රන්මිණිතැන්න ටෙලි සිනමා ගම්මානය ජනාධිපති මහින්ද රාජපක්ෂ මහතා අතින් මීට ස්වල්ප මොහොතකට පෙර විවෘත විය. adaderana
Tuesday, March 30, 2010
රන්මිණිතැන්න විවෘතයි
රන්මිණිතැන්න ටෙලි සිනමා ගම්මානය ජනාධිපති මහින්ද රාජපක්ෂ මහතා අතින් මීට ස්වල්ප මොහොතකට පෙර විවෘත විය. adaderana
එජාප රජයක් යටතේ 10,000 ක වැටුප වාරික 4කින්
තම ආණ්ඩුවක් යටතේ රාජ්‍ය සේවකයින්ට රුපියල් 10,000 ක වැටුප් වැඩිවීමක් වාරික 4ක් යටතේ සිදුකරන බව විපක්ෂ නායක රනිල් වික්‍රමසිංහ මහතා පවසයි.
හම්බන්තොට ප්රදේශයේ පැවති මැතිවරණ ප්‍රචාරක රැලියක් අමතමින් රනිල් වික්‍රමසිංහ මහතා මේ අදහස් පළ කළේය. අත්‍යවශ්‍ය භාණ්ඩ සඳහා පනවා ඇති සියලුම බදු ඉවත් කර භාණ්ඩ මිල පහත හෙළීමට පියවර ගන්නා බව රනිල් වික්‍රමසිංහ මහතා මෙහිදි සඳහන් කළේය. ජංගම දුරකථන සඳහා පනවා ඇති බදු ද ඉවත් කිරීමට තම පක්ෂය තීරණය කර ඇති බව රනිල් වික්‍රමසිංහ මහතා වැඩිදුරටත් කියා සිටියේය. adaderana
සංවර්ධිත දේශයක් වෙනුවෙන් කැපවෙනවා
ඒකීය රටක් මෙන්ම සංවර්ධිත දේශයක් අනාගත පරපුරට උරුම කරදීමට තමන් කැපවන බව ජනාධිපති මහින්ද රාජපක්ෂ මහතා පවසයි.
රටේ ආර්ථිකය ශක්තිමක් කර සියලු ජනතාවගේ ජිවිත ගොඩනැගීමේ වගකීම ඉටුකිරීමට තමන් බැඳී සිටින බව ජනාධිපතිවරයා සඳහන් කළේය. අද පෙරවරුවේ අම්බලන්තොට දික්වැල්ලවත්තේ දී ශ්‍රි ලංකා නිදහස් පක්ෂ ක්‍රියාකාරීන් පිරිසක් අමතමින් ජනාධිපතිවරයා මේ බව කියා සිටියේය. රටේ සංවර්ධන වැඩපිළිවෙල ආපසු හැරවීමට කිසිවෙකුටත් ඉඩ නොතබන බව ජනාධිපතිවරයා මෙහිදි වැඩිදුරටත් අවධාරණය කළේය. adaderana
අප්‍රේල් 8න් පසු දැඩි තීන්දු ගන්නවා
අප්‍රේල් 8 වැනිදායින් පසු දැඩි තීන්දු තීරණ ගැනීමට සිදුවන බව අග්‍රාමාත්‍ය රත්නසිරි වික්‍රමනායක මහතා පවසයි.
මෙතෙක් දැඩි තීන්දු තීරණ ගනු ලැබුවේ මානුෂීය අයිතිවාසිකම් නැති කිරීමට හෝ ප්‍රජාතන්ත්‍රවාදී අයිතිවාසිකම් නැති කිරීමට නොවන බව අග්‍රාමාත්‍යවරයා සඳහන් කළේය. මාතර කඹුරුපිටියේ පැවති මැතිවරණ ප්‍රචාරක රැළියක් අමතමින් අග්‍රාමාත්‍ය රත්නසිරි වික්‍රමනායක මහතා මේ බව කියා සිටියේය.
දේශීය හා විදේශීය වශයෙන් රටට එල්ල වන තර්ජන ගර්ජන මෙල්ල කර ශීඝ්‍ර සංවර්ධනයක් අත්පත් කර ගැනීමට දැඩි තීන්දු තීරණ ගන්නා බව අග්‍රාමාත්‍යවරයා මෙහිදි ප්‍රකාශ කළේය. තුනෙන් දෙකක ජනවරමක් ලබාදී රජය සමඟ මෙරට ජනතාව සිටින බවට විදේශීය රටවලට පණිවිඩයක් ලබාදිය හැකි බව අග්‍රාමාත්‍යවරයා මෙහිදි වැඩිදුරටත් අවධාරණය කළේය. adaderana
සිව් මසක් තුළ සියලු උපාධිධාරීන්ට රැකියා
එක්සත් ජනතා නිදහස් සන්ධාන ආණ්ඩුව පිහිටුවා සිව් මසක් තුළ රැකියා විරහිත සියලුම උපාධිධාරීන්ට රැකියා ලබාදීමට පියවර ගන්නා බව එස්.බී.දිසානායක මහතා පවසයි.
ගම්පොල පුස්සැල්ලාව ප්රදේශයේ පැවති ජනහමුවක් අමතමින් එස්.බී.දිසානායක මහතා මේ අදහස් පළ කරන ලදී. උසස් පෙළ , සාමාන්‍ය පෙළ මෙන්ම විවිධ ඩිප්ලෝමා සමත් වු දරුවන් තුන් ලක්ෂ 60,000 ක් පමණ මෙරට තුළ සිටින බව එස්.බී.දිසානායක මහතා පෙන්වා දෙයි.
එයින් ලක්ෂයකට මේ වසර තුළදී රැකියා ලබාදීමට පියවර ගන්නා බව එස්.බී.දිසානායක මහතා සඳහන් කළේය.
විශේෂයෙන්ම වතුකරයේ උගත් තරුණ තරුණියන් හට මෙහිදී විශේෂ සැළකිල්ලක් දක්වන බව හෙතෙම කියා සිටියේය.
මෙහිදි වැඩිදුරටත් අදහස් දැක්වු එස්.බී. දිසානායක මහතා කියා සිටියේ විසි වන වරටත් මැතිවරණ පරාජයේ අභියස රනිල් වික්‍රමසිංහ මහතා සිටින බවයි. adaderana
රාජගිරිය නොසන්සුන්
රාජගිරියේ පවත්වන්නට නියමිතව තිබූ එක්සත් ජාතික පක්ෂ මහ රැළියට අදාළ සැරසිලි පොලිසිය විසින් ඉවත් කිරීම නිසා ප්රදේශයේ නොසන්සුන්කාරී තත්ත්යක් වර්ධනය වී ඇතැයි අද දෙරණ වාර්තාකරු සඳහන් කරයි.
මෙම රැළිය අද සවස 3.00 ට රාජගිරිය නගරයේදී පවත්වන්නට නියමිතව තිබිණි.
එහෙත් ඊට අදාළ සැරසිලි,කටවුට් ආදිය ඉවත් කර ඇති අතර ඒවා සමහරක් පොලීසිය බාරයේ තබා‍ගෙන ඇති බවත්,එ.ජා.ප ආධාරකරුවන් ඒවා ආපසු ලබාදෙන ලෙස ඉල්ලමින් වැලිකඩ පොලීසිය ඉදිරිපිට කලහකාරී ලෙස හැසිරෙන බවත් අප වාර්තාකරු පවසයි. adaderana
පොලීසිය 58,700 යි-හමුදාව 19,500 යි
මැතිවරණය ප්‍රකාශයට පත්කිරීමෙන් අනතුරුව මේ වන විට මැතිවරණ ප්‍රචණ්ඩ ක්‍රියා 219 ක් වාර්තා වී ඇති බව පොලිස්පති මහින්ද බාලසූරිය මහතා පවසයි.
එකී සිදුවීම් වලට අදාළව පුද්ගලයින් 174 දෙනෙකු අත්අඩංගුවට ගෙන ඇති බවත්,එයින් 161 දෙනෙකු සම්බන්ධයෙන් මේ වන විටත් අධිකරණයට කරුණු ඉදිරිපත් කර ඇති වගද හෙතෙම කියා සිටියේ අද පැවති මාධ්‍ය හමුවකට සහභාගි වෙමිනි.
ඉතිරි පුද්ගලයින් ද අත්අඩංගුවට ගැනීමට කටයුතු කරමින් සිටින බවත්,මේ වන විට මඩකළපුව ප්‍රදේශයෙන් 24 ක්,මහනුවරින් 20 ක්,මාතලේ 13 ක්,කන්තලේ 12 ක් වන සේ ප්‍රචණ්ඩ ක්‍රියා වාර්තා වී ඇති බවත් හෙතෙම කියා සිටියේය.
නුවරඑළිය ප්‍රදේශයේද බරපතල සිදුවීම් වාර්තා වීමට ඉඩ ඇති නිසා සාමය ආරක්ෂා කිරිමට පියවර ගෙන ඇති බවත් ඔහු පැවසීය. මැතිවරණ සමයේ ආරක්ෂාවට පොලිස් නිලධාරීන් 58,700 ක් ද ත්‍රිවිධ හමුදාවේ නිලධාරීන් 19,500 ක් ද යෙදවීමට බලාපොරොත්තු වන බව මැතිවරණ පැමිණිලි කටයුතු බාර නියෝජ්ය පොලිස්පති ගාමිණී නවරත්න මහතා මෙම මාධ්‍ය හමුවේදීම කියා සිටියේය.
