ස්වාධීන කණ්ඩායම් 159 ක් ඇප මුදල් තැන්පත් කරයි

2011 පළාත් පාලන මැතිවරණය සඳහා මේ වන විට ස්වාධීන කණ්ඩායම් 159 ක් පමණ ඇප මුදල් තැන්පත් කර තිබේ.

අම්පාර දිස්ත්‍රික්කය වෙනුවෙන් ස්වාධීන කණ්ඩායම් 37ක්, කළුතර දිස්ත්‍රික්කය වෙනුවෙන් ස්වාධීන කණ්ඩායම් 21ක්, රත්නපුර දිස්ත්‍රික්කය වෙනුවෙන් ස්වාධීන කණ්ඩායම් 12 ක් සහ පුත්තලම දිස්ත්‍රික්කය වෙනුවෙන් ස්වාධීන කණ්ඩායම් 10 ක් ඇප මුදල් තැන්පත් කර ඇත.

මාතලේ දිස්ත්‍රික්කය සඳහා ස්වාධීන කණ්ඩායම් 7ක්, මොණරාගල දිස්ත්‍රික්කය සඳහා කණ්ඩායම් 5ක්, මඩකළපුව දිස්ත්‍රික්කය සඳහා කණ්ඩායම් 8ක් සහ බදුල්ල දිස්ත්‍රික්කය සඳහා කණ්ඩායම් 14ක් ඇප මුදල් තැන්පත් කර ඇති බව දිස්ත්‍රික් තේරීම්භාර නිලධාරීන් සඳහන් කළේය.

මේ අතර නුවරඑළිය දිස්ත්‍රික්කයට ස්වාධීන කණ්ඩායම් 4ක්, ගම්පහ දිස්ත්‍රික්කයට කණ්ඩායම් 6ක්, හම්බන්තොට දිස්ත්‍රික්කයට කණ්ඩායම් 9ක්, මහනුවර දිස්ත්‍රික්කයට කණ්ඩායම් 4ක් සහ කෑගල්ල දිස්ත්‍රික්කයට කණ්ඩායම් 5ක් ඇප මුදල් තැන්පත් කර තිබේ.

අනුරාධපුර දිස්ත්‍රික්කය සඳහා ඇප මුදල් තැන්පත් කර ඇති ස්වාධීන කණ්ඩායම් සංඛ්‍යාව 9 කි.

පොළොන්නරුව දිස්ත්‍රික්කය සඳහා ස්වාධීන කණ්ඩායම් 3ක් ඇප මුදල් තැන්පත් කර ඇති අතර එම දිස්ත්‍රික්කයේ පළාත් පාලන ආයතන 7ක් සඳහා ජනතා විමුක්ති පෙරමුණ නාමයෝජනා භාරදී තිබේ.

ත්‍රිකුණාමල දිස්ත්‍රික්කයේ ස්වාධීන කණ්ඩායමක් ද නාමයෝජනා භාරදී ඇති බව සහකාර මැතිවරණ කොමසාරිස්වරයා සඳහන් කළේය.

මේ අතර ජනසෙත පෙරමුණ අද(24) ගම්පහ සහ කළුතර දිස්ත්‍රික්කයේ පළාත් පාලන ආයතන සඳහා නාමයෝජනා භාරදීමට නියමිතය.

ලබන 26 සහ 27 යන දෙදින තුළ නාමයෝජනා භාරදෙන බව ජනතා විමුක්ති පෙරමුණ සඳහන් කරනු ලැබීය.

නාමයෝජනා භාරදීමෙන් අනතුරුව අපේක්ෂකයන් දැනුවත් කිරීමේ දීපව්‍යාප්ත වැඩසටහනක් පැවැත්වීමට ද එම පක්ෂය තීරණය කර ඇත.