් ඇතිවු බව ඔහු සඳහන් කළේය.
බන්ධනාගාර නිලධාරීන්ගේ හා පොලිසියේ මැදිහත් වීමෙන් තත්ත්වය පාලනය කළ බව ද වී. ආර්. ද සිල්වා මහතා පෙන්වා දෙයි.
අනුරාධපුර බන්ධනාගාරයට මාරු කර යැවු රැඳවියෙකු වහා ගෙන්වන ලෙස බල කරමින් රැඳවියන් පිරිසක් මෙසේ කලහාකාරී ලෙස හැසිරුණු බව ඔහු සඳහන් කළේය.
අනුරාධපුර බන්ධනාගාරයට මාරු කර යැවු අදාළ රැඳවියා කිසිදු හේතුවක් මත යළි වව්නියාව බන්ධනාගාරයට ඇතුළත් නොකරන බව වී. ආර්. ද සිල්වා මහතා පැවසුවේය.
ළමා අපචාරයකට සම්බන්ධ බවට චෝදනා මත මන්නාරම මහේස්ත්‍රාත්වරයාගේ නියමය පරිදි වව්නියාව බන්ධනාගාරයට ඇතුළත් කෙරුණු පූජකවරයෙක් සම්බන්ධයෙන් බන්ධනාගාර රැඳවියන් දෙපිරිසක් අතර මෙම ගැටුමේ මූලාරම්භය පසුගියදා ඇතිවිය.
ගැටුමෙන් තුවාල ලැබු රැඳවියන් දෙදෙනෙකු රෝහල්ගත කෙරුණු අතර එම සිද්ධියට මුල් වු ප්‍රධාන රැඳවියෙකු අනුරාධපුර බන්ධනාගාරයට මාරු කර යැවීමට බන්ධනාගාර නිලධාරීන් පියවර ගනු ලැබීය.adaderana.lk
දුම්රිය පැමිණිලි, තොරතුරු හා යෝජනා සඳහා අමතන්න
දුම්රිය තුළ හෝ දුම්රිය පරිශ්‍රයන් තුළ හදිසි අවශ්‍යතාවන් සඳහා මඟීන්ට තොරතුරු දැන ගැනීමට සහ පැමිණිලි ඉදිරිපත් කිරීමට හදිසි දුරකථන අංකයන් කිහිපයක් දුම්රිය දෙපාර්තමේන්තුව විසින් ප්‍රකාශයට පත් කර තිබේ.
අද(30) සිට එම දුරකථන අංකයන් පැය 24 පුරාම ක්‍රියාත්මක කිරීමට කටයුතු කරන බව එම දෙපාර්තමේන්තුවේ සැලසුම් කටයුතු පිළිබඳ අධ්‍යක්ෂ විජය සමරසිංහ මහතා සඳහන් කළේය.
හදිසි දැනුම්දීමක් සඳහා 011 -3135202 දරන අංකයෙන් ප්‍රධාන දුම්රිය පාලක කාර්යාලයද, දුම්රියක් පිළිබඳව තොරතුරු විමසීමට 011 -2434215 දරන දුරකථන අංකයෙන් කොළඹ -කොටුව දුම්රිය ස්ථානයේ විමසීම් අංශය ද ඇමතිය හැකි බව ඒ සම්බන්ධයෙන් වැඩිදුරටත් පැහැදිලි කරන විජය සමරසිංහ මහතා ප්‍රකාශ කළේය.
එමෙන්ම නව අදහස් හා යෝජනා ඇත්නම් ඒවා 071 4393102 දරන අංකයෙන් සැලසුම් අධ්‍යක්ෂටද, ආරක්ෂක කටයුතු සම්බන්ධව යම්කිසි පැමිණිල්ලක් ඇත්නම් පැය 24 පුරාම ක්‍රියාත්මක වන ආරක්ෂක මෙහෙයුම් කාර්යාලයේ 011 -2347988 දරන දුරකථන අංකයට ද ඇමතිය හැකිය.adaderana.lk
Wednesday, December 29, 2010
සරසවි ප්‍රවේශයට ඉංග්‍රීසි සමත් වීම අනිවාර්යය නෑ
උසස් පෙළ විභාගයේ දී ඉංග්‍රීසි විෂයට පෙනී සිටිය යුතු බවට කොන්දේසි පැනවුව ද විශ්ව විද්‍යාල ප්‍රවේශය සඳහා එම විෂය සමත් වීම අනිවාර්යය නොවන බව උසස් අධ්‍යාපන අමාත්‍යාංශය පවසයි.
එහෙත් විශ්ව විද්‍යාලයට ඇතුළු වීම සඳහා සෑම සිසුවෙකුම ඉංග්‍රීසි විෂයට පෙනී සිට එහි ප්‍රතිඵල පෙන්විය යුතු බව එම අමාත්‍යාංශය සඳහන් කරයි.
අදාළ ප්‍රතිඵල මත විශ්ව විද්‍යාවලට ඇතුළත් කරගැනීමට අපේක්ෂිත සිසුන් සඳහා ඉංග්‍රීසි පාඨමාලා ක්‍රියාත්මක කිරීමට අමාත්‍යාංශය සැලසුම් කර තිබේ.
විශ්ව විද්‍යාලවලට ඇතුළුවීමට පෙර සිසුන්ට තම ගම් ප්‍රදේශවල සිටම ඉංග්‍රීසී පාඨමාලා හැදෑරීමේ අවස්ථාව ලබාදීමට ද නියමිතය.adaderana.lk
දැයට කිරුළෙන් පවුල් 2500 ට නිවාස පහසුකම්
දැයට කිරුළ නිවාස සංවර්ධන වැඩසටහන යටතේ පවුල් 2500 ට නිවාස පහසුකම් සැපයීමේ වැඩසටහනක් ක්‍රියාත්මක කර ඇති බව ජාතික නිවාස සංවර්ධන අධිකාරිය පවසයි.
මොණරාගල දිස්ත්‍රික්කයේ ප්රාදේශීය ලේකම් කොට්ඨාශ 11 ක් තුළ මෙම වැඩසටහන ක්‍රියාත්මක කිරීමට නියමිතය. මේ සඳහා වැය කිරීමට අපේක්ෂිත මුදල රුපියල් මිලියන 220 කි.
ප්‍රදේශයේ අඩු ආදායම්ලාභී පවුල් 700 ට රුපියල් ලක්ෂය දක්වා වූ නිවාස ණය ලබාදීමේ වැඩපිළිවෙළක් ද ක්‍රියාත්මක කරන බව ජාතික නිවාස සංවර්ධන අධිකාරිය සඳහන් කරයි.
2011 වසරේ නිදහස් දිනය නිමිත්තෙන් දැයට කිරුළ ප්‍රදර්ශනය මොණරාගල දී පැවැත්වෙන අතර ඊට සමගාමීව මෙම වැඩපිළිවෙළ ක්‍රියාත්මක කර තිබේ. adaderana.lk
පුද්ගලික බස් සේවකයින් හා ගනුදෙනුව ලංගම සේවකයින්ට තහනම්
පෞද්ගලික බස්රථ රියදුරන් සහ කොන්දොස්තරවරුන් සමග ලංගම රියදුරන්ට සහ කොන්දොස්තරවරුන්ට ගනුදෙනු කිරීම සපුරා තහනම් බව ප්‍රවාහන අමාත්‍ය කුමාර වෙල්ගම මහතා පවසයි.
ශ්‍රී ලංගමයේ ඇතැම් රියදුරන් සහ කොන්දොස්තරවරුන් පෞද්ගලික අංශයේ බස්රථ සේවකයින් වෙත ගමන් වාර මුදලට විකිණීමේ ජාවාරමක් පිළිබඳ තොරතුරු හෙළිව ඇති බව අමාත්යවරයා පෙන්වාදෙයි.
කළුතර, ශ්‍රී ලංගම ඩිපෝවේ ධාවනයෙන් ඉවත් කර තිබූ බස්රථ 10 ක් අලුත්වැඩියා කර යළි ධාවනයට එක්කිරීම වෙනුවෙන් කළුතර ඩිපෝ පරිශ්‍රයේ පැවති උත්සවයක දී ප්‍රවාහන අමාත්යවරයා මේ බව ප්‍රකාශ කළේය.
