කරුණා අම්මාන්, පිල්ලෙයාන් එල්.ටී.ටී.ඊය පැරදවීමට සහය දුන්නා

එල්. ටී. ටී. ඊ සංවිධානයට එක්ව කටයුතු කළ කරුණා අම්මාන්, පිල්ලෙයාන් හා කුමරන් පද්මනාදන් වැනි පුද්ගලයින් එල්.ටී.ටී.ඊ ය පරාජය කිරීම සඳහා රජයට සහය ලබාදුන් බව ද ආරක්ෂක ලේකම් ගෝඨාභය රාජපක්ෂ මහතා පවසයි. 2005 වසරේ දී වඩාත් ශක්තිමත් වූ එල්.ටී.ටී.ඊ සංවිධානය ජාති භේදයකින් තොරව සිය ත්‍රස්තවාදය ක්‍රියාත්මක කළ බව ඔහු සඳහන් කළේය.

ලක්ෂ්මන් කදිරගාමර් කේන්ද්‍ර‍යේ දී උගත් පාඩම් හා ප්‍රතිසන්ධානය පිළිබඳ ජනාධිපති පරීක්ෂණ කෙ‍මිසම සිව්වන දිනටත් අද රැස් වූ අවස්ථාවේ එම කොමිසම හමුවේ සාක්ෂි ලබාදෙමින් ආරක්ෂක ලේකම් ගෝඨාභය රාජපක්ෂ මහතා මෙම අදහස් පළ කළේය. එල්.ටී.ටී.ඊ සංවිධානය යනු ලෝකයේ දරුණුතම ත්‍රස්තවාදී සංවිධානයක් බව එහිදී ඔහු සඳහන් කළේය. මරාගෙන මැරෙන බෝම්බ නිෂ්පාදනය කරමින් මෙරට නායකයින් මෙන්ම සිවිල් ජනතාව ද ඝාතනය කිරීමට ඔවුන් කටයුතු කළ බවත් ගෝඨාභය රාජපක්ෂ මහතා පෙන්වා දුන්නේය. adaderana.lk

ශ්‍රී ලංකාවේ වෛද්‍ය කණ්ඩායමක් පකිස්ථානයට

පකිස්ථානයේ ගංවතුරින් අවතැන්ව සිටින ජනතාවගේ සෞඛ්‍ය පහසුකම් නංවාලීම සඳහා මෙරටින් 17 දෙනෙකුගෙන් සමන්විත විශේෂ වෛද්‍ය කණ්ඩායමක් අද දිවයිනෙන් පිටත්ව ගොස් තිබේ. ජනාධිපතිවරයා‍ගේ උපදෙස් මත අදාළ වෛද්‍ය කණ්ඩායම අද පිටත් ගිය බව සෞඛ්‍ය අමාත්‍යාංශය සඳහන් කළේය.

මෙම වෛද්‍ය කණ්ඩායමට විශේෂඥ වෛද්‍යවරුන් තිදෙනෙකු ඇතුළු වෛද්‍යවරු 6 දෙනෙක්, හෙදියන් 6 දෙනෙක්, ‍ඖෂධවේදින් දෙදෙනෙක් සහ සහායකයින් දෙදෙනෙක් ද ඇතුළත්ය. මෙම පිරිසට අමතරව රුපියල් ලක්ෂ 25 ක් වටිනා ශල්‍ය ද්‍රව්‍ය සහ ඖෂධ තොගයක් යැවීමට ද පියවර ගත් බව සෞඛ්‍ය අමාත්‍යාංශය සඳහන් කරනු ලැබීය. adaderana.lk

යුද අධිකරණයත් අධිකරණයක්-තීන්දුව ගැන විවාද සුදුසු නෑ

යුද අධිකරණ තීන්දු පිළිබඳ විවාද කිරීමට අවශ්‍ය නම් ඒ සඳහා විශේෂ යෝජනාවක් ගෙන ආ යුතු බව විදේශ කටයුතු අමාත්‍ය මහාචාර්ය ජී.එල්. පීරිස් මහතා අද පාර්ලිමේන්තුවේ දී ප්‍රකාශ කළේය.

යුද අධිකරණය ද අධිකරණ පද්ධතියේ ම කොටසක් බවත්, ඒ අනුව එහි තීරණ පිළිබඳ විවාද කිරීම නුසුදුසු බවත් අමාත්‍යවරයා කියා සිටියේය.

ජෙනරාල් සරත් ෆොන්සේකා මහතාට එරෙහිව පළමු යුද අධිකරණයෙන් ලබාදුන් තීන්දුවට අදාළ සියලුම වාර්තා පාර්ලිමේන්තුවට ඉදිරිපත් කරන ලෙස විපක්ෂ නායකවරයා කථානායකවරයාගෙන් කළ ඉල්ලීම සම්බන්ධයෙන් අද පාර්ලිමේන්තුවේදී අදහස් දක්වමින් හෙතෙම මේ බව සඳහන් කළේය.

යුද අධිකරණයේ තීන්දු විවාදයට ගැනීම ආණ්ඩු ක්‍රම ව්‍යවස්ථාව මෙන්ම පාර්ලිමේන්තු ස්ථාවර නියෝග ද උල්ලංඝණය කිරීමක් බව ජී.එල්. පීරිස් මහතා වැඩිදුරටත් පෙන්වාදුන්නේය. adaderana.lk

ෆොන්සේකාගේ පළමු යුද අධිකරණයේ වාර්තා පාර්ලිමේන්තුවට ඉල්ලයි

සරත් ෆොන්සේකා මහතා සම්බන්ධ පළමු යුද අධිකරණයේ සියලු වාර්තා සහිත ලිපිලේඛන පාර්ලිමේන්තුවට ඉදිරිපත් කිරීමට නියෝග කරන ලෙස විපක්ෂ නායක රනිල් වික්‍රමසිංහ මහතා අද පාර්ලිමේන්තුවේ දී කතානායකවරයාගෙන් ඉල්ලා සිටියේය.

ෆොන්සේකා මහතාගේ ප්‍රජාතන්ත්‍රවාදී අයිතීන් සහ පාර්ලිමේන්තු වරප්‍රසාද උල්ලංඝණය වී ඇති බව විපක්ෂ නායකවරයා මෙහිදී සඳහන් කළේය.

විපක්ෂනායකවරයාගේ කතාවෙන් අනතුරුව ආණ්ඩු පක්ෂය වෙනුවෙන් මහාචාර්ය ජී.එල්. පීරිස් මහතාගේ කතාවාරය පැමිණ තිබුණ ද ඔහු සභාවේ නොසිටි බැවින් අනුර කුමාර දිසානායක මන්ත්‍රීවරයාට කතාවාරය ලබාදීමට මූලාසනය පියවර ගත් බව අප වාර්තාකරු සඳහන් කරයි.

එහෙත් එයින් අනතුරුව ජී.එල්. පීරිස් මහතා සභාවට පැමිණීමෙන් අනතුරුව තම කතාව ආ‍රම්භ කිරීමට උත්සාහ කළ ද එම අවස්ථාවේ සභාවේ නොසන්සුන් තත්ත්වයක් ඇති වී තිබේ.

සභාවේ ඇතිවූ නොසන්සුන්තාව හේතුවෙන් විනාඩි 5 ක කාලයක් සඳහා පාර්ලිමේන්තුව කල්තැබීමට මීට සුළු වේලාවකට පෙර නියෝජ්‍ය කාරක සභා සභාපති චන්ද්‍රරත්න මුරුගේසු මහතා පියවර ගෙන ඇති බවද සඳහන් වේ.

මගේ අපේක්ෂාව අමාරු ඉලක්ක ජයගැනීමයි -රාජිත

වසර 2013 වන විට මෙරට මන්දපෝෂණය පිටුදැකීම තම ඉලක්කය බව ‍ධීවර හා ජලජ සම්පත් අමාත්‍ය රාජිත සේනාරත්න මහතා පවසයි. අසීරු ඉලක්ක ජයගැනීම තම අපේක්ෂාව බව අමාත්‍යවරයා පෙන්වාදෙයි.

ලෝක සෞඛ්‍ය සංවිධානය සැලසුම් කර ඇති පරිදි 2013 වසර වන විට මෙරට මන්දපෝෂණ ප්‍රතිශතය 12% දක්වා අවම කිරීමේ වැඩසටහන අභිබවා මන්දපෝෂණය පිටුදැකීමේ ඉලක්කයකට ක්‍රියා කළ යුතු බව අමාත්‍යවරයා පවසයි.

ධීවර සංවර්ධන ප්‍රවර්ධන වැඩසටහනේ සමාරම්භය වෙනුවෙන් කොළඹ, පදනම් ආයතනයේ අද පෙරවරුවේ පැවති උත්සවයකට සහභාගී වෙමින් රාජිත සේනාරත්න අමාත්‍යවරයා මේ අදහස් පළ කළේය. අදාළ ඉලක්කය සපුරා ගැනීමට නම් මෙරට දැනට පවතින ග්‍රෑම් 31 ක දෛනික මාළු පරිභෝජන මට්ටම 60 දක්වා වැඩිකරගත යුතු බව එහිදී අමාත්‍යවරයා වැඩිදුරටත් පැවසුවේය. adaderana.lk

විදුලියෙන් වන හානි වැලකීමට ලංවිම ජනතා සහය පතයි

විදුලි රැහැන් මතට ගස් කඩාවැටීම හේතුවෙන් සිදුවන විදුලිය බිඳවැටීම් හා එමගින් මිනිස් ජීවිතවලට සිදුවන හානිය අවම කරගැනීමට ජනතා සහය අවශ්‍ය බව විදුලි බල හා බලශක්ති අමාත්‍යාංශය පවසයි. විදුලි උපකරණ අපරික්ෂාකාරී භාවිත‍ය හේතුවෙන් සිදුවන අනතුරු ද සුලභ වී ඇති බව එම අමාත්‍යාංශය නිවේදනයක් නිකුත් කරමින් සඳහන් කරයි.

‍මේ හේතුවෙන් විදුලි උපකරණ භාවිතයේ දී සුපරීක්ෂාකාරී වන ලෙස ද අමාත්‍යාංශය ජනතාවගෙන් ඉල්ලා සිටියි. විදුලි සැර වැදීම හේතුවෙන් මිය යන පුද්ගලයින්ගේ සංඛ්‍යාව ක්‍රමිකව වර්ධනය වීමක් දක්නට ලැබෙන බව එම අමාත්‍යාංශය පෙන්වා‍දෙයි.