ඊට අමතරව ප්‍රදේශය බාර නියෝජ්ය පොලිස්පතිවරයාගේ ඉල්ලීම පිට පොලිස් නිලධාරීන් තිදෙනෙකුගෙන් සහ ත්‍රිවිධ හමුදාවේ නිලධාරීන් දෙදෙනෙකුගෙන්ද සමන්විත පස් දෙනෙකුගෙන් යුතු කණ්ඩායමක් ජංගම මුර සංචාරයේ යෙදවීමට කටයුතු කර ඇති බවද හෙතෙම සඳහන් කළේය.adaderana
ජංගම දුරකථනයටත් අකුණු එන්න පුළුවන්
අකුණු සහිත තද වැසි පවත්නා කාලගුණ තත්ත්වයක් අත්දකින්නට ඇති හෙයින් ජංගම දුරකථන භාවිතය අවදානම් සහගත බව කාර්යභාර කාලගුණ විද්‍යාඥ ඩී.ඒ ජයසිංහ ආරච්චි මහතා පවසයි.
අකුණු සහිත තද වැසි පවත්නා විට රැහැන් සහිත දුරකතන භාවිතය ඉතාමත් අවදානම් බවත්,ඒ තරමටම නොවුණත් ජංගම දුරකතන භාවිතයත් අවදානම් බවත් හෙතෙම කියා සිටියි.
මාතලේ- උකුවෙල ප්රදේශයේ වත්තක සිටි පුද්ගලයින් පස් දෙනෙකු අකුණු සැර වැදීමෙන් ඇතිවූ කම්පනමය තත්ත්වයක් හේතුවෙන් රෝහල් ගත කර ඇති අතර ඔවුන්ගේ තත්ත්වය බරපතළ නොවූවත් එක් පුද්ලගයෙකු ළඟ තිබූ ජංගම දුරකතනයක් හේතුවෙන් මෙම අකුණු සැර වැදී ඇති බවද සඳහන් වේ.adaderana
නුවරඑළියට එස්.ටී.එෆ් කැඳවයි
නුවරඑළිය දිස්ත්‍රික්කයේ මැතිවරණ ප්‍රචණ්ඩ ක්‍රියාවන් පාලනය කිරීම සඳහා පොලිස් විශේෂ කාර්ය බලකාය කැඳවීමට තීරණය කර ඇති බව නුවරඑළිය දිස්ත්‍රික් ලේකම් ඩී.පී.ජී කුමාරසිරි මහතා පවසයි.
දේශපාලන පක්ෂ හා අපේක්ෂකයින් අතර දරුණු ප්‍රචණ්ඩත්වයක් මේ වන විට නිර්මාණය වී ඇති බව අද දෙරණ වෙත විශේෂ ප්‍රකාශයක් කරමින් ඒ මහතා සඳහන් කළේය.
මේ සම්බන්ධයෙන් දිස්ත්‍රික් සහකාර මැතිවරණ කොමසාරිස් වරයා සහ මැතිවරණ කටයුතු භාර ජ්‍යෙෂ්ඨ නියෝජ්ය පොලිස්පති ගාමීණි නවරත්න මහතා සමඟ ද තමන් සාකච්ඡා කළ බව නුවරඑළිය දිස්ත්‍රික් ලේකම්වරයා කියා සිටියේය.
ඒ අනුව පොලිස් විශේෂ කාර්ය බලකායේ ජංගම රථ දිස්ත්‍රික්කය පුරා යෙදවීමට සැලසුම් කර ඇති බව ඩී.පී.ජී කුමාරසිරි මහතා වැඩිදුරටත් සඳහන් කළේය. adaderana
ගංජා ප්‍රවාහනය කළ දෙදෙනෙක් අත්අඩංගුවට
කිලෝග්‍රෑම් 100 කට අධික ගංජා තොගයක් ප්‍රවාහනය කරමින් සිටි පුද්ගලයින් දෙදෙනෙකු හුංගම ප්රදේශයේ දී අත්අඩංගුවට ගෙන තිබේ.
ඊයේ රාත්‍රී රත්නවේල්ල මාර්ග බාධකයේ දී ලොරියක් පරීක්ෂා කිරීමේ දී මෙම ගංජා තොගය සොයා ගෙන ඇති බව පොලිස් මාධ්‍ය ප්‍රකාශක පොලිස් අධිකාරි ප්‍රිශාන්ත ජයකොඩි මහතා සඳහන් කළේය. ලොරියේ වහලයේ සකස් කර තිබුණු විශේෂ රහස් කුටියක් තුළ මෙම ගංජා තොගය අසුරා තිබූ බව සඳහන්ය. අත්අඩංගුවට ගත් සැකකරුවන් දෙදෙනා අද අධිකරණයට ඉදිරිපත් කිරීමට නියමිත අතර හුංගම පොලිසිය මේ සම්බන්ධයෙන් වැඩි දුර පරීක්ෂණ පවත්වයි. adaderana
දැන් රටේ නීතියක් නෑ
රටේ නීතියක් නොමැති තත්ත්වයකට පත් වී ඇති බව එක්සත් ජාතික පක්ෂ පාර්ලිමේන්තු මන්ත්‍රී දයාසිරි ජයසේකර මහතා පවසයි.
රජය මේ වන විට විපක්ෂයේ දේශපාලන නායකයින් මර්දනය කිරීමේ ව්‍යාපාරයක් ආරම්භ කර ඇති බව ඔහු සඳහන් කරයි. කුරුණෑගල රීදීගම ප්රදේශයේ පැවති ජනහමුවකට එක් වෙමින් දයාසිරි ජයසේකර මන්‍ත්‍රීවරයා මෙම අදහස් පළ කළේය. ඇතැම් පොලිස් ස්ථාන මේ වන විට ශ්‍රී ලංකා නිදහස් පක්ෂයේ ශාඛා කාර්යාලය ලෙස කටයුතු කරමින් සිටින බව ඔහු එහි දී වැඩි දුරටත් ප්‍රකාශ කළේය. adaderana
ජනතා ගැටලු විසඳන මැතිවරණයක්
මෙවර මැතිවරණය ජනතාවගේ ගැටලු විසඳන මැතිවරණයක් ලෙස සැලකිය යුතු බව අමාත්‍ය ආචාර්ය සරත් අමුණුගම මහතා පවසයි.
තරුණ තරුණයින්ට රැකියා අවස්ථා හිමි කර දීමට එහි දී වැඩි අවධානයක් යොමු කළ යුතු බව අමාත්‍යවරයා සඳහන් කරයි. ඊයේ මහනුවර, ගලගෙදර ප්රදේශයේ පැවති ජනහමුවක් අමතමින් සරත් අමුණුගම මහතා මෙම අදහස් පළ කළේය. යුද්ධය අවසන් කර ඇති මේ මොහොතේ රට සංවර්ධනය කිරීම සඳහා විශාල මුදලක් ඉතිරි කර ගැනීමට රජයට හැකි වී ඇති බව අමාත්‍යවරයා මෙහි දී වැඩි දුරටත් ප්‍රකාශ කළේය. adaderana
Monday, March 29, 2010
ඉන්ධන නොමැතිව මොරටුව සහ රත්මලාන ඩිපෝවල බස් රථ ධාවනය නවතී
ලංකා ගමනාගමන මණ්ඩලයට අයත් මොරටුව සහ රත්මලාන ඩිපෝවල මගී ප්‍රවාහන බස් රථ ධාවනය ඉන්ධන නොමැති කම හේතුවෙන් සම්පූර්ණයෙන්ම අඩාලවී ඇතැයි වාර්තාවේ. වාර්තාවන ආකාරයට එම ඩිපෝවලින් අද දවසේ පිටත්ව ඇත්තේ ඉතා සීමිත බස් රථ ප්‍රමාණයක් පමණි. ඉන්ධන නොමැති වුවහොත් හෙට දිනය වන විට එය සම්පූර්ණයෙන්ම ඇණ හිටිනු ඇති බව සේවකයින් පවසති.
කෙසේ වෙතත් රත්මලාන සහ මොරටුව ඩිපෝවලට අයත් එක්සත් ජනතා නිදහස් සන්ධානයේ මැතිවරණ කටයුතු සදහා යොදාගන්නා බස් රථ කිහිපයක් සදහා පමණක් ඩිපෝවල ඉතිරිව ඇති ඉන්ධන අතිරික්තය වෙන්කර ඇති බවද සේවකයින් පවසති.lankatruth
ආණ්ඩුව සින්දුව - තනුව - ගායකයා වෙනස් කරලා : ටිල්වින් සිල්වා
ආණ්ඩුවේ මහ මැතිවරණයේ ප්‍රධාන සටන් පාඨයවූ ව්‍යවස්ථා වෙනස සදහා තුනෙන් දෙක ලබා ගැනීම මේවන විට ආණ්ඩුවම ඉල්ලා අස්කර ගෙන ඇති බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පවසයි. අද ජනතා විමුක්ති පෙරමුණේ ප්‍රධාන කාර්යාලයේදී පැවැති ප්‍රවෘත්ති සාකච්ඡාවකදී අදහස් දැක්වූ ඒ මහතා පෙන්වාදුන්නේ ආණ්ඩුව තුනෙන් දෙකේ බලය ගැන කිව් සින්දුව, තනුව පමණක් නොව ගායකයාද වෙනස්කර ඇති බවයි.
එහිදී ඒ මහතා මෙසේද පැවසීය.
