දවසින් ප්‍රශ්න විසඳන්න බෑ -බන්දුල

අධ්‍යාපන ක්ෂේත්‍රයේ පවතින ගැටලු එක් දිනකින් අවසන් කළ නොහැකි බව අධ්‍යාපන අමාත්‍ය බන්දුල ගුණවර්ධන මහතා පවසයි. මෙරට ගැටලු විසඳීම සඳහා ආකල්පමය වශයෙන් ප්‍රබල වෙනසක් අවශ්‍ය බව ඔහු පෙන්වා දෙයි.

ආණ්ඩු වෙනස් වන විට වෙනස් නොවන අධ්‍යාපන ප්‍රතිපත්තියක් සකස් කිරීම සඳහා තම අමාත්‍යාංශය මේ වන විට කටයුතු කරමින් සිටින බව ද බන්දුල ගුණවර්ධන මහතා සඳහන් කළේය. බස්නාහිර පළා‍තේ උපාධිධාරීන් පිරිසකට ගුරු පත්වීම් ප්‍රදානය කිරීම වෙනුවෙන් අද පෙරවරුවේ පැවති උත්සවයකට සහභාගි වෙමින් අධ්‍යාපන අමාත්‍ය බන්දුල ගුණවර්ධන මහතා මේ අදහස් පළ කළේය.

අනුර කුමාර සීපා ගැන විවාදයක් ඉල්ලයි

ඉන්දියාව හා ශ්‍රී ලංකාව අතර අත්සන් කිරීමට යෝජිත සීපා ගිවිසුම සම්බන්ධයෙන් පාර්ලිමේන්තු විවාදයක් පැවැත්විය යුතු බව ප්‍රජාතන්ත්‍රවාදී ජාතික සන්ධානයේ පාර්ලිමේන්තු මන්ත්‍රී අනුර කුමාර දිසානායක මහතා පවසයි. ඒ සඳහා වූ ‍යෝජනාව ලබන 8 වැනිදා පාර්ලිමේන්තුවට ඉදිරිපත් කරන බව මන්ත්‍රීවරයා පෙන්වා දෙයි. එම සතිය තුළ යෝජිත ගිවිසුම පිළිබඳව විවාදයක් පැවැත්වීමට ආණ්ඩු පක්ෂයේ එකඟත්වය ලබාගැනීමට ද බලාපොරොත්තු වන බව අනුර කුමාර දිසානායක මහතා සඳහන් කළේය. සීපා ගිවිසුම අත්සන් කළහොත් ඉන්දියාව හා ශ්‍රී ලංකාව අතර කර්මාන්ත හා සේවා සඳහා හුවමාරු කරගැනීමේ දී දැනට පවතින බාධක ලිහිල් වේ.

එමගින් ඉන්දියානු ආයෝජන සහ සේවාවන් ශ්‍රී ලංකාව තුළට විශාල වශයෙන් පැමිණීම හේතුවෙන් මෙරට කර්මාන්ත කඩාවැටීමකට ලක්වන බව දේශීය ව්‍යාපාරිකයින් පෙන්වා දෙයි. මෙම ගිවිසුම අත්සන් කිරීමට එරෙහිව පසුගියදා දේශීය ව්‍යාපාරිකයින් පිරිසක් උද්ඝෝෂණයක නිරත වූ අතර ඔවුන් ජනාධිපතිවරයා වෙත සංදේශයක් ද භාරදුන්නේය. රටට හානිදායක කිසිදු ගිවිසුමකට තමන් අත්සන් නොකරන බව එම අවස්ථාවේ දී ජනාධිපති මහින්ද රාජපක්ෂ මහතා සඳහන් කළේය. කෙසේවෙතත් ඉදිරියේ දින කිහිපය තුළ ජනාධිපතිවරයා ඉන්දීය සංචාරයක නිරත වීමට නියමිතය. adaderana

එජාපයේ සීතල යුද්ධයක්?

එක්සත් ජාතික පක්ෂ ප්‍රතිසංවිධාන ක්‍රියාවලියේ මේ වන විට කැපී පෙනෙන චරිත දෙකක් ගොඩ නැගී තිබේ. ඉන් එක් අයෙක් සජිත් ප්‍රේමදාස මහතා වන අතර අනෙක් පුද්ගලයා වන්නේ රවී කරුණානායක මහතාය. ආකාරයට ඔවුන් දෙදෙ‍නා අතර අනාගත නායකත්වය සඳහා සීතල යුද්ධයක් නිර්මාණය වී ඇති බව පක්ෂ අභ්‍යන්තර ආරංචි මාර්ග සඳහන් කරයි. පක්ෂ නායකත්වය සහ අනෙකුත් ජ්‍යෙෂ්ඨ තනතුරු සදහා පුද්ගලයින් නම් කිරීම ඡන්දයකින් සිදුකළ යුතු බවට ඉදිරිපත් වූ යෝජනාව පසුගියදා කෘත්‍යාධිකාරී මණ්ඩලයේ දී ඒකමතිකව සම්මත විය.

ඉදිරියේ දී නායකත්වය සඳහා ඡන්ද විමසීමක් සිදුවීමට ඉඩකඩ ඇති බැවින් මොවුන් දෙදෙනාම මේ වන විට ඡන්ද එක්රැස් කිරීමේ කටයුතුවල නිරතව සිටින බව වාර්තා වේ. කෙසේවෙතත් මේ වන විටත් සජිත් ප්‍රේමදාස මහතාත් රවී කරුණානායක මහතාත් එහි මූලික පියවරක් ලෙස මාධ්‍ය මෙහෙයුමක් ද ආරම්භ කර තිබේ. පක්ෂ නායක රනිල් වික්‍රමසිංහ මහතාගේ සහ ඔහුගේ සමීපතමයන්ගේ සහය රවී කරුණානායක මහතාට හිමිවන අතර සජිත් ප්‍රේමදාස මහතාට ප්‍රතිසංවිධාන වැඩපිළිවෙළට උරදුන් පිරිසගේ සහය හිමිවන බව‍ දේශපාලන ආරංචි මාර්ග පවසයි. මෙම සීතල යුද්ධය කුමන අතකට පෙරලේවි ද කියා කිසිවෙකුටත් කිව නොහැක්කේ ඔවුන් දෙදෙනාම පක්ෂයේ ප්‍රබල චරිත දෙකක් වන නිසාය. adaderana

පොළොන්නරුව රෝහලට හෘද රෝග ඒකකයක්

පොළොන්නරු මහ රෝහලට විශාල අඩුපාඩුවක්ව පැවති හෘද රෝග ඒකකයක් ලබා දීමට සෞඛ්‍ය අමාත්‍ය මෛත්‍රීපාල සිරිසේන මහතා පියවර ගෙන තිබේ. මේ සඳහා වැය කර ඇති මුදල රුපියල් මිලියන 6.5 කි. පොළොන්නරුව රෝහලට පැමිණෙන හදවත් රෝගීන්ට ප්‍රතිකාර ලබාගැනීම සඳහා කොළඹ, නුවර, කුරුණෑගල මහරෝහල්වලට පැමිණීමට පසුගිය කාලයේ දී සිදුවිය.
දිනකට හෘදයාබාධ සහිත රෝගීන් සියයකට අධික පිරිසක් ප්‍රතිකාර ලබාගැනීම සඳහා රෝහලට පැමිණිය ද ඔවුන්ට අවශ්‍ය පහසුකම් සැලසීමට පසුගිය කාලයේ දී නොහැකි වූ බව පොළොන්නරුව රෝහල් බලධාරීන් පවසයි. එහෙත් මෙම ඒකකය විවෘත වීමත් සමග සියලුම පරීක්ෂණ කටයුතු සහ ප්‍රතිකාර කටයුතු ලබාදිය හැකි බව හෘද රෝග විශේෂඥ වෛද්‍ය රුවන් ඒකනායක මහතා සඳහන් කරයි. එම හෘද ‍රෝග ඒකකය විවෘත කිරීම සිදුවූයේ සෞඛ්‍ය අමාත්‍ය මෛත්‍රීපාල සිරිසේන මහතා අතිනි. adaderana

මාස 6ක් තුළ කිසිදු වැටලීමක් නෑ

අල්ලස් හෝ දූෂණ චෝදනා විමර්ශන කොමිසමේ වැටලීම් කටයුතු අක්‍රිය වී දැනට මාස 6 කට ආසන්න කාලයක් ගතවී තිබේ. එම කාලය තුළ කිසිදු වැටලීමක් සිදුකර නොමැති බව අල්ලස් හෝ දූෂණ චෝදනා විමර්ශන කොමිසම සඳහන් කළේය. අල්ලස් කොමිසමේ සාමාජිකයින් තිදෙනාගේ සේවා කාලය පසුගිය දෙසැම්බර් මාසයේ දී අවසන් විය. එබැවින් අල්ලස් සම්බන්ධ වැටලීම් සිදුකිරීම සඳහා අනුමැතිය ලබාගැනීමට එහි සාමාජිකයින්ට නොහැකි වීම හේතුවෙන් වැටලීම් කටයුතු අඩාල වී ඇති බව අල්ලස් කොමිසම පවසයි.
අල්ලස් කොමිසමේ සාමාජිකයින් තිදෙනා පත්කිරීමේ බලය ඇත්තේ ව්‍යවස්ථාදායක සභාවටය. එහෙත් ව්‍යවස්ථාදායක සභාව අක්‍රිය වීම හේතුවෙන් එම අල්ලස් කොමිසමේ සාමාජිකයින් පත්කිරීමේ බලය ජනාධිපතිවරයා‍ වෙත පැවරී ඇත. ඉදිරි සතිය ඇතුළත ජනාධිපතිවරයා විසින් කොමිසමේ සාමාජිකයින් තිදෙනා නම් කරනු ඇති බව අල්ලස් කොමිසම ආරංචි මාර්ග සඳහන් කළේය.

