ආගමද..?නීතියද..?එහෙමත් නැත්නම්...?

අත්අඩංගුවේ පසු වන ජෙනරාල් සරත් ෆොන්සේකා මහතා නිදහස් කරන ලෙස ඉල්ලා පසුගිය මස 03 වන දින කොටුව දුම්රිය ස්ථානයේ භික්ෂූන් පිරිසක් විසින් ආරම්භ කරන ලද උපවාසය අද (05)විසුරුවා හරින්නට පොලීසිය කටයුතු කළ අයුරු.

හිමිවරුන්ගේ උපවාසයට පොලිස් පොල්ල හරස්වෙයි

කොටුව දුම්රිය පොළ ඉදිරිපිට උපවාසයක නිරතවූ භික්ෂූන් වහන්සේලා පිරිස ඉවත් කිරීමට පොලිසිය මේ වන විට පියවර ගෙන තිබේ.
අධිකරණයෙන් ලබාගත් අවසරයකට අනුව මෙම ක්‍රියාමාර්ගය ගන්නා බව පොලිසිය සඳහන් කරන ලදී. ඒල්ල වූ දැඩි විරෝධය නොතකා මේ වන විට භික්ෂූන් වහන්සේලා එම ස්ථානයෙන් ඉවත් කිරීමට පොලිසිය පියවර ගත් බව එහි සිටි අද දෙරණ විශේෂ වාර්තාකරු පැවසුවේය.
කෙසේ වෙතත් භික්ෂූන් වහන්සේලා මීට විරෝධය පළකිරීමත් සමග දැඩි උණුසුම්කාරී වාතාවරණයක් එම ස්ථාන‍යේ නිර්මාණය වූ බව ද අප වාර්තාකරු සඳහන් කළේය.
සිවිල් ඇඳුමින් සැරසුණු පොලිස් නිලධාරීන් විසින්‍ උපවාසයේ නිරත වූ භික්ෂූන් බලහත්කාරයෙන් ඉවත් කරන අයුරු කොටුව සීමාවේ රැඳී සිටි ජනයාට දැක ගන්නට ලැබී තිබේ.
අත්අඩංගුවේ පසුවන ජෙනරාල් සරත් ෆොන්සේකා මහතා නිදහස් කර‍න ලෙස ඉල්ලමින් මෙම භික්ෂූන් වහන්සේලා පසුගියදා උපවාසයක් ආරම්භ කළෝය. adaderana

පැන්සල වෙනුවට පෑන

මෙවර මහ මැතිවරණ‍යේ දී ඡන්දය සලකුණු කිරීම සඳහා පැන්සල වෙනුවට පෑන භාවිතා කිරීමට මැතිවරණ කොමසාරිස් දයානන්ද දිශානායක මහතා තීරණය කර තිබේ.
මෙලෙස මැතිවරණයකදී ඡන්දය සලකුණු කිරීම සඳහා පැන්සල වෙනුවට පෑන භාවිතා කරන්නේ ඉතිහාසයේ ප්‍රථම වරටය. දේශපාලන පක්ෂවලින්, මැතිවරණ නිරීක්ෂකයින්ගෙන් සහ වෙනත් සංවිධානවලින් ඉදිරිපත් වූ යෝජනා සලකා බැලීමෙන් අනතුරුව මැතිවරණ කොමසාරිස්වරයා විසින් මෙම තීරණය ගෙන ඇති බව මැතිවරණ මහලේකම් කාර්යාලය සඳහන් කළේය. මැතිවරණය විනිවිදභාවයකින් පැවැත්වීම මෙන්ම මැතිවරණ කාර්යාලයට ඉදිරිපත් වන දූෂිත චෝදනා වැළැක්වීම මෙමගින් අපේක්ෂා කරයි. adaderana