විදුලි රැහැන් පද්ධතිවලට බාධාවන ලෙස ගස්කොළන් වැවීම නොකරන ලෙසත් අකුණු සැර පවතින අවස්ථාවලදී විදුලි උපකරණ භාවිතා නොකරන ලෙසත් විදුලි බල හා බලශක්ති අමාත්‍යාංශය ජනතාවගෙන් වැඩිදුරටත් ඉල්ලා සිටියි. adaderana.lk

මට පහරදෙද්දී පොලිස් ස්ථානාධිපතිත් බලාගෙන හිටියා-විජිතගෙන් වරප්‍රසාද ප්‍රශ්නයක්

ගාල්ල පොලීසිය විසින් තමන්ට පහරදුන් බවත්,එමගින් පාර්ලිමේන්තු වරප්‍රසාද උල්ලංඝණය වී ඇති බවත් ප්‍රජාතන්ත්‍රවාදී ජාතික පෙරමුණේ පාර්ලිමේන්තු මන්ත්‍රී විජිත හේරත් මහතා පවසයි.

අද පාර්ලිමේන්තුවේදී වරප්‍රසාද ප්‍රශ්නයක් මතු කරමින් හෙතෙම මෙම අදහස් පළ කර තිබේ.

මන්ත්‍රීවරයාගේ කරුණු දැක්වීම මෙපරිදිය.

2010.08.12 වන දින සවස ගාල්ල නගරයේදී පැවැත් වූ විරෝධතා ව්‍යාපාරයට ගාල්ල පොලිසිය විසින් එල්ල කරන ලද ප‍්‍රහාරය පිළිබඳව පැමිණිලි කිරීමට පාර්ලිමේන්තු මන්ත‍්‍රී අර්ජුණ රණතුංග, පාර්ලිමේන්තු මන්ත‍්‍රී අජිත් කුමාර සහ පෞද්ගලිකව මමත් එදින සවස 5.00ට පමණ ගාල්ල පොලිසිය වෙත ගියෙමු. පළමුව පොලිස් අධිකාරී සිසිර කුමාර මහතා මුණ ගැසී ඒ බව ඔහු වෙත දැන්වීමු.

ඉන් පසු පැමිණිලි සටහන් කරන ලද ස්ථානයට ගිය විට එහි සිටි පොලිස් පරීක්ෂක ආරියසේන මහතා විසින් ඒ මොහොතේ පැමිණිල්ල ලියා ගැනීම සඳහා ප‍්‍රමාණවත් නිලධාරීන් නොමැති බව දැන්වීය. ඒ සඳහා යම් කාලයක් ගත වන බව දැන ගත් පසු අජිත් කුමාර මන්ත‍්‍රීතුමාත් මමත් නැවත පොලිස් අධිකාරීවරයා මුණ ගැසී ඒ බව දැන්වීම සඳහා ඔහු සිටින ස්ථානයට යාමට පිටත් වුණෙමු. එහිදී පොලිස් කොස්තාපල්වරයකු අපට ඇතුළුවීමට ඉඩ නොදී බාධා කරන ලදී.

එවිට මා පාර්ලිමේන්තු මන්ත‍්‍රීවරයෙක් බවත් පැමිණිල්ලක් කිරීමට අවශ්‍ය බවත් ඔහු වෙත දැන්වීමි. එය නොසලකමින් ඔහු එක්වරම මගේ බෙල්ලෙන් අල්ලා පස්සට තල්ලූ කරනු ලැබුවේය. ඒ මොහොතේම ඔහුත් ඒ අසල සිටි පොලිස් පරීක්ෂක ඩයස් මහතාත් තවත් පොලිස් නිලධාරීන් කීප දෙනෙක්ම එකවර මගේ හිසට පපුවට හා මුහුණට තදින් පහර කීපයක්ම එල්ල කරනු ලැබූහ. ඒ මොහොතේ පොලිස් අධිකාරී සිසිර කුමාර මහතාත් පොලිස් ස්ථානාධිපති කිරිඇල්ල මහතාත් එම ස්ථානයේ මෙම සිද්ධිය බලාගෙන සිටියත් ඔවුන් එය වැළැක්වීමට කිසිදු පියවරක් ගනු නොලැබීය. එකවරම පොලිස් අධිකාරීවරයාගේ නියෝගයක් මත පොලිස් ස්ථානාධිපති කිරිඇල්ල මහතා, එතැන සිටි පොලිස් නිලධාරීන්ට මාවත්, පා. ම. අජිත් කුමාර මහතාත් පළාත් සභා මන්ත‍්‍රී නලීන් හේවගේ මහතාත් කූඩුවට දමන ලෙස නියෝග කරනු ලැබීය. ඉන් මොහොතකට පසු අප විසින් පොලිස් නිළධාරීන්ට පහර දුන් බවට වූ අභූත චෝදනාවක් අප වෙත යොමු කර අපව අත්අඩංගුවේ රඳවා ගනු ලැබීය. පැමිණිල්ල විත්තිය බවට පත් කරනු ලැබීය. පාර්ලිමේන්තු මන්ත‍්‍රීවරුන් ලෙස අපට පොලිසිය විසින් කරන ලද මෙම පහරදීම හෝ පැවති උද්ඝෝෂණය පිළිබඳ පැමිණිල්ල සටහන් කිරීමට අප ඉල්ලා සිටියද එයට අවස්ථාවක් ලබා නොදුනි.

ගරු කතානායකතුමනි,

පාර්ලිමේන්තුමන්ත‍්‍රීවරුන් වන අපට පොලිසියකදී මෙසේ පහර දෙනු ලබන්නේ නම් සාමාන්‍ය සිවිල් පුරවැසියකුට මුහුණ පාන්න සිදුවන තත්වය ඉතාම ගැටලූ සහගතය. එබැවින් මේ පිළිබඳව ඔබතුමාගේ විශේෂ අවධානය යොමු කරන මෙන් කරුණාවෙන් ඉල්ලා සිටිමි. adaderana.lk

දේව පූජාවක ආහාර ගත් දැරියක් මරුට

බදුල්ල, මඩුල්සිම ප්‍රදේශයේ දේව පූජාවකට සැකසූ ආහාර අනුභව කිරීමෙන් දැරියක ජීවිතක්ෂයට පත්ව තිබේ. මෙසේ ජීවිතක්ෂයට පත්ව ඇත්තේ එම ප්‍රදේශයේම පදිංචි වයස අවුරුදු එක හමාරක පමණ දැරියකි.

පාචනය උත්සන්න වීමෙන් විජලන තත්ත්වයට පත්වී හෘදය අකර්මන්‍ය වීම හේතුවෙන් අදාළ දැරිය මියගොස් ඇති බව පශ්චාත් මරණ පරීක්ෂණයේ දී අනාවරණය වී ඇත. පසුගියදා එම දේව පූජාව අනුභව කිරීමෙන් තවත් වයස අවුරුදු 10 ට අඩු ළමුන් 15 දෙනෙකු ද රෝගී වී ඇති බව අද දෙරණ වාර්තාකරු පැවසුවේය.

රෝගී වූ දරුවන් සිව්දෙනෙකු මේ වන විටත් බදුල්ල, මැටිගහතැන්න රෝහලේ ප්‍රතිකාර ලබමින් සිටින බව රෝහල් ප්‍රකාශකයෙකු සඳහන් කළේය. සිද්ධිය සම්බන්ධයෙන් බදුල්ල‍ පොලිසිය පරීක්ෂණ ආරම්භ කර තිබේ.adaderana.lk

රට රැකියා ඉල්ලන්න ආ පිරිසක් නොසන්සුන්

විදේශ රැකියා නියුක්ති කාර්යාංශයේ ගාල්ල ශාඛා‍ව ඉදිරිපිට දැඩි නොසන්සුන්කාරී තත්ත්වයක් හටගෙන තිබේ. කොරියානු රැකියා සඳහා ලියාපදිංචි වීමට පැමිණි පිරිසක් අතර මෙම නොසන්සුන්කාරී තත්ත්වය හටගත් බව අද දෙරණ වාර්තාකරු සඳහන් කළේය.

අද අලුයම කාලයේ සිට එහි රැඳී සිටි ලියාපදිංචි වීම සඳහා පැමිණි දහස් ගණනක පිරිසට අමතරව පිටස්තර පුද්ගලයින් ලියාපදිංචි කිරීම සිදුවූ නිසා මෙම තත්ත්වය හටගෙන ඇති බව සඳහන්ය. එහිදී ඇතමුන් විසින් විදේශ රැකියා නියුක්ති කාර්යාංශයේ කාර්යාලයට ගල්මුල් ප්‍රහාර ද එල්ල කර ඇති අතර එම පිරිස පාලනය කිරීම සඳහා පොලිසිය ද කැඳවා තිබූ බව අද දෙරණ වාර්තාකරු ප්‍රකාශ කළේය. කොරියානු රැකියා සඳහා දිනකට ලියාපදිංචි කෙරෙන්නේ 600 ක පමණ පිරිසක් වුව ද ලියාපදිංචි වීම සඳහා 2000 ක පමණ පිරිසක් පැමිණ සිටි බව සඳහන්ය. adaderana.lk

අතුරුදන් වූ තිදෙනාගෙන් එක් සිරුරක් හමුවෙයි

කිරින්ද මුහුදේ දී බෝට්ටුවක් පෙරළීමෙන් අතුරුදන් වූ තිදෙනාගෙන් එක් අයෙකුගේ සිරුරක් අද අලුයම සොයාගෙන තිබේ. මෙලෙස සොයාගෙන ඇත්තේ දැනට අතුරුදන්ව සිටින දරුවන්ගේ පියාගේ සිරුර බව නාවික හමුදා මාධ්‍ය ප්‍රකාශක කපිතාන් අතුල සෙනරත් මහතා සඳහන් කළේය.

කෙසේවෙතත් අතුරුදන් වූ ළමුන් දෙදෙනාගේ සිරුරු සොයා මේ වන විටත් මෙහෙයුම් දියත් කර ඇති බව‍ සෙනරත් මහතා පැවසීය. එකම පවුලේ සාමාජිකයින් පිරිසක් ඊයේ පස්වරුවේ කිරින්ද මුහුදේ තල්මසුන් නැරඹීම සඳහා නාවික හමුදාවට අයත් බෝට්ටුවක ගමන් කරමින් සිටිය දී මෙම අනතුර සිදු වී තිබේ.

මෙම අනතුරින් මිය ගිය පුද්ගලයින් දෙදෙනෙකුගේ සිරුරු ඊයේ පස්වරුවේම සොයා ගනු ලැබීය. සිද්ධියෙන් තුවාල ලැබූ පුද්ගලයින් තිදෙනෙකු ද රෝහල් ගත කර ප්‍රතිකාර ලබන බව අතුල සෙනරත් මහතා සඳහන් කළේය. adaderana.lk

යාපනය -මොරටු වෙළෙඳුන් ගැටෙයි

මොරටුව ප්‍රදේශයේ සිට ලී බඩු අලෙවි කිරීම සඳහා යාපනයට ගිය ව්‍යාපාරිකයින් පිරිසක් සහ යාපනය ප්‍රදේශයේ ව්‍යාපාරිකයින් පිරිසක් අතර ගැටුමක් ඇති වී තිබේ. එම ගැටුමෙන් තුවාල ලැබූ මොරටුව ප්‍රදේශයේ ව්‍යාපාරිකයින් දෙදෙනෙකු යාපනය රෝහලට ඇතුළත් කර ඇති බව පොලිසිය පවසයි.