බෞද්ධාලෝක මාවත යළි විවෘතයි

කොළඹ බෞද්ධාලෝක මාවතේ වාහන ගමනාගමනය සඳහා මෙතෙක් වසා තිබූ කොටස සැහැල්ලු වාහන සඳහා විවෘත කර තිබේ. ස්ටැන්ලි විජේසුන්දර මාවත ආසන්න‍යේ සිට තුම්මුල්ල දක්වා වන කොටස ආරක්ෂක හේතූන් මත පසුගිය ස‍මයේ වසා දමා තිබුණි.
මේ වන විට බෞද්ධාලෝක මාවතේ එම කොටස සැහැල්ලු වාහන සඳහා විවෘත කළ බව කුරුඳුවත්ත පොලිසිය පැවසුවේය. පෙරවරු 6 සිට රාත්‍රී 9 දක්වා එම මාර්ගය සැහැල්ලු වාහන සඳහා විවෘතව පවතින බව කුරුඳුවත්ත පොලිසිය වැඩිදුරටත් සඳහන් කළේය. adaderana

කර්මාන්ත අංශයේ ඉහළ වර්ධනයක්

ශ්‍රී ලංකාවේ කර්මාන්ත අංශය පසුගිය මාර්තු මාසය වන විට 9. 3% ක වර්ධනයක් පෙන්නුම් කර ඇති බව ශ්‍රී ලංකා මහ බැංකුව පවසයි. එය පසුගිය වසරේ අදාළ කාලයට සාපේක්ෂව අමෙරිකානු ඩොලර් මිලියන 428 ක වර්ධනයක් බව මහබැංකුව පෙන්වාදෙයි.
අපනයනයෙන් ද 4 . 8% ක වර්ධනයක් පෙන්නුම් කරන බව මහ බැංකුව සඳහන් කරයි. එය පසුගිය වසරේ අදාළ කාලයට සාපේක්ෂව අමෙරිකානු ඩොලර් මිලියන 660 ක ඉහළ යාමකි. adaderana

කමිටුව ගැන බලාපොරොත්තු තැබිය හැකියි -හිලරි

ශ්‍රී ලංකාවේ යුද ගැටුම් හටගැනීම පිළිබඳ අධ්‍යයනය කිරීම සඳහා පත්කර ඇති විශේෂ කමිටුව කෙරෙහි බලාපොරොත්තු තබා ගත හැකි බව අමෙරිකානු රාජ්‍ය ලේකම් හිලරි ක්ලින්ටන් මහත්මිය පවසයි. මෙය ශ්‍රී ලංකාවේ තිරසාර සාමයක් සඳහා මහඟු අඩිතාලමක් වනු ඇති බව ඇය සඳහන් කරයි. විදේශ අමාත්‍ය මහාචාර්ය ජී.එල්. පීරිස් මහතා සමග මාධ්‍ය හමුවකට සහභාගී වෙමින් ඇය මේ බව ප්‍රකාශ කර ඇත.
මෙම කමිටුව ස්වාධීනව අපක්ෂපාතීව සහ කාර්යක්ෂමතාවයෙන් යුතුව තම කාර්යය ඉටුකරනු ඇති බවට විශ්වාසය පළ කරන බව එහිදී ඇය වැඩිදුරටත් ප්‍රකාශ කර ඇත. මෙමගින් දශක ගණනාවක් පුරා පැවති යුද්ධයෙන් පීඩාවට පත් ජනතාවගේ ගැටලුවලට ස්ථිර විසඳුම් ලබාදීමට ද පදනම සකස් කරනු ඇති බව හිලරි ක්ලින්ටන් මහත්මිය එහිදී පවසා ඇති බව සඳහන්ය.adaderana

කැබ් රථයක් හා පාපැදියක් ගැටී අයෙක් මියයයි

වෙල්ලාවලි, මන්ඩූර් මාර්ගයේ සිදුවූ රිය අනතුරකින් පුද්ගලයෙකු ජීවිතක්ෂයට පත්ව තිබේ. කැබ් රථයක් හා පාපැදියක් එකිනෙක ගැටීමෙන් මෙම අනතුර සිදුව ඇති බව පොලිසිය පවසයි.
අනතුරින් තුවාල ලැබූ පාපැදිකරු මඩකලපුව රෝහලට ඇතුළත් කිරිමෙන් අනතුරුව මියගොස් ඇති බව සඳහන්ය. මියගොස් ඇත්තේ කුරුමන්වේලි ප්‍රදේශයේ පදිංචි 62 හැවිරිදි පුද්ගලයෙකි. අනතුර සම්බන්ධයෙන් කැබ් රථයේ රියදුරු පොලිසිය විසින් අත්අඩංගුවට ගෙන ඇත. adaderana

සංවර්ධනයට පූර්ණ සහය

වසර 30 ක යුද්ධයෙන් පසුව ස්ථිරසාර සංවර්ධනයක් කරා රට රැගෙනයාමේ ඓතිහාසික අවස්ථාවක් උදාවී ඇති බව ආසියානු සංවර්ධන බැංකුවේ සභාපති හරුහිතෝ කුරෝඩා මහතා පවසයි. යුද්ධයෙන් විනාශ වූ ප්‍ර‍දේශවල යටිතල පහසුකම් නැංවීමට ද ප්‍රමුඛත්වය ලබාදිය යුතු බව ඔහු සඳහන් කරයි. ශ්‍රී ලංකාවේ සංවර්ධන ක්‍රියාවලියට ආසියානු සංවර්ධන බැංකුවේ සක්‍රිය දායකත්වය ලබාදී ඇති බව හෙතෙම පෙන්ව‍ා දෙයි.
මෙම වසරට බලපාන පරිදි අ‍මෙරිකානු ඩොලර් මිලියන 150 ක ණය මුදලක් ලංකාවට ලබාදී ඇත්තේ එහි එක් පියවරක් වශයෙන් බව ඔහු පෙන්වාදෙයි. ශ්‍රී ලංකාවට ඉහළ වර්ධන වේගයක් අත්පත් කරගැනීමට නම් අයවැය හිඟය පාලනය කරගත යුතු බව ද හෙතෙම අවධාරණය කරයි. ආසියානු සංවර්ධන බැංකුවේ සභාපතිවරයා තෙදින සංචාරයක් සඳහා දිවයිනට පැමිණි අතර ඔහු ඊයේ දිවයිනෙන් පිටත්ව ගියේය. adaderana

බලය ගන්න හැටි සජිත් කියයි

එක්සත් ජාතික පක්ෂය යළි රාජ්‍ය බලය ලබාගැනීමට නම් එහි ප්‍රතිපත්ති මාලාවේ වෙනස්කම් සිදුවිය යුතු බව පාර්ලිමේන්තු මන්ත්‍රී සජිත් ප්‍රේමදාස මහතා පවසයි. ඔහු පෙන්වා දෙන්නේ ග්‍රාමීය දිළිඳු ජනතාවගේ ගැටලුවලට විසඳුම් ලබාදිය හැකි පක්ෂයක් බවට එක්සත් ජාතික පක්ෂය පරිවර්තනය විය යුතු බවයි. තමා පක්ෂයේ පාලනය ලබාගන්නා විට අනිවාර්යයෙන් දිළිඳු ජනතාව කෙරෙහි වැඩි අවධානයක් යොමු කරන බව සජිත් ප්‍රේමදාස මහතා සඳහන් කළේය. හම්බන්තොට පැවති ජනහමුවකදී සජිත් ප්‍රේමදාස මහතා වැඩිදුරටත් පැවසුවේ එක්සත් ජාතික පක්ෂයේ හිමිකරුවන් වන්නේ මෙරට ‍පීඩිත පන්තියේ ජනතාව බවයි. adaderana

මැද පෙරදිග ගිය පිරිසක් යළි ගෙන්වයි

මැ‍දපෙරදිග සේවය සඳහා ගිය තවත් ‍ශ්‍රමිකයින් පිරිසක් මෙරටට ගෙන්වා ගැනීමට නියමිත බව විදේශ සේවා නියුක්ති කාර්යාංශය පවසයි.. එම කාර්යාංශ‍යේ අතිරේක සාමාන්‍යාධිකාරී එල්.කේ. රුහුණගේ මහතා පවසන පරිදි මැදපෙරදිග සේවයට ගොස් සිටියදී විවිධ ගැටලුවලට මුහුණදුන් සහ වීසා අවලංගු වී රැඳී සිටීමට සිදුවූ පිරිස් මෙලෙස ගෙන්වා ගැනීමට නියමිතය.
‍මෙම පිරිස ගෙන්වා ගැනීම සඳහා තානාපති මට්ටමෙන් ලබාගත යුතු අවසරය පිළිබඳ මේ වන විට කටයුතු කරමින් සිටින බව රුහුණගේ මහතා සඳහන් කළේය. ඒ අනුව ඉදිරි දින කිහිපය තුළ මෙම පිරිස ශ්‍රී ලංකාවට ගෙන්වා ගැනීමට හැකිවෙනු ඇතැයි සඳහන් වේ.
මේ අතර කාර්යාංශයේ සභාපති කිංස්ලි රණවක මහතා පැවසුවේ විදේශ සේවය සඳහා ගොස් අතරමංව සහ විවිධ ගැටලුවලට මුහුණ දී සිටින පිරිස් කඩිනමින් එවීම සඳහා කටයුතු කරන ‍ ලෙස සියලු තානාපති කාර්යාල වෙත මේ වන විටත් දැනුම් දී ඇති බවයි.
ගුවන් ගමන් තදබදය අවම කරගැනීම සඳහා ගිම්හාන නිවාඩු සමයට පෙර එවැනි පිරිස් එවීමට කටයුතු කිරීම වැදගත් බව කිංස්ලි රණවක මහතා වැඩිදුරටත් පවසයි. adaderana