ලාංකික සිසුවෙක් අතුරුදහන්

වීසා අවලංගු වී වැඩිදුර රැඳී සිටීමේ හේතුව මත පිටුවහල් කරනු ලැබූ ශ්‍රී ලාංකික ශිෂ්‍යයෙකු අතුරුදන් වී ඇති බව ඔස්ට්‍රේලියානු මාධ්‍ය වාර්තා කරයි.
ඔහු සෙවීමේ කටයුතු සඳහා සහයවීමට නොහැකි බව ඔස්ට්‍රේලියානු ආගමන දෙපාර්ත‍මේන්තුව ප්‍රකාශ කර ඇති බව වාර්තා වේ. මීට මාස දෙකකට පෙර ශ්‍රී ලංකාව බලා පිටත්ව එන ගුවන්යානයකට ආගමන දෙපාර්තමේන්තු බලධාරීන් විසින් ඔහු නංවා තිබුණ ද ඔහු ශ්‍රී ලංකාව බලා පැමිණි බවට වාර්තා වී නැත. කෙසේවෙතත් අදාළ ශිෂ්‍යයාගේ දෙමව්පියන් චෝදනා කරන්නේ ඔහු නංවන ලද ගුවන්යානයේ තොරතුරු පවා ඔස්ට්‍රේලියානු ආගමන දෙපාර්තමේන්තුව තමන් වෙත ලබාදී නොමැති බවය. adaderana

සාම සාධක හමුදාව 5000 දක්වා වැඩිකිරීමට උපදෙස්

එක්සත් ජාතීන්ගේ සාම සාධක කටයුතු වෙනුවෙන් මෙරටින් යොමු කරන භට පිරිස් ඉහළ නැංවීම සඳහා සැළසුම් සකස් කරන ලෙස ජනාධිපතිවරයා තමන් වෙත උපදෙස් දී ඇති බව යුධ හමුදාපති ලුතිනන් ජෙනරාල් ජගත් ජයසුරිය මහතා පවසයි.
වරකට සෙබලුන් 5,000 ක් යැවීමට ඇති හැකියාව පිළිබඳ මේ වන විට සැළසුම් සකස් කරමින් පවතින බව ජයසුරිය මහතා සඳහන් කරයි. දැනට එක් වාරයක් සඳහා සෙබලුන් 950ක පිරිසක් සාම සාධක කාර්යය සඳහා යොමු කෙරෙන අතර ඒ අනුව එක් වසරකට මෙරටින් යැවෙන සෙබලුන් සංඛ්‍යාව 2,000කට ආසන්න වේ. නව සැලසුම් යටතේ එය එක් වාරයක් සඳහා සෙබලුන් 5,000 දක්වා ඉහළ නැංවීමට අවධානය යොමු වී ඇති බව මාන්කුලම්හි තුන් වන කාර්ය සාධක බලකායේ සෙබලුන් අමතමින් ජගත් ජයසුරිය මහතා අවධාරණය කළේය. adaderana

එල්.ටි.ටි.ඊ.ය සැඟවූ උපකරණ තොගයක් හමුවේ

ඉරණපලෙයි ප්‍රදේශයේ සිදුකළ සෝදිසි මෙහෙයුමකින් එල්.ටි.ටි.ඊ. සංවිධානය විසින් සඟවා තිබු උපකරණ තොගයක් සොයා ගැනීම පොලිසිය සමත් වී තිබේ.
මාන්කුලම් කොට්ඨාශ‍යේ කොට්ඨාශ අපරාධ විමර්ශන ඒකකය විසින් ඊයේ සිදුකළ මෙම මෙහෙයුමෙන් කිලෝග්‍රෑම් 5 බැගින් වූ වෙල්ඩින් කූරු 38ක් ඇතුලු උපකරණ කිහිපයක් සොයාගත් බව‍ පොලිසිය පැවසීය. මේ අතර වෙල්ලාවේලි මණ්ඩූර් ප්‍රදේශ‍යේ ලඳු කැළෑවක සඟවා තිබු ස්වයංක්‍රීය පිස්තෝලයක්, ජීව උණ්ඩ 14ක් සහ මැගසින් තුනක් පොලිසිය භාරයට ගෙන ඇත. එසේම කරුවලගස්වැව හතේ කණුව ප්‍රදේශයේදී ගිනි අවියක් සහ ජීව අත්බෝම්බයක් සමග සැකකරු‍වෙකු අත්අඩංගුවට ගත් බව කරුවලගස්වැව පොලිසිය සඳහන් කළේය.adaderana