පසුගිය දිනවල ජනාධිපතිවරයා ප්රමුඛ අනෙක් සෑම ඇමැතිවරයෙක්ම ව්‍යවස්ථා සංශෝධයක් කිරීම වෙනුවෙන් 2/3 ක බලයක් ආණ්ඩුවට ලබාදිය යුතුයි යන අදහසේ සිට ජනතාව ඇමතුවා. ඒවගේම මේ මැතිවරණ ව්‍යාපාරය ආරම්භයටත් පෙර සිටම ඔවුන් 2/3 බලයක් සම්බන්ධයෙන් කතා කළා. නමුත් ඊයේ (28) වන දින ආණ්ඩුවේ ඇමතිවරයෙක් වන චම්පික රණවක ඇමැතිවරයා පවසන්නේ අලූත් ව්‍යවස්ථාවක් ගේන එක ප්රමුඛ නෑ සිදුවන්නේ තියෙන ව්‍යවස්ථාවට අලූතින් කරුණු එකතු කරන එක බවයි.
ආණ්ඩුව දැන් සිංදුව වෙනස් කරලා, සිංදුව විතරක් නොවෙයි, තනුවත් වෙනස්, ගායකයිනුත් වෙනස් කරලා තියෙන්නේ. මෙයින් පෙනෙන්නේ ඔවුන් තිබෙනවා ඡන්දයට කළින්ම 2/3 බලය පිළිබඳ සිහිනය අත්හැරල. මේ තත්ත්වය උඩ මේ ගෙන එනවා කියන ව්‍යවස්ථාව එදා චන්ද්‍රිකා ගෙන ඒමට උත්සාහ කරපු ව්‍යවස්ථාවම ද කියන සැකයක් තිබෙනවා. එහි අඩංගුයි ජනාධිපතිවරයාගේ බලය දීර්ග කර ගැනීම පිළිබඳ වන කරුණු. මේ ජනාධිපතිරයාගේ අවශ්‍යතාවයත් මේ වන විට වන්නේ ඒකමයි.
ඒ නිසා අලූත් ව්‍යවස්ථාවක් ගෙන ඒමේ අරමුණ වන්නේ මේ තිබෙන පවුල් පාලනය ගොඩනගා ගැනීම විනා අලූතින් ව්‍යවස්ථා ගෙන ඒම නොවේ. තිබෙන ව්‍යවස්ථාව හොදටම ප‍්‍රමාණවත් ප්රජාතන්ත්රවාදය ස්ථාපිත කිරීමට හා ජනතාවට සහන සැලසීමට. නමුත් ඒ ප‍්‍රමාණයවත් මොවුන් ඉටුකරන්නේ නැහැ.
පසුගිය දවස්වල ඉන්දීය විදේශ ලේකම්වරිය මෙරටට පැමිණියා. ඒ පැමිණීමත් සමග විශාල අර්බුද ගණනාවක් සම්බන්ධයෙන් කතා බස් වූනා එහිදී ජනාධිපතිවරයා දිගින් දිගටම ජාතික ගැටළුව සම්න්ධයෙන් 13 වෙනි සංශෝධනයට එහා ගිය විසදුමක් සම්බන්ධයෙන් කරුණු මතු කර තිබුනා. මෙය තමයි මේ ව්‍යවස්ථා සංශෝධනය වෙනස්වීම සදහා මුල පුරන්නේ මේ වෙලාවේ මේ තත්්ත්වය සගවා ගෙන සිටින්නේ දේශපේ‍්‍රමය ඉදිරියට දමාගෙන මැතිවරණ කරන අයට එමගින් පාඩුවක් වන නිසයි.
17 වන ආණ්ඩුක්රම ව්‍යවස්ථාව බලගන්වන්න ඕන කියන චම්පික මහත්තයා තමයි 17 වන සංශෝධනය ගෙන එන වෙලාවේ එයට විරුද්ධ වූ එකම පුද්ගලයා. පසුගිය දවස්වල යුරෝපා සංගමය සමග ජී.එස්.පී. ප්ලස් සම්බන්ධයේන කතාබහ කිරීමට ගිය දූතයන්ට පවසා තිබෙනවා. 17 වන සංශෝධන බලාත්මක කරන ලෙස මේ හදිසි වෙනසට හේතුව එයයි.
ආණ්ඩුව කියනවා 17 වන සංශෝධනය ගෙන ඒම සිදුවන්නේ මහ මැතිවරණයෙන් පස්සේයි ඒ නිසා එය ගෙනඒමට ඡන්දය ලබාදෙන්න යැයි කියනවා. ප‍්‍රශ්නය තිබෙන්නේ 17 වන සංශෝධනය අවශ්‍ය වන්නේ මැතිවරණ සදහායි ඉන් පසුව එය වැඩක් නැහැ. මේ සිදුකරන්නේ නීතියට පිටතින් බලය ගෙන ඒ බලය තහවුරු කරගැනීම සදහා ව්‍යවස්ථා වෙනස්කම් සිදුකරන එකයි.
මෙම මාධ්‍ය හමුවට ජනතා විමුක්ති පෙරමුණේ මධ්‍යම කමිටු සාමාජික දුමින්ද නාගමුව මහතාද සහභාගී විය. lankatruth
ඇමති චන්ද්‍රසිරි ගජධීරගේ ආධාරකරුවන් පහරදී සන්ධානයේම ආධාරකරුවෙක් ඝාතනය කරයි
ඊයේ (28) රාත්‍රී මාතර, වැලිගම, කොටවිල ප්රදේශයේ පැවැති එක්සත් ජනතා නිදහස් සන්ධාන මැතිවරණ ප්‍රචාරක රැස්වීමක් අතරතුර මනාප පොරයක් හේතුවෙන් හටගත් ගැටුමකදී පහරකෑමට ලක්වූ එක් ආධාරකුරවකු මියගොස් තවත් ආධාරකරුවන් දෙදෙනෙකු බරපතල තුවාල ලබා රෝහල්ගත කර ඇති බව වාර්තාවේ.
අමාත්‍ය චන්ද්‍රසිරි ගජධීර මහතා විසින් මෙම රැස්වීම සංවිධානය කර තිබූ අතර ඒ සදහා එක්සත් ජනතා නිදහස් සන්ධානයේ මාතර දිස්ත්‍රික් අපේක්ෂකයින්වන මහින්ද යාපා, ලක්ෂ්මන් යාපා ඇතුළු අපේක්ෂකයින් සහ ආධාරකරුවන් සහභාගී වී ඇත.
මෙම ගැටුම සිදුව ඇත්තේ ප්‍රචාරක රැස්වීමෙන් අනතුරුව පැවැති සංගීත ප්‍රසංගයක් අතරතුර රාත්‍රී 10.00ට පමණය. සන්ධාන ආධාරකරුවන් අතර මනාප සම්බන්ධයෙන්වූ සිද්ධියක් ගැටුමට මුල්වී තිබේ.
මෙහිදී පහරදීම සිදුකර ඇත්තේ අමාත්‍ය චන්ද්‍රසිරි ගජධීරගේ ආධාරකරුවන් පිරිසකි. ඔවුන් එම රැස්වමි පැමිණ සිටි වෙනත් සන්ධාන අපේක්ෂකයකුගේ ආධාරකරුවන් පිරිසකට මෙසේ පහරදී එක් අයෙකු ඝාතනයකර තිබේ. පහරකෑමෙන් මරුමුවට පත්ව ඇත්තේ වැලිගම, කොටවිල පදිංචි 21 හැවිරිදි තිවංක සදකැලුම් නැමැති තරුණයාය. තුවාල ලැබූ අනෙකුත් ආධාරකරුවන් දෙදෙනා මාතර රෝහලට ඇතුළත්කර තිබේ.
කෙසේ වෙතත් සිද්ධිය සම්බන්ධයෙන් මේවන තෙක් කිසිවෙකුත් අත්අඩංගුවට ගැනීමට පොලීසිය කටයුතු කර නොමැත.lankatruth
විජේදාස රාජපක්ෂගේ පනත සාකච්ඡාවට ගන්න බැරි බව පාර්ලිමේන්තු මහලේකම් දැනුම් දෙයි
විශ්‍රාමික හමුදා නිලධාරීන්ට සහ සෙබළුන්ට හමුදා පනත අදාළ නොවන ලෙසට සංශෝධනය කරන ලෙස පාර්ලිමේන්තු මන්ත්‍රී විජේදාස රාජපක්ෂ මහතා ඉදිරිපත් කළ පෞද්ගලික මන්ත්‍රී යෝජනාව 6 වැනිදා ඉදිරිපත් කිරීමට හැකියාවක් නොමැති බව පාර්ලිමේන්තු මහලේකම්වරයා විජේදාස රාජපක්ෂ මහතාට දැනුම්දී තිබේ.
