එෆ්.එම් දෙරණින් ශ්‍රී ලංකා ගුවන් විදුලි සංස්ථාවට එන්තරවාසියක්

2011 ලෝක කුසලාන ක්‍රිකට් තරගාවලියේ මෙරට ගුවන් විදුලි විස්තර විචාරයේ විකාශන අයිතිය එෆ්.එම් දෙරණට ලැබී තිබියදීත් ශ්‍රී ලංකා ගුවන් විදුලි සංස්ථාව විසින් එම විස්තර විචාරය ලබා දෙන බවට පූර්ව ප්‍රචාරයන් සිදුකිරීම තම බුද්ධිමය දේපළ අයිතිය උල්ලංඝනය කිරීමක් බව පවසමින් එෆ්.එම් දෙරණ සිය නීතිඥයන් මගින් ගුවන් විදුලි සංස්ථා සභාපතිවරයා වෙත එන්තර වාසියක් යවා තිබේ.

මෙම එන්තර වාසිය ඊයේ දිනයේ දී යවා ඇත.

ශ්‍රී ලාංකේය පෞද්ගලික ගුවන් විදුලි නාලිකා ඉතිහාසය වෙනස් කරමින් එෆ්.එම් දෙරණ 2011 ලෝක කුසලාන ක්‍රිකට් තරගාවලියේ ශ්‍රී ලංකාවේ ගුවන් විදුලි විකාශන අයිතිය ලබාගත් පුවත ඉකුත් පෙබරවාරි මස 01 වන දින පැවති මාධ්‍ය හමුවකදී නිල වශයෙන් ප්‍රකාශ කරන ලදී.

එසේ වුවද ක්‍රිකට් ලෝක කුසලාන තරගාවලියේ විස්තර විචාරය ලබාදෙන බවට ශ්‍රී ලංකා ගුවන් විදුලි සංස්ථාව විසින් දිගින් දිගටම පූර්ව ප්‍රචාරක පට විකාශය කරනු ලැබිණි.

ඒ අනුව මින් ඉදිරියට එවැනි ප්‍රචාරක කටයුතු වලින් වළකින ලෙස හා ඔවුන්ගේ ක්‍රියා කලාපයෙන් තමන්ට වූ අලාභය සම්බන්ධයෙන් වන්දි ලබාදෙන ලෙසද දැනුම් දෙමින් එෆ්.එම් දෙරණ සිය නීතිඥයින් වන"කැපිටල් ලෝ චේම්බර්ස්"නීතිඥ සමාගම මගින් ගුවන් විදුලි සංස්ථා සභාපති වෙත මෙම එන්තර වාසිය යවා තිබේ.