අදාළ වංචා සම්බන්ධයෙන් තොරතුරු දන්නේ නම් තම පෞද්ගලික දුරකතන අංකයට දැනුම් දෙන ලෙස එහිදි අදහස් දැක්වූ කුමාර වෙල්ගම මහතා කියා සිටියේය.
ලංගමයේ ආදායමෙන් 25% ක් පමණ කොන්දොස්තරවරුන් වංචා කරන බව ද අමාත්යවරයා එහිදී සඳහන් කළේය. adaerana.lk
පළාත් පාලන මැතිවරණය මාර්තු මාසයේදී
ලබන ජනවාරි මාසයේ දී සියලු පළාත් පාලන ආයතන විසුරුවා හැරීමට නියමිත බව ශ්‍රී ලංකා නිදහස් පක්ෂයේ මහලේකම් මෛත්‍රීපාල සිරිසේන අමාත්යවරයා පවසයි.
එම පළාත් පාලන ආයතනවලට අදාළ මැතිවරණය මාර්තු මාසයේ දී පැවැත්වීමට අපේක්ෂා කරන අමාත්යවරයා සඳහන් කළේය.
අදාළ මැතිවරණ සියල්ල එකවර පැවැත්වීම සඳහා රජයේ අවධානය යොමුව ඇති බව ද මෛත්‍රීපාල සිරිසේන මහතා සඳහන් කරයි.
එම මැතිවරණයට තරග කරන ශ්‍රී ලංකා නිදහස් පක්ෂ අපේක්ෂකයින් පිළිබඳ ලබන ජනවාරි මාසය වන විට තීරණයකට එළඹීමට නියමිත බව අමාත්යවරයා සඳහන් කරයි.
පසුගිය වසරේ කාලය අවසන් වීමට නියමිතව තිබූ පළාත් පාලන ආයතනවල නිල කාලය වසරකින් දීර්ඝ කිරීමට රජය පියවර ගෙන තිබුණි.adaerana.lk
ශ්‍රී ලංකාවේ විදේශ ප්‍රතිපත්තිය කැඳ හැලියක්
ශ්‍රී ලංකාවේ විදේශ ප්‍රතිපත්තිය මේ වනවිට කැඳ හැලියක් බවට පත්ව ඇති බව එක්සත් ජාතික පක්ෂ පාර්ලිමේන්තු මන්ත්‍රී මංගල සමරවීර මහතා පවසයි.
එමෙන්ම ශ්‍රී ලංකාවේ විදේශ අමාත්යවරයා විදෙස් රටවල් ඉදිරියෙහි බොරුකාරයෙක් බවට පත්ව ඇති බවත් ඔහු සඳහන් කරයි. අද(29) කොළඹ පැවති මාධ්‍ය හමුවකදී අදහස් දක්වමින් ඒ මහතා මෙම කරුණු අවධාරණය කළේය.
පසුගිය දිනයක නේපාලය සම්බන්ධව විදේශ අමාත්යවරයා විසින් සිදුකරන ලද ප්‍රකාශයෙන් ඒ බව පෙනීයන බව ද සමරවීර මහතා එහිදී ප්‍රකාශ කළේය.
2011 වර්ෂය පොදු ජනතාව දිනවන වර්ෂය ලෙස නම් කර ඇති බවත්, එක්සත් ජාතික පක්ෂය නව වර්ෂය සඳහා ජයග්‍රාහීව ඉදිරියට ගමන් කරන බවත් මෙම මාධ්‍ය හමුවේදී පාර්ලිමේන්තු මන්ත්‍රීවරයා වැඩිදුරටත් කියා සිටියේය. adaderana.lk
මෙරට මුහුදු තීරයට ඇතුළු වූ ඉන්දීය ධීවර පිරිසක් අත්අඩංගුවට
ඉන්දීය ධීවරයින් පිරිසක් නාවික හමුදාව විසින් අත්අඩංගුවට ගෙන තිබේ. අත්අඩංගුවට ගත් මෙම ධීවරයින් පිරිසට ධීවරයින් සිව් දෙනෙකු අයත් වන බව පොලිසිය පවසයි.
වඩුක්කෝට්ටේ, අග්බෝමදගල් නාවික හමුදා කඳවුරේ නිලධාරීන් කණ්ඩායමක් විසින් අනවසරයෙන් ශ්‍රී ලංකා මුහුදු තීරයට ඇතුළු වූ මෙම ධීවරයින් සිව්දෙනා අත්අඩංගුවට ගෙන ඇත.
මොවුන් තමිල්නාඩුවේ පදිංචිකරුවන් බව සඳහන්ය. අදාළ ධීවරයින් අද(29) මල්ලාක්කම් මහේස්ත්‍රාත් අධිකරණයට ඉදිරිපත් කරන බව පොලිසිය සඳහන් කරයි. adaderana.lk
ග්‍රේෂන් ආනන්ද මියයයි
ප්‍රවීන ගායන ශිල්පී ග්‍රේෂන් ආනන්ද මහතා අභාවප්‍රාප්ත වී තිබේ.
අද(29) පෙරවරු 6 30ට පමණ දැඩි සත්කාර ඒකකයේ ප්‍රතිකාර ලබමින් සිටිය දී ඒ මහතා අභාවප්‍රාප්ත වූ බව කොළඹ ජාතික රෝහලේ අධ්‍යක්ෂ වෛද්‍ය හෙක්ටර් වීරසිංහ මහතා පැවසුවේය.
කලක් රෝගාතුරව සිටි ඔහු කොළඹ පෞද්ගලික රෝහලක ප්‍රතිකාර ලබමින් සිට වැඩිදුර ප්‍රතිකාර සඳහා කොළඹ ජාතික රෝහලට ඇතුළත් කෙරුණි.
පසුගිය 22 වැනිදා සිට ග්‍රේෂන් ආනන්ද මහතා රෝහලේ දැඩි සත්කාර ඒකකයේ ප්‍රතිකාර ලැබූ බව ජාතික රෝහලේ අධ්‍යක්ෂ හෙක්ටර් වීරසිංහ මහතා සඳහන් කළේය.adaderana.lk
සභාපති ඉවත් කරන්නැයි පෝද්දල ප්රාදේශීය සභාවේ විරෝධතාවක්
ගාල්ල, බොපෙ පෝද්දල ප්රාදේශීය සභාවේ මන්ත්‍රීවරුන් පිරිසක් අද(28) විරෝධතා ව්‍යාපාරයක නිරත විය.
ප්රාදේශීය සභා මන්ත්‍රීවරුන් පස් දෙනෙකු ගාල්ල දිස්ත්‍රික් ලේකම් කාර්යාලයේ මුරකුටියේ වහලය මත නැගී විරෝධතාවක නිරත වූ බව අද දෙරණ වාර්තාකරු සඳහන් කළේය.
ප්රාදේශීය සභා සභාපතිවරයා වහා සිය තනතුරෙන් පහ කළ යුතු බවට බලකෙරෙන පුවරු ප්‍රදර්ශනය කරමින් ඔවුන් විරෝධතාවයේ නිරත ව තිබේ.
මේ සඳහා ආණ්ඩු පක්ෂයේ මන්ත්‍රිවරුන් දෙදෙනෙකු සහ විපක්ෂ මන්ත්‍රීවරුන් තිදෙනෙකු සහභාගී වී සිට ඇති අතර පළාත් පාලන කොමසාරිස්වරයාගේ මැදිහත්වීමෙන් මෙම විරෝධතාව අත්හිටවූ බව අද දෙරණ වාර්තාකරු සඳහන් කළේය.
පළාත් මහ ඇමතිවරයා සමග අදාළ මන්ත්‍රීවරුන්ට සාකච්ඡාවක් ලබාදීමට එහිදී පළාත් පාලන කොමසාරිස්වරයා එකඟවී ඇත.adaderana.lk
ඉන්දු -ශ්‍රී ලංකා ආරක්ෂක සබඳතා පුළුල් කිරීම ගැන අවධානය යොමුවෙයි
ශ්‍රී ලංකාව සහ ඉන්දියාව අතර ක්‍රියාත්මක වන ආරක්ෂක සබඳතාව තවදුරටත් පුළුල් කිරීම සම්බන්ධයෙන් අවධානය යොමු කරන බව ඉන්දීය ආරක්ෂක ලේකම් ප්‍රදීප් කුමාර් මහතා පවසයි.
