රාජපක්ෂ පරම්පරාව විසින් තමා දේශපාලනයට ගෙන ආවේ නැතිනම් තමා මේ වන විටත් තාත්තගේ කඩේ අල,ලූණු විකුණනමින් සිටින බව ජනමාධ්‍ය නියෝජ්‍ය අමාත්‍ය ආචාර්ය මර්වින් සිල්වා මහතා පවසයි.
තමා ජනාධිපතිවරයාගේ දෙකකුල් ළඟ වැටී සිටින ඡායා රූපයක් මාධ්‍යවල පළ වීම සම්බන්ධයෙන් අදහස් දක්වමින් හෙතෙම මේ බව කියා සිටියේ නියෝජ්‍ය අමාත්‍ය පදවියේ වැඩ භාර ගනිමින් අද කොළඹ පැවති මාධ්‍ය හමුවකදීය.
මැදමුලන වලව්වට තමන් ඒ කාලයේ යන විට වලව්වේ බංකුවල මිස පුටුවල වාඩි නොවන ලෙස මව්පියන් උගන්වා තිබුණු බවත්,තමන් එකී උපදෙස් අකුරටම පිළිගන්නා බවත්,එසේ කරනුයේ ආගම, දහම හා සදාචාරය පිළිබඳ ගරු කරන බවත් ඔහු කියා සිටියේය. ජනාධිපතිවරයාගේ ළඟ දණින් වැටී නොමැතිව තමන් ඔහුගේ ඔඩොක්කුවේ ඉඳ ගත්තානම් තමන් පිස්සෙක් ලෙස සලකා අංගොඩ යවනු ඇති බවත් හෙතෙම සිහිපත් කළේය.
තමාගේ ජීවිතය නොසලකා මාධ්‍යවේදීන්ගේ ජීවිත ආරක්ෂාව වෙනුවෙන් කටයුතු කරන බව ද ආචාර්ය මර්වින් සිල්වා මහතා කියා සිටියේය. එසේ හෙයින් රාත්‍රී 12.00 ට වුව තමාගේ ජංගම දුරකතනයට මාධ්‍යවේදීන්ගේ ගැටලු ඉදිරිපත් කළ හැකි බවත්,තමන් මාධ්‍යවේදීන් වෙනුවෙන් කෙතරම් කැප කිරීම් කරනවාද යත් මාධ්‍යවේදීන්ට රාත්‍රීයේ පවා තමන්ගේ ගැටලු ඉදිරිපත් කළ හැකිවන පරිදි තමන් සහ තම බිරිඳ එකම කාමරයේ නිදා නොගැනීමට තීරණය කර ඇති බව ද නියෝජ්‍ය ඇමතිවරයා පැවසීය.
මාධ්‍යවේදීන් වෙනුවෙන් මාධ්‍ය ගම්මානයක් ඉදිකිරීමට කටයුතු කරන බවත් ඒ තුළ කුඩා දරුවකුගේ උපතේ සිට සුසානය දක්වාම සියලු පහසුකම් ස්ථාපිත කිරීමට කටයුතු කරන බවද හෙතෙම සඳහන් කළේය.
තමන්ට අභූත චෝදනා එල්ල කරනු ලැබූවද එකී චෝදනා කිසිවෙකුට හෝ ඔප්පු කිරීමට හැකිනම් ඉල්ලා අස්වීමට සූදානම් බවත් ඇමතිවරයා වැඩිදුරටත් පවසා සිටියේය. adaderana
0 comments:
Post a Comment