තුවාල ලැබූවන්ගෙන් එක් අයෙකුගේ තත්ත්වය බරපතල බව පොලිසිය සඳහන් කරයි. යාපනය ආදිපාද වීදිය අසල දී මෙම ගැටුම හටගෙන ඇති අතර එහි දී මොරටුව ප්‍රදේශයේ සිට පැමිණි ව්‍යාපාරිකයින්‍ට අයත් ලොරියක් ද ගිනි තබා තිබේ.adaderana.lk

දෙවන යුද අධිකරණයේ තුන්වන සාක්ෂිකරුගෙන් සාක්ෂි විමසයි

සරත් ෆොන්සේකා මහතා වෙනුවෙන් ක්‍රියාත්මක දෙවන යුද අධිකරණය අද යළි රැස්වී තිබේ. අද දිනයේ තුන්වන සාක්ෂිකරුගෙන් සාක්ෂි සටහන් කරගැනීමට නියමිත බව හමුදා මාධ්‍ය ප්‍රකාශක මේජර් ජෙනරාල් උභය මැදවල මහතා සඳහන් කළේය.

ඊයේ දිනයේ රැස්වූ දෙවන යුද අධිකරණය පළමු ‍හා දෙවන සාක්ෂිකරුවන්ගෙන් සාක්ෂි සටහන් කරගෙන ඇත. එම සාක්ෂිකරුවන්ගෙන් හරස් ප්‍රශ්න විමසීම සඳහා ෆොන්සේකා මහතාගේ නීතීඥයින් ඊයේ දිනයේ පැමිණ සිටි බව උභය මැදවල මහතා සඳහන් කළේය. adaerana.lk

සරණාගතයින් ගැන ශ්‍රී ලංකාව කැනඩාවෙන් තොරතුරු ඉල්ලයි

ශ්‍රී ලාංකික සරණාගතයින් 500 ට ආසන්න ප්‍රමාණයක් රැගත්"සන් සී"නැමති නෞකාව පිළිබඳව තොරතුරු ලබාදෙන ලෙස ශ්‍රී ලංකාව කැනඩාවෙන් ඉල්ලීමක් කර තිබේ. මේ සම්බන්ධව කැනඩා බලධාරීන් සමග පසුගිය සති කිහිපය තුළ නිල නොවන මට්ටමේ සාකච්ඡාවන් පැවැත්වූ බව ද කැනඩාවේ ශ්‍රී ලංකා මහ කොමසාරිස් චිත්‍රාංගනී වාගීෂ්වර මහත්මිය ඊයේ පැවති සම්මුඛ සාකච්ඡාවකදී සඳහන් කර තිබේ. එසේ තොරතුරු හුවමාරු කරගැනීම සම්බන්ධව තවමත් දෙරට අතර ගිවිසුමක් ගොඩනැඟී නොමැති බව ද ඒ මහත්මිය පෙන්වාදෙයි.

ශ්‍රී ලාංකික සංක්‍රමණිකයින් 500 ක් පමණ රැගත් ‍ මෙම නෞකාව පසුගිය සිකුරාදා දින කැනේඩියානු මුහුදු සීමාවට ඇතුළු වී තිබිණි. MV Sun Sea නම් මෙම නෞකාව තුළ එල්.ටී.ටී.ඊ සාමාජිකයින් ද සිටින බව ද සඳහන් විය. මෙම නෞකාවෙන් කැනඩාව වෙත පැමිණි ශ්‍රී ලාංකික සරණාගතයින්ට එරට පුරවැසි භාවය ලබා‍ නොදෙන ලෙස ද කැනඩාවේ ශ්‍රි ලංකා මහකොමසාරිස් චිත්‍රාංගනී වාගීෂ්වර මහත්මිය කැනඩා බලධාරීන්ගෙන් ඉල්ලීම කර ඇති බව ද පසුගියදා වාර්තා විය.adaderana.lk

එල්. ටී. ටී. ඊ ත්‍රස්තවාදීන් හා සටන් වැදීමට වීඩියෝ ක්‍රීඩාවක්

යුබිසොෆ්ට් නම් වීඩියෝ ක්‍රීඩා නිර්මාණය කිරීමේ සමාගම විසින් තවතම වීඩියෝ ක්‍රීඩාවක් හඳුන්වා දී තිබේ. ‍ Sony PlayStation Portable ක් තුළ ක්‍රීඩා කළ යුතු මෙම ක්‍රීඩාව නිර්මාණය කර ඇත්තේ එල් .ටී. ටී. ඊ ත්‍රස්වාදීන් සමග සටන් වැදීම සම්බන්ධ ක්‍රීඩාවක් ලෙසය. මෙම ක්‍රීඩාව නම්කර ඇත්තේ Ghost Recon Predator ලෙසය.

මෙම ක්‍රීඩාවේදී ක්‍රීඩකයින්හට ක්‍රීඩා කිරීමට සිදුවන්නේ ශ්‍රී ලංකාවේ කැළෑ ලෙස සැකසුණු පසුබිමක් තුළය. ක්‍රීඩාවේ ජයග්‍රහණය ළඟාකර ගැනීම සඳහා වන ඔබගේ මෙහෙයුම වන්නේ එල්. ටී. ටී. ඊ ත්‍රස්තවාදීන් පරාජය කිරීමය. එමෙන්ම ක්‍රීඩා කිරීමේදී ක්‍රීඩකයින්ගේ සහයට තවත් කණ්ඩායමක්ද සිටී. මෙම වීඩියෝ ක්‍රීඩාව නොවැම්බර් මාසය වනවිට වෙළඳපොළට නිකුත් කිරීමට නියමිතය. adaderna.lk

උතුරේ වැසියන්ගෙන් පැමිණිලි 4763 ක්

උතුරු ප්‍රදේශයේ වැසියන්ගෙන් පසුගිය වසරේ මැයි මාසයේ සිට මේ දක්වා ශ්‍රී ලංකා මානව හිමිකම් කොමිසන් සභාව වෙත පැමිණිලි 4763 ක් ලැබී තිබේ. වව්නියාව, මන්නාරම හා යාපනය යන දිස්ත්‍රක්ක වල පිහිටි මානව හිමිකම් කොමිසන් සභාවේ කාර්යාල වෙත මෙම පැමිණිලි ලැබී ඇති බව සඳහන්ය.

එම ‍ලැබුණු පැමිණිලි වලින් 3000 ක් පමණ පුද්ගල අතුරුදහන් වීම් සම්බන්ධ පැමිණිලි බව ශ්‍රී ලංකා මානව හිමිකම් කොමිසන් සභාවේ නිලධාරියෙකු සදහන් කළේය. බලහත්කාරයෙන් රඳවාගෙන සිටීම සහ අත්අඩංගුවට ගෙන තිබීම වැනි කරුණු සම්බන්ධයෙන් ද තවත් පැමිණිලි රැසක් ලැබී තිබේ. adaderana.lk

ෆොන්සේකාගේ නිලතල අහිමිකිරීමේ තීන්දුවට ජනපති අනුමැතිය

සරත් ෆොන්සේකා මහතාගේ සියලු හමුදා නිලතල අහෝසි කරන ලෙස පළමු යුද අධිකරණය ලබාදුන් තීන්දුව සඳහා ජනාධිපති මහින්ද රාජපක්ෂ මහතාගේ අනුමැතිය හිමිවී තිබේ. ඊ‍යේ දිනයේ යුද හමුදාපතිවරයා විසින් ජනාධිපතිවරයා වෙත යොමු කරන ලද පළමු යුද අධිකරණ තීන්දුව සඳහා මෙසේ අනුමැතිය ලැබී ඇති බව යුද හමුදා ජනමාධ්‍ය අධ්‍යක්ෂ මණ්ඩලයේ කර්නල් දුමින්ද ගමගේ මහතා පැවසුවේය. ඒ අනුව පළමු යුද අධිකරණය විසින් නිර්දේශ කර ඇති කරුණු ක්‍රියාවට නැංවෙනු ඇත.

එකී තීරණය ඉදිරියේ දී ෆොන්සේකා මහතාට ද දැන්වීමට නියමිතව තිබේ. ෆොන්සේකා මහතා සක්‍රිය හමුදා සේවයේ යෙදී සිටියදී දේශපාලන කටයුතුවල නිරත වීම පිළිබඳ විභාග කළ පළමු යුද අධිකරණය ඔහුට එරෙහිව නැගී ඇති චෝදනා තුනටම වැරදිකරු බව ඊයේ තීරණය කළේය.

යුද අධිකරණය මගින් දඬුවම් තිරණය කිරිමෙන් අනතුරුව එම තීන්දුව අදාළ අධිකරණය කැඳවීමේ බලධරයා සහ දඬුවම තහවුරු කිරීමේ බලධරයා ද වන සේනාධිනායක ජනාධිපති මහින්ද රාජපක්ෂ මහතා වෙත යොමු කර තිබුණි. ජනාධිපතිවරයා මෙම අනුමැතිය ලබාදී ඇත්තේ ඒ අනුවය. adaderana.lk

ෆොන්සේකාට බරපතල දඬුවම් ලැබිය යුතුයි

ජෙනරාල් සරත් ‍ෆොන්සේකා මහතා වැරදිකරු කරමින් පළමු යුද අධිකරණය විසින් ලබාදුන් දඬුවම ජනාධිපති මහින්ද රාජපක්ෂ මහතා විසින් අනුමත කරනු ඇති බව ආරක්ෂක ලේකම් ගෝඨාභය රාජපක්ෂ මහතා පවසයි. හමුදා විනය පවත්වාගෙන යාමට නම් ජෙනරාල් ෆොන්සේකා සිදුකළ වැරදි වලට දඬුවම් ලබාදිය යුතු බවට ඔහු අවධාරණය කරයි. ඔහු ජාතික ආරක්ෂාව අනතුරේ හෙලූ බවත්, එය සරල වරදක් ලෙස අර්ථ දැක්විය නොහැකි බවත් අද දෙරණ වෙත අදහස් දක්වමින් ආරක්ෂක ලේකම්වරයා පෙන්වා දුන්නේය.‍

ත්‍රිවිධ හමුදාවේ ප්‍රධානියා ලෙස කටයුතු කළ අයෙකු ලෙසත්, ජාතික ආරක්ෂාව පිළිබඳව ගනු ලබන තීන්දු තීරණ වලට සම්බන්ධ වූ කෙනෙකු ලෙසත්, ආරක්ෂක මණ්ඩලයේ සාමාජිකයෙකු ලෙසත් වගකීම් රැසක් දැරූ රාජ්‍ය නිලධාරියකු රජය පෙරළීමට කුමන්ත්‍රණය කළ පිරිසකට සහය දැක්වීම කිසිසේත්ම අනුමත කළ නොහැකි බව ද ගෝඨාභය රාජපක්ෂ මහතා ප්‍රකාශ කළේය. එම ක්‍රියාව ජනාධිපතිවරයා ඇතුළු කැබිනට් මණ්ඩලය විනාශ කිරීමට දැරූ උත්සාහයක් ලෙසත් ඔහු පෙන්වා දුන්නේය.