අද(28) පෙරවරුවේ ජනාධිපති මහින්ද රාජපක්ෂ මහතා හමුවූ අවස්ථාවේ දී ශ්‍රී ලංකාවේ සංචාරයක නිරතව සිටින ඉන්දීය ආරක්ෂක ලේකම්වරයා මේ බව සඳහන් කර ඇත.
දෙරට අතර පවතින ආරක්ෂක කතිකාවත පාබල සහ ගුවන් හමුදා අතර ද තවදුරටත් පුළුල් කිරීමට මෙහිදී අවධානය යොමු වී ඇති අතර ඒ අනුව 2011 වසරේ දී ඉන්දීය සහ ශ්‍රී ලංකා නාවික හමුදා ඒකාබද්ධ අභ්‍යාසයක් ශ්‍රී ලංකා මුහුදු සීමාවේ දී පැවැත්වීමට ද තීරණය කර ඇති බව සඳහන්ය.
ශ්‍රී ලංකාවේ ආරක්ෂක අංශ සාමාජිකයින් සඳහා පුහුණු අවස්ථාවන් විශාල සංඛ්‍යා‍වක් ලබාදීමට ඉදිරියේ දී කටයුතු කරන බව ද එහිදී ඉන්දීය ආරක්ෂක ලේකම්වරයා පවසා තිබේ.
ශ්‍රී ලංකා ගුවන් හමුදාවේ 60 වන සංවත්සරය නිමිත්තෙන් ඉන්දීය ගුවන් හමුදා සංදර්ශනයක් පැවැත්වීමට කටයුතු කරන බව ප්‍රදීප් කුමාර් මහතා එහිදී තවදුරටත් සඳහන් කර ඇත.adaderana.lk
ආනයනික බිත්තර අද වෙළඳපොළට
ආනයනය කරන ලද බිත්තර අද(28) දිනය තුළ වෙළඳපොළට නිකුත් කිරිමට පියවර ගත් බව සමුපකාර හා අභ්‍යන්තර වෙළඳ අමාත්‍ය ජොන්ස්ටන් ප්‍රනාන්දු මහතා පවසයි.
සතොස, කෝප්, මිනි කෝප් හා සමුපකාර තුළින් මෙම බිත්තර රුපියල් 11 ක තොග මිලක් යටතේද, රුපියල් 12 ක සිල්ලර මිලක් යටතේද ලබාගත හැකි බව අමාත්යවරයා සඳහන් කළේය.
ආනයන කරන ලද බිත්තර මිලියන 2 ක් මෙසේ බෙදාහැරීමට කටයුතු කළ බව අද(28) කොළඹ පැවති මාධ්‍ය හමුවේ දී අමාත්යවරයා පෙන්වා දුන්නේය.
වෙළ‍ඳපොළේ බිත්තර මිල ගණන් පහත වැටෙන තුරු බිත්තර ආනයනය කිරීමට පියවර ගන්නා බව ඔහු එහිදී කියා සිටියේය.
එමෙන්ම ආනයනය කරන ලද කුකුල් මස් ටොන් 500 ක් හෙට(29) දිනය තුළ වෙළඳපොළට නිකුත් කිරීමට නියමිත බවද ජොන්ස්ටන් ප්‍රනාන්දු අමාත්යවරයා පැවසුවේය.
එම කුකුල් මස් කිලෝග්‍රෑම් 1ක් රුපියල් 350 ක මිලකට සතොස, කෝප්, මිනි කෝප් හා සමුපකාර තුළින් මිලට ගත හැකි බව අමාත්යවරයා වැඩිදුරටත් කියා සිටියේය.adaderana.lk
ඒකක 90 දක්වා බදු සහනය ඒකක 120 ට වැඩිවෙයි
විදුලි ඒකක 90 දක්වා වූ විදුලි ගාස්තු සහනය ඒකක 120 දක්වා ඉහළ නැංවීමට ජනාධිපති මහින්ද රාජපක්ෂ මහතා උපදෙස් ලබා දී තිබේ.
ඒ අනුව විදුලි ඒකක 120 ට ඉහළ පාරිභෝගිකයින්ට පමණක් විදුලි ගාස්තුවල වැඩිවීමක් සිදුවන බව රජයේ ප්‍රවෘත්ති දෙපාර්තමේන්තුව සඳහන් කරනු ලැබීය.
ලක්ෂ 46 ක් පමණක් වන සමස්ත විදුලි පාරිභෝගිකයින්ගෙන් ලක්ෂ 42 ක් විදුලි ඒකක 120 ට අඩුවෙන් විදුලිය පරිභෝජනය කරන බවට හඳුනාගෙන තිබේ.
ඒ අනුව එම ජනතාවට සහනයක් දීමේ අරමුණින් ජනාධිපතිවරයා මෙම තීරණය ගෙන ඇති බව රජයේ ප්‍රවෘත්ති දෙපාර්තමේන්තුව පවසයි.adaderana.lk
ගාස්තු වැඩිනොකළහොත් බස් වර්ජනයකට යනවා -ගැමුණු
බස් ගාස්තු වැඩිකිරීම සම්බන්ධ යෝජනාවට රජයේ එකඟත්වය පළ‍නොවුනහොත් ජනවාරි මාසයේ දෙවැනි සතිය තුළ බස්නාහිර පළාතේ පෞද්ගලික බස් වර්ජනයක් ක්‍රියාත්මක කරන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි.
කළුතර, ගම්පහ හා කොළඹ යන දිස්ත්‍රික්ක වල පෞද්ගලික බස් හිමියන් සමග පැවති සාකච්ඡාවකින් පසු මෙම තීරණයට එළඹුන බව ද අද(28) පැවති මාධ්‍ය හමුවකට එක්වෙමින් ඒ මහතා සඳහන් කළේය.
එමෙන්ම බස්නාහිර පළාතේ බස් රථ අතිරික්තයක් තිබියදීත් මාර්ගස්ථ මගී ප්‍රවාහන අධිකාරිය විසින් තවත් බස්රථ රැසකට බලපත්‍ර ලබාදිමට සූදානම් වන බවට ඔහු චෝදනා කරයි බස්නාහිර පළාත තුළ මේ වන විට 20% ක බස්රථ අතිරික්තයක් පවතින බව හෙතෙම පෙන්වාදෙයි.
තවත් බස්රථ 20% ක ප්‍රමාණයක් සඳහා බලපත්‍ර නිකුත් කිරීමට බස්නාහිර පළාත් මාර්ගස්ථ මගී ප්‍රවාහන අධිකාරිය කටයුතු කරමින් සිටින බව විජේරත්න මහතා වැඩිදුරටත් කියා සිටියේය.
පුද්ගලික ප්‍රවාහන සේවා අමාත්‍යවරයෙකු පත්කර සිටිය ද ඔහු සතුව කිසිදු බලයක් නොමැති බව ද වැඩිදුරටත් කරුණු දක්වමින් ඔහු අවධාරණය කර සිටියේය.adaderana.lk
Tuesday, December 21, 2010
සහන මිලට පොල් ලබා දීමට විශේෂ වැඩපිළිවෙළක්
සහන මිලට පොල් ලබා දීම සඳහා විශේෂ වැඩපිළිවෙළක් ක්‍රියාත්මක කර ඇතැයි හලාවත වැවිලි සමාගමේ සභාපති ආචාර්ය සුනිල් ජයසේකර මහතා පවසයි.
උත්සව සමය වෙනුවෙන් කොළඹ සිට තදාසන්න ප්‍රදේශවලට සහන මිලට පොල් බෙදාහැරීමට කටයුතු යොදා ඇති බව ඔහු සඳහන් කළේය.
ජනතා වතු සංවර්ධන මණ්ඩලයට අයත් කොළඹ වොක්ෂල් වීදියේ පිහිටි ගබඩා සංකීර්ණයක පොල් ගබඩා කිරීමේ වැඩපිළිවෙළ ආරම්භ කරමින් සුනිල් ජයසේකර මහතා මේ අදහස් පළ කළේය.
මෙම ගබඩා සංකීර්ණය තුළ පොල් ගෙඩි ලක්ෂ 2 ක් ගබඩා කිරීමට නියමිතය.
මෙම ගබඩා සංකීර්ණයෙන් පොල් ගෙඩියක් රුපියල් 32 ත් 35 ත් අතර මිලකට අලෙවි කිරීමට නියමිත බව සුනිල් ජයසේකර මහතා කියා සිටියේය.
adaderana.lk
රටට ආදරය නැති නම් දක්ෂයෙක් වුවත් ශ්‍රේෂ්ඨයෙක් නොවේ
රටට ආදරය නැති පුද්ගලයා කෙතරම් දක්ෂයෙකු වුව ද ශ්‍රේෂ්ඨයෙකු නොවන බව ජනාධිපති මහින්ද රාජපක්ෂ මහතා පවසයි.
