දෙමළ පුනරුත්ථාපන සංවිධානයේ ප්‍රධානීන් 06 දෙනෙකුට විවෘත වරෙන්තුFebruary 10, 2011 04:24 pm

එල්. ටී. ටී. ඊ සංවිධානය වෙත අරමුදල් සපයා දීමේ චෝදනා එල්ල වී ඇති, තහනමට ලක්ව තිබෙන දෙමළ පුනරුත්ථාපන සංවිධානයේ ප්‍රධානීන් 06 දෙනෙකු අත්අඩංගුවට ගෙන අධිකරණයට ඉදිරිපත් කරන ලෙස දන්වා කොළඹ මහාධිකරණය විවෘත වරෙන්තු නිකුත්කරනු ලැබීය.

අදාළ නඩුව කැඳවූ අවස්ථාවේදී විත්තිකරුවන් අධිකරණය හමුවෙහි පෙනීසිටියේ නැත.

විත්තිකරුවන් මේ වනවිට අධිකරණය මගහැර සිටින බව මෙහිදී රජයේ නීතිඥවරයා කියා සිටියේය.

එම කරුණු සලකා බැලූ මහාධිකරණය එම විත්තිකරුවන් අත්අඩංගුවට ගෙන අධිකරණයට ඉදිරිපත් කරන ලෙස දන්වා රහස් පොලිසිය වෙත විවෘත වරෙන්තු නිකුත් කරනු ලැබීය.

දෙමළ පුනරුත්ථාපන සංවිධානය සඳහා ලැබුණු අරමුදල් කොටි සංවිධානයේ අවි ආයුධ මිලදී ගැනීම ඇතුළු ක්‍රියාකාරකම් සඳහා යෙදවූ බවට චෝදනා කරමින් නීතිපතිවරයා විසින් මෙම නඩුව පවරා ඇත.

අනතුරුව නඩු විභාගය ලබන 22 වන දිනට කල්දැමූ අධිකරණය එදිනට අදාළ සැකකරුවන් සම්බන්ධයෙන් වාර්තාවක් ඉදිරිපත් කරන ලෙස ද රහස් පොලිසියට නියෝග කරනු ලැබීය.