එහිදී පාර්ලිමෙන්තු මහලේකම් ධම්මික දිසානායක මහතා පෙන්වාදී ඇත්තේ එළඹෙන අප්‍රේල් 06 වනදා පාර්ලිමේන්තුව නැවත රැස් කරන්නේ හදිසිනීති රෙගුලාසි සම්මත කර ගැනීමට පමණක් බැවින් එදින හමුදා පනතට අදාළ කටයුතු කිරීමට අවකාශයක් නොමැති බවයි.lankatruth
දරුවාට කිරිපිටි පැකට්ටුවක් ගන්න මව රන්මාලයක් කොල්ලකයි
සිය දරුවාගේ කුසගින්න නිවා දැමීම සදහා කාන්තාවකගේ රන් මාලයක් කොල්ලකෑ බව කියන එක් දරු මවක් පසුගිය 27 වනදා දෙනියාය පොලීසිය විසින් අත්අඩංගුව ගෙන තිබේ. අත්අඩංගුවට ගැනීමෙන් අනතුරුව පොලීසිය සිදුකළ ප්‍රශ්න කිරීම්වලදී අනාවරණයවී ඇත්තේ අවුරුදු එක හමාරක් වියැති සිය දරුවාට ආහාර සදහා යමක් සොයාගැනීමට දෙනියාය නගරය පුරා දවසක් ඇවිද ඇති ඇය එය අසාර්ථකවීමෙන් අනතුරුව මහ මග ගමන් ගත් කාන්තාවකගේ රන් මාලය මෙලෙස කොල්ලකෑමට පෙළඹී තිබේ.
දෙනියාය නගරයේ මහ මග ගමන් කරමින් සිටි කාන්තාවකගෙන් මෙලෙස කොල්ල කා ඇත්තේ රුපියල් 23500ක් වටිනා රන් මාලයකි. ඇය එම රන් මාලය රැගෙන පල්ලේගම ප්රදේශයේ බැංකුවකට රුපියල් 12000කට උගස්කර තිබේ. පසුව ඇය අත් අඩංගුවට ගත් අවස්ථාවේදී ඇය මිලදීගත් කිරිපිටි පැකැට්ටුව සහ ඉතිරි මුදල් සියල්ල සොයා ගැනීමට පොලීසිය සමත්ව තිබේ.lankatruth
සහනාධාර පොහොර හොරෙන් අදියි
මහින්ද චින්තන සහනාධාර ක්‍රමය යටතේ ගොවීන්ට බෙදා හැරීමට නියමිතව තිබු පොහොර තොගයක් හොර රහසේ ප්‍රවාහනය කරමින් සිටි සැකකරුවෙකු අත්අඩංගුවට ගෙන තිබේ.
මුන්වත්ත , පදියපැලැල්ල ප්‍රදේශයේදී ඊයේ පස්වරුවේ ලොරි රථයක් පරීක්ෂා කිරීමේදී මෙම පොහොර තොගය සොයාගත් බව පොලීසිය සඳහන් කරයි.
එහි තිබු කිලෝ ග්‍රෑම් 50 බැගින් වු සහනාධාර පොහොර මිටි 6ක් මතුරට පොලිසිය බාරයට ගෙන ඇත.
සැකකරු අද අධිකරණයට ඉදිරිපත් කිරීමට නියමිතව ඇතැයි සඳහන් වේ. adaderana
අදත් ඡන්ද පත්‍රිකා බෙදයි
මහ මැතිවරණයට අදාළ නිල ඡන්ද දැන්වීම් පත්‍රිකා බෙදා හැරීමේ විශේෂ වැඩපිළිවෙළ අද දෙවන දිනටත් ක්‍රියාත්මක වේ.
තැපැල් දෙපාර්තමේන්තුව ජනතාවගෙන් ඉල්ලා සිටින්නේ ගෙන්ගෙට පැමිණ බෙදා හරින නිල ඡන්ද දැන්වීම් පත්‍රිකා ලබා ගැනීම සඳහා නිවසේ රැඳී සිටිමින් සහය දක්වන ලෙසයි.
මේ සඳහා දිවයින පුරා 7,500ක පමණ තැපැල් නිලධාරීන් පිරිසක් යොදවා තිබේ. නිල ඡන්ද දැන්වීම් පත්‍රීකා බෙදා හැරීමේ විශේෂ දිනයක් ඊයේ ද ක්‍රියාත්මකවිය. පසුගිය 23 වැනිදා බෙදා හැරීම් ආරම්භ කළ නිල ඡන්ද දැන්වීම් පත්‍රීකා වලින් සියයට 35ක් පමණ මේ වන විට බෙදා හැර අවසන් බව තැපැල් දෙපාර්තමේන්තුව සඳහන් කරයි.
ඡන්ද පත්‍රීකා බෙදා හැරීම ලබන 31 වන දිනෙන් අවසන් වීමට නියමිතව ඇත.
කෙසේ වුවද එම කාලය තුළ නිල ඡන්ද දැන්වීම් පත්‍රිකා ලබා ගත නොහැකි වු පුද්ගලයන්ට සිය අනන්‍යතාවය තහවුරු කිරීමෙන් පසු ප්රදේශයේ තැපැල් කාර්යාල වලින් ඒවා ලබා ගැනීමට ද පහසුකම් සලසා තිබේ. adaderaana
විපක්ෂයෙන් පලිගන්න මෙහෙව් ආණ්ඩුවක් තිබුණේ නෑ
විපක්ෂයෙන් මෙතරම් පලිගන්නා ආණ්ඩුවක් ඉතිහාසයේ කිසිදිනක නොතිබු බව ශ්‍රී ලංකා නිදහස් පක්ෂ මහජන පාර්ශවයේ නායක මංගල සමරවීර මහතා පවසයි.
විපක්ෂයට උදව් කළ සෑම දේශපාලන පක්ෂයකම පාක්ෂිකයන්ටද වත්මන් ආණ්ඩුව විසින් හිරිහැර කරන බව ඔහු පෙන්වා දෙයි.
මාතර ප්රදේශයේ පැවති ජනරැලියකට එක්වෙමින් සමරවීර මහතා මේ අදහස් පළ කරන ලදී. එහිදී ඔහු වැඩිදුරටත් කියා සිටියේ මෙම ආණ්ඩුව පෙරළා දමා රට තුළ යළි ප්රජාතන්ත්රවාදය ස්ථාපිත කළ යුතු බවයි.
ඒ සඳහා එක්සත් ජාතික පෙරමුණ ප්රමුඛ සමස්ත විපක්ෂයම සුදානමින් සිටින බව ද මංගල සමරවීර මහතා පැවසීය. adaderana
නීති හදන්නට හොරුන්ට තැන දෙන්න එපා
පාර්ලිමේන්තුවේ නීති සාදන පුද්ගලයන් සත්‍ය වශයෙන්ම නීති රකින පුද්ගලයන්දැයි ජනතාව අ‍වබෝධ කර ගත යුතු බව ජනතා විමුක්ති පෙරමුණේ නායක සෝමවංශ අමරසිංහ මහතා පවසයි.
නීති සෑදීමේ කාර්යයට එක්ව ඇත්තේ සොරුන් , වංචාකරුවන් සහ දාමරිකයන් ඇතුළු පිරිස් බව ඔහු සඳහන් කරයි.
එබැවින් යළිත් වරක් එවැනි පුද්ගලයන්ට ජනතාව වෙනුවෙන් නීති සෑදීම සඳහා පාර්ලිමේන්තුවට යෑමට අවස්ථාව ලබාදීම පිළිබඳ සලකා බැලිය යුතු බව අමරසිංහ මහතා පෙන්වා දෙයි.
අකුරැස්ස ප්රදේශයේ පැවති ජනහමුවක් අමතමින් ඔහු මෙම අදහස් පළ කරන ලදී. adaderana
යුද්ධයට දැන් හොඳ වෙළෙඳපොළක් නෑ
යුද්ධය ගෙන්ගෙට ගොස් අලෙවි කිරීමේ ව්‍යාපාරයක් ආණ්ඩු පක්ෂය විසින් ආරම්භ කර ඇතැයි එක්සත් ජාතික පක්ෂ පාර්ලිමේන්තු මන්ත්‍රීධුර අපේක්ෂක මනූෂ නානායක්කාර මහතා පවසයි.
වර්තමානයේ යුද්ධයට වෙළඳපළක් නොමැති බව ඔහු පෙන්වා දෙයි.
ගාල්ල ප්රදේශයේ පැවති ජනහමුවක් අමතමින් මනූෂ නානායක්කාර මහතා සඳහන් කළේ යුද්ධය ගැන කථා කිරීම නොව ජනතාවට ජිවත් වීමේ මගක් සලසා දීම පිළිබඳ අවධානය යොමු විය යුතු බවයි.
මැතිවරණයෙන් පසු ජනතාව තවදුරටත් පීඩාවට පත්වනු ඇති බව ද ඔහු සඳහන් කළේය.. adaderana
කටවුට් ගලවන්නැයි ආයෙමත් නියෝගයක්
සියලුම මැතිවරණ ප්‍රචාරක පෝස්ටර් , කටවුට් සහ බැනර් අප්‍රේල් පස් වන දිනට පෙර ගලවා ඉවත් කරන ලෙස මැතිවරණ කොමසාරිස් දයානන්ද දිශානායක මහතා පොලිස්පති මහින්ද බාලසුරිය මහතා වෙත නැවතත් නියෝග කර තිබේ.
අපේක්ෂකයන්ගේ ප්‍රචාරක කාර්යාලවල සහ එම භූමිවල ඇති ප්‍රචාරක පුවරු ද වහා ගලවා ඉවත් කළ යුතු බවට නියෝග කර ඇති බව සඳහන් වේ. මැතිවරණ කොමසාරිස්වරයාගේ ප්‍රධානත්වයෙන් පැවති සාකච්ඡාවකින් අනතුරුව එම නියෝගය දී ඇතැයි මැතිවරණ මහලේකම් කාර්යාලය සඳහන් කරයි.