ඉන්දියාවෙන් හොරෙන් මැණික් ගෙනත්

නීතිවිරෝධී ලෙස මෙරටට මැණික් ගල් ගෙන ඒමට උත්සාහ දැරූ පුද්ගලයෙකු කටුනායක ගුවන්තොටුපළ මත්ද්‍රව්‍ය කාර්යාංශය මගින් අත්අඩංගුවට ගෙන තිබේ. පොලිස් මාධ්‍ය ප්‍රකාශක පොලිස් අධිකාරී ප්‍රිශාන්ත ජයකොඩි මහතා පවසන පරිදි අදාළ පුද්ගලයා ඉන්දියාවේ සිට මෙරටට පැමිණ ඇත.. ඔහු රේගුවට නොදන්වා මැණික් ගල් කිලෝග්‍රෑම් 1යි ග්‍රෑම් 460 ක ප්‍රමාණයක් රැගෙන විත් තිබේ. ඊට අමතරව මෙරට වලංගු මුදලින් රුපියල් 14,900 ක මුදලක් ද ඔහු සතුව තිබූ බව ප්‍රිශාන්ත ජයකොඩි මහතා සඳහන් කරයි. පසුව එම සැකකරු වරද පිළිගැනීමෙන් පසු රුපියල් ලක්ෂයක දඩ මුදලක් නියම කර ඇති අතර ඔහු සතු වූ මුදල් රාජසන්තක කර තිබේ. adaderana

වෙසක් සතියේ සුරා නීතියට 950 ක් හසුවෙලා

වෙසක් සමයේ නීතිවිරෝධී ලෙස මත්පැන් අලෙවි කිරීම, නිෂ්පාදනය කිරීම ඇතුළු සුරාබදු පනත යටතේ වැරදි සිදුකළ පුද්ගලයින් 950 දෙනෙකු අත්අඩංගුවට ගැනීමට සුරාබදු දෙපාර්තමේන්තුව සමත් වී තිබේ.
එයින් වැටලීම් 48 ක්ම නීති විරෝධී මත්පැන් නිෂ්පාදනය කිරීම් සම්බන්ධයෙන් බවත්,62 ක් අන්තරායකර ඖෂධ පනත යටතේ කළ වැටලීම් බවත් සඳහන් වේ.
එම දෙපා‍ර්තමේන්තුවේ සුරාබදු අධිකාරී ප්‍රභාත් ජයවික්‍රම මහතා පැවසුවේ දින 3ක් තුළ සිදුකළ වැටලීම්වලින් මෙම පිරිස අත්අඩංගුවට ගැනීමට හැකිවූ බවයි.
දිවයින පුරා සුරාබදු දෙපාර්තමේන්තු කාර්යාල සම්බන්ධ කර ගනිමින් මෙම වැටලිම් සිදු කළ බවත්,වෙසක් සතිය පුරාම මෙම වැටලීම් ක්‍රියාත්මක කිරීමට පියවර ගන්නා බවත් හෙතෙම සඳහන් කරයි.adaderana

හොවාඩ්ගේ බලාපොරොත්තුවට ශ්‍රී ලංකාවෙන් තහංචි

අන්තර්ජාතික ක්‍රිකට් කවුන්සිලයේ උපසභාපති ධුරය සඳහා නාමයෝජනා ඉදිරිපත් කර ඇති ජෝන් හොවාඩ් මහතා පිළිබඳව කළ ඡන්ද විමසීමේ දී ශ්‍රී ලංකාව සිය අකමැත්ත පළ කර තිබේ. ශ්‍රී ලංකා ක්‍රිකට් ආයතනයේ අතුරු කමිටු සභාපති සෝමචන්ද්‍ර ද සිල්වා මේ බව ජාත්‍යන්තර මාධ්‍ය හමුවේ ප්‍රකාශ කර ඇති බව සඳහන් වේ.
ජෝන් හොවාඩ් ඔස්ට්‍රේලියාවේ හිටපු අගමැතිවරයා වන අතර මුත්තයියා මුරලිදරන්ට 2004 වසරේ දී එල්ල වූ පන්දුව දමා ගැසීමේ චෝදනාවට දෙවරක්ම පරීක්ෂණ පැවැත්විය යුතු බවට‍ ප්‍රකාශ කරමින් ඔහු මුරලිදරන්ව අභියෝගයට ලක් කර තිබිණි..
ඔස්ට්‍රේලියාවේ සහ නවසීලන්තයේ ඕනෑම ක්‍රිකට් කවුන්සිල නියෝජිතයෙකුට සහය පළ කළ ද ඉන් පිටත කිසිවෙකුත් පිළිබඳ තමා සෑහීමකට පත් නොවන බව සෝමචන්ද්‍ර මහතා පවසා ඇත.
‍ජෝන් හොවාඩ්ට මෙම ධුරය ලබාගැනීමට නම් ටෙස්ට් ක්‍රීඩා කරන රටවල් 10 අතුරින් රටවල් 7 ක කැමැත්ත හිමිවිය යුතුය.. මේ වන විටත් ඔස්ට්‍රේලියාවේ සහ නවසීලන්තයේ කැමැත්ත ඔහුට ලැබී ඇති අතර රටවල් 3 ක අකමැත්ත පළ වී තිබේ.
තවත් එක් රටක අකමැත්ත පළ වුවහොත් ජෝන් ‍හොවාඩ්ට මෙම ධුරය හිමිනොවේ. adaderana

ජාත්‍යන්තර ප්‍රජාව යනු එන්.ජී.ඕ කීපයක් නොවේ

ජාත්‍යන්තර ප්‍රජාව යන්න රාජ්‍ය නොවන සංවිධාන කිහිපයකට ලඝු නොවන බව විදේශ කටයුතු අමාත්‍ය මහාචාර්ය ජී.එල්. පීරිස් මහතා පවසයි. රාජ්‍ය නොවන සංවිධාන කිහිපයක් ශ්‍රී ලංකාවට එරෙහිව යුද අපරාධ චෝදනා එල්ල කිරීම යුක්තිසහගත නොවන බව හෙ‍තෙම පෙන්වාදෙයි.
එක්සත් ජාතීන්ගේ සංවිධානයට ජාතීන් 196 ක් ඇතුළත්ව සිටියදී ශ්‍රී ලංකාවට එරෙහිව චෝදනා එල්ල කර ඇත්තේ රාජ්‍ය නොවන සංවිධාන කිහිපයක් පමණක් බව පීරිස් මහතා පවසයි.
අමෙරිකාවේ සංචාරයක නිරත විදේශ කටයුතු අමාත්‍ය මහාචාර්ය ජී.එල්. පීරිස් මහතා එරට පැවති විශේෂ හමුවකදී මෙම කරුණු ප්‍රකාශ කර තිබේ.
රජයේ ආරක්ෂක අංශ මුදාගනු ලැබූ ලක්ෂ 3කට ආසන්න සිවිල් ජනතාව පිළිබඳවත් එල්.ටී.ටී.ඊය විසින් ඝාතනය කරනු ලැබූ දහස් ගණනක් වන ජනතාව පිළිබඳවත් අමතක නොකළ යුතු බව එහිදී පීරිස් මහතා වැඩිදුරටත් ප්‍රකාශ කර ඇත. adadaerana

කුණු වළකින් බිළිඳියක් හමුවෙයි

මස්කෙලිය-නෝටන් බ්‍රිජ් ප්‍රධාන මාර්ගයේ ළකඹේ ප්‍රදේශයේ කුණුවළක දමා ගොස් සිටි බිළිඳියක සොයා ගැනීමට මස්කෙලිය පොලිසිය සමත්වී තිබේ. ප්‍රදේශවාසීන්ගේ ලද තොරතුරකට අනුව අද උදෑසන 7.00 ට පමණ මෙම බිළිඳිය සොයා ගැනීමට හැකි වී ඇති බව වාර්තා වේ.
යහපත් සෞඛ්‍ය තත්ත්වයෙන් පසුවු දිනක් පමණ වයසැති මෙම බිළිඳිය මස්කෙලිය දිසා රෝහලට ඇතුළත් කර තිබේ.. බිළිඳිය පිළිබඳ වැඩිදුර පරීක්ෂණ සඳහා ඇය නාවලපිටිය මුලික රෝහල වෙත මාරු කර යැවු බව මස්කෙළිය දිසා රෝහලේ වෛද්‍ය නිළධාරී ජි.ජි.පි. ගමගේ මහතා පවසයි.
බිළිඳියගේ මව සොයා මස්කෙළිය පොලිසිය පරීක්ෂණ ආරම්භ කර ඇත. adaderana

බිම් බෝම්බ වෙනුවට උතුරට විදුලිය

උතුරු පළාතේ බිම් බෝම්බ ඉවත් කෙරෙන සෑම ප්‍රදේශයකටම විදුලිය සපයා දෙන බව ආර්ථික සංවර්ධන අමාත්‍ය බැසිල් රාජපක්ෂ මහතා පවසයි. උතුරු පළාතේ කඩිනම් සංවර්ධනය සඳහා අවශ්‍ය සියලු පියවර මේ වන විටත් ගෙන ඇති බව හෙතෙම කියා සිටියි.
වව්නියාවේ සිට යාපනයේ චුන්නාකමම් දක්වා විදුලි සම්ප්‍රේෂණ පද්ධතිය අලුතින් පිහිටුවීමේ කටයුතු ආරම්භ කිරීමේ අවස්ථාවට එක්වෙමින් බැසිල් රාජපක්ෂ මහතා‍ මෙම අදහස් පළ කළේය.
ආසියානු සංවර්ධන බැංකුවේ සහ ජපන් ජාත්‍යන්තර මිත්‍රත්ව සහයෝගිතා පදනම මගින් මෙම ව්‍යාපෘතිය සඳහා අවශ්‍ය මූල්‍යාධාර සපයා තිබේ.. මෙම අවස්ථාවට ඩග්ලස් දේවානනන්දා , රිෂාද් බදුයුදීන් සහ පාඨලී චම්පික රණවක අමාත්‍යවරුන් ද සහභාගි වී තිබේ. adaderana

පලාගිය සිරකරු යළිත් හිරේට

පල්ලේකැලේ එළිමහන් සිරකඳවුරෙන් පලාගිය සිරකරුවෙකු දික්වැල්ල පොලිසිය විසින් අත්අඩංගුවට ගෙන තිබේ. මෙම සිරකරු අප්‍රේල් මස 18 වන දින සිරකඳවුරෙන් පැන ගොස් ඇති බවයි වාර්තා වේ.
පුරාවස්තු සොරකම් කිරීමක් සම්බන්ධයෙන් මොහුට චෝදනා එල්ල වී තිබේ. දික්වැල්ල පොලිසිය විසින් අත්අඩංගුවට ගත් මෙම සැකකරු ඊයේ මාතර මහේස්ත්‍රාත් අධිකරණයට ඉදිරිපත් කිරීමෙන් අනතුරුව ‍මේ මස 31 වැනිදා දක්වා රක්ෂිත බන්ධනාගාර ගත කරනු ලැබිණි. adaderana

