අද රටේ ඕනෑම තැනකින් ස්වයංක්‍රීය ගිනි අවියක් සොයා ගත හැකි බව ආරක්ෂක ලේකම් ගෝඨාභය රාජපක්ෂ මහතා පවසයි.
ත්‍රස්තවාදය තුරන් කළද ත්‍රස්තවාදය නිසා හිස එසවූ අතුරුඵල බොහොමයක් පවතින බවත්,පාතාලය මෙන්ම රට තුළ සිදුවන නොයෙක් අක්‍රමිකතා වලට හේතුව එය බවත් හෙතෙම කියා සිටියි.
ත්‍රස්තවාදය තුරන් කළ පරිද්දෙන්ම එහි අතුරුඵල ද තුරන් කළ යුතු බව ආරක්ෂක ලේකම්වරයා කියා සිටියේ අද සවස රාගම-බටුවත්ත ප්‍රදේශයේ පැවති විශේෂ ජන හමුවක් අමතමිනි.
රටට ආදරය යයි කියා ගනිමින් මහා පරිමාණ පෝස්ටර්,කටවුට් හා පුවත්පත් වල දැන්වීම් පළ කර ගන්නා විපක්ෂයේ උදවිය චැනල්-4 වැනි විදෙස් මාධ්‍යයන් හරහා ජාත්‍යන්තරයට රට පාවා දෙමින් සිටින වග ඔහු පෙන්වා දුන්නේය.
හමුදා අත්අඩංගුවේ පසුවන සරත් ෆොන්සේකා මහතාගේ ප්‍රකාශ චැනල්-4 මාධ්‍ය ආයතනයට ලැබෙන්නට සලස්වා ඇත්තේ විපක්ෂයේ රටට ආදරයේයැයි කියා ගන්නා උදවිය විසින්ම බව ආරක්ෂක ලේකම් වරයා පැවසීය.
යුද්ධය තීරණාත්මකව පැවති අවධියේ ජාත්‍යන්තර"කොටි හඬ"ලෙස ක්‍රියා කළ චැනල්-4 ආයතනය රජයේ හමුදා විසින් දෙමළ ජනයා ඝාතනය කරන බවට බොරු ප්‍රවෘත්ති මවා පාමින් රට අපකීර්තියට පත් කළ බවද ගෝඨාභය රාජපක්ෂ මහතා සිහිපත් කළේය. adaderana
0 comments:
Post a Comment