අවතැන් ජන සංඛ්‍යාව 140,665 ට අඩුවෙයිFebruary 10, 2011 09:27 am

පැවති අයහපත් කාලගුණ තත්ත්වය හේතුවෙන් අවතැන්ව සිටින පුද්ගලයින් සංඛ්‍යාව 140,665 දෙනෙකු දක්වා අඩු වී තිබේ.

තවදුරටත් අවතැන් වූ ජනතාව කඳවුරු 584ක් තුළ රැඳී සිටින බව ආපදා කළමනාකරණ මධ්‍යස්ථානය සඳහන් කරනු ලැබීය.

කෙසේ වුවත් පැවති ආපදා තත්ත්වය හේතුවෙන් මියගිය පුද්ගලයින්ගේ සංඛ්‍යාව 17 දෙනෙකු දක්වා ඉහළ‍ ගොස් තිබේ.

පුද්ගලයින් 11 දෙනෙකු විවිධ අනතුරුවලට ලක්ව තුවාල ලබා ඇති අතර තවත් පුද්ගලයින් දෙදෙනෙකු අතුරුදන්ව සිටින බව සඳහන්ය.

කෙසේ වුවත් නුවරඑළිය සහ බදුල්ල දිස්ත්‍රික්කවල ප්‍රදේශ 10ක් පමණ තවදුරටත් නාය යෑම් අවදානම් තත්ත්වයේ පවතින බව ජාතික ගොඩනැගිලි පර්යේෂණ සංවිධානය පවසයි.

මේ හේතුවෙන් තවදුරටත් එම දිස්ත්‍රික්ක දෙක නාය යෑම් අවදානම් කලාප ලෙස නම් කර ඇති බව එම සංවිධානයේ භූ විද්‍යා හා නාය යෑම් අධ්‍යයන අංශයේ ප්‍රධානී ආර්. එම්. එස්. බණ්ඩාර මහතා කියා සිටියේය.

මේ අතර ගංවතුර තත්ත්වයන් හේතුවෙන් කොටුවී සිටින මන්නාරම කුංජිකුලම ගම්මානයේ ජනතාවට සහන සැලසීම සඳහා විශේෂ වෛද්‍ය කණ්ඩායමක් ‍ඊයේ(09) පිටත්කර යවා තිබේ.