මීට පෙර අවස්ථා කිහිපයකදී ද මැතිවරණ කොමසාරිස්වරයා විසින් ප්‍රචාරක පුවරු ඉවත් කරන ලෙසට පොලිස්පතිවරයාට නියෝග කර තිබුණි. මේ අතර පාරිභෝගික කටයුතු අධිකාරියේ අධ්‍යක්ෂ ජනරාල් ආර්.ජයසුරිය මහත්මියගේ සේවය අත්හිටුවීම වහාම අවලංගු කරන ලෙස මැතිවරණ කොමසාරිස්වරයා එම අධිකාරියේ සභාපතිවරයා වෙත නියෝග කර තිබේ.
ජයසුරිය මහත්මිය කළ පැමිණිල්ලකට අනුව මැතිවරණ කොමසාරිස් දයානන්ද දිශානායක මහතා මෙම නියෝගය කර ඇති බව මැතිවරණ මහලේකම් කාර්යාලය සඳහන් කරයි.
මැතිවරණ කාල සීමාව තුළදී රාජ්‍ය සේවයේ ස්ථාන මාරු කිරීම් , පත්කිරීම් හා උසස් කිරීම් ඇතුළු කටයුතු සිදුකිරීම නීති විරෝධි බැවින් මැතිවරණයෙන් පසු අදාළ තීරණය සම්බන්ධයෙන් පියවර ගන්නා ලෙස මැතිවරණ කොමසාරිස්වරයා දන්වා ඇත. adaderana
Sunday, March 28, 2010
රනිල්ගෙන් ඉල්ලීමක්
එක්සත් ජාතික පක්ෂයෙන් ඉවත් කළ මන්ත්‍රීවරුන් වෙනුවට නම් කළ නියෝජිතයන්ට ලබන 6 වැනිදා පාර්ලිමේන්තුවේදී දිවුරුම් දීමට අවස්ථාව සලසා දෙන ලෙස විපක්ෂ නායක රනිල් වික්‍රමසිංහ මහතා කථානායකවරයාගෙන් ඉල්ලා සිටියි.
විපක්ෂ නායක රනිල් වික්‍රමසිංහ මහතා විසින් ලිපියක් මගින් කථානායක වි.ජ.මු. ලොකුබණ්ඩාර මහතාගෙන් මෙම ඉල්ලීම කර තිබේ. ඔහු එමගින් පෙන්වා දෙන්නේ ආණ්ඩුක්රම ව්‍යවස්ථාවට අනුව ජොන්ස්ටන් ප්‍රනාන්දු සහ ඉන්දික බණ්ඩාරනායක යන මහත්වරුන‍්ගේ පාර්ලිමේන්තු මන්ත්‍රීධුරය ජනවාරි 18 වන දිනෙන් පසු අහෝසි වී ඇති බවය. එබැවින් අදාළ කරුණ සම්බන්ධයෙන් නීතිපතිවරයාගේ මත විමසීමක් අවශ්‍ය නොවන බව විපක්ෂ නායකවරයා පවසයි.
අණ්ඩුක්‍රම ව්‍යවස්ථාව අර්ථනිරූපනය කිරීමට නීතිපතිවරයාට බලයක් නොමැති බව රනිල් වික්‍රමසිංහ මහතා අවධාරණය කරයි. නීතිපතිවරයාගේ මතය සැළකිල්ලට ගනිමින් අදාළ පුද්ගලයන්ගේ මන්ත්‍රීධුරයන් තවදුරටත් වලංගු වන බව රජය කර ඇති ප්‍රකාශ ප්‍රතික්ෂේප කරන බව ද රනිල් වික්‍රමසිංහ මහතා එම ලිපිය මගින් පෙන්වා දෙයි. adaderana
යහපත් හෙටක් වෙනුවෙන් එක්වන්න
මහින්ද චින්තනය සියයට සියයක් ක්‍රියාත්මක කර රටේ අනාගත පරපුරට යහපත් හෙටක් ගොඩනැගීම සඳහා එක්වන්නැයි ජනාධිපති මහින්ද රාජපක්ෂ මහතා ජනතාවගෙන් ඉල්ලා සිටියි.
මහින්ද චින්තන වැඩපිළිවෙළ රටේ ආර්ථිකයට මෙන්ම සමාජීය තත්ත්වයට නැවුම් මාවතක් ලබාදුන් බව ජනාධිපතිවරයා පෙන්වා දෙයි. අද පෙරවරුවේ පැල්මඩුල්ල මහජන ක්‍රිඩාංගණයේ පැවති ජනරැලියක් අමතමින් මහින්ද රාජපක්ෂ මහතා මේ අදහස් පළ කළේය. මේ වන විට ගුවන් තොටුපල, වරාය, අධ්‍යාපන, සෞඛ්‍ය සහ සංචාරක ක්ෂේත්‍රවල නව ප්‍රබෝධයක් උදා වී ඇති බව එහිදි වැඩිදුරටත් අදහස් දැක්වු ජනාධිපතිවරයා පෙන්වා දුන්නේය.adaderana
වැව ඉදිකළත් තවමත් වතුර නෑ
මාළිගාවිල සද්ධාතිස්ස වැව ඉදිකර වසර 12ක පමණ කාලයක් ගත වුවද මෙතෙක් එහි ජලය ගොවිතැන් කටයුතු සදහා නිකුත් කර නැතැයි ගොවීන් චෝදනා කරයි.
මේ හේතුවෙන් ගොවීන් විශාල සංඛ්‍යාවක් දුෂ්කරතාවට පත්ව ඇති බව සඳහන්ය. මේ අතර අදාළ වැව් සොරොව්ව බලහත්කාරයෙන් විවෘත කිරීමට ඊයේ ගොවීන් උත්සාහ ගෙන තිබේ. කෙසේ වුවද ඉදිරි මැතිවරණයෙන් අනතුරුව වැව විවෘත කිරීම පිළිබඳ තීරණයක් ගන්නා බව බලධාරීන් ප්‍රකාශ කර ඇත. adaderana
ව්‍යවස්ථා සංශෝධනයට රජය විරුද්ධ නෑ
17 වන ආණ්ඩුක්රම ව්‍යවස්ථා සංශෝධනය ගෙන ඒමේ අරමුණ පිළිබඳ කිසිදු විරෝධයක් ආණ්ඩුවට නැති බව පරිසර අමාත්‍ය පාඨලී චම්පික රණවක මහතා පවසයි.
එම සංශෝධනය සඳහා අනුගමනය කර ඇති ක්‍රම‍වේදයේ ගැටලු පවතින බව ඔහු සඳහන් කරයි. එබැවින් අදාළ ගැටලු වලට විසඳුම් සොයන ආකාරයේ වෙනස්කම් සිදුකළ යුතු බව අමාත්‍යවරයා පෙන්වාදෙයි. අද කොළඹ පැවති මාධ්‍ය හමුවකට එක්වෙමින් අමාත්‍ය පාඨලී චම්පික රණවක මහතා මේ බව ප්‍රකාශ කළේය. adaderana
අද එජාපයක් නෑ
වර්තමානයේ එක්සත් ජාතික පක්ෂයක් නැති බව සෞඛ්‍ය අමාත්‍ය නිමල් සිරිපාල ද සිල්වා මහතා පවසයි.
එම පක්ෂයේ නායකයන් විසින්ම ඇතැම් අයට මනාප ලබා නොදෙන ලෙස ජනතාවගෙන් ඉල්ලා සිටින බව අමාත්‍යවරයා පෙන්වාදෙයි. වියලුව ප්රදේශයේ පැවති ජනහමුවක් අමතමින් නිමල් සිරිපාල ද සිල්වා අමාත්‍යවරයා මේ අදහස් පළ කළේය. ඌව පළාතේ තමා ආරම්භ කළ සියලු ව්‍යාපෘති ක්‍රියාත්මක කර ඇති බව එහිදි වැඩිදුරටත් කරුණු දක්වමින් අමාත්‍යවරයා ප්‍රකාශ කළේය. adaderana
ෆොන්සේකා දැඩි අසනීපයෙන්
ජෙනරාල් සරත් ෆොන්සේකා මහතාගේ අසනීප තත්ත්වය පිළිබඳව බලධාරීන්ගේ අවධානය යොමු විය යුතු බව අනෝමා ෆොන්සේකා මහත්මිය පවසයි.
මේ වන විට සරත් ෆොන්සේකා මහතා දැඩි අසනීප තත්ත්වයෙන් පසුවන බව ඇය පෙන්වාදෙයි. අද කොළඹ පැවති මාධ්‍ය හමුවකට එක්වෙමින් අනෝමා ෆොන්සේකා මහත්මිය මේ බව සඳහන් කළේය. සරත් ෆොන්සේකා මහතාට ආහාර ගෙන යාම සම්බන්ධයෙන් ඥාතීන්ගේ නාම ලේඛනයක් ඉදිරිපත් කළද ඊට ද මෙතෙක් අවසර ලැබී නැති බව ඇය වැඩිදුරටත් ප්‍රකාශ කර සිටියේය. adaderana
විපක්ෂයේ වැඩි පිරිසක් අද රජය සමගයි
විපක්ෂයේ සියයට 15 කට වඩා වැඩි පිරිසක් අද රජය සමග එක්ව සිටින බව කෘෂිකර්ම හා ගොවිජන සේවා අමාත්‍ය මෛත්‍රීපාල සිරිසේන අමාත්‍යවරයා පවසයි.