මෙවැනි නිලධාරියකු සාධාරණීකරණය කළ හැකිද යන පැනය විනිවිදභාවය පිළිබඳව කතාකරන පුද්ගලයින්ගෙන් විමසා සිටින බවත් ආරක්ෂක ලේකම්වරයා සඳහන් කළේය. සරත් ෆොන්සේකා සිදුකළ වැරදි වලට බරපතල දඬුවම් හිමිවිය යුතු බවට ද ඔහු අවධාරණය කරයි. එමෙන්ම ජෙනරාල් සරත් ෆොන්සේකාගේ සියලුම තනතුරු අහිමි වනු ඇති බවත්, ඒ අනුව සාමාන්‍ය පුද්ගලයෙක් පමණක් වනු ඇති බවත් ගෝඨාභය රාජපක්ෂ මහතා පෙන්වාදෙයි.adaderana.lk

සක්විති හොර ඔප්පු හදමින් ඉඩම් විකුණලා

මූල්‍ය වංචා රැසක් සම්බන්ධයෙන් අත්අඩංගුවේ සිටින සක්විති රණසිංහ නැමැත්තා ව්‍යාජ ඔප්පු සකස් කරමින් ඉඩම් විකිණීමේ නිරතව සිට ඇති බව විමර්ශනවලදී අනාවරණය වී තිබේ. සැකකරුගෙන් ඉඩම් මිලදී ගෙන එවැනි ගැටලුවලට ගොදුරු වූ පුද්ගලයින් සිටී නම් අපරාධ පරීක්ෂණ දෙපාර්තමේන්තුවට පැමිණිලි කරන ලෙස පොලිස් මාධ්‍ය ප්‍රකාශකවරයා පවසයි.

ඒ සඳහා විශේෂ දුරකථන අංකයක් අපරාධ පරීක්ෂණ ‍දෙපාර්ත‍මේන්තුව විසින් ලබාදී තිබේ. 0112 422176 ඇමතීමෙන් එම පැමිණිලි ඉදිරිපත් කළ හැකිය. ඊට අමතරව සක්විති රණසිංහ නැමැත්තා ලබාදී ඇති, මුදල් කරගැනීමට නොහැකිව බැංකු විසින් ආපසු යොමු කරන ලද චෙක්පත් හිමිකරුවන් වේ නම් ඒ පිළිබඳව ද දැනුම් දෙන ලෙස පොලිසිය දන්වා සිටියි.
adaderana.lk

හෙද ගැටලු වලට මේ මාසය තුළ විසඳුම්

හෙද ‍සේවාවේ ගැටලුවලට මේ මාසය තුළ විසඳුම් ලබාදීමට කටයුතු කරන බව සෞඛ්‍ය අමාත්‍යාංශය පවසයි. ඒ අනුව හෙද කාර්යය මණ්ඩලය මුහුණ පා ඇති ගැටලු සම්බන්ධයෙන් මුදල් අමාත්‍යාංශය සමග සාකච්ඡා කොට විසඳුම් ලබාදෙන ලෙසට සෞඛ්‍ය අමාත්‍යවරයා, අමාත්‍යාංශ ලේකම්වරයාට උපදෙස් ලබා දී ඇති බව එම අමාත්‍යාංශය පෙන්වාදෙයි.

කඩිනමින් එම ගැටලුවලට විසඳුම් ලබාදීමට රජය තීරණය කර ඇති හෙයින් හෙද කාර්යය මණ්ඩලය ලබන 16 වැනිදා කිසිදු වෘත්තීය ක්‍රියාමාර්ගයක නිරත වීමේ අවශ්‍යතාවයක් නොමැති බව ද අමාත්‍යාංශය පවසයි. රාජ්‍ය‍ සේවා එක්සත් හෙද සංගමයේ සභාපති පූජ්‍ය මුරුත්තෙට්ටුවේ ආනන්ද හිමියන් සෞඛ්‍ය අමාත්‍යවරයා සමග ඊයේ පැවැත්වූ විශේෂ සාකච්ඡාවකදී හෙද හෙදියන්ගේ ගැටලුවලට විසඳුම් ලබාදීමට එකගත්වය පළවී තිබේ. adaderana.lk

රඹුටන් කැඩීමට ගොස් විදුලි සැර වැදී ළමුන් දෙදෙනක් මරුට

රත්නපුර, පතුල්පාන ප්‍රදේශයේ ළමුන් දෙදෙනකු විදුලිසැර වැදීමෙන් ජීවිතක්ෂයට පත්ව තිබේ. මෙහිදී විදුලි සැර වැදුණු තවත් ළමයෙකු රත්නපුර රෝහලේ ප්‍රතිකාර ලබමින් සිටින බව අද දෙරණ වාර්තාකරු සඳහන් කළේය. අදාළ ළමුන් තිදෙනා රඹුටන් ගසකට නැග රඹුටන් කඩමින් සිටියදී මෙම අනතුරට ලක්ව ඇත.

ඔවුන් අත තිබූ යකඩ කම්බියකින් රඹුටන් කඩමින් සිටියදී එය අසල තිබූ විදුලි රැහැනක ගැටීමෙන් මෙම අනතුර සිදුව ඇති බව අප වාර්තාකරු සඳහන් කළේය. විදුලි සැර වැදුණු අනෙක් ළමයා ද බරපතල තත්ත්වයේ පසුවන බව සිද්ධිය සම්බන්ධයෙන්"අද දෙරණ"රත්නපුර රෝහලෙන් කළ විමසීමක දී එහි ප්‍රකාශකයෙකු සඳහන් කළේය. මෙ‍සේ අනතුරට‍ ලක්ව ඇත්තේ වයස අවුරුදු 10 ත් 15 ත් අතර වයසේ පසුවන ළමුන් තිදෙනෙකු බව සඳහන්ය. adarana.lk

ෆොන්සේකාගේ ආරක්ෂාව ගැන මූන් යළි මතක් කරයි

අත්අඩංගුවේ පසුවන ජෙනරාල් සරත් ෆොන්සේකා මහතාගේ ආරක්ෂාව තහවුරු කිරීමට බලධාරීන් කටයුතු කළ යුතු බව එක්සත් ජාතීන්ගේ මහ ලේකම්වරයා යළි අවධාරණය කර තිබේ.

ඊයේ පැවති දෛනික මාධ්‍ය හමුවේ දී එක්සත් ජාතීන්ගේ මහලේකම්වරයාගේ මාධ්‍ය ප්‍රකාශකවරයා විසින් බැන්කි මූන් මහ‍තාගේ අදාළ ප්‍රකාශය නැවත වරක් සිහිපත් කළ බව සඳහන්ය. අත්අඩංගුවට පත්වූ ජෙනරාල් ‍‍ෆොන්සේකා මහතා සම්බන්ධයෙන් නීත්‍යානුකූලව කටයුතු කිරීමට සහ ආරක්ෂාව සැපයීමට බලධාරීන් සහතික විය යුතු බවට එක්සත් ජාතීන්ගේ මහලේකම්වරයා එහිදී ප්‍රකාශ කර තිබුණි. adaderana.lk

ප්‍රජාතන්ත්‍රවාදය වෙනුවෙන් ජවිපෙ රට පුරා උද්ඝෝෂණයේ

රටේ ප්‍රජාතන්ත්‍රවාදය තහවුරු කරන ලෙසට බලකරමින් දැවැන්ත උද්ඝෝෂණ රැසක් දිවයින පුරා පැවැත්වීමට කටයුතු යොදා ඇතැයි ජනතා ‍විමුක්ති පෙරමු‍ණේ ප්‍රධාන ලේකම් ටිල්වින් සිල්වා මහතා පවසයි. සාමකාමී ලෙස පවත්වන උද‍්ඝෝෂණවලට එරෙහිව රජය ගෙන යන මර්දනකාරී පිළිවෙත දැඩිලෙස හෙළා දකින බව ඔහු සඳහන් කළේය.

මේ හේතුවෙන් සැලසුම් කර ඇති උද්ඝෝෂණ මාලාවේ පළමු පියවර ලෙස අද සවස 4 ‍ට කොළඹ කොටුව දුම්රියපළ ඉදිරිපිට දී දැවැන්ත උද්ඝෝෂණයක් සංවිධානය කර ඇති බව ටිල්වින් සිල්වා මහතා ප්‍රකාශ කළේය. විශේෂයෙන්ම මන්ත්‍රී වරප්‍රසාද පවා උල්ලංඝණය කරමින් මන්ත්‍රීවරුන් දෙදෙනකු අත්අඩංගුවට ගැනීමට එරෙහිව එහිදී හඬක් නගන බව ඔහු අවධාරණය කර සිටියි.
adaderana.lk

මඩු මංගල්‍යය වෙනුවෙන් රාජ්‍ය ආයතන දිවා රාත්‍රී වැඩ

මෙවර මඩු මංගල්‍යයට සහභාගි වන බැතිමතුන්ගේ පහසුව සඳහා සියලුම රාජ්‍ය බැංකු සහ ආයතන ලබන 16 වැනිදා තෙක් දිවා රාත්‍රී කාලයේ විවෘතව තැබීමට පියවර ගෙන තිබේ. මඩු ‍වන්දනාවට සහභාගි වන බැතිමතුන්ට අවශ්‍ය ආහාර, මිල මුදල් ඖෂධ හා සනීපාරක්ෂක කටයුතු සිදුකරගැනීම සඳහා ඊට අදාළ රාජ්‍ය ආයතන මෙසේ විවෘතව තැබෙනු ඇත.