අභ්‍යන්තර කටයුතු වලට ඇඟිලිගහන්න දෙන්නේ නෑ

මානූෂීය මෙහෙයුමේ අවසාන අදියරේදී සාමාන්‍ය වැසියන් ඝාතනය වු බවට එල්ල වන චෝදනා තමන් තරයේ ප්‍රතික්ෂේප කරන බව ජනාධිපති මහින්ද රාජපක්ෂ මහතා පවසයි.
ශ්‍රී ලංකා හමුදාව කිසිවිටකත් සාමාන්‍ය වැසියන් ඉලක්ක කොට ප්‍රහාර එල්ල නොකරන බව හෙතෙම පෙන්වා දෙයි. "අල්ජසීරා"රූපවාහිනීය සමග පැවැති මාධ්‍ය සාකච්ඡාවකට එක්වෙමින් ජනාධිපති මහින්ද රාජපක්ෂ මහතා මෙම අදහස් පළ කර තිබේ. දෙමළ ජනතාවට නිදහසේ ජිවත් විය හැකි වාතාවරණයක් ශ්‍රී ලංකාව තුළ ‍ මේ වන විට ඇති කර ඇති බව ජනාධිපතිවරයා මෙහිදී පෙන්වා දුන‍්නේය.
උතුරේ සිටින ජනතාවට දකුණටත් දකුණේ සිටින ජනතාවට උතුරටත් නිදහසේ ගමන් කළ හැකි වාතාවරණයක් බිහිවී ඇති බව ජනාධිපති මහින්ද රාජපක්ෂ මහතා ප්‍රකාශ කර ඇත.. මේ වන විට නැවත පදිංචි කිරීමේ කටයුතු සියයට 90ක් පමණ අවසන් කර ඇති බවත් දෙසැම්බර් මාසයට පෙර සහන ගම්මානවල සිටින සියලු වැසියන් නැවත පදිංචි කරන බවත් ජනාධිපතිවරයා මෙහිදි පෙන්වා දී තිබේ.
මෙරට අභ්‍යන්තර ගැටලු වලට කිසිදු රටකට හෝ කිසිදු සංවිධානයකට මැදිහත් වීමට ඉඩ නොතබන බව ද මහින්ද රාජපක්ෂ මහතා මෙම සාකච්ඡාවේදී වැඩිදුරටත් අවධාරණය කර ඇත. adaderana

‍ත්‍රස්ත ක්‍රියාකාරකම් ඇතුළත් ජංගම දුරකතන අල්ලයි

එල්.ටී.ටී.ඊ. සංවිධානයේ ත්‍රස්තවාදී ක්‍රියාකාරකම් වල දර්ශන ඇතුළත් ජංගම දුරකථන සමග පුද්ගලයන් තිදෙනෙකු මඩකළපුව ප්‍රදේශයේදී අත්අඩංගුවට ගෙන තිබේ.
පොලිස් මාධ්‍ය ප්‍රකාශක පොලිස් අධිකාරී ප්‍රිශාන්ත ජයකොඩි මහතා සඳහන් කරන පරිදි ඊයේ පස්වරුවේ මඩකළපුව ප්ලොට් හංදිය මාර්ග බාධකයේදී මොවුන් අත්අඩංගුවට ගෙන ඇත.
අත්අඩංගුවට ගත් සැකකරුවන් සම්බන්ධයෙන් සිදුකළ පරීක්ෂණ වලදී එල්.ටි.ටි.ඊ. සංවිධානය විසින් සිදුකරන ලද රාජ්‍ය විරෝධී ක්‍රියාකාරකම් හා වෙනත් අසභ්‍ය දර්ශන ඇතුළත් පරිඝණකයක් සහ උපාංග ද සොයාගෙන තිබේ..
මොවුන් නාවක්කාඩු ප්‍රදේශයේ පදිංචිකරුවන් තිදෙනෙකු බව පොලිසිය සඳහන් කරයි. වව්නතිව් පොලිසිය අත්අඩංගුවට ගත් මෙම සැකකරුවන් තිදෙනා සම්බන්ධයෙන් වැඩිදුර පරීක්ෂණ පවත්වයි. adaderana

ජංගම දුරකතන සොරෙක් මාට්ටු

ජංගම දුරකථන සොරකම් කිරීම ඇතුළු අපරාධ රැසකට සම්බන්ධ පුද්ගලයෙකු ග්‍රෑන්ඩ්ස්පාස් ප්‍රදේශයේදී අත්අඩංගුවට ගෙන තිබේ. මොහු කාලයක සිට අධිකරණය මග හරිමින් සිටි පුද්ගලයෙකු බව පොලිසිය පවසයි.
කොළඹ මධ්‍යම දිසා දූෂණ මර්දන ඒකකයේ නිලධාරීන් සිදුකළ වැටලීමකදී මොහු අත්අඩංගුවට ගෙන ඇති බව සඳහන් වේ. අත්අඩංගුවට ‍ගත් සැකකරු මත් ද්‍රව්‍ය වලට දැඩි ලෙස ඇබ්බැහි වී ඇති බවට පොලිසිය සිදුකළ මූලික පරීක්ෂණ වලින් අනාවරණය වී තිබේ. adaderana

තාප්පයකට බිලිවීමෙන් සෞදියේදී අයෙක් මරුට

සෞදි අරාබියේ කම්කරුවකු ලෙස සේවයේ නියුතුව සිටි ශ්‍රී ලාංකිකයෙකු තාප්පයකට යටවීමෙන් ජීවිතක්ෂයට පත්වී තිබේ. රියාද් නගරයේ සේවයේ කරමින් සිටියදී මොහු ජීවිතක්ෂයට පත්වී ඇති අතර තාප්පය කඩාවැටීමේ සිදුවීමෙන් තවත් අයෙකු තුවාල ලබා ඇතැයි විදෙස් මාධ්‍ය සඳහන් කරයි.
පරීක්ෂණ කටයුතු නිමවීමෙන් පසු මිය ගිය පුද්ගලයාගේ මිනිය ශ්‍රී ලංකාවට ගෙන ඒමට කටයුතු යොදා ඇතැයි විදේශ සේවා නියුක්ති කාර්යාශයේ අතිරේක සාමානධිකාරී එල්.කේ රුහුණගේ මහතා පවසයි.
තුවාල ලැබූ පුද්ගලයා වෛද්‍ය ප්‍රතිකාර සඳහා යොමුකර ඇතැයිද හෙතෙම වැඩිදුරටත් කියා සිටියි. adaderana

ඩුබායි සිට අඩු වියදම් ගුවන් සේවයක්

ශ්‍රි ලංකාව හා ඩුබායි අතර නව ගුවන් ගමන් සේවයක් ආරම්භ කිරීමට පියවරගෙන තිබේ. ඩුබායි ගුවන් සමාගමක් මගින් මෙම ගුවන් සේවය ආරම්භ කිරීමට නියමිත බව සඳහන්ය. ලබන මස සිට ආරම්භ කිරීමට නියමිත මෙම ගුවන් සේවය අඩු වියදම් ගුවන් සේවයක් ලෙස පවත්වාගෙන යාම මෙමගින් අරමුණු කෙරෙන බව එම ගුවන් සමාගම පවසයි.
ශ්‍රි ලාංකික ගුවන් මගීන් ලක්ෂ තුනක් පමණ මෙහි සේවය ලබාගනු ඇති බවට අදාළ ගුවන් සමාගම අපේක්ෂා කරයි. සඳුදා, බදාදා, බ්‍රහස්පතින්දා සහ සෙනසුරාදා යන දිනවල දෙරට අතර ගුවන් ගමන් සිදුකිරීමට ද නියමිතය.adaderana

හොර කුලීකරුවන් දෙදෙනෙක් හසුවේ

කුලී ගමන් යන මුවාවෙන් ගමනාන්තයට නොගොස් මගීන් අතරමං කර ඔවුන් සතු භාණ්ඩ පැහැරගන්නා පුද්ගලයින් දෙදෙනෙකු පොලිසිය විසින් අත්අඩංගුවට ගෙන තිබේ. පොලිසියට ලැබුණු පැමිණිලි කිහිපයකට අනුව පරීක්ෂණ පැවැත්වු නිලධාරීන් කණ්ඩායමක් විසින් මොවුන් අත්අඩංගුවට ගෙන ඇති බව වාර්තා වේ.
මාතලේ දික්කිරියවත්ත ප්‍රදේශයේදී මොවුන් අත්අඩංගුවට ගෙන ඇති අතර ඔවුන් මාතලේ මහේස්ත්‍රාත් අධිකරණය වෙත ඉදිරිපත් කිරීමට නියමිත බව සඳහන්ය. මේ සම්බන්ධයෙන් මාතලේ පොලිසිය වැඩිදුර පරීක්ෂණ මෙහෙයවයි. adaderana

රනිල්ගේ නායකත්වය ශක්තිමත්

එක්සත් ජාතික පක්ෂයේ යම් වෙනස් කමක් සිදුවිය යුතු බව තමන්ගේ ද පෞද්ගලික මතය බව පාර්ලිමේන්තු මන්ත්‍රීනි උපේක්ෂා ස්වර්ණමාලී මහත්මිය පවසයි.

එහෙත් පක්ෂ නායකත්වය වෙනස් විය යුතු ද නැද්ද යන කාරණය සම්බන්ධයෙන් තමන් කිසිවක් ප්‍රකාශ කිරීමට කැමැත්තක් නොදක්වන බවත්,එය තීරණය කිරීමේ වගකීම එ.ජා.ප කෘත්‍යධිකාරී මණ්ඩලය සතු වන බවත් ඇය කියා සිටියාය.

ස්වර්ණමාලී මහත්මිය මේ බව කියා සිටියේ අද කොළඹ පැවති මාධ්‍ය හමුවකට සහභාගිවෙමිනි.