පළිගැනීමේ චේතනාවෙන් මානුෂිකත්වයට නොගැළපෙන දඩුවම් කිසිවෙකුටත් නොදිය යුතු බව ජනාධිපතිවරයා සඳහන් කරයි.
දියතලාව ශ්‍රී ලංකා යුද හමුදා විද්‍යා පීඨයේ පැවති විසිරයාමේ උළෙලකට අද(21) පෙරවරුවේ එක්වෙමින් මහින්ද රාජපක්ෂ මහතා මේ අදහස් පළ කළේය.
යුද හමුදා සාමාජිකයින් හමුදා නීතියටත් රටේ නීතියටත් යටත් විය යුතු බව එහිදී තවදුරටත් අදහස් දක්වමින් ජනාධිපතිවරයා සඳහන් කළේය.
එම ආයතන දෙකෙන්ම පනවන දඬුවම්වලට ද ඔවුන් යටත් විය යුතු බව ද ජනාධිපති මහින්ද රාජපක්ෂ මහතා එහිදී අවධාරණය කර සිටියේය.
adaderana.lk
ව්‍යවස්ථාව අලුත් වුණත් නායකත්වයේ බලය වෙනස් නෑ
නව පක්ෂ ව්‍යවස්ථාව තුළින් වුවද විපක්ෂ නායක රනිල් වික්රමසිංහ මහතාගේ බලය අඩුවීමක් සිදුව නැති බව එ.ජා.ප.ප්‍රතිසංවිධාන කමිටුවේ සභාපති පාර්ලිමේන්තු මන්ත්‍රී ජෝශප් මයිකල් පෙරේරා මහතා පවසයි.
එබැවින් ඒ සම්බන්ධයෙන් ජන මාධ්‍ය විසින් ගැටලුවක් ඇතිකරගත යුතු නැති බව හෙතෙම කියා සිටියේ අද කොළඹ පැවති මාධ්‍ය හමුවකට එක්වෙමිනි.
නව පක්ෂ ව්‍යවස්ථාවට අනුව ඡන්දයෙන් තොරාපත් කරගත යුතු ඉහළ තනතුරු හැකි ඉක්මනින් පත් කර ගැනීමට කටයුතු කරන බවද මයිකල් පෙරේරා මහතා පෙන්වාදුන්නේ මාධ්‍යවේදියෙකු ඇසූ ප්‍රශ්නයකට පිළිතුරු ලබාදෙමිනි.
එක්සත් ජාතීන්ගේ සංවිධානයේ මහ ලේකම්වරයා විසින් ශ්‍රී ලංකාවේ සිදුවීයයි කියනු ලබන යුද අපරාධ චෝදනා සම්බන්ධයෙන් තමන්ට උපදෙස් ලබා ගැනීම සඳහා පත් කළ විද්වත් කමිටුව මුලදී ශ්‍රී ලංකාවට පැමිණ උගත් පාඩම් හා ප්‍රතිසන්ධානය පිළිබඳ ජනාධිපති කොමිසමේ සාමාජිකයින් ගෙන් ප්‍රකාශ ලබාගැනීමට අදහස් කළද මේ වන විට එවැන්නක් සිදුනොවන බවට මාධ්‍ය මගින් කරුණු අනාවරණය වී ඇති බව මෙම මාධ්‍ය හමුවට එක්වූ එ.ජා.ප පාර්ලිමේන්තු මන්ත්‍රී ලක්ෂ්මන් කිරිඇල්ල මහතා සඳහන් කළේය.
මුලදී මෙම අන්තර් ජාතික විද්වත් කමිටුවට සිය විමර්ශන කටයතු සිදු කිරීමට පූර්ණ සහයෝගය ලබාදෙන බව රජයෙන් කියා සිටියද,ඒ වෙනුවට වීසා ලබාදීමට පවා අදිමදි කිරීම නිසා උගත් පාඩම් හා ප්‍රතිසන්ධානය පිළිබඳ ජනාධිපති කොමිසමේ සාමාජිකයින් විදේශ රටකට ගෙන්වා ප්‍රකාශ ලබාගැනීමට ඔවුන් අදහස් කරන බවට තොරතුරු දැක්වෙන බවද හෙතෙම කියා සිටියේය.
කෙසේ වුවද බී.බී.සී ලෝක සේවය උපුටා දක්වන ආකාරයට එක්සත් ජාතීන්ගේ විද්වත් කමිටුව හා ශ්‍රී ලංකාවේ උගත් පාඩම් හා ප්‍රතිසන්ධානය පිළිබඳ ජනාධිපති කොමිසමේ සාමාජිකයින්ගේ හමුවීම සිදුවන්නේ කිනම් රටක කිනම් ස්ථානයකද යන්න මේවන තෙක් තහවුරු වී නොමැති බවයි. adaerana.lk
වල් අලි එළවන්න මී මැස්සන්ගේ සහය
ගම් වදින අලින් පළවා හැරීම සඳහා විශේෂ වැඩසටහනක් ලෙස රක්ෂිත මායිම් වල මී මැසි පෙට්ටි සවි කිරීමට වනජීවි අමාත්‍යාංශය තීරණය කර තිබේ.
රක්ෂිත මායිම් වල අගල් කැපීම සහ තල් ගස් සිටුවීම ද සිදු කෙරෙන බව අමාත්‍ය එස්. එම්. චන්ද්‍රසේන මහතා පවසයි.
අලි මිනිස් ගැටුම් පවතින ප්‍රදේශ වල මාධ්‍යවේදීන්ගේ අත්දැකීම් ලබා ගනිමින් විශේෂ වැඩසටහනක් ක්‍රියාත්මක කරන බව අමාත්‍ය එස්. එම්. චන්ද්‍රසේන මහතා සඳහන් කළේය.
වන අලින් ගම් වැදීම හේතුවෙන් දිවයිනේ ප්‍රදේශ රැසක අලි මිනිස් ඝාතන පිළිබඳ වාර්තා ඉහළ යාම මෙවැනි තීරණයක් ගැනීමට හේතු වී තිබේ. adaderana.lk
කැමරා පද්ධතිය විවෘත කිරීම 29 වැනිදා
අද(21) දින විවෘත කිරීමට නියමිතව තිබූ කොළඹ නගරයේ ආරක්ෂිත කැමරා පද්ධතිය අද විවෘත නොවන බව පොලිසිය පවසයි.
ඒ අනුව අදාළ ආරක්ෂක කැමරා පද්ධතිය ලබන 29 වැනිදා විවෘත කිරීම සිදු කෙරෙන බව පොලිස් මාධ්‍ය ප්‍රකාශක පොලිස් අධිකාරි ප්‍රිශාන්ත ජයකොඩි මහතා පවසයි.
කොළඹ නගරයේ ක්‍රියාත්මක අපරාධකරුවන්, කොල්ලකල්ලි, කප්පම්කරුවන් සහ මත්ද්‍රව්‍ය ජාවාරම්කරුවන් පොලිසියට හසු කර ගැනීම මෙම ආරක්ෂක කැමරා පද්ධතිය සවි කළ බව පොලිස් මාධ්‍ය ප්‍රකාශකවරයා සඳහන් කළේය.
ඉදිරියේ දී දිවයිනේ සියලුම නගර වල මෙවැනි ආරක්ෂක කැමරා සවි කිරීමට කටයුතු කරන බව ඔහු පැවසුවේය.
adaerana.lk
ජංගම දුරකථන වල සැඟවූ මත් කුඩු පැකට් සමග තිදෙනෙක් කොටුවෙයි
හෙරොයින් මත් කුඩු පැකට් 14ක් ළඟ තබා ගෙන සිටි සැකකරුවන් තිදෙනෙකු හැටන් පොලිසියේ විශේෂ මෙහෙයුම් ඒකකයේ නිලධාරීන් කණ්ඩායමක් විසින් අත්අඩංගුවට ගෙන තිබේ.
ඊයේ(20) පස්වරුවේ අත්අඩංගුවට ගත් මෙම සැකකරුවන්ගෙන් අයෙකු කොළඹ ග්‍රෑන්ඩ්පාස් ප්‍රදේශයේ පදිංචිකරුවෙකු වන අතර අනෙක් දෙදෙනා හැටන් ප්‍රදේශයේ පදිංචිකරුවන් බව පොලිසිය පැවසීය.