යුධ ජයග්‍රහණයෙන් පසුව ‍ දෙවන වාර්ෂික මඩු මංගල්‍යය මෙවර එළඹේ. මේ හේතුවෙන් පසුගිය වසරේ මඩු මංගල්‍යයට වඩා මනා සංවිධානයකින් යුතුව මෙවර මඩු මංගල්‍යය පැවැත්වීමට සංවිධායකයින් කටයුතු යොදා ඇති බව සඳහන්ය. වාර්ෂික මඩු මංගල්‍යය අද සහ හෙට පැවැත්වේ. adaderana.lk

හිටපු එල්.ටී.ටී.ඊ සාමාජිකාවන් 37 ගේ වෘත්තීය පුහුණුව අවසන්

පුනරුත්ථාපන මධ්‍යස්ථානවලදී වෘත්තීය පුහුණුව ලැබූ හිටපු එල්.ටී.ටී.ඊ සාමාජිකාවන් 37 දෙනෙකු පුහුණුව අවසන් කර තිබේ. ඔවුන්ට මනාලියන් හැඩගැන්වීම සහ කොණ්ඩා‍ මෝස්තර පිළිබඳ විධිමත් පුහුණුවක් ලබාදී ඇති බව පුනරුත්ථාපන කොමසාරිස් බ්‍රිගේඩියර් සුදන්ත රණසිංහ මහතා පවසයි. වයස අවුරුදු 45 ට වැඩි කාණ්‍ඩයේ පසුවූ අදාළ පිරිස එම වයස් කාණ්ඩය යටතේ පුනරුත්ථාපනය වූ අවසන් කණ්ඩායම බව ද වාර්තා වේ.

පුහුණුව ලැබූ එම පිරිසට වව්නියාවේ සිය ගම්ප්‍රදේශවලට යාමේ අවස්ථාව සලසා දී ඇති අතර ඔවුන්ට නිදහසේ රැකියාවල නිරත විය හැකි බව සුදන්ත රණසිංහ මහතා පවසයි. එල්.ටී.ටී.ඊ සංවිධානයේ හිටපු සාමාජිකයන් විශාල පිරිසකට මේ වන විට පුනරුත්ථාපනය කර රැකියා සඳහා පුහුණුව ලබාදී ඇත. adaerana.lk

සෙල්ලම් කරද්දී හමුවූ අත්බෝම්බය පුපුරයි

මොණරාගල, අලියාවත්ත ප්‍රදේශයේ දී අත්බෝම්බයක් පුපුරායාමෙන් ළමුන් දෙදෙනකු තුවාල ලබා තිබේ. ඊයේ පස්වරුවේ අලියාවත්ත ප්‍රදේ‍ශයේ ළඳු කැලෑවක සෙල්ලම් කරමින් සිටියදී හමුවී ඇති මෙම අත්බෝම්බය පරීක්ෂා කිරීමට යාමේ දී පුපුරා ගොස් ඇති බව පොලිසිය පැවසුවේය.

සිද්ධියෙන් තුවාල ලබා ඇත්තේ වයස අවුරුදු 8 ක් සහ 9 ක් වූ පිරිමි ළමුන් දෙදෙනෙකි. ඔවුන් මොණරාගල, සිරිගල රෝහලේ ප්‍රතිකාර ලබමින් සිටින බව සඳහන්ය. සිද්ධිය සම්බන්ධයෙන් මොණරාගල පොලිසිය විශේෂ පරීක්ෂණයක් ආරම්භ කර ඇති බව පොලිස් මාධ්‍ය ප්‍රකාශකවරයා සඳහන් කළේය.adaerana.lk

සන් සී කැනඩාවට ළඟාවෙයි

ශ්‍රී ලාංකික සරණාගතයින් 500 දෙනෙකු පමණ රැගත්"සන් සී"නැමැති නෞකාව කැනඩාවට අයත් බ්‍රිටිෂ්‍ කොළොම්බියා නාවික මූලස්ථානයට පැමිණ තිබේ. එම පිරිස කැනේඩියානු බලධාරීන්ගේ පරීක්ෂාවට ලක්වෙමින් සිටින බව විදෙස් වාර්තා පවසයි.

එම නෞකාව කැනේඩියානු වෙරළාසන්නයට පැමිණීමත් සමග එරට බලධාරීන් සහ ආරක්ෂක අංශ විසින් නෞකාව වටලා ඇත. ඊයේ රාත්‍රිය වන විට ආරක්ෂක අංශ නෞකාවට ඇතුළු වී ඇති අතර නෞකාවේ සිටින්නන්ගෙන් ප්‍රශ්න කරමින් සිටින බව විදෙස් වාර්තා පවසයි. අදාළ නෞකාවේ එල්.ටී.ටී.ඊ සාමාජිකයින් සිටින බවට පළ වි තිබූ වාර්තා පිළිබඳව ද එරට බලධාරීන්ගේ අවධානය යොමුව තිබේ.

සති කිහිපයක් තිස්සේ කැනඩාව දෙසට ගමන් කරමින් තිබූ මෙම යාත්‍රාව පිළිබඳ අවධානයෙන් සිටි බලධාරීන් ඔවුන්ට එරෙහිව ජාත්‍යන්තර නීතියට අනුව කටයුතු කරන බව ප්‍රකාශ කර තිබුණි. කෙසේ‍වුවද එම සරණාගත පිරිසට වෛද්‍ය පහසුකම්, ආහාර ඇතුළු අත්‍යවශ්‍ය‍ සේවාවන් සැපයීමට ද කැනේඩියානු බලධාරීන් පියවර‍ ගෙන තිබේ. adaderana.lk

ගාල්ල පොලිස් නිලධාරීන්ට ගුටි බැට දීම ගැන පොලිසියේ විරෝධය

උද්ඝෝෂණයක් මැඩ පැවැත්වීමට ගිය අවස්ථාවේ දී ගාල්ල පොලිසියේ නිලධාරීන් කිහිපදෙනෙකුට පහරදීමේ සිද්ධිය සම්බන්ධයෙන් පොලිසියේ විරෝධය පළ කරන බව පොලිස් මූලස්ථානය පවසයි. පොලිස් සංගම් කිහිපයක් මෙලෙස සිය විරෝධය දක්වා ඇති බව පොලිස් මාධ්‍ය ප්‍රකාශක පොලිස් අධිකාරී ප්‍රිශාන්ත ජයකොඩි මහතා සඳහන් කරයි.

ශ්‍රී ලංකා කණිෂ්ඨ පොලිස් නිලධාරි සංගමය හා ශ්‍රී ලංකා පොලිස් පරීක්ෂකවරුන්ගේ සංගමය පොලිස්පතිවරයා වෙත ලිපි යොමුකරමින් මෙම විරෝධතා දක්වා ඇති බව සඳහන්ය. අදාළ සිද්ධියේ දී පහරකෑමට ලක්වූ පොලිස් නිලධාරීන් දෙදෙනෙකු රෝහල් ගත කර ඇති බව ඔවුන් පෙන්වා දී ඇත. adaderana.lk

ජනපති පරීක්ෂණ කොමිසම අද වව්නියාවේ දී

උගත් පාඩම් හා ප්‍රතිසන්ධානය පිළිබඳ ජනාධිපති පරීක්ෂණ කොමිසන් සභාව අද වව්නියාවේ දී රැස්වෙයි. වව්නියාව දිස්ත්‍රික් මහලේකම් කාර්යාලයේ දී පෙරවරු 10 සිට පස්වරු 1 දක්වා මෙම ‍කොමිසම රැස්වන අතර පස්වරු 2 සිට 5 දක්වා සෙට්ටිකුලම ප්‍රාදේශීය ලේකම් කාර්යාලයේ දී එය රැස්වීමට නියමිතය.

එම කොමිසම වෙත සාක්ෂි සහ තොරතුරු ඉදිරිපත් කිරීමේ අවස්ථාව අදාළ ප්‍රදේශවල මහජනතාවට ලබාදී තිබේ. මේ අතර ඊයේ කොළඹ දී රැස්වූ කොමිසම හමුවේ අධිනීතීඥ එස්.එල්. ගුණ‍සේකර මහතා සාක්ෂි ලබා දුන්නේය.

දේශපාලන පක්ෂවල අසමගිය ජනවාර්ගික ගැටලුවට මූලික හේතුවක් වූ බව එහිදී ඔහු සඳහන් ක‍ළේය. ත්‍රස්තවාදය නිමා වුව ද සිවිල් ජනතාවට සිදුවන අසාධාරණකම් නිමා වී නැතැයි ගුණසේකර මහතා සාක්ෂි දෙමින් වැඩිදුරටත් අවධාරණය කළේය.
adaderana.lk

මරදමඩු මංගල්‍යය වෙනුවෙන් විශේෂ දුම්රිය 6 ක්

වාර්ෂික මරදමඩු මංගල්‍යය වෙනුවෙන් විශේෂ දුම්රිය 6 ක් ධාවනයට එක් කිරීමට ප්‍රවාහන අමාත්‍යාංශය තීරණය කර තිබේ. කොළඹ -කොටුව, දකුණු කළුතර, මොරටුව සහ මීගමුව කේන්ද්‍ර කරගනිමින් මෙම දුම්රිය සේවාවන් ක්‍රියාත්මකය. මීට අමතරව කොළඹ ‍කොටුවේ සිට මැදවච්චිය දක්වා දෛනිකව දුම්රිය 6ක් ධාවනය වන බව ද අමාත්‍යාංශය පවසයි.

දුම්රියෙන් පැමිණෙන සියලු මගීන්ට මැදවච්චිය සිට මඩු දේවස්ථානය දක්වා විශේෂ බස්රථ ‍සේවයක් ද ක්‍රියාත්මක කරන බව මඩු මංගල්‍යය වෙනුවෙන් පළමු විශේෂ දුම්රිය ‍ පිටත්වී‍ෙම් අවස්ථාවට එක්වූ ප්‍රවාහන අමාත්‍ය කුමාර වෙල්ගම මහතා සඳහන් කළේය. adaderana.lk

‍පළමු යුද අධිකරණයේ ෆොන්සේකා වරදකරුවෙයි

ජෙනරාල් සරත් ෆොන්සේකා මහතා පළමු යුද අධිකරණයෙන් වරදකරු බවට පත්ව ඇති බවත්,එකී වරදට දඬුවම් ලෙස ඔහු ගේ තනතුරුවලින් පහල දැමීමක් සිදුකළ හැකි නිසා යුද අධිකරණ විනිසුරු මඩුල්ල විසින් ඔවුනගේ තීන්දුව ජනාධිපතිවරයාගේ නිර්දේශය සඳහා යොමු කර ඇති බව ඒ.එෆ්.පී පුවත් සේවය උපුටා දක්වමින් අල්ජසීරා මාධ්‍ය සඳහන් කරයි.

යුද හමුදාවේ සක්‍රීය සේවයේ යෙදී සිටියදී දේශපාලන කටයුතු සිදුකිරිමට එරෙහිව ජෙනරාල් සරත් ෆොන්සේකා මහතාට එරෙහිව පළමු යුද අධිකරණය කැඳවා තිබිණි.

