පසුගිය 19 වැනිදා මහනුවර ගැටඹේ ක්‍රීඩාංගනයේ පැවැති රැස්වීමේදී ජනාධිපතිවරයා විසින් මහනුවර කණ්ඩායම් නායක සරත් අමුණුගමගේ නම පමණක් සිය කතාවේදී ප්‍රකාශ කිරීමට විරෝධය දක්වමින් ඇමැති මහින්දානන්ද අලුත්ගමගේගේ ආධාරකරුවන් විසින් "හූ" කීමේ සිදුවීම සම්බන්ධයෙන් ඇමැති කෙහෙළිය රඹුක්වැල්ල ජනාධිපතිවරයාට තොරතුරු වාර්තා කර ඇති බවත්, මේ අනුව මහින්දානන්ද හා කෙහෙළිය රඹුක්වැල්ල අතර මේ වන විට සීතල යුද්ධයක් හට ගෙන ඇති බවත් වාර්තා වේ.
ගැටඹේ ක්‍රීඩාංගනයේදී පැවැති මෙම රැලියට පැමිණි ජනාධිපතිවරයා සිය කතාවේදී සරත් අමුණුගමගේ නම පමණක් ප්‍රකාශ කර ඇත. මේ අවස්ථාවේදී මහින්දානන්ද අලුත්ගමගේගේ ආධාරකරුවන් විසින් ඔහුගේ මනාප අංකය ප්‍රදර්ශනය කරමින් මහ හඬින් "හූ" කියා ඇත. මේ අවස්ථාවේදී සිය කතාව නතර කර ඇති ජනාධිපතිවරයා "මට ද හූ කිව්වෙ" යනුවෙන් විමසා ඇත. මේ අවස්ථාවේදී නැවතත් පිරිස අතරින් හූ හඬක් ඇසී ඇති අතර, මේ අවස්ථාවේදී කෝප වී ඇති ජනාධිපතිවරයා "මේක නාවලපිටිය කියලද හිතන් ඉන්නෙ. පස්සෙ බලාගමුකො" යනුවෙන් පවසා සිය කතාව අතරමග නතර කොට පිටත්ව ගොස් ඇත.
මේ අවස්ථාවේදී මහින්දානන්ද අලුත්ගමගේගේ ආධාරකරුවන් විසින් හූ කීමේ සිදුවීම කෙහෙළිය රඹුක්වැල්ලගේ ආධාරකරුවන් විසින් වීඩියෝ ගත කර ඇති අතර, මෙම වීඩියෝ ඇතුළත් සීඩී පටයක් කෙහෙළිය රඹුක්වැල්ල විසින් ජනාධිපතිවරයාට ලබා දී ඇත. මෙම වීඩියෝ පටයේ මහින්දානන්ද අලුත්ගමගේගේ ආධාරකරුවන් හූ කියන ආකාරයත්, එම හූ කියන පිරිස මහින්දානන්දගේ මනාප අංකය ප්‍රදර්ශනය කරමින් සිටින ආකාරයත් දක්වා ඇත.
මෙම සිදුවීමෙන් මේ වන විට මහින්දානන්ද අලුත්ගමගේ හා කෙහෙළිය රඹුක්වැල්ල අතර සීතල යුද්ධයක් ආරම්භව ඇති අතර, මහින්දානන්ද අලුත්ගමගේ විසින් සිය මැතිවරණ වේදිකාවලදී "යූඇන්පියෙන් පැනපු උන්ට මනාප දෙන්න එපා" යනුවෙන් ප්‍රසිද්ධියේ ප්‍රකාශ කර ඇත.lankatruth
0 comments:
Post a Comment