ඇමරිකාවෙන් තුනෙන් එකක් හිමෙන් වැසේ.

ඇමරිකා එක්සත් ජනපදයේ භූමි ප‍්‍රදේශයෙන් තුනෙන් එකක ජනතාව අධික හිම පතනයේ බලපෑමට ගොදුරු වී සිටිනවා. ගුවන්තොටුපල සහ පාසල් විශාල සංඛ්‍යාවක් වසා දැමීමට සිදුව ඇති බවයි විදෙස් වාර්තා කියා සිටියේ. දශක ගණනාවකින් එරටට බලපෑ දරුණුතම හිම පතනය මෙයයි. චිකාගෝ නුවර හිම පතනයට දැඩි ලෙස මුහුණ පා සිටින ප‍්‍රදේශය වනවා. චිකාගෝ නුවර පාසල් වසා දමා ඇත්තේ වසර 12 කට පසුවයි. ටල්සා නගරය ද අධික හිම පතනයකට ගොදුරු වී ඇති අතර, එම ප‍්‍රදේශයේ ප‍්‍රධානතම පුවත්පත මුද්‍රණය ද වසර සියයකට පසුව නවතා දමා ඇති බවයි විදෙස් වාර්තා කියා සිටියේ. නිව්යෝක් සහ ඕක්ලොහෝමා යන ප‍්‍රදේශවල හිම ඉවත් කිරිමේ කටයුතු සහ අනතුරට පත්වූවන් සොයා දියත් කරන සහන මෙහෙයුම් ද මේ වනවිටත් කි‍්‍රයාත්මක වනවා.

මේ අතර, ඕස්ටේ‍්‍රලියාවේ කුවින්ස්ලන්ත වැසියන්ට ගොඩබිම වෙත ළගා වෙමින් පවතින යාසි සුළි කුණාටුවෙන් මිදීමට ප‍්‍රමාණවත් කාලයක් නොමැති බව වාර්තා වුණා. මීට පෙර එම ප‍්‍රදේශවලින් ඉවත් වන ලෙස කාලගුණ බලධාරීන් නිවේදනය කළත් එම නිවේදනවලට අනුව ප‍්‍රදේශ අතහැර නොගිය පිරිස් මෙම හදිසි ආපදාවට ගොදුරු වනු ඇති. සුළි කුණාටුව තවත් පැය කිහිපයකින් ගොඩබිම වෙත ළගා වනු ඇති බවටයි අනතුරු ඇගවෙන්නේ