සන්ධානයේ ප්‍රචණ්ඩ ක්‍රියා ඉහළ යයිApril 5, 2010 11:00 am

ගතවු පැය 48 ඇතුළත සන්ධාන අපේක්ෂකයින් අතර ඇති වු ගැටුම් ඉහළ ගොස් ඇති බව මැතිවරණ ප්‍රචණ්ඩ ක්‍රියා නීරීක්ෂණ මධ්‍යස්ථානය පවසයි.
සමන්තුරේ ප්‍රදේශයේ දී ගැටුම් රැසක් ඇති වී තිබෙන බව එම මධ්‍යස්ථානයේ නිකුත් කළ නිවේදනයේ සඳහන් වේ. තුවාල සිදුකිරීමක් හා දේපල හානි සිදුකිරීම් 4ක් වාර්තා වී ඇති බව එම ‍නිවේදනයේ සඳහන්ය. එක්සත් ජනතා නිදහස් සන්ධාන අපේක්ෂකයන් වන ඒ. එම්. නෞෂාඩ් සහ අබ්දුල් අමීර් යන අය අතර මෙලෙස ගැටුම් ඇති වී ඇති බව මැතිවරණ ප්‍රචණ්ඩ ක්‍රියා නීරීක්ෂණ මධ්‍යස්ථානය අවධාරණය කරයි.adaderana

2009 සංවර්ධන වේගය 3 .5%ක්

2009 වර්ෂයේ ශ්‍රි ලංකාවේ සංවර්ධන වේගය 3 .5%ක් බව මහ බැංකු අධිපති අජිත් නිවාඩ් කබ්රාල් මහතා පවසයි. එමෙන්ම රුපියල් දහයේ වටිනාකමින් යුත් නව කාසියක් අද සිට හඳුන්වා දෙන බව ද ශ්‍රි ලංකා මහ බැංකුව සඳහන් කරයි.
එය රුපියල් දහයේ නෝට්ටුව වෙනුවට ඉදිරියේදී භාවිත කරන බවයි මහ බැංකුව ප්‍රකාශ කළේය. පැරණි ශත දහයේ හැඩයට නිර්මාණය කර ඇති මෙහි මුල්ම කාසිය මහ බැංකු අධිපති අජිත් නි‍වාඩ් කබ්රාල් මහතා විසින් ජනාධිපති මහින්ද රාජපක්ෂ මහතා වෙත පිලිගැන්වීමට නියමිතය. මේ අතර මහ බැංකු වාර්ෂික වාර්තාව නිකුත් කිරීම ද අද සිදුකෙරෙන බව එහි ප්‍රකාශකයෙකු සඳහන් කළේය.adaderana

අතුරුදන්වූවන් සෙවීමට ස්වාධීන කණ්ඩායමක්

පසුගිය කාලයේ අත්අඩංගුවට ගත් සහ රජයට භාර වු පුද්ගලයන් පුනරුත්තාපනය කොට ඔවුන්ගේ ඥාතීන් වෙත භාරදීම තම වගකීම බව අමාත්‍ය ඩග්ලස් දේවානන්දා මහතා පවසයි.
මේ සඳහා දැනටමත් ජනාධිපතිවරයා සමග සාකච්ඡා කර ඇති බව ඔහු සඳහන් කරයි. අතුරුදන්වූවන් සොයා ගැනීම සඳහා ‍ස්වාධීන කණ්ඩායමක් පත් කිරීමට ද ජනාධිපතිවරයා සමග සාකච්ඡා කළ බව දේවනන්දා මහතා ප්‍රකාශ කරයි. විනාශකාරී යුද්ධයේදී සිදුවු ජිවිත හානි දේශපාලන වාසියට යොදා ගනිමින් ඇතැම් බලවේග ජනතාවගේ ඡන්දය කොල්ලකෑමට සුදානම් වන බව ද අමාත්‍යවරයා පෙන්වාදෙයි. adaderana

