මාලදිවයින් ජනපති හා ශ්‍රී ලංකා ජනපති හමුවක්

පෞද්ගලික සංචාරයක් සඳහා ශ්‍රී ලංකාවට පැමිණ සිටින මාලදිවයින් ජනාධිපති මොහොමඩ් නෂීඩ් මහතා අද(26) අරලියගහ මන්දිරයේදී ජනාධිපති මහින්ද රාජපක්ෂ මහතා හමුවී තිබේ.

මාලදිවයින් ජනාධිපතිවරයා සහ දූත පිරිස වෙත අරලිය ගහ මන්දිරයේදී දිවා භෝජන සංග්‍රහය ද පිරිනමා ඇති බව ජනාධිපති මාධ්‍ය ඒකකය සඳහන් කරයි.

ඊයේ(25) රාත්‍රියේ ශ්‍රී ලංකාවට පැමිණි ජනාධිපති මොහොමඩ් නෂීඩ් මහතා අද රාත්‍රියෙහි දිවයිනෙන් පිටත්ව යාමට නියමිතය.

මාලදිවයින් ජනාධිපතිවරයා සමග මාලදිවයින් අමාත්‍ය මහමුද් රාසි, පාර්ලිමේන්තු මන්ත්‍රීවරුන් වන මුසා මනික්, ඉබ්‍රාහිම් මොහොමඩ්, ශ්‍රී ලංකාවේ මාලදිවයින් මහ කොමසාරිස් හුසේන් ෂිහාබ් යන පිරිස ද අදාළ අවස්ථාවට පැමිණ තිබේ.

එමෙන්ම සුසිල් ප්‍රේමජයන්ත, දිනේෂ් ගුණවර්ධන, පවිත්‍රා වන්නිආරච්චි, ප්‍රියංකර රත්නායක, රාජිත සේනාරත්න, බන්දුල ගුණවර්ධන, ජෙන්ස්ටන් ප්‍රනාන්දු යන අමාත්‍ය අමාත්‍යවරියන් සහ ජනාධිපති ලේකම් ලලිත් වීරතුංග ඇතුළු පිරිසක් ද එක්වී සිටියහ.