ජනාධිපති මහින්ද රාජපක්ෂ මහතා සහ විපක්ෂ නායක රනිල් වික්‍රමසිංහ මහතා අතර විශේෂ සාකච්ඡාවක් අද පස්වරු‍වේ අරලියගහ මන්දිරයේදී පැවැත්වුණු බව ජනාධිපති මාධ්‍ය ඒකකය සඳහන් කරයි.
පසුගිය සෙනසුරාදා දිනයේද මේ අයුරින්ම ජනාධිපතිවරයා හා විපක්ෂ නායකවරයා අතර සාකච්ඡාවක් පැවැත්වුණු අතර ව්‍යවස්ථා සංශෝධනයට අදාළ ඉදිරි කටයුතු පිළිබඳ එහිදී සාකච්ඡාවට ලක් වූ බවත්, යෝජිත ව්‍යවස්ථා සංශෝධනය සම්බන්ධයෙන් විපක්ෂ මන්ත්‍රීවරුන් ඉදිරි කාලයේ දී දැනුවත් කරන බව ජනාධිපති මහින්ද රාජපක්ෂ මහතා විපක්ෂ නායකවරයාට එදින දැනුම් දී තිබුණි.
පෙරවරු 9.30 ට පමණ ආරම්භ වූ එදින සාකච්ඡාව විනාඩි 30 කට ආසන්න කාලයක් පැවැත්වුණු අතර විපක්ෂ නායකවරයාට කඩවත පවත්වන්නට නියමිතව තිබුණු විරෝධතා ව්‍යාපාරයකට නායකත්වය දෙන්නට සිදුව තිබීම ඊට හේතුවයි.
ජනාධිපතිවරයාගේ ආරාධනයකට අනුව මෙම සාකච්ඡාවට සහභාගී වූ රනිල් වික්‍රමසිංහ මහතා ව්‍යවස්ථා සංශෝධනයට අදාළ කරුණු සාකච්ඡා කිරීම සඳහා තම නියෝජතයින් පිරිසක් ද සහභාගී කරවා ගත යුතු බව එහි දී දැනුම් දී ඇති බව එක්සත් ජාතික පක්ෂ මාධ්‍ය අංශය සඳහන් කර තිබිණි.
ඊට ජනාධිපතිවරයා එකඟතාව පළ කර තිබීම හේතුවෙන් අද දිනයේ යළි විපක්ෂ නායකවරවයා ඇතුළු එක්සත් ජාතික පක්ෂ නියෝජිතයින් සමග මෙම සාකච්ඡාව පැවැත්වී ඇත. adaderana