සන්ධාන ආධාරකරුවෙකු ඝාතනය කරයි

එක්සත් ජනතා නිදහස් සන්ධාන ආධාරකරුවෙකු වෙඩි තබා ඝාතනය කර තිබේ.
ඊයේ රාත්‍රී 11.30 ට පමණ මාවතගම කැප්පැටිපොල මාර්ගයේ බරන්දල ප්‍රදේශයේදී මෙම වෙඩි තැබීම සිදුව ඇති බව මාවතගම පොලිසිය පැවසුවේය. එක්සත් ජනතා නිදහස් සන්ධාන අපේක්ෂකයෙකුට අයත් වාහනයකින් ගමන් කරමින් සිටියදී මග හරස් කොට සන්නද්ධ පිරිසක් විසින් වෙඩි තැබීම සිදුකර ඇති බව සඳහන්ය.
සිද්ධියෙන් මියගොස් ඇති පුද්ගලයා රීදිගම ප්‍රදේශයේ පදිංචි 22හැවිරිදි තරුණයෙකු බව පොලිසිය සඳහන් කරයි. සිද්ධිය සම්බන්ධයෙන් මාවතගම පොලිසිය වැඩිදුර පරීක්ෂණ සිදුකරන අතර මෙතෙක් කිසිවෙකුත් අත්අඩංගුවට ගෙන නොමැති බව වාර්තා වේ. adeana

මැතිවරණ ප්‍රචාරණය අදින් අවසන්

2010 මහ මැතිවරණයට අදාළ සියලු ප්‍රචාරක කටයුතු අද මධ්‍යම රාත්‍රියෙන් අවසන් වේ.
එම කාලයෙන් පසුව කිසිදු ආකාරයක මැතිවරණ ප්‍රචාරක කටයුත්තක නිරත වීම නීති විරෝධි බව මැතිවරණ මහලේකම් කාර්යාලය සඳහන් කළේය. ඒ අනුව මැතිවරණයට තරග කරන සියලු පක්ෂ හා ස්වාධීන කණ්ඩායම් වල අපේක්ෂකයන්ගේ ඡායාරූප, බැනර් සහ කටවුට් ද අද මධ්‍යම රාත්‍රීයට පෙර ඉවත් කළ යුතුය. ඔවුන්ට පිහිටුවීමට අවසර ලබා දී තිබු කොට්ඨාශ මට්ටමේ පක්ෂ කාර්යාල හෙට මධ්‍යම රාත්‍රියට පෙර ඉවත් කළ යුතු බව මැතිවරණ මහලේකම් කාර්යාලය ප්‍රකාශ කළේය. ඒ අනුව දේශපාලන පක්ෂ සහ ස්වාධීන කණ්ඩායම් අද සිය අවසන් ප්‍රචාරක රැලි පැවැත්වීමට නියමිතය.
ජනාධිපති මහින්ද රාජපක්ෂ මහතාගේ ප්‍රධානත්වයෙන් එක්සත් ජනතා නිදහස් සන්ධානයේ අවසන් ප්‍රචාරක රැලිය හම්බන්තොට‍ මිද්දෙනිය ප්‍රදේශයේ පැවැත්වේ. එක්සත් ජාතික පක්ෂ අවසන් ප්‍රචාරක රැලි කොළඹ කොස්ගස්හන්දිය, කළුතර සහ ගාල්ල ප්‍රදේශ වලදී පැවැත්වෙන්නේ විපක්ෂ නායක රනිල් වික්‍රමසිංහ මහතාගේ ප්‍රධානත්ව‍යෙනි. ප්‍රජාතන්ත්‍රවාදී ජාතික සන්ධානය ද සිය අවසන් ප්‍රචාරක රැලිය එහි නායකයන්ගේ ප්‍රධානත්වයෙන් කොළඹ අලුත් කඩේ ප්‍රදේශයේදී පැවැත්වීමට නියමිතය. මෙවර මහ මැතිවරණය පැවැත්වෙන්නේ අප්‍රේල් 8 වැනි දිනය. adaderana