ඉදිරි දින කිහිපය තුළ දී මෙම තත්ත්වය තවත් සතුටුදායක වී හැකි බව ඔහු සඳහන් කරයි. අද රටේ බහුතර ජනතාවගේ බලාපොරොත්තුව ශක්තිමත් පාර්ලිමේන්තුවක් තුළින් මහින්ද චින්ත ඉදිරි දැක්ම ක්‍රියාත්මක කිරීම බව අමාත්‍යවරයා අවධාරණය කරයි. මේ වන විට රජයට හුදකලා සටනක නිරත වීමට සිදු වී ඇති බව ද මෛත්‍රීපාල සිරිසේන අමාත්‍යවරයා මෙහි දී වැඩි දුරටත් ප්‍රකාශ කළේය. adaderana
මුස්ලිම් ජනතාව බේරාගත්තේ මමයි -ජනපති
වේලුපිල්ලෙයි ප්‍රභාකරන් මුස්ලිම් ජනතාව සිය ගම්බිම් වලින් පන්නා දැමූ අවස්ථාවේ දී ඔවුන් බේරා ගැනීමට කටයුතු කළේ තමන් බව ජනාධිපති මහින්ද රාජපක්ෂ මහතා පවසයි.
මේ වන විට මනාව හිමිකම් ගැන කතා කරන විපක්ෂය සහ ජාත්‍යන්තර සංවිධාන මුස්ලිම් ජනතාවගේ එම අයිතිවාසිකම් වෙනුවෙන් පෙනී නොසිටි බව ඔහු සඳහන් කරයි. ඊයේ රාත්‍රී මැද කොළඹ ප්රදේශයේ පැවති ජනරැළියකට එක් වෙමින් ජනාධිපතිවරයා මෙම අදහස් පළ කළේය. අනාගත දරු පරපුර ගැන සිතා කටයුතු කිරීමට හොඳම කාලය මේ වන විට එළඹ ඇති බව ජනාධිපති මහින්ද රාජපක්ෂ මහතා මෙහි දී වැඩි දුරටත් ප්‍රකාශ කළේය.adadearana
දුම්රිය තුළ සිඟමනට තහනමක්
දුම්රිය මැදිරි තුළ සිඟමනේ යෙදීම අප්‍රේල් 01 වනදා සිට තහනම් කිරීමට දුම්රිය දෙපාර්තමේන්තුව පියවර ගෙන තිබේ.
යාචකයින් මගින් මගී ජනතාවට සිදු වන විවිධ කරදර හා හිරිහැර වළක්වා ලීමේ අරමුණින් මෙම පියවර ගෙන ඇති බව දුම්රිය වාණිජ අධිකාරි විජය සමරසිංහ මහතා ප්‍රකාශ කළේය. දුම්රිය තුළ සිඟමනේ යෙදීම මේ දින වල බහුලව දක්නට ලැබෙන ඇති අතර ව්‍යාපාරයක් ලෙස මෙය කරගෙන යන පුද්ගලයින් ද සිටින බව දුම්රිය දෙපාර්තමේන්තු පවසයි.
මෙමගින් බොහෝ දූෂණ සහ වංචාවන් දුම්රිය තුළ සිදුවන බවට ද සිදු කළ සමීක්ෂණ වල දී හෙළී වී ඇත. එම නිසා අප්‍රේල් මස 01 වන දින සිට දුම්රිය තුළ සිඟමන් යැදීම තහනම් වන අතර දුම්රිය ආරක්ෂක නිලධාරීන්ගේ සහය මේ සඳහා යොදා ගන්නා බව විජය සමරසිංහ මහතා වැඩි දුරටත් සඳහන් කළේය.adaderana
මෙරට ආයෝජනයට මැලේසියාවේ දැඩි උනන්දුව
මෙරට ආයෝජනය කිරීම සඳහා මැලේසියානු ආයෝජකයින්ගේ දැඩි උනන්දුවක් ඇති බව ශ්‍රී ලංකාවේ මැලේසියානු මහ කොමසාරිස් රසේලි ඉස්මයිල් මහතා පවසයි.
එවැනි ආයෝජන අවස්ථා සොයා බැලීම සඳහා ව්‍යාපාරික කණ්ඩායමක් මෙරටට පැමිණ ඇති බව ඔහු සඳහන් කරයි. මෙරට ප්‍රධාන විදේශ ආයෝජකයෙකු ලෙස මේ වන විට මැලේසියාව ප්‍රමුඛස්ථානයේ සිටියි.
විශේෂයෙන්ම විදුලි සංදේශ ක්ෂේත්‍රයේ ආයෝජන රැසක් සිදු කර ඇති අතර සංචාරක, මාර්ග, නිවාස, යටිතල පහසුකම් සංවර්ධන ක්ෂේත්‍ර වල ද ආයෝජන කිරීමට මැලේසියානු අයෝජකයන්ගේ උනන්දුවක් ඇති බව ඉස්මයිල් මහතා පෙන්වා දෙයි. ශ්‍රී ලංකාවේ මැලේසියානු මහකොමසාරිස් ඉස්මයිල් මහතා වැඩි දුරටත් ප්‍රකාශ කළේ දෙරට අතර ව්‍යාපාරික සබඳතා පුළුල් කර ගැනීම සඳහා ද අවධානය යොමු වී ඇති බවය. adaderana
දුම්රිය අනතුරකින් සිව් දෙනකුට තුවාලයි
උඩරට දුම්රිය මාර්ගයේ කඩුගන්නාව ප්රදේශයේ දී දුම්රිය හරස් මාර්ගයක සිදු වූ අනතුරකින් පුද්ගලයින් සිව් දෙනකු තුවාල ලබා රෝහල් ගත කර තිබේ.
ඊයේ පස්වරුවේ බදුල්ල සිට කොළඹ බලා ධාවනය වූ පොඩි මැණිකේ දුම්රියට ඌරාපොළ දුම්රිය හරස් මාර්ගයේ දී ලොරියක් ගැටීමෙන් මෙම අනතුර සිදු වී ඇති බව පොලිස් මාධ්‍ය ප්‍රකාශක පොලිස් අධිකාරි ප්‍රිශාන්ත ජයකොඩි මහතා ප්‍රකාශ කළේය. අනතුරින් ලොරියේ ගමන් ගත් පුද්ගලයින් සිව් දෙනෙකු තුවාල ලබා මහනුවර රෝහලට ඇතුළත් කර ඇත. අනතුර සම්බන්ධයෙන් කඩුගන්නාව පොලිසිය වැඩි දුර පරීක්ෂණ පවත්වයි. adaderana
ළමුන්ගේ රැකවරණයට නව වැඩපිළිවෙළක්
බරපතල හා අවදානම් තත්ත්වයන්ට මුහුණපාන ළමුන්ගේ නිසි ආරක්ෂාව සහ රැකවරණය සඳහා පරිවාස හා ළමා ආරක්ෂක දෙපාර්තමේන්තුවෙන් නව වැඩපිළිවෙළක් ආරම්භ කර තිබේ.
මව, පියා දෙදෙනාම සිටිය ද සමහර ළමුන්ට නිසි ආරක්ෂාව සහ රැකවරණයක් නොලැබෙන අවස්ථා වර්තමානයේ දී වාර්තා වේ. එවන් ළමුන්ගේ ආරක්ෂාව හා රැකවරණය සැලසීම සඳහා පරිවාස හා ළමා ආරක්ෂක දෙපාර්තමේන්තුව වැඩසටහන් රැසක් ආරම්භ කර ඇත. මේ අතර ළමුන්ට නිසි ආරක්ෂාවක් සහ රැකවරණයක් ලබා දීමට නොහැකි නම් දරුවන් විනාශ නොකර ඔවුන් පිළිබඳව ග්‍රාම නිලධාරීවරයා මාර්ගයෙන් පරිවාස හා ළමා ආරක්ෂක දෙපාර්තමේන්තුවට දැනුම් දෙන ලෙස එම දෙපාර්තමේන්තුව ජනතාවගෙන් ඉල්ලීමක් කරයි.adaderana
Saturday, March 27, 2010
හම්බන්තොට වරායේ පළමු අදියර අගෝස්තු මාසයේ අවසන්
හම්බන්තොට වරායේ පළමු අදියරේ ඉදිකිරීම් කටයුතු මේ වසරේ අගෝස්තු මාසය වන විට අවසන් කළ හැකි බව වරාය හා සිවිල් ගුවන් සේවා අමාත්‍ය චමල් රාජපක්ෂ මහතා පවසයි.
ඒ සඳහා අමෙරිකානු ඩොලර් මිලියන 360 ක මුදලක් වැය වනු ඇති බව අමාත්‍යවරයා සඳහන් කරයි. පළමු අදියර අවසන් වීමත් සමග එම වරාය සඳහා පැමිණෙන පළමු නෞකාව නොවැම්බර් මාසය වන විට යාත්‍රා කරනු ඇති බවට වරාය හා සිවිල් ගුවන් සේවා අමාත්‍යාංශය විශ්වාසය පළ කරයි. එම නෞකාව මගින් රබර්, සීනී ඇතුළු මෙරට නිෂ්පාදිත අපනයනය කිරීමට හැකි වන බව අමාත්‍ය චමල් රාජපක්ෂ මහතා අවධාරණය කරයි. adaderana
නිල ඡන්ද දැන්වීම් පත්‍රිකා බෙදීම හෙට
ඉදිරි මහ මැතිවරණයට අදාළ නිල ඡන්ද දැන්වීම් පත්‍රිකා බෙදාහැරීම හෙට දිනයේ ද සිදුකෙරෙන බව තැපැල් දෙපාර්තමේන්තුව පවසයි.