රනිල් වික්‍රමසිංහ මහතා විපක්ෂ නායකවරයා ලෙස ඉතාමත් බුද්ධිමත්,ශක්තිමත් හා ජාත්‍යන්තර මට්ටමේ පිළිගත් ශ්‍රේෂ්ඨ නායකයෙකු බවද ඇය වැඩිදුරටත් සඳහන් කළේය.

නායකත්වය ගන්නා දිනය මගෙන් අහනවා

හම්බන්තොට දිස්ත්‍රීක්කයේ ජනතාව එක්සත් ජාතික පක්ෂය තුළ විප්ලවයක් කරමින් සිටින බව පාර්ලිමේන්තු මන්ත්‍රී සජිත් ප්‍රේමදාස මහතා පවසයි.
එකී විප්ලවය නම් පක්ෂ නායකත්වය හම්බන්තොට දිස්ත්‍රීක්කයට දිනා දීමේ විප්ලවය බව හෙතෙම කියා සිටියේ අද හම්බන්තොට -තිස්සමහාරාමය ප්‍රදේශයේ පැවති ජන හමුවක් අමතමිනි. දිස්ත්‍රීක්කයේ මෙන්ම දිස්ත්‍රීක්කයෙන් පිටත ජනතාවද තමන්ගෙන් පක්ෂයේ යම් යම් ඉහළ තනතුරු ලබා ගන්නේ කවදාදැයි අසන බවත්,විශේෂයෙන්ම පක්ෂ නායකත්වය ගන්නේ කවදාදැයි අසන බව හෙතෙම කියා සිටියේය.
පක්ෂ නායකත්වය ඇතුළු ඉහළ තනතුරු සඳහා ඡන්ද බලයෙන් තෝරා පත් කර ගැනීමට අවස්ථාව සලසා දීමට හැකි වීම ප්‍රජාතන්ත්‍රවාදය ගරු කරන සියලු දෙනා ලැබූ ජයග්‍රහණයක් බව ත් ප්‍රේමදාස මහතා සඳහන් කළේය.
මේ හේතුවෙන් ඉතා පහළ පාන්තික,දක්ෂයින්ට පවා පක්ෂයේ ඉහළ තනතුරු දැරීමට අවස්ථාව සැලසෙන බව හෙතෙම වැඩිදුරටත් කියා සිටියේය. adaderana

පාලිත රංගේට පහරදුන්නාට නිදහසට කරුණු විමසයි

පාර්ලිමේන්තු මන්ත්‍රී පාලිත රංගේ බණ්ඩාර මහතාට පහරදීම සම්බන්ධයෙන් චෝදනා ලැබ සිටින පළාත් සභා මන්ත්‍රී ශාන්ත සිසිර කුමාර අබේසේකර මහතාගෙන් නිදහසට කරුණු විමසා ඇතැයි එක්සත් ජාතික පක්ෂය පවසයි.
නිවේදනයක් නිකුත් කරන එම පක්ෂයේ මහලේකම් තිස්ස අත්තනායක මහතා පවසන පරිදි පසුගිය මැයි මස 11 වැනි දින මීට අදාළ ලිපිය ලියාපදිංචි තැපෑලෙන් අබේසේකර මහතා වෙත යොමු කර ඇත.
ඒ අනුව මේ මස 31 වැනි දිනට පෙර නිදහසට කරුණු ඉදිරිපත් කිරීමට අබේසේකර මහතාට අවස්ථාව ලබාදී තිබේ. එදිනෙන් පසු මේ පිළිබඳ විනය පරීක්ෂණ මණ්ඩලයක් පත්කෙරෙන අතර එහිදී ඉදිරිපත් කෙරෙන නිර්දේශ පක්ෂයේ විනය කමිටුවටත් එමගින් කෘත්‍යාධිකාරී මණ්ඩලයටත් ඉදිරිපත් කරන බව තිස්ස අත්තනායක මහතා පවසයි.
අදාළ සිද්ධිය සම්බන්ධයෙන් විධිමත් ක්‍රියාමාර්ගයක් ගෙන නොමැති බවට පළ වන වාර්තා හේතුවෙන් මෙම නිවේදනය නිකුත් කරන බව ඔහු වැඩිදුරටත් කියා සිටියි. adaderana

අසැබි වෙබ් අඩවි වලට යාම වළකන්න තැතක්

ජංගම දුරකතන මගින් අසභ්‍ය වෙබ් අඩවිවලට පිවිසීම අවහිර කිරීම සම්බන්ධයෙන් විමර්ශන සිදුකරන ලෙස බම්බලපිටිය ළමා අධිකරණය පොලිස් ළමා හා කාන්තා කාර්යාංශයට නියෝග කර තිබේ.
මෙම නියෝගය නිකුත් කර ඇත්තේ එවැනි අසභ්‍ය වෙබ් අඩවි සම්බන්ධයෙන් ලැබී තිබෙන පැමිණිලි පිළිබඳව එම කාර්යාංශය අධිකරණය හමුවේ කරුණු දැක්වීමෙන් අනතුරුවයි.
දැනට සිදුකර තිබෙන පරීක්ෂණවලදී එවැනි අසභ්‍ය වෙබ් අඩවි 50 ක් පිළිබඳ තොරතුරු වාර්තා වන බව පොලිස් ළමා හා කාන්තා කාර්යාංශය මෙහිදී අධිකරණයට දැනුම් දෙන ලදී.
ඒ අනුව එවැනි වෙබ් අඩවි අවහිර කිරීමට ඇති හැකියාව පිළිබඳ වාර්තා කිරීම සඳහා ජංගම දුරකතන සමාගම්වල කළමනාකරුවන්ට ලබන දෙවැනිදා පොලිස් ළමා හා කාන්තා කාර්යාංශය හමුවේ පෙනී සිටින ලෙස ද ළමා අධිකරණයේ විනිසුරුවරිය දැනුම් දී තිබේ.adaderana

අයිෆා වෙනුවෙන් පොලීසිය සීරුවෙන්

මෙරටදී පැවැත්වීමට නියමිත අයිෆා සිනමා සම්මාන උ‍ළෙල වෙනුවෙන් වි‍ශේෂ ආරක්ෂක වැඩපිළි‍වෙළක් ක්‍රියාත්මක කරන බව පොලීසිය පවසයි.
ඒ අනුව පොලිස් නිලධාරීන් 6,000 කට වැඩි පිරිසක් ආරක්ෂක කටයුතු වෙනුවෙන් යොදවන බව එම දෙපාර්තමේන්තුව සඳහන් කළේය. අයිෆා සිනමා ‍උළෙල වෙනුවෙන් කොළඹ නගරයේ අලංකරණ කටයුතු ඇතුළු විශේෂ ක්‍රියාමාර්ග රැසක් මේ වන විටත් දියත් කර තිබේ.
සිනමා උළෙල සඳහා පැමිණෙන ආරාධිතයින් වෙනුවෙන් විශේෂ දුම්රිය සේවයක් ක්‍රියාත්මක කිරීමට ශ්‍රී ලංකා දුම්රිය සේවය ද කටයුතු යොදා ඇති බව සඳහන් වේ-. adaderana

විනය පරීක්ෂණයක් නැතිව ඉවත් කරන්න බෑ

තමන් තවදුරටත් එක්සත් ජාතික පක්ෂ කෘත්‍යාධිකාරී මණ්ඩලයේ කටයුතු කරන බව එම පක්ෂයේ පාර්ලිමේන්තු මන්ත්‍රී රංජිත් මද්දුමබණ්ඩාර මහතා පවසයි.
කෘත්‍යාධිකාරී මණ්ඩලයෙන් ඉවත් කළ බවට කිසිදු දැනුම් දීමක් තමන් වෙත සිදුකර නොමැති බව හෙතෙම කියාසිටියි.
කිසියම් අවස්ථාවක සාමාජිකයෙකු පක්ෂයෙන් ඉවත් කරන්නේ නම් ඔහුට අදාළව විනය පරීක්ෂණයක් සිදුකරන බව පෙන්වා දෙන රංජිත් මද්දුමබණ්ඩාර මහතා විනය පරීක්ෂණයේ දී තමාගේ නිවැරදිභාවය සනාථ කළ හැකි බව ද පවසයි.
පක්ෂ සාමාජිකයෙකු බලහත්කාරයෙන් කිසිවෙකුටත් පක්‍ෂයෙන් ඉවත් කළ නොහැකි බව මද්දුම බණ්ඩාර මහතා වැඩිදුරටත් සඳහන් කළේය. adaderana

රෝගීන් ආපසු හරවා යවන රෝහලක්

තන්තිරිමලේ රෝහලේ වෛද්‍යවරුන් නොමැති වීමෙන් රෝගීන් දැඩි අපහසුතාවයකට ලක්ව ඇතැයි අද දෙරණ වාර්තාකරු සඳහන් කරයි. මෙම රෝහලේ සේවයේ යෙදී සිටි වෛද්‍යවරයා වෙනත් රෝහලකට මාරුවී යාමත් වෛද්‍යවරිය ප්‍රසූත නිවාඩු යාමත් හේතුවෙන් මෙම රෝහලේ මෙතෙක් සේවයේ යෙදී සිටි වෛද්‍යවරුන් දෙදෙනාගේම සේවය ප්‍රදේශයේ ජනතාවට අහිමි වී තිබේ.
තන්තිරිමලේ ප්‍රදේශයේ 2,500 ට අධික පවුල් සංඛ්‍යාවක් පදිංචිව සිටින අතර තවත් 1,500 ට අධික ආරක්ෂක අංශවල පිරිස්ද සිටිති. මේ වන විට රෝහලේ වෛද්‍යවරුන් නොමැති ‍හෙයින් රෝගීන්ට කි.මීටර් 45 ක පමණ දුරක් ගෙවා අනුරාධපුරය රෝහලට හෝ කි.මීටර් 17 ක් ගෙවා විලච්චිය රෝහලට යා යුතුවේ.
එහෙත් හදිසි රෝගාබාධ තත්ත්වයක් වැළඳුණු අයෙකු මෙන්ම සර්පයෙකු දෂ්ඨ කිරීමක් වැනි අවස්ථාවක මේ සා දුරක් ගෙවා රෝහලකට ප්‍රතිකාර සඳහා ගෙන යන විට රෝගියාගේ ජීවිතයට තර්ජනයක් වීමට ඇති ඉඩ කඩ වැඩි බව ප්‍රදේශවාසීහු පෙන්වා දෙති.
තන්තිරිමලේ රෝහලට පැමිණෙන රෝගීන් ආපසු හරවා යැවීම රෝහල් කාර්ය මණ්ඩලයේ කාර්යභාර්ය වී තිබේ.adaderana