දැඩි සත්කාර ඒකකය ජනතා අයිතියට

මාතර මහ රෝහලේ දැඩි සත්කාර ඒකකය සහ දැඩි සත්කාර කාන්දු කරන ඒකකය ජනාධිපති මහින්ද රාජපක්ෂ මහතා විසින් ජනතා අයිතියට පත් කර තිබේ.
ඒ ජනතා අයිතියට පත්කිරීමේ උත්සවය ඊයේ පස්වරුවේදී පැවැත්වුණි. මේ සඳහා වැය කර ඇති මුදල රුපියල් මිලියන 50කි. මෙහි විශේෂත්වය වන්නේ අන්තර්ජාලය ඔස්සේ සම්බන්ධ වෙමින් ඕනෑම රෝහලක සිටින රෝගියෙකුට ප්‍රතිකාර කිරීමට අවශ්‍ය පහසුකම් මෙහි සපයා තිබීමය. adaderana

හදිසි නියෝගය ජනතාව දුෂ්කරතාවට පත්කරනවා

අවතැන් කඳවුරු වල වෙසෙන ඡන්ද දායකයන්ට ආකෘති පත්‍රයක් සම්පුර්ණ කර නැවත භාරදෙන ලෙස මැතිවරණ කොමසාරිස්වරයා හදිසියේ කර ඇති නියෝගය ‍හේතුවෙන් එම ඡන්ද දායකයන් දුෂ්කරතාවට පත්ව ඇති බව එක්සත් ජාතික පක්ෂය පවසයි.
එම පක්ෂයේ මහලේකම් තිස්ස අත්තනායක මහතා මැතිවරණ කොමසාරිස් දයානන්ද දිශානායක මහතා වෙත ලිපියක් යොමු කරමින් මේ බව දන්වා තිබේ. දින තුනක් ඇතුළත 26,000කට ආසන්න පිරිසකට ආකෘති පත්‍ර සඳහා ග්‍රාම නිලධාරීන්ගෙන් සහ කඳවුර භාර නිලධාරීන්ගෙන් අනුමැතිය ලබා ගැනීම ප්‍රායෝගික නොවන බව එම ලිපිය මගින් පෙන්වා දී ඇත.
මේ‍ හේතුවෙන් විශාල පිරිසකට ඡන්දය අහිමි වීමේ අවධානමක් පවතින බව තිස්ස අත්තනායක මහතා පෙන්වාදෙයි. එසේම කඳවුරු භාර නිලධාරීන් සියලු දෙනා ‍දේශපාලන පත්වීම් ලැබු අය බැවින් අනුමැතිය ලබාදීම සම්බන්ධ ගැටලු මතුවන බව මහ‍ලේකම්වරයා සඳහන් කරයි. එබැවින් මෙම හදිසි තීරණය ක්‍රියාත්මක නොකරන ලෙස තිස්ස අත්තනායක මහතා මැතිවරණ කොමසාරිස්වරයාගෙන් ඉල්ලා සිටියි. adaderana

සැමවිට නීතියට ගරු කරනවා

සැමවිටම තමන් නීතියට ගරු කරන බව ජනාධිපති මහින්ද රාජපක්ෂ මහතා පවසයි.
නීතියට මැදිහත් වීමට තමාගේ කිසිදු අදහසක් නොමැති බව ජනාධිපතිවරයා සඳහන් කරයි. වැරදි කළ පුද්ගලයන් නිදහස් කිරීමට මැදිහත් නොවන බව පවසන ජනාධිපති මහින්ද රාජපක්ෂ මහතා එ‍සේ කිරීමෙන් සිදුවන්නේ නීතියට විරුද්ධව කටයුතු කිරීමක් බව පෙන්වා දෙයි. ගම්පහ කිරිල්ලවල ප්‍රදේශයේ පැවති ජනහමුවක් අමතමින් ජනාධිපතිවරයා මේ අදහස් පළ කළේය.