සාමාන්‍ය නිවාඩු දිනයක් වුව ද නිල ඡන්ද දැන්වීම් පත්‍රිකා බෙදාහැරීමේ විශේෂ දිනය ලෙස හෙට දිනය ක්‍රියාත්මක වන බව සඳහන්ය. මෙම කටයුතු සදහා තැපැල්කරුවන් 8,000 ක පිරිසක් යොදවා ඇති බව තැපැල් දෙපාර්තමේන්තුව පවසයි.
වතු ආශ්‍රිත ප්‍රදේශවල නිල ඡන්ද දැන්වීම් පත්‍රිකා බෙදාහැරීමේ කටයුතු වෙනුවෙන් පමණක් තැපැල්කරුවන් 400 දෙනෙකුට ආසන්න පිරිසක් යෙදවීමට පියවර ගෙන තිබේ. ලබන 31 වැනිදා දක්වා මෙම කටයුතු සිදුකෙරෙන අතර එම පත්‍රිකා නොලැබුණු අයෙකු වෙතොත් ඉන් පසුව ද තම අනන්‍යතාව තහවුරු කර ප්රදේශයේ තැපැල් කාර්යාලයෙන් අදාළ පත්‍රිකාව ලබාගත හැකි බව මැතිවරණ මහලේකම් කාර්යාලය පවසයි. adaderana
ජවිපෙ ප්‍රධානතම සතුරා මමයි- ලක්ෂ්මන්
ජනතා විමුක්ති පෙරමුණේ ප්‍රධානතම සතුරා බවට තමන් පත්ව ඇති බව එක්සත් ජාතික පක්ෂ නියෝජ්ය මහලේකම් ලක්ෂ්මන් සෙනෙවිරත්න මහතා පවසයි.
පාර්ලිමේන්තු මැතිවරණයට අලියා ලකුණින් තරග කළ යුතු බවට එක්සත් ජාතික පක්ෂය තුළ ප්‍රබල මතවාදයක් ගෙනයාම ඊට හේතුව බව ඒ මහතා පෙන්වා දෙයි. ජනතා විමුක්ති පෙරමුණ සමග සන්ධානගතවී තරග කළේ නම් එක්සත් ජාතික පක්ෂයට හිමිවන මන්ත්‍රී ආසනවලින් 30 කට වැඩි ප්‍රමාණයක් ඔවුන් සතුවන බව ඒ මහතා අවධාරණය කරයි. හාලිඇල ප්රදේශයේ පැවති මැතිවරණ ප්‍රචාරක රැළියක් අමතමින් ලක්ෂ්මන් සෙනෙවිරත්න මහතා මේ අදහස් පළ කළේය. adaderana
වී මිල තීරණය කිරීමේ අයිතිය ගොවි ජනතාවට
එක්සත් ජාතික පක්ෂ පාලනයක් යටතේ වී මිල තීරණය කිරීමේ අයිතිය ගොවි ජනතාවට ලබා දීමේ ක්‍රමවේදයක් සකස් කරන බව එම පක්ෂයේ නායක රනිල් වික්‍රමසිංහ මහතා පවසයි.
වත්මන් කෘෂිකර්ම අමාත්‍යවරයා ගොවිජනතාව අමතක කර කටයුතු කරමින් සිටින බව රනිල් වික්‍රමසිංහ මහතා සඳහන් කළේය. ගබඩා පහසුකම් සහ ගොවි ජනතාව සතු මුදල් ඇත්නම් ඔවුන්ට අඩු මිලට වී විකිණීමේ අවශ්‍යතාවයක් ඇති නොවන බව ඒ මහතා සඳහන් කළේය. රනිල් වික්‍රමසිංහ මහතා මහතා මේ අදහස් පළ කළේ පොළොන්නරු‍වේ පැවති මැතිවරණ ප්‍රචාරක රැළියක් අමතමිනි. adaderana
කාන්තාවන්ගේ දුක නිවීමට ජනපති සමත් වී තිබෙනවා
මෙරට කාන්තාවන්ගේ දුක් ගිනි නිවීමට වත්මන් ජනාධිපති මහින්ද රාජපක්ෂ මහතා සමත් වී ඇති බව අමාත්‍ය ඩලස් අලහස්පෙරුම මහතා පවසයි.
දශක තුනක් පුරා පැවති යුද්ධය හේතුවෙන් වැඩි වශයෙන්ම පීඩාවට පත් වූයේ කාන්තාවන් බව අමාත්‍යවරයා පෙන්වා දෙයි. හම්බන්තොට පැවති කාන්තා හමුවක් අමතමින් ඩලස් අලහස්පෙරුම අමාත්‍යවරයා මේ අදහස් පළ කළේය. adaderana
මාතලේ නිවාස රැසකට සුළඟින් හානි
මාතලේ දිස්ත්‍රික්කයේ ප්‍රදේශ කිහිපයක් හරහා හඹා ගිය සුළඟක් හේතුවෙන් නිවාස රැසක් හානියට පත්ව ඇති බව දිස්ත්‍රික් ආපදා කළමනාකරණ මධ්‍යස්ථානය පවසයි.
ඊයේ දිනයේ බලපෑ මෙම සුළං තත්ත්වය හේතුවෙන් දඹුල්ල ප්‍රාදේශීය ලේකම් කොට්ඨාශයේ ඇතාබැදිවැව සහ පන්නම්පිටිය යන ප්‍රදේශවල නිවාස 16 ක් හානියට පත්ව ඇති බව වාර්තා වේ. ඉන් නිවාස 4 ක් මුළුමනින්ම විනාශ වී ඇති බව මාතලේ දිස්ත්‍රික් ආපදා කළමනාකරණ මධ්‍යස්ථානය සඳහන් කරයි.
මේ හේතුවෙන් පවුල් 22 ක් පමණ අවතැන්ව ඇති අතර එම පවුල් සඳහා අවශ්‍ය සියලු පහසුකම් සැලසීමට පියවර ගෙන ඇති බව ද එම මධ්‍යස්ථානය සඳහන් කළේය. මේ අතර අකුණු සැර වැදීමක් හේතුවෙන් නාවුල, අරංගලවත්ත ප්රදේශයේ කාන්තාවක් ජීවිතක්ෂයට පත්ව තිබේ. adaderana
රත්නපුර රිය අනතුරකින් කාන්තාවක් මියයයි
රත්නපුර, පානදුර මාර්ගයේ ඉංගිරිය රෝහල අසල සිදුවූ රිය අනතුරක් හේතුවෙන් කාන්තාවක් ජීවිතක්ෂයට පත්ව තිබේ.
අද දහවල් 1ට පමණ මෙම අනතුර සිදුව ඇති බව අප වාර්තාකරු පැවසුවේය. පානදුර සිට රත්නපුර බලා ධාවනය වූ පෞද්ගලික බස්රථයක් මාර්ගයේ නවතා තිබූ ලොරියක ගැටී ඇත. සිද්ධියෙන් මියගොස් ඇත්තේ ලොරි රථය අසල සිටි කාන්තාවක බව සඳහන්ය.
මෙම සිද්ධියත් සමග කුපිත වූ ප්‍රදේශවාසීන් බස්රථයට ගල්මුල් ප්‍රහාරයක් එල්ල කළ බව අප වාර්තාකරු පැවසුවේය. මේ හේතුවෙන් මේ වන විට රත්නපුර හා පානදුර අතර පෞද්ගලික බස්රථ ධාවනය තාවකාලිකව ඇණ හිට තිබේ.adaderana
බන්ධනාගාර රැඳවියන්ට නව පුනරුත්ථාපන කලාපයක්
මත්ද්‍රව්‍ය භාවිතා කිරීම සම්බන්ධයෙන් දඩුවම් නියම වූ බන්ධනාගාර රැඳවියන් වෙනුවෙන් ආරක්ෂිත පුනරුත්ථාපන කලාපයක් ස්ථාපිත කිරීමට රජය තීරණය කර තිබේ.
එවැනි නව ආරක්ෂිත පුනරුත්ථාපන කලාප 3 ක් ස්ථාපිත කිරීමට සැලසුම් කර ඇති බව අධිකරණ හා නීති ප්‍රතිසංස්කරණ අමාත්‍යාංශය පවසයි. මහනුවර, පල්ලෙකැලේ හා බදුල්ල, තල්දෙන යන ප්‍රදේශවල එවැනි බන්ධනාගාර ස්ථාපිත කර ඇති අතර හම්බන්තොට වීරවිල ප්රදේශයේ තවත් එවැනිම බන්ධනාගාරයක් ස්ථාපිත කරන බව බන්ධනාගාර දෙපාර්තමේන්තුව සඳහන් කරයි.
රැඳවියන් සමාජගත කිරීම සඳහා ජනාධිපති කාර්ය සාධක බලකාය ඇතුළු මත්ද්‍රව්‍ය නිවාරණ සංවිධානවල සහය ලබාගන්නා බව ද අධිකරණ හා නීති ප්‍රතිසංස්කරණ අමාත්‍යාංශය ප්‍රකාශ කරයි. මත්ද්‍රව්‍ය භාවිතය සම්බන්ධයෙන් දඩුවම් නියමවූ පුද්ගලයින් සහ වෙනත් අපරාධ සම්බන්ධයෙන් වැරදිකරුවන් වූ පුද්ගලයින් එකම බන්ධනාගාරයක් තුළ රැඳවීමෙන් සිදුවිය හැකි අයහපත සලකා බලා මෙම පියවර ගත් බව එම අමාත්‍යාංශය අවධාරණය කරයි. adaderana
අධික වර්ෂාවෙන් නිවාස කිහිපයකට හානි
නුවරඑළිය දිස්ත්‍රික්කයට ඇද හැලෙන අධික වර්ෂාව හේතුවෙන් දික්ඔය වනරාජා වතු යායේ නිවාස කිහිපයකට හානි සිදුවී තිබේ.
