මහරාජා සමූහ ව්‍යාපාරයට අයත් MBC මාධ්‍ය ජාලයේ විකාශන අවසර පත්‍රය මේ වන විට බලවත් තර්ජනයකට මුහුණ දී ඇති බව වාර්තා වේ. MBC මාධ්‍ය ජාලයේ අභ්‍යන්තර වාර්තා පවසන්නේ MBC මාධ්‍ය ජාලයේ ජම්මාන්තර හතුරෙකු ලෙස ප්‍රසිද්ධියේ පවා පෙනී සිටින මර්වින් සිල්වා මහතාට ජනමාධ්‍ය නියෝජ්‍ය ඇමැති ධූරය ලැබීම මෙයට හේතුව බවයි.
මීට පෙර වැරදි ප්‍රවෘත්තියක් විකාශය කිරීමේ කරුණ මුල් කර ගනිමින් එවකට එක්සත් ජාතික පක්ෂයේ මන්ත්‍රීවරයෙකුව සිටි දුමින්ද සිල්වා මහතාගේ සොහොයුරාට අයත් ABC මාධ්‍ය ආයතනයේ විකාශන අයිතිය අහෝසි කළ ආකාරයට MBC මාධ්‍ය ආයතනයේ විකාශන අයිතිය අහෝසි කිරීමට අවශ්‍ය කරුණු රැස් කිරීමට මේ වන විට විශේෂ කණ්ඩායමක් යොදවා ඇත.
පසුගිය කාලයේදී සිරස මාධ්‍ය ආයතනයට කොටි ලේබලය අලවා සිරස MBC මාධ්‍ය ඒකකය විරුද්ධව ප්‍රසිද්ධියේ උද්ඝෝෂන මෙහෙයවූ හා පසුගියදා එම ආයතනයට පහරදීම සම්බන්ධයෙන් චෝදනා එල්ල වූ මර්වින් සිල්වා මහතාටම ජනමාධ්‍ය නියෝජ්‍ය ඇමැති පදවිය ලබාදීම පිළිබඳව බොහෝ පිරිස් සිය විමතිය මෙන්ම හාස්‍ය ද පළ කර ඇත. MBC මාධ්‍ය ආයතනයට ප්‍රසිද්ධියේ කැලණිය ඩිපෝවට අයත් බස් රථවලින් හා කැලණිය ප්‍රාදේශීය සභාවේ මන්ත්‍රීවරුන් හා කැලණිය අවට පිරිස් යොදවා පහරදීම සම්බන්ධයෙන් ජනාධිපතිවරයා ගත් ක්‍රියාමාර්ගය මෙය බව මේ සම්බන්ධයෙන් අප සමඟ අදහස් දැක්වූ නම හෙළි කිරීමට අකමැති මාධ්‍යවේදියෙකු පැවසීය.lankatruth