තරගයේ වීරයා සම්මානය මහේලට

ඉන්දීය ප්‍රිමීයර් ලීග් ක්‍රිකට් තරගාවලියේ කොල්කටා නයිට් රයිඩර්ස් සහ කිංග්ස් ලෙවන් පන්ජාබ් කණ්ඩායම අතර තරගයෙන් කඩුළු 8 ක ජයක් ලබාගැනීමට ‍කිංග්ස් ලෙවන් පන්ජාබ් කණ්ඩායම සමත්වූ අතර එහිදී ලකුණු 110 ක් ලබාගත් මහේල ජයවර්ධන තරගයේ වීරයා සම්මානය හිමිකරගැනීමට සමත්විය. adaderana

මාරාන්තික පොරයක් වුණේ ප්‍රබල විපක්ෂයක් නැති නිසයි

ප්‍රබල විපක්ෂයක් නොමැති වීම හේතුවෙන් එක්සත් ජනතා නිදහස් සන්ධානය තුළ මනාප සටන මරාගෙන මැරෙන පොරයක් බවට පත්වී ඇති බව එස්.බී.දිසානායක මහතා පවසයි.
සුළුවෙන් ආරම්භ වු මනාප සටන මේ වන විට ඉතා උත්සන්න මට්ටමකට පත්වී ඇති බව ඔහු සඳහන් කරයි.
උඩුනුවර ප්‍රදේශයේ පැවති මාධ්‍ය හමුවක් අමතමින් එස්.බී.දිසානායක මහතා ප්‍රකාශ කළේ කුල භේදය යළි මතු කරන නූගතුන් පිරිසක් ද මැතිවරණයට ඉදිරිපත්ව ඇති බවයි.
එක්සත් ජාතික පක්ෂය 20 වැනි පරාජයට ද සුදානම් වන බව ද ඔහු වැඩිදුරටත් සඳහන් කළේය. adaderana

කිඳෙල්පිටිය අත්අඩංගුවට ගැනීම සැකයි

ආණ්ඩුව විසින් සිය දේශපාලන න්‍යාය පත්‍ර ක්‍රියාත්මක කරන අතකොළුවක් බවට පොලිසිය පත්කර ඇතැයි එක්සත් ජාතික පක්ෂය පවසයි.
නිවේදනයක් නිකුත් කරමින් එම පක්ෂය පවසන්නේ සුසිල් කිඳෙල්පිටිය මහතා අත්අඩංගුවට ගැනීම සහ ඔහුට එරෙහිව පොලිසිය කටයුතු කරන ආකාරය පිළිබඳ බරපතල සැකයක් මතුවී ඇති බවයි.
කිඳෙල්පිටිය මහතා පිළිබඳව පොලිසියට පැමිණිලි ලැබී ඇති බව ඔහු අත්අඩංගුවට ගැනීමට පෙර රජයේ ඇතැම් මාධ්‍ය මගින් ප්‍රකාශ වූයේ කෙසේදැයි එක්සත් ජාතික පක්ෂය ප්‍රශ්න කර සිටියි.
අදාළ තොරතුරු පොලිස් මාධ්‍ය ප්‍රකාශකවරයාගෙන් බාහිරව මාධ්‍ය‍ වෙත නිකුත් කිරීම සම්බන්ධයෙන් ගෙන ඇති ක්‍රියාමාර්ග හෙළි කරන ලෙස ද එම පක්ෂය පොලිස්පතිවරයාගෙන් ඉල්ලා ඇති බව සඳහන් වේ.
එබැවින් මෙම ක්‍රියාදාමය කිඳෙල්පිටිය මහතාට එරෙහිව දේශපාලනමය වශයෙන් පහරගැසීම සඳහා අනුගමනය කරන්නක් බවට සැක මතුවී ඇති බව ද එම නිවේදනයේ දැක්වේ. adaderana