මෙම මත්කුඩු පැකට් තොගය සඟවා තිබු‍‍ණේ ජංගම දුරකථන වල අභ්‍යන්තරයේ සහ නිවසක ස්ථාවර දුරකථනයක් තුළ බව පොලිසිය සඳහන් කරනු ලැබීය.
සැකකරුවන් අද(21) හැටන් මහේස්ත්‍රාත් අධිකරණයට ඉදිරිපත් කිරීමට නියමිතය.adaerana.lk
ජනපති බොරුකාරයෙකු වනු දැකීමට අකමැතියි -රනිල්
මහින්ද චින්තනය ඉදිරි දැක්ම ප්‍රකාශනය තුළින් රුපියල් 2500ක වැටුප් වැඩිවීමක් රාජ්‍ය සේවකයින්ට ලබා දෙන බවට වූ පොරොන්දුව ඉටු කරවා ගැනීම සඳහා ජනවාරි 26 වැනි දින දැවැන්ත උද්ඝෝෂණයක් ක්‍රියාත්මක කරන බව විපක්ෂ නායක රනිල් වික්රමසිංහ මහතා පවසයි.
ජනාධිපතිවරයා බොරුකාරයෙකු වනු දැකීමට තමන්ට නොහැකි බැවින් අදාළ පොරොන්දුව ඉටු කරවා ගැනීම සඳහා එය ක්‍රියාත්මක කරන බව ඔහු පෙන්වා දෙයි.
මහර ප්‍රදේශයේ පැවති එක්සත් ජාතික පක්ෂ ජන හමුවකට එක්වෙමින් විපක්ෂ නායක රනිල් වික්රමසිංහ මහතා මේ අදහස් පළ කළේය.
වත්මන් ආණ්ඩුව බලාපොරොත්තු වූ පොරොන්දු කිසිවක් ජනතාව වෙනුවෙන් ඉටු කර නොමැති බව මෙම අවස්ථාවට එක් වෙමින් අදහස් දැක් වූ එක්සත් ජාතික පක්ෂ පාර්ලිමේන්තු මන්ත්‍රී සජිත් ප්‍රේමදාස මහතා සඳහන් කළේය.
රනිල් වික්රමසිංහ මහතා සොරකම් කළ, සොරකම් කරන නායකයකු නොවන බව විපක්ෂ නායකවරයා පිළිබඳ අදහස් දක්වමින් එහිදී එක්සත් ජාතික පක්ෂ පාර්ලිමේන්තු මන්ත්‍රී බුද්ධික පතිරණ මහතා සඳහන් කළේය.
1994 දී වික්රමසිංහ මහතා එක්සත් ජාතික පක්ෂ රජය පරාජයට පත්වූ අවස්ථාවේ කාර්යාල බෑගයත් රැගෙන මහත්මයෙකු සේ බලයට කෑදරකමක් නොමැතිව අරලිය ගහ මන්දිරයෙන් ඉවත්ව ගිය නායකයකු බව ද ඒ මහතා ප්‍රකාශ කළේය.
රනිල් වික්රමසිංහ මහතා බලයට, තනතුරු වලට කෑදර නැති නායකයකු බවද, තනතුරු අලුයම හෙලූ කෙළ පිඬක් සේ ඉවත් කර ජනතාව වෙනුවෙන් පෙනීසිටින නායකයකු බව ද පතිරණ මහතා අවධාරණය කර සිටියේය.
ආණ්ඩුව කේරළයෙන් ගුරුකම් සඳහා යොදා ගන්නා පොල් මෙරටට ගෙන්වීමට පියවර ගෙන ඇති බව පොල් මිල ශීඝ්‍රයෙන් ඉහළ යාම පිළිබඳ අදහස් දක්වමින් රනිල් වික්රමසිංහ මහතා වැඩිදුරටත් සඳහන් කළේය.adaderana.lk
Monday, December 13, 2010
ඉපදෙන හැම මිනිසෙක්ම මැරෙන බව දැනගෙන වැඩ කළයුතුයි
ඉපදෙන සෑම මිනිසෙකුම මරණයට පත්වන බව දැන වගකීමෙන් යුතුව කටයුතු කළ යුතු බව සෞඛ්‍ය අමාත්‍ය මෛත්‍රීපාල සිරිසේන මහතා පවසයි.
රටක හොඳ සෞඛ්‍ය සේවාවක් යනු නිරෝගී ජනතාවක් සිටීම බව ද ඔහු සඳහන් කළේය.
අද(13) නාරාහේන්පිට රුධිර පාරවිලයන මධ්‍යස්ථානයේදී පැවති ක්ෂය රෝග මර්දන හා ළය රෝග පිළිබඳ ජාතික වැඩසටහන යටතේ සෞඛ්‍ය සේවාවේ පත්වීම් ලිපි ප්‍රදානය කිරීමේ අවස්ථාවකට එක්වෙමින් ඒ මහතා මේ බව සඳහන් කළේය.
adaderana.lk
අධීක්ෂණ මන්ත්‍රීවරුන් තිදෙනෙක්
විදේශ කටයුතු අමාත්‍යාංශයේ අධීක්ෂණ මන්ත්‍රීවරයෙකු ලෙස සජින් වාස් ගුණවර්ධන මහතා පත් කර තිබේ. ඒ ජනාධිපති මහින්ද රාජපක්ෂ මහතා විසිනි.
මීට අමතරව ආරක්ෂක අමාත්‍යාංශය සඳහා ආර්. දුමින්ද සිල්වා සහ උදිත ලොකුබණ්ඩාර යන පාර්ලිමේන්තු මන්ත්‍රීවරුන් අධීක්ෂණ මන්ත්‍රීවරුන් ලෙස පත් කර ඇති බව වාර්තා වේ.
adaderana.lk
මත්කුඩු පාර්සල් 39ක් සමග එක් අයෙක් පානදුරදී කොටුවෙයි
මත්කුඩු පාර්සල් 39ක් සමග පුද්ගලයෙකු වාද්දුව පොලිසිය විසින් අද(13) පෙරවරුවේ පානදුර ප්‍රදේශයේ දී අත්අඩංගුවට ගෙන තිබේ.
මෙලෙස අත්අඩංගුවට ගත් පුද්ගලයා යුද හමුදාවේ සේවය කර ආබාධිත තත්ත්වයට පත් වූවෙක් බව පොලිසිය සඳහන් කරනු ලැබීය.
සැකකරු පානදුර මහේස්ත්‍රාත් අධිකරණයට ඉදිරිපත් කිරීමෙන් අනතුරුව දෙසැම්බර් මස 24 වැනිදා දක්වා රක්ෂිත බන්ධනාගාර ගත කර ඇත.adaderana.lk
වේලා සටහන්කරුවන් කප්පම් ගන්නවා -කප්පම් දීමත් වරදක්
බස්නාහිර පළාත් මාර්ගස්ථ මගී ප්‍රවාහන අධිකාරිය මගින් පත්කර සිටින බස් රථ වේලා සටහන්කරුවන් බස් රථ වලින් කප්පම් ලබාගන්නා බව සමස්ත ලංකා පෞද්ගලික බස් රථ සංගමයේ ලේකම් අංජන ප්‍රියන්ජිත් මහතා චෝදනා කර සිටියි.
එම වේලා සටහන්කරුවන් දිනකට රුපියල් පහළොස් දහසකට අධික මුදලක් මෙලෙස කප්පම් වශයෙන් එකතු කරගන්නා බව ඔහු පවසයි.
මීට වර්ෂ 15 ක සිට පවත්වාගෙන එන පරිදි මෙසේ කප්පම් ක්‍රමවේදය පවත්වාගෙන යන බව ඒ පිළිබඳ පැහැදිලි කරන අංජන ප්‍රියන්ජිත් මහතා සඳහන් කරයි.
නමුත් බස්නාහිර පළාත් ප්‍රවාහන අමාත්‍යවරයාට මේ පිළිබඳව දැනුම්දුන් පසු එම ක්‍රමවේදය නවතා ඇති බව ඔහු සඳහන් කළ නමුත් බස්නාහිර පළාත් සභාවටත්, රජයටත් මෙම ක්‍රියාවලිය නැවතීමේ හැකියාවක් නොමැති බවට ද හෙතෙම චෝදනා කරයි.