වතු නිවාස 5 ක් කඩා වැටීම හේතුවෙන් පුද්ගලයින් 37 දෙනෙකු මේ වන විට අවතැන්ව සිටින බව අප වාර්තාකරු පැවසුවේය. තේ දළු එකතු කිරීමේ මධ්‍යස්ථානයක එම පිරිස තාවකාලිකව රඳවා තැබීමට පියවර ගෙන ඇති බව සඳහන්ය. එම පිරිසට අවශ්‍ය වියළි ආහාර සලාක දින 14 ක් පුරා ලබාදෙන ලෙස නුවරඑළිය දිස්ත්‍රික් ලේකම් ඩී.පී.ජී. කුමාරසිරි මහතා, ප්‍රාදේශීය ලේකම්වරයාට සහ ග්‍රාම නිලධාරීවරයාට දැනුම් දී ඇත. adaderana
එල්.ටී.ටී.ඊ.යට සහය දැක්වූ අයෙක් අත්අඩංගුවට
එල්.ටී.ටී.ඊ. සංවිධානයට සහය දැක්වීමේ චෝදනාව මත පුද්ගලයෙකු ජර්මනියේ දී අත්අඩංගුවට ගෙන තිබේ.
මෙම පුද්ගලයා එල්.ටී.ටී.ඊ සංවිධානයට මුල්‍යාධාර සපයා ඇති බවට අනාවරණය වී ඇති බව සඳහන්ය. ටී.එම්. නම් අනුවර්ත නාමයකින් හැදින්වෙන මෙම පුද්ගලයා දෙමළ සම්බන්ධීකරණ නම් කමිටුවේ ජර්මන් ශාඛාවේ ප්‍රධානත්ව‍ය දරමින් එල්.ටී.ටී.ඊ සංවිධානයට අරමුදල් සපයා ඇති බවට අනාවරණය වී ඇත. මෙම පුද්ගලයා ජර්මනියේ සිටින දෙමළ ජාතිකයින් බියවද්දා ඔවුන්ගෙන් කප්පම් ලබාගෙන ඇති බවටද ජර්මන් ආරක්ෂක අංශ වෙත තොරතුරු ලැබී ඇති බව වාර්තා වේ.adaderana
හිතුමනාපයට ජාතික පාසල් හදන්න බෑ
පාසලක්, ජාතික පාසලක් කිරීම හිතුමනාපයට කළ නොහැකි බව අධ්‍යාපන අමාත්‍ය සුසිල් ප්‍රේමජයන්ත් මහතා පවසයි.
ජාතික පාසලක් වීමට නම් නිසි ප්‍රමිතීන් තිබිය යුතු බව අමාත්‍යවරයා සඳහන් කරයි. ශිෂ්‍ය සංඛ්‍යාවක් වැඩිවූ පමණින් පාසලක් ජාතික පාසලක් බවට පත්කළ නොහැකි බව සුසිල් ප්‍රේමජයන්ත් අමාත්‍යවරයා පෙන්වා දෙයි.
ශිෂ්‍ය සංඛ්‍යාව සමග අධ්‍යයන පොදු සහතික පත්‍ර සාමාන්‍ය පෙළ විභාගය සමත්වීමේ ප්‍රතිශතය සියයට 80 ට වඩා ඉහළ යාම ජාතික පාසලක් කිරීමට මූලික වශයෙන් හේතු වන බව හෙතෙම අවධාරණය කරයි. කොට්ටාව ආනන්ද විද්‍යාලයේ නව ජල ටැංකිය ඉදිකිරීම සඳහා මුල්ගල තබමින් අධ්‍යාපන අමාත්‍යවරයා මේ බව සඳහන් කළේය. adaderana
ජපානයෙන් බිලියන 46 ක ණය මුදලක්
ශ්‍රී ලංකාවට රුපියල් බිලියන 46 ක ණය මුදලක් ලබාදීමට ජපාන රජය තීරණය කර තිබේ.
ව්‍යාපෘති කිහිපයක් සඳහා මෙම ණය මුදල ශ්‍රී ලංකා රජය වෙත ලබාදෙන බව ශ්‍රී ලංකා ජපාන තානාපති කාර්යාලය පවසයි. ග්‍රාමීය මාර්ග සංවර්ධන ව්‍යාපෘති, නැගෙනහිර පළාතේ ජල සම්පාදන සංවර්ධන ව්‍යාපෘති, මහනුවර නගරයේ අපවිත්‍ර ජල කළමනාකරණ ව්‍යාපෘතිය සහ ඉහළ කොත්මලේ ජලවිදුලි බලාගාර ව්‍යාපෘතිය සඳහා මෙම ණය මුදල යෙ‍දවෙන බව සඳහන්ය. මීට අමතරව රුපියල් බිලියන 3 ක ආධාර මුදලක් ද ජපන් රජය විසින් ශ්‍රී ලංකාවට ලබාදීමට තීරණය කර ඇත. adaderana
"මිහිකත හෝරාව" අද
හරිතාගාර වායු විමෝචනය අඩුකිරීම පිළිබඳව ලෝක නායකයින්ගේ අවධානය යොමු කිරීමේ අරමුණින් මිහිකත හෝරාවක් අද පැවැත්වේ.
ශ්‍රී ලංකාව ද මෙම මිහිකත හෝරාවට සම්බන්ධ වන බව පරිසර හා ස්වභාවික සම්පත් අමාත්‍යාංශය පවසයි. ඒ අනුව අද රාත්‍රී 8 සිට 9 දක්වා මිහිකත හෝරාව පැවැත්වෙන බව සඳහන්ය. මෙම හෝරාව තුළ හරිතාගාර වායු විමෝචනයේ ශීඝ්‍රතාව අඩුකිරීම පිළිබඳව විවිධ වැඩසටහන් ක්‍රියාත්මක කිරීමට නියමිතය.
මිහිකත හෝරාව තුළ දිවයිනේ සියලුම රාජ්‍ය ආයතනවල විදුලි පහන් නිවා දමා ඊට දායක වන ලෙස චක්‍රලේඛයක් අදාළ ආයතන වෙත නිකුත් කර ඇති බව පරිසර හා ස්වභාවික සම්පත් අමාත්‍යාංශය සඳහන් කරයි. adaderana
රටට වැඩ කරන අයට නිසිතැන
රටට වැඩ කරන අයට නිසිතැන ලබාදීමට තමා පසුබට නොවන බව ජනාධිපති මහින්ද රාජපක්ෂ මහතා පවසයි.
පක්ෂ, පාට, ජාති ආගම් වශයෙන් බෙදී නොසිට රටට වැඩ කළ යුතු කාලය එළඹ ඇති බව ජනාධිපතිවරයා පෙන්වාදෙයි. ඊයේ පස්වරුවේ ගාල්ල සමනළ ක්‍රීඩාංගණයේ පැවති මැතිවරණ ප්‍රචාරක රැළියකට සහභාගී වෙමින් ඔහු මේ බව ප්‍රකාශ කළේය.
රට ගොඩනැගීමේ පරම බලය පැවරී ඇත්තේ ජනතාවට බව එහිදී තවදුරටත් අදහස් දැක්වූ ජනාධිපති මහින්ද රාජපක්ෂ මහතා පැවසුවේය. ජනතාව වෙනුවෙන් ඉටුකළ යුතු වගකීම නිසි පරිදි ඉටුකළ හැකි නායකයින් පාර්ලිමේන්තුවට පත්කරලීම ජනතාවගේ වගකීම බව ද හෙතෙම අවධාරණය කරයි. adaderana
Wednesday, March 24, 2010
ලසන්ත ඝාතනය ගැන ටිරාන්ගෙන් ප්‍රශ්නකරයි
ශ්‍රීලංකා නිදහස් පක්ෂයේ මහජන පාර්ශවයේ නායක මංගල සමරවීර මහතාගේ සමීපතමයෙකු වන ටිරාන් අලස් මහතාගෙන් අද සවස අපරාධ පරීක්ෂණ දෙපාර්තමේන්තුවේ නිලධාරීන් විසින් ප්‍රශ්න කර තිබේ..
ලසන්ත වික්‍රමතුංග මහතාගේ ඝාතනයට අදාළව මෙසේ පැයක පමණ කාලයක් ප්‍රශ්න කළ බව අද දෙරණ කළ විමසීමකදී ටිරාන් අලස් මහතා කියා සිටියේය.
ලසන්ත වික්‍රමතුංග මහතා ඝාතනය වීමට පැය භාගයකට පෙර තමන්ට දුරකථන ඇමතුමක් දුන් බවත්,එකී අවස්ථාවේදී ඔහු ලුහුබඳිමින් සිටි යතුරුපැදි පිළිබඳ යමක් කීවේදැයි යන්න ප්‍රශ්න කළ බවත් හෙතෙම වැඩිදුරටත් පැවසීය.
මේ පිළිබඳ අප කළ විමසුමකට පිළිතුරු දෙමින් පොලිස් මාධ්‍ය ප්‍රකාශක පොලිස් අධිකාරී ප්‍රිශාන්ත ජයකොඩි මහතා කියා සිටයේ ඒ පිළිබඳ නිසි තොරතුරක් තමන්ට තාමත් නොලැබුණු බවයි. adaderana
