දරු සාඵල්‍යතාවය ඉහළ යයිFebruary 2, 2011 03:25 pm

මෙරට සමස්ත දරු සාඵල්‍යතා දර්ශකය ඉහළ යාමේ ප්‍රවණතාවක් පෙන්නුම් කරන බව සෞඛ්‍ය අමාත්‍යාංශය පවසයි. මේ කරුණු හෙළි වී ඇත්තේ පවුල් සෞඛ්‍ය කාර්යාංශය සිදුකළ තොරතුරු ගවේෂණයකිනි.

1953 වසරේ සිට 2007 වසර දක්වා කාලය සැසඳීමේ දී 1953 වසරේ සාඵල්‍යතා දර්ශකය 5 ක් වශයෙන් තිබුණ ද එය 2000 වසර වන විට 1 දක්වා පහත බැස තිබේ.

එහෙත් 2007 වසර වන විට එම අගය නැවත ඒකක දෙකක් දක්වා ඉහළ ගොස් ඇති බව ගවේෂණයේ දී අනාවරණය වී ඇත.

ඒ අනුව මෙම සාඵල්‍යතා දර්ශකය අඛණ්ඩව පැවතියහොත් 2025 වසර හා 2050 අතර කාලයේ දී මෙරට ජනගහනය දෙගුණ‍යකින් වැඩිවීමේ හැකියාවක් ඇති බව පවුල් සෞඛ්‍ය කාර්යාංශය පෙන්වාදෙයි.

එම අභියෝගයට මුහුණ දීම සඳහා මේ වන විටත් වැඩසටහන් ක්‍රියාත්මක කෙරෙන බව සෞඛ්‍ය අමාත්‍යාංශයේ ප්‍රජා සෞඛ්‍ය විශේෂඥ වෛද්‍ය චිත්‍රමාලී ද සිල්වා මහත්මිය පවසයි.