පොළොන්නරුව මහ රෝහල පළාත් සභාවෙන් ගිළිහෙයි

පොළොන්නරුව මහරෝහල මධ්‍යම රජය යටතට පවරා ගැනීම සඳහා උතුරු මැද පළාත් සභාවේ අනුමැතිය හිමිව තිබේ.
ඊයේ පැවති පළාත් සභා රැස්වීමේ දී මේ සම්බන්ධයෙන් වූ ඡන්ද විමසීමට පක්ෂව ඡන්ද 20 ක් ලැබුණු අතර ඊට විරුද්ධව ඡන්ද 6 ක් ලැබී තිබුණි.
උතුරු මැද පළාත් ප්‍රධාන අමාත්‍ය බර්ටි ප්‍රේමලාල් දිසානායක මහතා පවසන පරිදි සෞඛ්‍ය අමාත්‍ය මෛත්‍රීපාල සිරිසේන මහතාගේ යෝජනාවකට අනුව ‍පළාත් සභාව විසින් මෙම තීරණය ගෙන ඇත.
සෑම දිස්ත්‍රික්කයකම රෝහලක්, ජාතික රෝහලක් බවට පත්කිරීමේ ප්‍රතිපත්තිය යටතේ මෙම පවරා ගැනීම සිදුකිරීමට නියමිතව තිබේ. adaderana

නිරිත දිග මෝසම් අවිනිශ්චිතයි

නිරිත දිග මෝසම් වර්ෂාව ආරම්භ වන කාලසීමාව පිළිබඳ තවදුරටත් අවිනිශ්චිත තත්ත්වයක් පවතින බව කාලගුණ විද්‍යා දෙපාර්ත‍මේන්තුව පවසයි.
කාර්යයේ නියුතු කාලගුණ විද්‍යාඥ එස්.ආර්. ජයසේකර මහතා සඳහන් කරන පරිදි වායුගෝල‍ෙය් පවතින ස්වභාවය හේතුවෙන් තවදුරටත් දිවයිනේ සියලු ප්‍රදේශවලින් වැසි අපේක්ෂා කළ හැකිය. අද දිනයේ බස්නාහිර, මධ්‍යම සහ සබරගමුව පළාත්වලටත් ගාල්ල සහ මාතර දිස්ත්‍රික්කවලටත් විටින් විට වැසි හෝ ගිගුරුම් සහිත වැසි ඇතිවිය හැකියි.
කෙසේ වුව ද බස්නාහිර පළාතට බලපා ඇති වැසි සහිත කාලගුණ තත්ත්වය තවත් දින කිහිපයකින් පහව යනු ඇති බව කාලගුණ විද්‍යා දෙපාර්තමේන්තුව සඳහන් කරයි.
පසුගිය සතියක පමණ කාලයක සිට ඇදහැලුණු ධාරානිපාත වර්ෂාව හේතුවෙන් ලක්ෂ 6කට වැඩි පිරිසක් පීඩාවට පත්වූ අතර ඊයේ දහවල් වන විට පුද්ගලයින් දෙලක්ෂ 27,000 ක් පමණ අවතැන් ව සිටි බව ආපදා කළමනාකරණ මධ්‍යස්ථානය කියා සිටියි. adaderana

වෙසක් වෙනුවෙන් විශේෂ දුම්රියක්

වෙසක් සතිය නිමිත්තෙන් විශේෂ දුම්රිය සේවයක් අද සිට ක්‍රියාත්මක කිරීමට දුම්රිය දෙපාර්තමේන්තුව පියවර ගෙන තිබේ.. ඒ අනුව අද සහ හෙට කොටුව දුම්රිය ස්ථානයෙන් පස්වරු 1.25 ට ගමන් ආරම්භ කරන විශේෂ දුම්රිය පස්වරු 6.20 ට අනුරාධපුරයට ළඟා වීමට නියමිතය.
මීට අමතරව හෙට සහ අනිද්දා දිනවල අනුරාධපුරයෙන් පෙරවරු 8.45 ට කොළඹ කොටුව බලා විශේෂ දුම්රියක් ධාවනයට එක් කර තිබේ. මරදාන ‍දුම්රිය ස්ථානයේ සිට උදෑසන 10.00 ට කළුතර දක්වාත් කළුතර සිට පෙරවරු 11.50 ට මරදාන දක්වාත් විශේෂ දුම්රිය ධාවනය කෙරෙන බව දුම්රිය වාණිජ අධිකාරී විජය සමරසිංහ මහතා සඳහන් කළේය.
මීට අමතරව දිනපතා මරදාන සිට පානදුර දක්වා ධාවනය වන දුම්රිය, දකුණු කළුතර දක්වා ගමන් කරවීමට ද තීරණය කර තිබේ.. අනුරාධපුරය, අටමස්ථානය සහ කළුතර බෝධිය වැඳපුදා ගැනීමට පැමිණෙන බැතිමතුන්ගේ පහසුව සඳහා මෙම පියවර ගෙන ඇතැයි සඳහන් වේ. adaderana

කොළොන්නාව නගර සභාවට එරෙහිව තීන්දුවක්

කොළඹ නගරයේ එක්රැස් වන කැලිකසළ ප්‍රමාණය ඉක්මවා කොළොන්නාව ප්‍රදේශයේ ගොඩගැසීමෙන් වළකින ලෙස ශ්‍රේෂ්ඨාධිකරණය කොළඹ මහ නගර සභාවට නියම කර තිබේ.

කොළොන්නාව ප්‍රදේශවාසීන් පිරිසක් ඉදිරිපත් කළ පැමිණිල්ලක් සලකා බැලීමෙන් පසුව ශ්‍රේෂ්ඨාධිකරණය මෙම නියෝගය සිදුකර ඇත.. පැමිණිලිකරුවන් කියා සිටියේ කොළඹ නගරයේ එක්රැස්වන කැලිකසළ බැහැර කිරීම සඳහා කොළොන්නාව ප්‍රදේශයේ අක්කර 2ක ‍භූමි භාගයක් පමණක් වෙන් කර තිබූ බවයි.

එහෙත් කොළඹ මහනගර සභාව එම සීමාව උල්ලංඝනය කරමින් අක්කර 8 ක පමණ භූමි භාගයක කැලි කසළ බැහැර කිරී‍මෙන් විශාල පාරිසරික අර්බුදයක් හටගෙන ඇති බව ඔවුන් පෙන්වාදෙයි.

අදාළ කරුණ සැලකිල්ලට ගනිමින් ශ්‍රේෂ්ඨාධිකරණය මේ පිළිබඳ සොයාබලා වාර්තාවක් ඉදිරිපත් කරන ලෙස ද මධ්‍යම පරිසර අධිකාරියට දන්වා සිටින ලදී.

අන්තරේ කැඳවුම්කරුට නොතීසි

ජනාධිපතිවරයාට සහ රජයට අපහාසාත්මක අයුරින් බැණ වැදී රජයේ දේපළවලට අලාභ හානි සිදුකිරීමේ සිද්ධියක සැකකරුවෙකු ලෙස නම් කර ඇති අන්තර් විශ්ව විද්‍යාලීය ශිෂ්‍ය බල මණ්ඩලයේ කැඳවුම්කරු උඳුල් ප්‍රේමරත්න මහතාට අධිකරණය හමුවේ පෙනී සිටින ලෙස නොතීසි නිකුත් කර තිබේ.
කුරුඳුවත්ත පොලිසිය මගින් කළ ඉල්ලීමක් පිළිගත් කොළඹ ප්‍රධාන මහේස්ත්‍රාත් චම්පා ජානකී රාජරත්න මහත්මිය සැකකරු ලබන මස 11 වැනිදා අධිකරණය හමුවේ පෙනී සිටිය යුතු බවට නියෝග කළාය.
පසුගිය 20 වැනිදා සිසුන් 400 ක් පමණ සමග පෙළපාලියකින් පැමිණ විශ්ව විද්‍යාල ප්‍රතිපාදන කොමිසමේ ප්‍රධා ගේට්ටුව කඩා බිඳ දමා කලහකාරී අයුරින් හැසිරුණු බවට උඳුල් ප්‍රේමරත්න මහතාට එරෙහිව චෝදනා එල්ල වී තිබේ.
මෙය මහජන සාමය කඩකිරීමේ සිද්ධියක් බවත් මේ පිළිබඳ ප්‍රකාශ රැසක් සටහන් කරගෙන ඇති බවත් පොලිසිය අධිකරණයට දන්වා තිබිණි. adaderana