දශක තුනකට ආසන්න කාලයක් එල්.ටී.ටී.ඊ සංවිධානය සමග යුද වැදුනු ශ්‍රී ලංකා රජයට යුදමය ජයග්‍රහණය ලබාදුන් මහින්ද රාජපක්ෂ ආණ්ඩුවේ හිටපු යුද හමුදාපතිවරයා මෙන්ම ආරක්ෂක මාණ්ඩලික ප්‍රධානීයාද වන ජෙනරාල් සරත් ෆොන්සේකා මහතා ට එරෙහිව විනිසුරුවරුන් තිදෙනෙකුගෙන් යුතු පළමු යුද අධිකරණය කැඳවනු ලැබුවේ මීට මාස 5 ට පෙරාතුව වේ.

තමන්ට එරෙහි පළමු යුද අධිකරණය අහෝසි කරන ලෙස ඉල්ලා මීට පෙරාතුව ජෙනරාල් සරත් ෆොන්සේකා මහතා විසින් අධිකරණයට පෙත්සමක් ගොනු කර තිබුණද එය විභාගයට නොගෙනම නිෂ්ප්‍රභ කෙරිණි.

සරත් ෆොන්සේකා මහතා වරදකරු කරමින් අද පස්වරුවේ ජනාධිපතිවරයාගේ නිර්දේශය සඳහා යොමු කළ තීන්දුව සම්බන්ධයෙන් රජය මේ වන ‍තෙක් නිල ප්‍රකාශයක් සිදුකර නොමැත.

කෙසේ වුවද ජෙනරාල් සරත් ෆොන්සේකා මහතා රාජ්‍ය සේවයේ යෙදී සිටියදී අවි ආයුධ ගනුදෙනුවලදී අක්‍රමිකතා සිදුවූ බවට චෝදනා කරමින් දෙවෙනි යුද අධිකරණයක්ද ක්‍රියාත්මක වේ. adaderana.lk

කේ.පී ට දඬුවම් දිය යුත්තේ තරු පහේ හෝටලයක නෙවෙයි

කේ. පී ට දඬුවම් ලබාදිය යුත්තේ ඔහු තරුපහේ හෝටලයක රඳවාගනිමින් නොවන බව වී. ආනන්ද සංගරී මහතා පවසයි. අදටත් නිමාවූ යුද්ධයේ ඇතැම් දේවල් පිළිබඳව මාධ්‍යය තවමත් සිහිපත් කරන බවටත් ඔහු අවධාරණය කරයි. උගත් පාඩම් හා ප්‍රතිසන්ධානය පිළිබඳ වූ ජනාධිපති ‍පරීක්ෂණ කොමිසන් සභාව ඉදිරියේ සාක්ෂි ලබාදෙමින් සංගරී මහතා මෙම කරුණු දැක්වීය.

උතුරේ සාමාන්‍ය පෙළ විභාගයට මුහුණදීමට සූදානමින් සිටි ළමුන් 8000 ක් එල්. ටී. ටී. ඊ සංවිධානය ළමා සොල්දාදුවන් ලෙස සිය සංවිධානයට බඳවාගෙන තිබූ බව පෙන්වාදුන් ඔහු අවධාරණය කළේ එම ළමා සොල්දාදුවන් සිදුවූයේ කුමක්ද යන්න පිළිබඳව කිසිවකු නොදන්නා බවය. එමෙන්ම සෑම පාසලක මෙන්ම විශ්ව විද්‍යාලයකම ‍සිංහල හා ද්‍රවිඩ භාෂා පිළිබඳව සිසුන්ට ඉගැන්විය යුතු බව ද ආනන්ද සංගරී මහතා ප්‍රකාශ කළේය.

අද දිනයේ වී. ආනන්ද සංගරී මහතාට අමතරව අධිනීතීඥ එස්. එල්. ගුණසේකර මහතා ද සාක්ෂි ලබාදී තිබිණි. ජනවාර්ගික ගැටලු ඇතිවීමට මේ රටේ දේශපාලන පක්ෂ මෙන්ම දේශපාලඥයින්ද හේතුවක් වූ බව එහිදී ඔහු පෙන්වාදුන්නේය. එමෙන්ම යුද්ධය පිළිබඳව කතා කළ කිසිදු දේශපාලඥයෙක් හෝ පක්ෂයක් එල් .ටී. ටී. ඊ ළමා සොල්දාදුවන් පිළිබඳව කතා කර නොමැති බව ද ගුණසේකර මහතා අවධාරණය කළේය. යුද්ධය අවසන් වුව ද විශේෂයෙන් උතුරේ සිවිල් ජනතාවගේ ගැටලු නිරාකරණය වී නොමැති බව ඒ මහතා ප්‍රකාශ කළේය.

සටන් විරාම ගිවිසුම අසාර්ථක වීමට බලපෑ කරුණු සහ ඉන් පසු කාලයේ සිදුවූ සිද්ධීන් පිළිබඳ සොයාබලා නිර්දේශ කිරීම සඳහා ජනාධිපතිවරයා විසින් මෙම උගත් පාඩම් හා ප්‍රතිසන්ධානය පිළිබඳ වූ ජනාධිපති ‍පරීක්ෂණ කොමිසන් සභාව පිහිටුවනු ලැබීය. එම කොමිසන් සභාවේ ප්‍රසිද්ධ සභා වාරය අද රැස්වූයේ තුන්වැනි දිනටය. adaderana.lk

ඒක පාර්ශවීය තීන්දුව පිළිගන්න බෑ

ඒක පාර්ශවීය ලෙස දෙනු ලැබූ යුද අධිකරණ තීන්දුව පිළිගත නොහැකි බව ප්‍රජාතන්ත්‍රවාදී ජාතික පෙරමුණේ පාර්ලිමේන්තු මන්ත්‍රී අනුර කුමාර දිසානායක මහතා පවසයි.

ෆොන්සේකා මහතා වෙනුවෙන් පෙනී සිටි නීතිඥයින් නොමැති අවස්ථාවකදී දෙනු ලැබූ මෙම තීන්දුව කිසිසේත්ම සාධාරණ නොවන බවද හෙතෙම කියා සිටියේ අද කොළඹ පිහිටි මාධ්‍ය හමුවකට සහභාගී වෙමිනි.

ජොන්ස්ටන් අමාත්‍යවරයා සාක්ෂිදීම සඳහා සහභාගී වූ අවස්ථාවේදී පමණක් ෆොන්සේකා මහතාගේ පාර්ශවයෙන් නීතිඥයින් සහභාගී වූ බවත්,එයින් අනතුරුව දිගින් දිගටම සාක්ෂි විමසීම කරනු ලැබුවේ රජයේ පාර්ශවයෙන් පමණක් බවත් හෙතෙම පෙන්වා දුන්නේය.

තමන්ගේ නීතිඥයාට නිවාඩු දී ඇති මොහොතක ලබාදුන් මෙම තීන්දුව පිළිබඳ නීතිඥ සංගමයටත් කරුණු දැක්වීම සඳහා වගකීමක් ඇති බවද අනුර කුමාර දිසානායක මහතා වැඩිදුරටත් කියා සිටියේය. adaderana.lk

අසාධ්‍ය ඩෙංගු රෝගීන්ට පිලිපීනයෙන් නොමිලේ ඖෂධ තොගයක්

අසාධ්‍ය ඩෙංගු රෝගීන් සඳහා ‍ලබාදෙන"ඩෙක්ස්ට්‍රන් ෆෝටි" නමැති ඖෂධ නික්ෂේපන තොගයක් නොමිලේ ලබාදීමට පිලිපීන ඖෂධ සමාගමක් එකඟතාව පළ කර තිබේ.

ශ්‍රි ලංකා ඖෂධ කර්මාන්තකරුවන්ගේ සංගමයේ සභාපති ආනන්ද සමරසිංහ මහතා පවසන පරිදි මිලිලීටර් 500 බැගින් වු ඖෂධ බෝතල් 400ක් මීට අයත් වේ.

මෙම ඖෂධය අසාධ්‍ය ඩෙංගු රෝගීන්ගේ රුධිර තරල ප්‍රසාරණය සඳහා ශීරාගත ඖෂධයක් වශයෙන් භාවිතයට ගැනේ. අදාළ ඖෂධ තොගය ඉදිරි දෙසතිය තුළ සෞඛ්‍ය අමාත්‍යාංශයට ලැබීමට නියමිතය.

ලෝක සෞඛ්‍ය සංවිධානය විසින් ද මෙම ඖෂධ බෝතල් 1,200ක් පමණ පසුගියදා සෞඛ්‍ය අමාත්‍යාංශයට ලබාදී තිබුණි.
adaderana.lk

මහ වැස්සෙන් ගස් කඩා වැටී නෝර්ටන් බ්‍රිජ් පාර අවහිර වෙයි

ගිනිගත්හේන -නෝර්ටන් බ්‍රිජ් ප්‍රධාන මාර්ගයේ ලොනාක් ප්‍රදේශයේ මාර්ගය දැඩි වර්ෂාව නිසා විශාල ගස් කඩා වැටී අවහිර වී ඇති බව වාර්තා වේ. එමනිසා නෝටන් බ්‍රිජ් වෙත ළඟාවන වාහන වලට විකල්ප මාර්ග භාවිත කරන ලෙස පොලීසිය ඉල්ලා සිටී. අද දහවල් සිට මධ්‍යම කඳුකර ප්‍රදේශයට ඇදහැලෙන ධාරානිපාත වර්ෂාව නිසා මෙසේ මාර්ගයට ගස් කඩා වැටී මාර්ගය අවහිර වී ඇත.

ඒ අනුව කොළඹ නගරයේ සිට පැමිණෙන රිය පදවන්නන්ට කළුගල හරහා නෝර්ටන් බ්‍රිජ් වෙත පැමිණෙන ලෙසත්, මහ නුවර සිට පැමිණෙන රිය පදවන්නන්ට හැටන් හරහා නෝර්ටන් බ්‍රිජ් වෙත පැමිණෙන ලෙසත් පොලීසිය ඉල්ලා සිටියි. adaderana.lk

සමෘද්ධි නිලධාරීන්ගේ ජාවාරම් හොයන්න මර්වින් රටවටේ

තමා නැවතී නැති බවත්,සැඟවී නැති බවත්,දුක්වෙන්නේ ද නැති බවත් හිටපු නියෝජ්‍ය අමාත්‍ය අචාර්ය මර්වින් සිල්වා මහතා පවසයි.

තමන් මෙතෙක් කරගෙන ආ කටයුතු දිගින් දිගටම කර‍ගෙන යන බවද හෙතෙම කියා සිටියේ අද කැලණිය,පෙතියාගොඩ-වෑවැල්ල පාරට තාර දැමීමේ කටයුතු ආරම්භ කිරිමේ අවස්ථාවට සහභාගී වෙමිනි.