තමාට අදාළ සංගම් වලින් මේ පිළිබඳ කිසිදු පැමිණිල්ලක් ලැබී නොමැති බව මෙම චෝදනාව සම්බන්ධයෙන් අද දෙරණ කළ විමසීමකදී බස්නාහිර පලාත් සභා ප්‍රවාහන අමාත්‍ය උපාලි කොඩිකාර මහතා පැවසුවේය.
කිසිදු කප්පම් මුදලක් අයනොකරන ලෙසට චක්‍රලේඛයක් නිකුත් කර ඇති බව ඔහු අවධාරණය කළේය. එසේම කිසිදු කප්පම් මුදලක් ලබානොදෙන ලෙසට බස් හිමියන් දැනුවත් කර ඇති බව ද අමාත්යවරයා කියා සිටියේය.
එවැනි තත්ත්වයක් තුළ කප්පම් මුදල් ලබාදීම ද වරදක් බව ද, ඒ පිළිබඳව පැමිණිලි කළ යුතු බව ද ඔහු පෙන්වාදෙයි.
adaderana.lk
ද්‍රවිඩ ජාතික ගීය විහිළුවක්-වැරැද්ද නිවරදි කළා
ජාතික ගීය මින් ඉදිරියට ගායනා කළ යුත්තේ සිංහල භාෂාවෙන් පමණක් වන බවට ආණ්ඩුව විසින් ගෙන ඇති තීරණය අතීතයේ සිදුවූ වැරැද්දක් නිවරදි කිරීමට ගත් තීරණයක් පමණක් බව ඉදිකිරීම්,ඉංජිනේරු සේවා,නිවාස හා පොදු පහසුකම් අමාත්‍ය විමල් වීරවංශ මහතා පවසයි.
ලෝකයේ කිසිදු රටක ජාතික ගීය වෙනත් භාෂාවකට පරිවර්තනය කොට රට තුළ ගායනා නොකරන බව අමාත්යවරයා අද දෙරණට කියා සිටියේය.
ඉන්දියාවේ භාෂා ගණනාවක් භාවිතා වුවද ජාතික ගීය ගායනා කරන්නේ එකම භාෂාවකින් පමණක් බවත්,එනම් හින්දි භාෂාවෙන් පමණක් බවත් වීරවංශ මහතා පෙන්වා දුන්නේය.
ජාතික ගීය"ජාතික"වන්නේද ඒ තුළ සියලු ජාතීන් නියෝජනය වන බැවින් හා එකම භාෂාවකින් ගායනා කළද සියලුම ජාතීන් එය පිළිගත යුතු බැවින් බවද අමාත්යවරයා සඳහන් කළේය.
1978 ව්‍යවස්ථාව තුළින් ජාතික ගීයේ ද්‍රවිඩ භාෂා පර්වර්තනයක් සකසා එය පසුව අධ්‍යාපන පෙළ පොත් වලට පවා ඇතුළත් කිරීම විහිළුවක් බව ද අමාත්යවරයා වැඩිදුරටත් සඳහන් කළේය.
adaderana.lk
වරකාපොළ කොල්ලකරුවන් ගැන තොරතුරු රැසක් හෙළිවෙයි
වරකාපොළ පොලිස් නිලධාරීන් දෙදෙනාගේ ඝාතන සිද්ධියට අදාළ කොල්ලකරුවන් කිහිපදෙනෙකුගේ තොරතුරු රැසක් හෙළිවී තිබේ.
ආරක්ෂක අංශ වෙඩි පහරින් මියගිය කොල්ල කල්ලි නායකයා වශයෙන් කටයුතු කර ඇති විශ්ව දේවයලාගේ සුමනරත්න නැමැත්තා ඇතුළු සැකකරුවන් තිදෙනෙකු ඌව පළාතේ පදිංචිකරුවන් බවට හෙළි වී ඇති බව පොලිසිය සඳහන් කරයි.
පසුගිය වසරේ බදුල්ලේ දුම්වැටි අලෙවි ආයතනයකට කඩා වැදී රුපියල් අනූ අට ලක්ෂ නව දහස් පන්සිය අනූ හතරක මුදලක් කොල්ලකෑමේ සිද්ධියක් සම්බන්ධයෙන් අදාළ කොල්ල කල්ලි නායකයා අධිකරණය මගින් වැරදිකරුවෙකු වු අයෙකු බවට ද හෙළි වී තිබේ.
මේ අතර අදාළ සිද්ධිය සම්බන්ධයෙන් පොලිස් වෙඩි පහරින් මියගිය තවත් සැකකරුවෙකු වන බදුල්ල තැන්නපංගුව ප්‍රදේශයේ පදිංචි මුණසිංහ දේවයලාගේ සංජීව පුෂ්පකුමාර නැමැත්තා යුධ හමුදා කොමාන්ඩෝ බලකා‍යේ සිට පැනගිය සෙබලෙකු බවට ද අනාවරණය වී ඇතැයි පොලිසිය සඳහන් කරනු ලැබීය.
1999 වසරේ සිදුවු කැටවල බැංකු මංකොල්ලය ඇතුළු අපරාධ රැසක විත්තිකරුවෙකු ලෙසට මොහුට එරෙහිව නඩු පවරා ඇතත් මොහු සුනාමියෙන් මියගිය අයෙකු බවට පවසා ඔහුගේ බිරිඳ විසින් බදුල්ල මහාධිකරණයට මරණ සහතිකයක් ඉදිරිපත් කිරීමෙන් අනතුරුව නඩු වාර්තාවෙන් මොහුගේ නම කටුගා දමා තිබේ.
මේ අතර සිද්ධියෙන් මියගිය මොණරාගල, කුඹුක්කන ප්‍රදේශයේ පදිංචි දේවේන්ද්‍රයලාගේ කරුණාසේන නැමැති සැකකරුවා ද පොලිස් කොස්තාපල්වරයෙකු වශයෙන් සේවය කර වැඩ තහනමට ලක්වු අයෙකු බවට ද තොරතුරු හෙළි වී ඇත.
මොහු පොලිස් කොස්තාපල්වරයෙකු වශයෙන් බඩල්කුඹුර පොලිසියේ සේවය කරමින් සිටියදී ටි - 56 වර්ගයේ ගිනි අවියක් සොරාගෙන යාම සම්බන්ධයෙන් මෙසේ වැඩතහනමට ලක් වු අයෙකු බව පොලිසිය සඳහන් කරයි.
adaderana.lk
මම යුතුකම් ඉටුකළා-26 දා ලක්ෂ 10 ක් කොළඹට ගේනවා
තමන් තමන්ගේ යුතුකම් ඉටු කළ බව විපක්ෂ නායක රනිල් වික්රමසිංහ මහතා පවසයි. එක්සත් ජාතික පක්ෂයට නව පක්ෂ ව්‍යවස්ථාවක් සම්මත කරදීම තුළින් මෙසේ යුතුකම් ඉටුකළ බව අද පැවති මාධ්‍ය හමුවකට එක්වෙමින් විපක්ෂ නායකවරයා කියා සිටියේය.
ජනවාරි මස 26 වන දින"ඒකාධිපති වියරුව පරදවමු"යන මැයෙන් දැවැන්ත උද්ඝෝෂණයක් කොළඹදී පවත්වන්නට කටයුතු යොදා ඇති බව ද හෙතෙම සඳහන් කළේය.
එම උද්ඝෝෂණයට ලක්ෂ 10 ක ජනතාවක් කොළඹට කැඳවන්නට අපේක්ෂා කරන බවද විපක්ෂ නායකවරයා කියා සිටියේය.
ගිය වසරේ ජනවාරි මස 26 වන දින වත්මන් ජනාධිපතිවරයා සිය ඒකාධිපති ගමන ආරම්භ කිරීම සනිටුහන් කරමින් මෙම දැවැන්ත උද්ඝෝෂණය පවත්වන බව විපක්ෂ නායක රනිල් වික්රමසිංහ මහතා වැඩිදුරටත් කියා සිටියේය.
adaderana.lk
මුවන්පැලැස්සේ අප්පුහාමිටත් පක්ෂයේ ඉහළටම යන්න පුළුවන්
පක්ෂ ව්‍යවස්ථාවේ 8(01) වගන්තිය වෙනස් කිරීම පක්ෂ සම්මේලනයේදී නව ව්‍යවස්ථාව සම්මත කරගැනීමෙන් සිදුවූ විශාලම විප්ලවය බව එක්සත් ජාතික පක්ෂ පාර්ලිමේන්තු මන්ත්‍රී සජිත් ප්‍රේමදාස මහතා පවසයි.