රටට අයහපත් ගිවිසුම් නෑ

රටට හෝ ජනතාවට අයහපත් ප්‍රතිඵල ගෙන දෙන කිසිඳු ගිවිසුමකට හෝ ලියවිල්ලකට අත්සන් තැබීමට රජය සූදානම් නැතැයි ජනාධිපති මහින්ද රාජපක්ෂ මහතා පවසයි.
යෝජිත සීපා ගිවිසුමට විරෝධය පළ කරමින් වෘත්තීයවේදීන්, වෛද්‍යවරුන් සහ ඉංජි‍නේරුවරුන් ඇතුළු ‍නියෝජිත පිරිසක් සංදේශයක් භාරදීම සඳහා ඊයේ අරලියගහ මන්දිරයට පැමිණි අවස්ථාවේ දී ජනාධිපතිවරයා මේ බව ප්‍රකාශ කළේය. ඉන්දියාව සමග අදාළ ගිවිසුමට අත්සන් තැබුවහොත් එරට නිෂ්පාදන හා සේවාවන් විශාල වශයෙන් මෙරටට ‍ග‍ලාඑන අතර එයින් ශ්‍රී ලංකාවේ නිෂ්පාදන හා සේවාවලට තර්ජනයක් විය හැකි බව අදාළ පිරිස පෙන්වා දී ඇත.
එහිදී ජනාධිපති මහින්ද රාජපක්ෂ මහතා සඳහන් කළේ එක් පාර්ශවයකට පමණක් වාසි සැලසෙන ගිවිසුමකින් සාර්ථක ප්‍රතිඵල අත්නොවන බවයි. සීපා ගිවිසුමට විරෝධය පළ කරමින් විශාල පිරිසකගේ සහභාගීත්වයෙන් ඊයේ උද්ඝෝෂණයක් ද සංවිධානය කර තිබුණි.
නවීන පහසුකම් සහිතව කටුනායක ජාත්‍යන්තර ගුවන්තොටුපළ සංවර්ධනය කිරීමට අවශ්‍ය උපදෙස් ජනාධිපතිවරයා විසින් ලබාදී තිබුණු අතර අරලිය ගහ මන්දිරයේ දී ඊයේ පැවති වරාය හා ගුවන්සේවා අමාත්‍ය‍ාංශ ප්‍රගති සමාලෝචන රැස්වීමේ දී මීට අදාළ කරුණු සාකච්ඡා වී තිබේ.. adaderana

දෙදහසක් අවතැන් කඳවුරු 37 ක

ගංවතුරෙන් පීඩාවට පත්වූ තවත් පවුල් දෙදහසක් පමණ අවතැන් කඳවුරු 37 ක සිටින බව ආපදා කළමනාකරණ මධ්‍යස්ථානය පවසයි. කෙසේවුව ද ඉදිරි දින කිහිපය තුළ ඔවුන්ට යළි නිවෙස් වෙත යා හැකි වනු ඇති බව එම මධ්‍යස්ථානය සඳහන් කරයි.
ගංවතුර‍ හේතුවෙන් දිස්ත්‍රික් කිහිපයක පුද්ගලයින් ලක්ෂ 5 කට අධික පිරිසක් පීඩාවට පත්වූ අතර එයින් 28 දෙනෙකු ජීවිතක්ෂයට පත්වූහ. මේ වන විට ගංවතුර තත්ත්වය බොහෝ දුරට පහව‍ගොස් ඇති බව වාර්තා වේ. adaderana

ඉංග්‍රීසි මාධ්‍යය ගුරු පුරප්පාඩු ලබන මාසයේ අවසන්

උසස් පෙළ ඉංග්‍රීසි මාධ්‍යයෙන් ඉගැන්වීමේ ඇති ගුරු පුරප්පාඩු ලබන මාසය වන විට අවසන් කරන බව අධ්‍යාපන අමාත්‍ය බන්දුල ගුණවර්ධන මහතා පවසයි. ඒ සඳහා ඉංග්‍රීසි මාධ්‍ය ගුරුවරුන් 554 දෙනෙකු බඳවා ගැනීමට ජනාධිපතිවරයාගේ අනුමැතිය ලැබී ඇති බව හෙතෙම කියා සිටියි.
පසුගිය කාලයේ සිදුකළ විවිධ අත්හදාබැලීම් සහ තීන්දු හේතුවෙන් අධ්‍යාපන ක්ෂේත්‍රයේ ඇතැම් අහිතකර ප්‍රතිඵල නිර්මාණය වී ඇති බව බන්දුල ගුණවර්ධන අමාත්‍යවරයා පෙන්වා‍දෙයි. ඉදිරියේ දී පාසල් අතර ඇති විෂමතාවය හා පරතරය අඩු කිරීමට පියවර ගන්නා බව ද ඔහු සඳහන් කළේය.
මෙරට ඉංග්‍රීසි ගුරුවරුන්ට කොරියාවේ ගුරුවරුන් ලෙස සේවය කිරීමට අවස්ථාව උදාවී ඇතැයි ද කොරියානු තානාපතිවරයා සමග පැවති සාකච්ඡාවකදී මෙම එකඟතාවයට පැමිණි බව ද ඇමතිවරයා කියා සිටියේය. මේ අතර පළමු ශ්‍රේණියට ළමුන් ඇතුළත් කිරීමට නොහැකි වූ දෙමාපියන් 1500 ක් පමණ අභියාචනා ඉදිරිපත් කර ඇති බව අධ්‍යාපන අමාත්‍යාංශය පවසයි..
පාසලක් නොලැබුණු දරුවන්ට ලබන වසරේ පාසලක් ලබාදීමට පියවර ගන්නා බව අමාත්‍යාංශය සඳහන් කරයි. adaerana

ගාස්තුව ඉහළ නැංවීම කල්යයි

බස්නාහිර පළාත් පෞද්ගලික බස් රථවල ලොග් පත්‍ර සඳහා වන ගාස්තුව ඉහළ නැංවීම බස්නාහිර පළාත් මාර්ගස්ථ මගී ප්‍රවාහන අධිකාරිය කල් දමා තිබේ. ජූලි පළමු වැනිදා සිට අදාළ ගාස්තුව රුපියල් 500‍ සිට රැපියල් 1000 දක්වා ඉහළ නැංවීමට යෝජනා වී තිබු බව එම අධිකාරියේ සභාපති පියසේන දිසානායක මහතා පැවසුවේය.
එහෙත් ඒ පිළිබඳ බස් හිමියන්ගේ සංගම් සමඟ සාකච්ඡා කර අවසන් විසඳුමකට එළඹීම සඳහා තීරණය කළ බව දිසානායක මහතා පවසයි. කෙසේ වෙතත් එවැනි ගාස්තු ඉහළ නැංවීමක් සිදුවුවහොත් බස් ගාස්තු පිළිබඳ ජාතික ප්‍රතිපත්තිය යටතේ එම සංශෝධනය ද ඇතුළත් කරන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පැවසුවේය. ඒ අනුව අවසානයේ මගී ජනතාවට එහි ප්‍රතිවිපාක අත්විඳීමට සිදුවන බව විජේරත්න මහතා සඳහන් කරයි. adaderana

පහත්බිම් ගොඩකරන්න අවසර දුන්නෙත් රජයයි -කරූ

ජලගැලීම් ඇතිවීමට හේතු වී තිබෙන පහත්බිම් ගොඩකිරීම සඳහා අවසර ලබා දී ඇත්තේ ද රජයෙන්ම බවට එක්සත් ජාතික පක්ෂය චෝදනා කරයි. එවැනි ගොඩකිරීම් පිටුපස දේශපාලන බලපෑම් පවතින බව එම පක්ෂයේ නියෝජ්‍ය නායක කරූ ජයසූරිය මහතා පවසයි. ජලගැලීම් හේතුවෙන් විපතට පත්වූ පිරිසට වැඩි සහන ලබාදීම කෙරෙහි රජයේ අවධානය දැඩිව යොමු විය යුතු බව ද ජයසූරිය මහතා පෙන්වාදෙයි.
අද කොළඹ පැවති මාධ්‍ය හමුවකදී කරූ ජයසූරිය මහතා මේ අදහස් පළ කළේය. එම මාධ්‍ය හමුවට එක්වූ එක්සත් ජාතික පක්ෂයේ මාධ්‍ය ප්‍රකාශක ගයන්ත කරුණාතිලක මහතා පැවසුවේ ගංවතුරින් නිවාස අහිමි වූ පිරිස වෙනුවෙන් රජය ලබාදෙන වන්දි ප්‍රමාණවත් නොවන බවය. adaderana

අතුරුදහන් වූවෙකුගේ මළ සිරුර වසර 2කින් හමුවේ

මීට වසර 2කට පමණ පෙර අතුරුදන් වූ පුද්ගලයෙකුගේ මළ සිරුරක් හලාවත පොලිසිය විසින් සොයාගෙන තිබේ. එම පුද්ගලයා අතුරුදහන් වීම සම්බන්ධයෙන් හලාවත පොලිස් අපරාධ විමර්ශන ඒකකයේ නිලධාරීන් විසින් සැකපිට අත්අඩංගුවට ගත් පුද්ගලයෙකුගෙන් ලද තොරතුරු අනුව අදාළ මළ සිරුර සොයාගෙන ඇති බව සඳහන්ය.
මීට වසර 2 කට පෙර එම ඝාතනය ‍කර වළ දැමූ බව සැකකරු විසින් අනාවරණය කර තිබේ. ඒ අනුව ඝාතනයට ලක්වූ පුද්ගලයාගේ මළ සිරුර අද නැවත ගොඩගෙන පරීක්ෂණ සිදුකිරීමට හලාවත දිසා විනිසුරුවරයා නියෝග කළේය.adaderana

අවසර නැතුව කැණීම් තහනම්

දුම්රිය මාර්ග දෙපස අනවසර කැණීම් සිදුකරන පුද්ගලයින්ට එරෙහිව දැඩි නීතිමය ක්‍රියාමාර්ග ගන්නා බව දුම්රිය දෙපාර්තමේන්තුව පවසයි. දුම්රිය මාර්ගයේ සිට මීටර 2ක් දෙපසට දුම්රිය රක්ෂිතයක් ලෙස නම් කර තිබෙන බව එහි වාණිජ අධිකාරී විජය සමරසිංහ මහතා පැවසුවේය. එම ප්‍රදේශයේ සිදුකෙරෙන අනවසර කැණීම් හේතුවෙන් දුම්රිය සංඥා පද්ධතියට හානි සිදුවන බව සමරසිංහ මහතා පෙන්වා‍දෙයි.
වැසි ජලය බැසයාම සඳහා ඇතැම් පුද්ගලයින් සිදුකරන එවැනි කැණීම් හේතුවෙන් දුම්රිය සංඥා පද්ධතියට හානි සිදුව තිබූ බව දුම්රිය දෙපාර්තමේන්තුව ප්‍රකාශ කරයි. මේ හේතුවෙන් පසුගිය දිනවල දුම්රිය ධාවන කටයුතුවලට බාධා සිදුවූ බව ද සමරසිංහ මහතා සඳහන් කළේය. ඒ අනුව දුම්රිය රක්ෂිත ප්‍රදේශයේ යම් කැණීමක් සිදුකරන්නේ නම් ඒ සඳහා දුම්රිය දෙපාර්තමේන්තුවේ ලිඛිත අවසර ලබාගත යුතු බව සමරසිංහ මහතා පවසයි. adaderana

