අනුරාධපුර බන්ධනාගාරය යුද පිටියක්!අයෙක් මරුට!23 ට තුවාලයිJanuary 24, 2011 09:03 pm

අනුරාධපුර බන්ධනාගාරයේ සිදුවූ ප්‍රචණ්ඩ ක්‍රියා වලින් හා වෙඩි තැබීම් වලින් පුද්ගලයෙකු ජීවිතක්ෂයට පත් වී තවත් 23 දෙනෙකු තුවාල ලබා ඇතැයි අනුරාධපුර රෝහල් අධ්‍යක්ෂවරයා අද දෙරණට කියා සිටියේය.

තුවාල ලබා රෝහල් ගත කළ විසිතුන් දෙනාගෙන් තිදෙනෙකු අසාධ්‍ය තත්ත්වයේ සිටින බවත් එයින් ඉතාම අසාධ්‍ය තත්ත්වයේ සිටි අයෙකු කොළඹට මාරු කර එවූ බවත් රෝහල් අධ්‍යක්ෂවරයා සඳහන් කරයි.

එසේම තුවාල ලැබූවන් විසිතුන් දෙනා අතර බන්ධනාගාර නිලධාරීන් 08 දෙනෙකු සිටින බවත් හෙතෙම කියා සිටියේය.

අනුරාධපුර බන්ධනාගාරයේ රැඳවියන් පිරිසක් ඊයේ(23)පස්වරුවේ සිට බන්ධනාගාර වහලය මත නැඟී බන්ධනාගාර ප්‍රධානියාගේ ක්‍රියා කලාපයට එරෙහිව විරෝධතාවයක නිරත වෙමින් සිටියහ.

මෙම විරෝධතාවයට එක්වූ සහ සහයෝගය දැක්වූ පිරිස හා බන්ධනාගාර නිලධාරීන් අතර අද පස්වරුවේ ගැටුමක් හටගත් බවත්,එම ගැටුම මැඩ පවත්වන්නට වෙඩි තබන්නට සිදුවූ බවත් බන්ධනාගාර කොමසාරිස් ජෙනරාල් වී. ආර්.ද සිල්වා මහතා සඳහන් කළේය.

එහෙත් ජීවිතක්ෂයට පත් වූ හා තුවාල ලැබූ පිරිස මීට වඩා වැඩි විය හැකි බව බන්ධනාගාර අභ්‍යන්තර ආරංචි මාර්ග සඳහන් කරයි.