මෙම මාර්ගයේ කටයුතු සඳහා ලක්ෂ 175 ක ප්‍රතිපාදන වෙන් කර ඇති බවත් ,අවශ්‍ය වන්නේනම් තවත් මුදල් වෙන් කළ හැකි බව ද හෙතෙම මෙහිදී සඳහන් කර තිබේ.

සමෘද්ධි නිලධාරීන් සමෘද්ධි ලාභීන්ගේ නමට බැංකුවලින් ණය පහසුකම් ලබාගෙන ඒවා පොළියට ලබාදෙමින් මුදල් උපයාගන්නා ජාවාරමක් පිළිබඳ තමන්ට තොරතුරු ලැබී ඇතැයි සිල්වා මහතා කියා සිටියේය.

ඒ නිසාම ඇතැම් සමෘද්ධි නිලධාරීන්ට වැටුප් නොලබා වුවද ජිවත්වන්නට ආදායම් මාර්ග පෑදී ඇතැයි හෙතෙම සඳහන් කළේය.

මෙම ජාවාරමෙන් සමෘද්ධි නිලධාරීන් මුදවා ගැනීම සඳහා තමන් රට වටේ යන්න සූදානම් බවද ආචාර්ය මාර්වින් සිල්වා මහතා වැඩිදුරටත් කියා සිටියේය. adaderana.lk

රනිල්ගේ මවගේ සුවදුක් බලන්න ජනපති රෝහලට

විපක්ෂ නායක රනිල් වික්‍රමසිංහ මහතාගේ මෑණියන්ගේ සුවදුක් විමසා බලන්නට ජනාධිපති මහින්ද රාජපක්ෂ මහතා මීට ස්වල්ප මොහොතකට පෙර සහභාගී වූ බව ජනාධිපති මාධ්‍ය ඒකකය සඳහන් කරයි.

රනිල් වික්‍රමසිංහ මහතාගේ මෑණියන් මේ වන විට කොළඹ පෞද්ගලික රෝහලක ප්‍රතිකාර ලබමින් සිටින බැවින් ජනාධිපතිවරයා රෝහලට ගොස් සුවදුක් විමසූ බව සඳහන් වේ. adaderana.lk

දඹුල්ලේ හෝටල් වලින් 90% ක් ඉතා අපිරිසිදුයි

දඹුල්ල නගරයේ ආපන ශාලා සහ හෝටල්වලින් 90% ක් පමණ දැඩි අපිරිසිදු තත්ත්වයේ පසුවන බව සෞඛ්‍ය අංශ පවසයි. මහජන සෞඛ්‍ය පරීක්ෂකවරුන් ඊයේ දිනයේ දඹුල්ල නගරයේ සිදුකළ වැට‍ලීමක දී මේ බව අනාවරණය වී ඇති බව සඳහන්ය.

ඇතැම් හෝටල්වල අමු මස්වල ලේ පිසින ලද ආහාරවල දැවටී තිබියදී මහජන සෞඛ්‍ය පරීක්ෂකවරුන් විසින් සොයාගෙන තිබේ. මෙහිදී ආපනශාලා හා හෝටල් රැසක හිමිකරුවන්ට නඩු පැවරීමට කටයුතු කළ බව දඹුල්ල සෞඛ්‍ය වෛද්‍ය නිලධාරී වෛද්‍ය ජයනාත් ජයසුන්දර මහතා සඳහන් කළේය. adaderana.lk

වට මේසයේ නඩු විසඳන්න ළමා අධිකරණය 16 දා

නවීන ක්‍රමවේදයන් වලින් යුතුව නඩු පසිඳලීම සඳහා බත්තරමුල්ල පිහිටවනු ලැබූ ළමා අධිකරණයේ කටයුතු ලබන අගෝස්තු 16 වන දින ආරම්භ කරන බව අධිකරණ අමාත්‍යංශය සඳහන් කරයි.

මෙම අධිකරණය විවෘත කිරීමට අදාළ සියලු කටයුතු මේ වන විට සූදානම් බව අධිකරණ අමාත්‍යංශයේ ලේකම් සුහද ගම්ලත් මහතා පවසයි.

අධිකරණ අමාත්‍යංශයේ ලේකම්වරයා මේ බව කියා සිටියේ පාර්ලිමේන්තු මාධ්‍යවේදීන් සඳහා වාද්දුවදී පැවැත්වෙන විශේෂ වැඩමුළුවකට සහභාගී වෙමිනි.

නව ළමා අධිකරණය ශ්‍රී ලංකාවේ පිහිටුවන ලබන දෙවෙනි ළමා අධිකරණය වන අතර තවත් ළමා අධිකරණයක් බම්බලපිටියේ ස්ථාපිත කර ඇති බව ද හෙතෙම සිහිපත් කළේය.

එසේ වුවද ළමයින්ගේ නඩු විසඳීම සඳහා බම්බලපිටිය පිහිටි ළමා අධිකරණයේ පහසුකම් අවම බවත්,නව අධිකරණයෙන් එකී ගැටලු විසඳීම සඳහා ක්‍රියා කරන බවත් ලේකම්වරයා සඳහන් කළේය.

වෙනත් අධිකරණ කටයුතු මෙන් නොව විනිසුරුවරයා මෙන්ම පැමිණිලිකරුවන් සහ විත්තියේ පාර්ශවය එකම මේසයක් වටා වාඩිගෙන සුහද ලෙස යුක්තිය පසිඳලන ක්‍රමවේදයක් නව ළමා අධිකරණය තුළින් ක්‍රියාත්මක කරන බව අධිකරණ අමාත්‍යංශ ලේකම් වරයා වැඩිදුරටත් කියා සිටියේය. adaderana.lk

ශ්‍රී ලංකාවේ සංවර්ධනයට ප්‍රංශය අතදෙයි

ශ්‍රී ලංකාවේ කඩිනම් සංවර්ධන කටයුතු සඳහා සහය දැක්වීමට ප්‍රංශ රජය තීරණය කර තිබේ. ශ්‍රී ලංකාවේ ප්‍රංශ තානාපති ක්‍රිස්ටීන් රොබිෂන් මහත්මිය ඊයේ අග්‍රාමාත්‍ය දි. මු. ජයරත්න මහතා හමුවූ අවස්ථාවේ මේ බව සඳහන් කළාය. ශ්‍රී ලංකාව යුද්ධය නිමාකර අලුත් මාවතක ගමන් කරමින් වේගවත් සංවර්ධනයක් අරඹා ඇති වර්ත‍මානයේ එහි ප්‍රමුඛ හවුල්කරුවෙකු වීමට ප්‍රංශයට හැකිවී ඇති බව ප්‍රංශ තානාපතිනිය පවසයි.

උතුරු නැගෙනහිර ඇතුළු දිවයිනේ විවිධ ප්‍රදේශවල සංවර්ධන කටයුතු සඳහා ප්‍රංශ රජය දැනටමත් දායක වී සිටින බව ක්‍රිස්ටීන් රොබිෂන් මහත්මිය සඳහන් කළාය. ප්‍රංශ රජය ශ්‍රී ලංකාවේ සංවර්ධන ක්‍රියාවලියට ලබාදී ඇති දායකත්වය අතිශයින් අගය අතර එම දායකත්වය ඉදිරියටත් බලාපො‍රොත්තු වන බව මෙහිදී අග්‍රාමාත්‍ය දි.මු. ජයරත්න මහතා පැවසුවේය. adaderana.lk

සිංගප්පූරුවේදී තරුණියන් ගණිකා වෘත්තියේ යෙදවූ සැකකරු රිමාන්ඩ්

නැටුම් සංදර්ශනවලට යැයි පවසා ශ්‍රී ලාංකික තරුණියන් සිංගප්පූරුවට රැගෙන ගොස් ගණිකා වෘත්තියේ යෙදවීම සම්බන්ධයෙන් අත්අඩංගුවට ගත් ප්‍රධාන සැකකරු රිමාන්ඩ් භාරයේ තැබීමට කොළඹ මහේස්ත්‍රාත් අධිකරණය නියෝග කර තිබේ. රහස් පොලිසිය විසින් මෙම සැකකරු පසුගියදා බේරුවල ප්‍රදේශයේ දි අත්අඩංගුවට ගනු ලැබීය.

අත්අඩංගුවට ගත් සැකකරු ඊයේ අධිකරණයට ඉදිරිපත් කිරීමෙන් අනතුරුව ලබන 18 වැනිදා දක්වා රිමාන්ඩ් භාරයේ තැබීමට කොළඹ ප්‍රධාන මහේස්ත්‍රාත් රශ්මි සිංගප්පුලි මහතා නියෝග කළේය. සිංගප්පූරුවේ ශ්‍රී ලංකා මහ කොමසාරිස්වරයා රහස් පොලිසියට කරන ලද පැමිණිල්ලකට අනුව රහස් පොලිසිය මෙම පරීක්ෂණ ආරම්භ කළ අතර මේ ආකාරයට අතවරයට පත් තරුණියන් රැසක් සිංගප්පූරුවේ දී හමුවී ඇති බව ඔවුන් අධිකරණයට දැනුම් දී ඇත. ඔවුන්ගෙන් ප්‍රශ්න කර ප්‍රකාශ සටහන් කරගැනීමට තීරණය කළ බව ද රහස් පොලිසිය අධිකරණයට දැනුම් දී තිබේ. adaderana.lk

කොම්පඤ්ඤවීදියේ ගොඩනැගිල්ලක හදිසි ගින්නක්

කොම්පඤ්ඤවීදිය ප්‍රදේශයේ ගොඩනැගිල්ලක ගින්නක් හටගෙන තිබේ. අද උදෑසන කොම්පඤ්ඤවීදිය, බේබෲක් මාවතේ පිහිටි ගොඩනැගිල්ලක පළමු මහලේ මෙම ගින්න හටගෙන ඇති බව ‍පොලිසිය පවසයි.

ගින්නෙන් කිසිවෙකුටත් හානි සිදුවී ‍නොමැති බව පොලිසිය සඳහන් කරයි. කොම්පඤ්ඤ වීදිය පොලිසිය සහ කොළඹ ගිනි නිවීමේ ඒකකය එක්ව මේ වන විට ගින්න මැඩපවත්වා ඇති බව වාර්තා වේ. adaderana.lk

සංක්‍රමණිකයින් රැගත් නැව තුළ මිනිස් ජාවාරම්කරුවන්

කැනේඩියානු මුහුදු සීමාවට ළඟා වී ඇති ශ්‍රී ලාංකික සංක්‍රමණිකයින් රැගත් නෞකාව තුළ පුද්ගලයින් 490 දෙනෙකු පමණ සිටින බව කැනඩාව පවසයි. මේ වන විට නෞකාව කැනේඩියානු වෙරළ සමීපයට පැමිණ ඇති බව කැනේඩියානු රජයේ මහජන ආරක්ෂාව පිළිබඳ අමාත්‍ය වික්ටොවුස් මහතා පවසයි. මෙම නෞකාව තුළ මිනිස් ජාවාරම්කරුවන් ඇතුළු අපරාධවලට සම්බන්ධ පුද්ගලයින් සිටින බවට වාර්තා වන බව වික්ටොවුස් මහතා ප්‍රකාශ කළේය.