ඒ අනුව පුද්ගලයින්ට සදාකල්හිම තනතුරු වල වැජඹීමේ අවස්ථාව ඉවත්ව ගිය බවත්, ඕනම කෙනෙකුට පක්ෂයේ පහළම තලයේ සිට ඉහළම තලය දකවා ගමන් කිරීමේ අවස්ථාව උදාවී ඇති බවත් ඔහු පෙන්වාදෙයි.
මරදන්කඩවල බණ්ඩාර මැණිකේටත්, මුවන්පැලැස්සේ අප්පුහාමිටත් පක්ෂයේ පහළම ස්ථානයේ සිට ඉහළම ස්ථානය දක්වා ගමන් කළ හැකි බව ඒ මහතා අවධාරණය කළේය.
අද(13) කොළඹ පැවති මාධ්‍ය හමුවකදී අදහස් දක්වමින් සජිත් ප්‍රේමදාස මහතා මේ කරුණු දැක්වීය. 8(01) වගන්තිය වෙනස මත සම්මුතියකින් හෝ රහස් ඡන්දයකින් ප්‍රජාතන්ත්‍රිකව පක්ෂයේ ප්‍රධාන තනතුරු 5 සඳහා ඕනම පුද්ගලයෙකුට පත්වීමේ හැකියාව ඇති බව ද හෙතෙම එම මාධ්‍ය හමුවේදී කියා සිටියේය.
එමෙන්ම මෙම ව්‍යවස්ථාව සම්මත කරගැනීමේ මහා අරගලය ජයගත හැකිවූයේ පක්ෂයේ සියලුදෙනා ඉල්ලීම්, ආයාචනා, සීනිබෝල තනතුරු වලට වහල් නොවූ නිසා බව ද සජිත් ප්‍රේමදාස මහතා අවධාරණය කළේය.
ඊයේ සම්මත කරගත් ව්‍යවස්ථාව ප්රාදේශීය සභා, නගර සභා, පළාත් සභා මන්ත්‍රීවරුන්ට ද ඡන්දය භාවිත කළ හැකි ලෙස නැවත ඉදිරියේදී වෙනස්වන බව ද ඔහු සඳහන් කළේය.
ෆොන්සේකා හා ඔහුගේ ලේකම්ට එරෙහි නඩුවට දින නියමවෙයි
යුද හමුදාවෙන් පලාගිය සෙබළුන් සේවයේ යොදවා ඔවුන්ට වැටුප් ලබාදීම සම්බන්ධව හිටපු යුද හමුදාපති සරත් ෆොන්සේකාට සහ ඔහුගේ ලේකම් සේනක ද සිල්වාට එරෙහිව පවරා ඇති නඩුව විභාග කිරීම සඳහා කොළඹ මහාධිකරණය දින නියම කරනු ලැබීය.
අදාළ නඩුව අද(13) කැඳවූ අවස්ථාවේදී සිර දඬුවම් විඳින සරත් ෆොන්සේකා සහ ඔහුගේ ලේකම් සේනක ද සිල්වා යන අය බන්ධනාගාර නිලධාරීන් විසින් අධිකරණයට ඉදිරිපත් කර තිබිණි.
මෙම නඩුව විභාග කිරීම සඳහා දින නියම කරන ලෙස එහිදී රජයේ නීතිඥවරයා සඳහන් කර සිටියේය.
ඉදිරිපත් වූ කරුණු සලකා බැලූ කොළඹ, මහාධිකරණ විනිසුරු දීපාලි විජේසුන්දර මහත්මිය මෙම නඩුව ජනවාරි මස 12 වන දින විභාග කිරීම සඳහා දින නියම කරනු ලැබීය.
මෙහිදී දෙවන විත්තිකරු වන සේනක ද සිල්වාට ඇප නියමකරන මෙන් ඔහුගේ නීතිඥවරු අධිකරණයෙන් ඉල්ලා තිබේ. එම ඇප ඉල්ලීම සම්බන්ධව තරයේ විරුද්ධ වන බව එවිට රජයේ නීතිඥවරයා සඳහන් කළේය.
ඒ අනුව ඇප ඉල්ලීම ලබන ජනවාරි 12 වන දින විභාග කරන බව විනිසුරුවරිය සඳහන් කළාය.
පසුගිය ජනාධිපතිවරණ සමයේ යුද හමුදාවෙන් පලාගිය සෙබළුන් 10 දෙනෙකු සේවයේ යොදවා ඔවුන්ට වැටුප් ගෙවීම තුළින් විත්තිකරුවන් රජයට එරෙහිව කුමන්ත්‍රණයක නිරත වී ඇතැයි චෝදනා කරමින් නීතිපතිවරයා මෙම නඩුව පවරා තිබේ.
adaderana.lk
Sunday, December 12, 2010
සිරිකොත පිටුපස ගේට්ටුවෙන් රනිල් සමුළුවට එයි
සිරිකොත පිටුපස ගේට්ටුවෙන් රනිල් සමුළුවට එයි
එක්සත් ජාතික පක්ෂයේ සිරිකොත මූලස්ථානයේ පෙ.ව. 9.30 ට පමණ එජාප නායක රනිල් වික්රමසිංහ මහතාගේ ප්‍රධානත්වයෙන් ආරම්භ වූ එ.ජා.ප. සමුළුව සඳහා රනිල් වික්රමසිංහ මහතා පැමිණියේ සිරිකොත පිටුපස ගේට්ටුවෙනි.
පක්ෂයේ සාමාජිකයින් වැඩි පිරිසක් සිරිකොත මුලස්ථානයට ඇතුළුවුයේ ගේට්ටුවෙන් පනිමිනි.
මෙම පක්ෂ සමුළුවේදී එක්සත් ජාතික පක්ෂ නව පක්ෂ ව්‍යවස්ථාව සම්මත කර ගත් බව වාර්තා වේ.
පක්ෂයට ජය කැන්දීම මගේ අපේක්ෂාවයි
සියලු දෙනාගේම සහයෝගය ලබාගෙන පක්ෂය ජයග්‍රහණය කරා රැගෙන යාම තම අපේක්ෂාව බව එක්සත් ජාතික පක්ෂ පාර්ලිමේන්තු මන්ත්‍රී සජිත් ප්‍රේමදාස මහතා පවසයි.
පරාජිත මානසිකත්වයෙන් මිදී ජයග්‍රහණය උදෙසා පක්ෂය රැගෙන යාමට සියලුදෙනා කැපවිය යුතු බව ඔහු කියා සිටියි.
පක්ෂ නායකත්වයේ සියලුම ක්‍රියාවන්ට එකඟත්වය පළ කරමින් ජයග්‍රහණය කරා ළඟා විය නොහැකි බව හෙතෙම පෙන්වාදෙයි.
පක්ෂ නායකත්වයේ අඩු ලුහුඩුකම් විවේචනය කර නිවැරදි මාර්ගයට යොමු කිරීම මගින් පක්ෂය ද ජයග්‍රහණය කරා යොමුකළ හැකි බව සජිත් ප්‍රේමදාස මන්ත්‍රීවරයා සඳහන් කරයි.
සිරිකොත පක්ෂ මූලස්ථානයේ පැවති එක්සත් ජාතික පක්ෂ විශේෂ මහ සම්මේලනය අමතමින් ඔහු මේ බව කියා සිටියේය.
බලයට කෙටි මං-පැන්නොත් ගොඩ මං
එක්සත් ජාතික පක්ෂයේ විශේෂ පක්ෂ සම්මේලනය ආරම්භ කිරීමට පෙර අද(12) පාක්ෂ ක්‍රියාකාරිකයෝ මහත් උනන්දුවෙන් පක්ෂ මූලස්ථානයට එක්රැස් වී සිටියහ.අනන්‍යතාවය පරීක්ෂා කරන පෝළිම දිග වැඩි නිසාම කෙටි මගකින් ඇතුළට රිංගා ගන්නට මෙම ක්‍රියාකාරිකයා උත්සාහ කළා විය හැකිය.