නාවික හමුදාව තවදුරටත් සේවයේ

පසුගිය සතියේ පැවති ජලගැලීම් හේතුවෙන් විපතට පත්වූවන් වෙනුවෙන් සහන සැලසීම සඳහා නාවික හමුදා කණ්ඩායම් 4ක් තවදුරටත් සේවයේ යොදවා ඇති බව නාවික හමුදා මාධ්‍ය ප්‍රකාශක කපිතාන් අතුල සෙනරත් මහතා පවසයි. කොළඹ දිස්ත්‍රික්කයේ අතුරුගිරිය ප්‍රදේශයේ කණ්ඩායම් 3ක් සහ කඩුවෙල ප්‍රදේශයේ එක් කණ්ඩායමක් බෝට්ටු සමග සහන සේවා කටයුතු වෙනුවෙන් යොදවා ඇති බව ඔහු පෙන්වා දෙයි.
ඊට අමතරව තවත් නාවික හමුදා කණ්ඩායමක් නැවත පදිංචි කරවීමේ කටයුතු සඳහා සහය වීමට යොමු කර තිබෙන බව අතුල සෙනරත් මහතා ප්‍රකාශ කරයි. නැවත පදිංචි කිරීමේ කටයුතු සඳහා සහයවීම ආපදා කළමනාකරණ මධ්‍යස්ථා‍නයේ සම්බන්ධීකරණයෙන් සිදුකෙරෙන බව සෙනරත් මහතා සඳහන් කළේය. පසුගිය ස‍මයේ පැවති අයහපත් කාලගුණය හේතුවෙන් පීඩාවට පත්වූ ජනතාව වෙනුවෙන් නාවික හමුදා කණ්ඩායම් 30 ක් සහ බෝට්ටු 28 ක් යොදවා තිබුණි. adaderana

ජලය බැසගියත් නැවත පදිංචි කරන්න බෑ

ජලගැලීම් පැවති බොහෝ ප්‍රදේශවල මේ වන විට එම තත්ත්වය පහව ගොස් ති‍බුණ ද ඇතැම් ප්‍රදේශවල නැවත පදිංචි කිරීමේ කටයුතු සිදුකළ නොහැකි තත්ත්වයක් පවතින බව ආපදා කලමනාකරණ මධ්‍යස්ථානය පවසයි. නිවාස පිරිසිදු කිරීමේ සහ පානීය ජල මූලාශ්‍ර පිරිසිදු කිරීමේ කටයුතු තවමත් අවසන් කිරීමට නොහැකි වීම ඊට‍ හේතුව බව එම මධ්‍යස්ථානය පෙන්වාදෙයි. adaderana

සංචාරක ආදායම දෙගුණයකින් වැඩි කරනවා -ලක්ෂ්මන්

සංචාරක කර්මාන්තයෙන් ශ්‍රී ලංකාවට ලැබෙන ආදායම ඉදිරි පස් වසර ඇතුළත දෙගුණයක් දක්වා වර්ධනය කරගැනීමට අපේක්ෂා කරන බව ආර්ථික සංවර්ධන නියෝජ්‍ය අමාත්‍ය ලක්ෂ්මන් යාපා අබේවර්ධන මහතා පවසයි. සංචාරක කර්මාන්තයෙන් ලැබෙන ආදායම අමෙරිකානු ‍ඩොලර් බිලියන 2 දක්වා ඉහළ නංවා ගැනීම රජයේ අපේක්ෂාව බව අමාත්‍යවරයා සඳහන් කරයි.
දැනට වාර්ෂිකව සංචාරක කර්මාන්තයෙන් ශ්‍රී ලංකාව අමෙරිකානු ‍ඩොලර් මිලියන 400 ක පමණ මුදලක් උපයා ගන්නා බව ඔහු පැවසුවේය. වාර්ෂිකව විදේශිකයන් ලක්ෂ 5ක් පමණ මෙරටට පැමිණෙන අතර එම සංඛ්‍යාව ලක්ෂ 25 දක්වා වැඩිකරගැනීමට ද අපේක්ෂිතය. adaderana

බෝම්බයට හේතුව පුද්ගලික ආරවුලක්

රක්වාන, හැදරලිය වත්ත, ඩෙල්වින් බී කොටසේ ලයින් කාමරයක‍ට අත්බෝම්බ ප්‍රහාරයක් එල්ල කිරීමට හේතුව පෞද්ගලික ආරවුලක් බව පොලිසිය පවසයි. ප්‍රහාරය එල්ල කළ සැකකරුවන්ගේ සහෝදරියක් සමග එම ලයින් කාමරයේ පුද්ගලයෙකු අනියම් ප්‍රේම සබඳතාවක් පවත්වාගෙන යාම ‍මීට හේතුව බවට පොලිස් පර‍ීක්ෂණවලදී අනාවරණය වී තිබේ.
ඊයේ එල්ල වූ එම බෝම්බ ප්‍රහාරයෙන් පුද්ගලයින් 11 දෙනෙකු තුවාල ලැබූ අතර ඔවුන් රක්වාන රෝහලට ඇතුළත් කිරීමෙන් අනතුරුව තිදෙනෙකු වැඩිදුර ප්‍රතිකාර සඳහා රත්නපුර රෝහලට මාරු කර යැවුණි. ප්‍රහාරය සම්බන්ධ‍යෙන් අත්අඩංගුවට ගත් එකම පවුලේ සහෝදරයින් දෙදෙනා අද අධිකරණයට ඉදිරිපත් කිරීමට නියමිතය. adaderana

කල් දැමූ විභාග ගැන දැනුම්දීම ඉදිරියේදී

අයහපත් කාලගුණය හේතුවෙන් කල් දැමූ විභාග යළි පැවැත්වීම සම්බන්ධයෙන් ඉදිරි දිනවලදී දැනුම් දෙන බව විභාග කොමසාරිස් ‍ජනරාල් අනුර එදිරිසිංහ මහතා පවසයි. ඇතැම් විට එම විභාග මාස කිහිපයක් වුව ද පමා විය හැකි බව ඔහු සඳහන් කළේය.
පසුගිය දිනවලදී විභාග‍ දෙපාර්තමේන්තුව මගින් පැවැත්වීමට නියමිතව තිබූ විභාග 6ක් පමණ කල්දැමීමට සිදුවිය. කෙසේවුවද ඉදිරියේ දී පැවැත්වීමට නියමිත විභාග සාමාන්‍ය පරිදි පවත්වන බව විභාග කොමසාරිස්වරයා වැඩිදුරටත් ප්‍රකාශ කළේය. adaderana

විදෙස් රටක වෙනම රාජ්‍යයක් වෙනුවෙන් බෙදීමක්

ශ්‍රී ලංකාවේ වෙනම රාජ්‍යයක් සඳහා වූ ආණ්ඩුවක් විදෙස් රටක පිහිටුවීම පිළිබඳ ජාත්‍යන්තර දෙමළ ප්‍රජාව බෙදීමකට ලක්ව සිටින බව අමාත්‍ය විනයාගමූර්ති මුරලිදරන් මහතා පවසයි. අදාළ කරුණ සම්බන්ධයෙන් ජාත්‍යන්තරය තුළ සැලකිය යුතු බලපෑමක් සිදුකිරීමට එම සංවිධානය අසමත් වී ඇති බව ඔහු සඳහන් කරයි. ඔවුන්ගේ පරස්පර විරෝධී මතවාද හේතුවෙන් ජාත්‍යන්තර දෙමළ ප්‍රජාව කණ්ඩායම් 3කට බෙදී ඇති බව විනයාගමූර්ති මුරලිදරන් මහතා පෙන්වා දෙයි.
වී. රුද්‍රකුමාර්ගේ නායකත්වයෙන් යුත් අමෙරිකානු දෙමළ ප්‍රජාව වෙනම කණ්ඩායමත් වශයෙනුත් නෙදියවන් මූලිකත්වය ගන්නා නෝර්වේ දෙමළ ප්‍රජාව තවත් කණ්ඩායමක් වශයෙනුත් කටයුතු කරන අතර ලන්ඩනයේ දෙමළ ප්‍රජාව වෙනත් මතයක් දරන බව මුරලිදරන් මහතා සඳහන් කරයි. සැබෑ ‍නොවන එම ආණ්ඩු සිහිනය වෙනුවෙන් සහය පළකිරීමට දෙමළ ප්‍රජාව ප්‍රතික්ෂේප කර ඇතැයි ද මුරලිදරන් මහතා වැඩිදුරටත් පෙන්වා දී තිබේ. adaderana

හරුහිකෝ කුරෝඩා ලංකාවට

Print this

හරුහිකෝ කුරෝඩා ලංකාවට May 24, 2010 08:26 am
ආසියානු සංවර්ධන බැංකුවේ සභාපති හරුහිකෝ කුරෝඩා මහතා ශ්‍රී ලංකාවේ සංචාරයක නිරත වීමට සැලසුම් කර තිබේ. ඒ අනුව ලබන බදාදා දිවයිනට පැමිණෙන සභාපතිවරයා 28 වැනිදා දක්වා රැදී සිටිනු ඇත. මෙරට රැඳී සිටින කාලය තුළ කුරෝඩා මහතා මන්නාරම, මුලතිවු සහ කිලිනොච්චි යන දිස්ත්‍රික්කවල සංචාරය කිරිමට නියමිත බව ආසියානු සංවර්ධන බැංකුවේ ප්‍රකාශකයෙකු සඳහන් කළේය.
එම දිස්ත්‍රික්කවල පවතින තත්ත්වය පිළිබඳ සොයාබැලීම මෙහි අරමුණ වී තිබේ. ආසියානු සංවර්ධන බැංකුවේ සභාපතිවරයා ශ්‍රී ලංකාවේ සිදුකරන දෙවන සංචාරය මෙය වන අතර සුනාමි ව්‍යසනයෙන් පසු 2005 වසරේ දී ද ඔහු මෙරටට පැමිණියේය.adaderana