ඊයේ දිනයේ කැනේඩියානු මුහුදු සීමාවට පැමිණි මෙම නෞකාව එරට නාවික හමුදා භාරයට ගෙන ඇති බව සඳහන්ය. කැනේඩියානු රජය මේ සම්බන්ධයෙන් දැඩි අවධානයෙන් සිටින අතර අනවසර සංක්‍රමණිකයින්ට කැනඩාවට ඇතුළුවීමට ඇති අවස්ථාව අවම කිරීමට මින් ඉදිරියට කටයුතු කරන බව වික්ටොවුස් මහතා වැඩිදුරටත් අවධාරණය කරයි.adaderana.lk

විදෙස් ගතවන මව්වරුන්ගේ දරුවන් වෙනුවෙන් ඒකකයක්

විදේශ ගතවන මව්වරුන්ගේ දරුවන් පිළිබඳව තොරතුරු ලබාගැනීම සඳහා විශේෂ ඒකකයක් පිහිටුවීමට ජාතික ළමා රක්ෂණ අධිකාරිය පියවර ගෙන තිබේ. කටුනායක, ජාත්‍යන්තර ගුවන්තොටුපළ තුළ එම ඒකකය පිහිටුවීමට කටයුතු කරන බව ජාතික ළමා රක්ෂණ අධිකාරියේ සභාපති නීතීඥ අනෝමා දිසානායක මහත්මිය ප්‍රකාශ කළාය.

මව්වරුන් විදේශ ගතවූ විට දරුවන්ට සිදුවන හිරිහැර හා විවිධ අතවර පිළිබඳ ලැබෙන පැමිණිලි හේතුවෙන් මෙම වැඩපිළිවෙළ ක්‍රියාත්මක කරන බව සභාපතිවරිය සඳහන් කළාය. adaderana.lk

පළමු යුද අධිකරණය අදත්

ජෙනරාල් සරත්‍ ෆොන්සේකා මහතාට එරෙහි පළමු යුද අධිකරණය අද දිනයේ යළි කැඳවීමට නියමිතය. හමුදා සේවයේ යෙදී සිටියදී ක්‍රියාකාරී දේශපාලනයේ නිරත වීම සම්බන්ධයෙන් ජෙනරාල් සරත් ෆොන්සේකාට එරෙහිව පළමු යුද අධිකරණය කැඳවා තිබේ. ‍මේ වන විට පැමිණිලි පාර්ශවයේ සියලුම සාක්ෂිකරුවන්ගෙන් සාක්ෂි සටහන් කරගැනීම ඊයේ දිනයෙන් අවසන් වූ බව යුද හමුදා මූලස්ථානය පවසයි.

ඊයේ දිනයේ ද ජෙනරාල් සරත් ෆොන්සේකා මහතාගේ නීතීඥවරුන් සහභාගී නොසිටි අතර අද දිනයේ ඔවුන්ට සහභාගි වන ලෙස ඉල්ලීමක් කර තිබේ. අද උදෑසන 9.30 ට නාවික හමුදා මූලස්ථානයේ දී පළමු යුද අධිකරණය රැස්වීමට කටයුතු යොදා ඇති බව යුද හමුදා මූලස්ථානය සඳහන් කරනු ලැබීය. adaderana.lk

ශ්‍රී ලාංකිකයින් සිව්දෙනෙකුට ඕමානයේ දී මාංචු

මුදල් සොරකමක් සම්බන්ධයෙන් ශ්‍රී ලාංකිකයින් සිව්දෙනෙකු ඕමානයේ දී අත්අඩංගුවට ගෙන තිබේ. ඕමානයේ මස්කට් හි බවුෂාර් ප්‍රදේශයේ නිවසකින් මොවුන් මෙම මුදල් සොරකම් කර ඇති බව වාර්තා වේ.

අත්අඩංගුවට ගත් ශ්‍රී ලාංකිකයින් සිව්දෙනා අතර කාන්තාවන් තිදෙනකු ද වන බව සඳහන්ය. මොවුන් විසින් සොරකම් කර ඇති මුදලේ වටිනාකම ඕමාන් රියාල් 19,000 ක් වන බව එරට පොලිසිය පවසයි. අත්අඩංගුවට ගත් පිරිසෙන් එක් කාන්තාවක් එම සොරකම සිදුවූ නිවසේ සේවය කර ඇති බව ද සඳහන්ය. adaderana.lk

පහරදීම ගැන නිසි පියවර නොගතහොත් වෘත්තීය ක්‍රියාමාර්ගයකට

දේශීය ආදායම් දෙපාර්තමේන්තුවේ මාතර කාර්යාලයේ ප්‍රධානියාට සිදුකළ පහරදීම සම්බන්ධයෙන් නිසි පියවර නොගන්නේ නම් දැඩි වෘත්තීය සමිති ක්‍රියාමාර්ගයක නිරත වන බව දේශීය ආදායම් පොදු සේවක සංගමය පවසයි. පසුගියදා මාතර දේශීය ආදායම් දෙපාර්තමේන්තු කාර්යාලයේ නියෝජ්‍ය කොමසාරිස් එච්. එම්. ඩෙන්සිල් මහතාට බස්රථයක් තුළ දී කිසියම් පිරිසක් විසින් පහරදී තුවාල කර තිබුණි.

ඔහු මේ වන විට මාතර මහරෝහලේ දැඩි සත්කාර ඒකකයේ ප්‍රතිකාර ලබන බව වාර්තා වේ. මෙම පහරදීම සම්බන්ධයෙන් අදාළ පුද්ගලයින් අත්අඩංගුවට ගෙන නීතිය ක්‍රියාත්මක කරන ලෙස දේශීය ආදායම් වෘත්තීය සමිති බලධාරීන්ගෙන් ඉල්ලා සිටියි.
adaderana.lk

කොළඹ -නානුඔය නගරාන්තර දුම්රිය යළි ක්‍රියාත්මකයි

කොළඹ සිට නානුඔය දක්වා ධාවනය වන සීඝ්‍රගාමී නගරාන්තර දුම්රිය අද දිනයේ සිට යළිත් ධාවනය ආරම්භ කරන බව දුම්රිය දෙපාර්තමේන්තුව පවසයි. පාසල් නිවාඩු සමය හා මගීන්ගේ ඉල්ලීම හේතුවෙන් අද දිනයේ සිට දිනපතා එම දුම්රිය ධාවනය කරන බව දුම්රිය වාණිජ අධිකාරී විජය සමරසිංහ මහතා සඳහන් කළේය. මෙම දුම්රිය කලින් වෙන්කරවා ගැනීමේ හැකියාවද මගීන්ට ලබා දී ඇති බව සමරසිංහ මහතා ප්‍රකාශ කළේය.

ඒ අනුව පෙරවරු 8 .35 ට කොළඹ -කොටුවෙන් ආරම්භ වන මෙම දුම්රිය පස්වරු 2 .10 ට නානුඔය වෙත ළඟාවීමට නියමිතය. නැවත නානුඔය සිට පස්වරු 3 .15 ට පිටත්වන දුම්රිය රාත්‍රී 9 ට කොළඹ -කොටුවට ළඟාවීමට නියමිතය. අද සිට සැප්තැම්බර් 5 දක්වා මෙම දුම්රිය ගමන් වාර ක්‍රියාත්මක වේ. adaderana.lk

මර්වින් කැපෙයි

මහා මාර්ග නියෝජ්‍ය අමාත්‍ය ආචාර්ය මර්වින් සිල්වා මහතාගේ අමාත්‍ය ධූරය මෙන්ම ශ්‍රී ලංකා නිදහස් පක්ෂ සාමාජිකත්වය අහෝසි කිරීමට ජනාධිපතිවරයා පියවර ගත් බව ජනාධිපති මාධ්‍ය ඒකකය සඳහන් කරයි. adaderana.lk

ඔළුව බර මුත් ගමන සැහැල්ලුයි. .

අද පෙරවරුවේ විපක්ෂ නායක රනිල් වික්‍රමසිංහ මහතා සහ ජනාධිපති මහින්ද රාජපක්ෂ මහතා අතර හමුවක් පැවති බව ජනාධිපති මාධ්‍ය අංශය සඳහන් කළේය. එම අවස්ථාවේදී ජනපතිවරයා හා රනිල් වික්‍රමසිංහ මහතා කතාබහක යෙදී සිටි අයුරු මෙසේ ඡායාරූපයට නැගී තිබිණි. adaderana.lk

මර්වින් ඉල්ලා අස්වෙයි..?

මහා මාර්ග නියෝජ්‍ය අමාත්‍ය ආචාර්ය මර්වින් සිල්වා මහතා සිය නියෝජ්‍ය අමාත්‍ය ධූරයෙන් ඉල්ලා අස්වන බව විශ්වාසදායි ආරංචි මාර්ග තහවුරු කරයි. අද සවස මහා මාර්ග අමාත්‍යංශයේදී සිය ඉල්ලා අස්වීම බාරදීමට කටයුතු සැලසුම් කර ඇතැයි සඳහන් වේ. adaderana.lk

නිවාස අමාත්‍යංශය ගැන යෝජනා, චෝදනා වෙනුවෙන් දුරකථන අංකයක්

නිවාස, ඉදිකිරීම් හා පොදු පහසුකම් අමාත්‍යංශය සම්බන්ධ යෝජනා හා චෝදනා ඉදිරිපත් කිරීම සඳහා ජනතාව වෙනුවෙන් නව දුරකථන මධ්‍යස්ථානයක් ආරම්භ කර තිබේ. පෙරවරු 8 සිට රාත්‍රී 8 දක්වා මෙම දුරකථන මධ්‍යස්ථානය විවෘත කර තබන බව නිවාස, ඉදිකිරීම් හා පොදු පහසුකම් විමල් වීරවංශ මහතා සඳහන් කළේය.

අද කොළඹ පැවති මාධ්‍ය හමුවකදී අදහස් දක්වමින් ඒ මහතා මේ බව ප්‍රකාශ කළේය. ඒ අනුව 011 -2888871 හා 011 -2883868 යන දුරකථන අංක ඔස්සේ ජනතාවට නිවාස, ඉදිකිරීම් හා පොදු පහසුකම් අමාත්‍යංශය පිළිබඳ ඕනෑම යෝජනාවක් හා චෝදනාවක් ඉදිරිපත් කළ හැකි බව අමාත්‍යවරයා ප්‍රකාශ කළේය. adaderana.lk