අලියා අලුත් කරන ලියැවිල්ල ගොඩයයි
අද සිරිකොත පක්ෂ මූලස්ථානයේ පැවති පක්ෂ මහා සම්මේලනයේදී එක්සත් ජාතික පක්ෂ නව පක්ෂ ව්‍යවස්ථාව සම්මත කර ගත් බව අද දෙරණ වාර්තාකරු සඳහන් කරයි. එක්සත් ජාතික පක්ෂ මහා සම්මේලනය අද පෙ.ව 9.30 ට පමණ විපක්ෂ නායක රනිල් වික්රමසිංහ මහතාගේ ප්‍රධානත්වයෙන් සිරිකොත පක්ෂ මූලස්ථානයේ දී ආරම්භ විය
කැලණිය දැන් ආශ්චර්යයි
දම්වැලක පුරුක් මෙන් රාජ්‍ය සේවකයා සහ දේශපාලනඥයා එක්ව රට ගොඩනැඟීමේ වැඩසටහන ක්‍රියාත්මක කළ යුතු බව මහජන සම්බන්ධතා මහජන කටයුතු අමාත්‍ය මර්වින් සිල්වා මහතා පවසයි.
මහින්ද චින්තය ක්‍රියාත්මක කිරීමට සියලු දෙනාගේ සහයෝගය අත්‍යවශ්‍ය බව ඔහු කියා සිටියි.
කැලණිය ප්රාදේශීය සභාවේ හිටපු මන්ත්‍රීවරුන් හට උපහාර පිරිනැමීමේ උත්සවයකට එක් වෙමින් අමාත්යවරයා මෙම අදහස් පළ කළේය.
එහි දී වැඩිදුරටත් අදහස් දැක් වූ අමාත්‍ය මර්වින් සිල්වා මහතා ප්‍රකාශ කර සිටියේ කැලණිය පුරවරය මේ වන විට ආශ්චර්යමත් නගරයක් බවට පත් කිරීමට තමාට හැකි වී ඇති බවයි.
අලි සමුළුව ඇරඹෙයි
එක්සත් ජාතික පක්ෂයේ විශේෂ පක්ෂ සම්මේලනය මීට ස්වල්ප මොහොතකට පෙර සිරිකොත පක්ෂ මූලස්ථානයේ දී ආරම්භ වූ බව අද දෙරණ වාර්තාකරු පවසයි.
එක්සත් ජාතික පක්ෂයේ ව්‍යවස්ථා සං‍ශෝධනය සම්මත කර ගැනීම මෙම පක්ෂ සම්මේලනයේ මූලික අරමුණ වී තිබේ.
එහෙත් මෙම පක්ෂ සම්මේලනයෙන් පක්ෂයේ කිසිදු වෙනසක් සිදු නොවන බව එක්සත් ජාතික පක්ෂයේ සිට රජයට එක් වූ වැවිලි කර්මාන්ත නියෝජ්‍ය අමාත්‍ය අර්ල් ගුණසේකර මහතා පවසා තිබිණි.. විපක්ෂ නායක රනිල් වික්රමසිංහ මහතාගේ ප්‍රධානත්වයෙන් එම පක්ෂයේ සියලු මන්ත්‍රීවරුන්ගේ සහභාගීත්වයෙන් සමුළුව ආරම්භ වූ බව එහි සිටින අද දෙරණ වාර්තාකරු ප්‍රකාශ කරයි.
ආගමික වතාවත් සිදු කිරීමෙන් අනතුරුව සමුළුවේ වැඩ කටයුතු ආරම්භ වී ඇති අතර සමුළුවට සහභාගී වීම සඳහා එක්සත් ජාතික පක්ෂ නියෝජිතයින් විශාල පිරිසක් මේ වන විටත් සිරිකොත පක්ෂ මූලස්ථානය වෙත පැමිණ ඇති බව සඳහන් වේ.
හෙද නිලධාරී වර්ජනයට මහනුවරත් එක්වෙයි
රජයේ හෙද නිලධාරීන්ගේ සංගමය ආරම්භ කර ඇති වැඩ වර්ජනය සදහා අද දිනයේ මහනුවර රෝහලේ හෙද නිලධාරීන් ද එක්වන බව එම සංගමයේ සභාපති සමන් රත්‍නප්‍රිය මහතා පවසයි.
සිය ගැටලුවට බලධාරීන් කඩිනමින් විසඳුම් ලබා නොදුනහොත් දිවයින පුරා රෝහල් වල අඛණ්ඩ වැඩ වර්ජන ක්‍රියාවලියක් දියත් කරන බව හෙතෙම අවධාරණය කරයි.
හම්බන්තොට රෝහලේ හෙද නිලධාරීන් 10 දෙනෙකුද,කළුබෝවිල රෝහලේ හෙද නිලධාරීන් 24 දෙනෙකුද ඉතා අමානුෂික ලෙස දුර බැහැර ප්‍රදේශ වලට මාරු කර යැවීම හේතුවෙන් මෙම වර්ජනය ආරම්භ කළ බව ඔහු සිහිපත් කළේය.
ජාතික රෝහල,හම්බන්තොට,කළුබෝවිල,මාතර,කරාපිටිය යන රෝහල් වල මෙම වර්ජනය අඛණ්ඩ උපවාසයක් ලෙස ක්‍රියාත්මක කරන බවත්,සිද්ධියට හේතු වූ හෙද නිලධාරීන්ගේ ස්ථාන මාරු වහාම අත්හිටුවා සෞඛ්‍ය සේවාව යථා තත්ත්වයට පත් කරන ලෙස හෙතෙම සෞඛ්‍ය බලධාරීන්ගෙන් ඉල්ලා සිටියි.
ඉස්කෝලෙට කට්ටි පැනපු ළමුන් යළි කැඳවීම සාර්ථකයි
පාසල් නොයන ළමුන් පාසල් යැවීම සඳහා ආරම්භ කර ඇති විශේෂ වැඩසටහන මේ වන විට ඉතා සාර්ථකව සිදු කෙරෙමින් පවතින බව පොලිස් ළමා හා කාන්තා කාර්යාංශය පවසයි.
ඒ අනුව වැල්ලවත්ත , ගල්කිස්ස , මොරටුව යන පොලිස් බල ප්‍රදේශ වල පාසල් නොගිය ළමුන් 34 දෙනෙකු පාසල් යැවීම සඳහා කටයුතු කර තිබේ.
දෙහිවල පොලිස් බල ප්‍රදේශයේ පාසල් නොයන සිසුන් ද ඉදිරි සතිය තුළ පාසල් යැවීම සඳහා අවශ්‍ය පියවර ගන්නා බව පොලිස් ළමා හා කාන්තා කාර්යාංශයේ ප්‍රකාශකයෙක් සඳහන් කළේය.
අධිකරණ නියෝග මත ආරම්භ කළ මෙම වැඩසටහන ඉදිරියේ දී කොළඹ නගරයේ අනෙකුත් පොලිස් බල ප්‍රදේශ වල ද ක්‍රියාත්මක කරන බව පොලිස් ළමා හා කාන්තා කාර්යාංශය පෙන්වාදෙයි.
ඒ සඳහා අවශ්‍ය තොරතුරු ප්‍රදේශයේ ග්‍රාම නිලධාරීවරුන් හරහා ලබා ගැනීමට කටයුතු යොදා ඇති බව ද පොලිස් ළමා හා කාන්තා කාර්යාංශය වැඩිදුරටත් සඳහන් කරයි.
Saturday, December 11, 2010
ඇතුළුවීම අවසර ලත් අයට පමණයි. .
විපක්ෂ නායක රනිල් වික්රමසිංහ, එක්සත් ජාතික පක්ෂ නියෝජ්‍ය නායක කරූ ජයසූරිය යන මහත්වරුන් ඇතුළු එම පක්ෂ ක්‍රියාකාරිකයින් කිහිපදෙනෙකු සහභාගි වූ මාධ්‍ය හමුවක් අද(11) කොළඹ විපක්ෂ නායක කාර්යාලයේදී පැවැත්විණි. එහිදී විපක්ෂ නායකවරයා රැස්ව සිටි මාධ්‍යවේදීන් ඇමතූ අයුරු ඉහතින් දැක්වේ. හෙට(12) පැවැත්වීමට නියමිත පක්ෂ සම්මේලනයට සහභාගි විය හැක්කේ අවසරය ඇති පුද්ගලයින්ට පමණක් බව මෙහිදී රනිල් වික්රමසිංහ මහතා ප්‍රකාශ කළේය.
