දීප ව්‍යාප්ත නිවාස ණය ක්‍රමයක්

ජාතික නිවාස සංවර්ධන අධිකාරිය විසින් දීප ව්‍යාප්ත නිවාස ණය ලබා දීමේ වැඩසටහනක් ක්‍රියාත්මක කර තිබේ.
මහින්ද චින්තන ඉදිරි දැක්මට අනුව සෑම පවුලකටම නිවසක් ලබා දීමේ අපේක්ෂාවෙන් මෙම වැඩසටහන ක්‍රියාත්මක කරන බව නිවාස සංවර්ධන අධිකාරිය පවසයි. මෙම නිවාස ණය ලබා දීමේ වැඩසටහන නිවාස ගැටලු පවතින නාගරික ප්‍රදේශ තුළත් බහුතර කොටසක් ජීවත් වන ග්‍රාමීය ප්‍රදේශ තුළත් වතුකරයේත් ක්‍රියාත්මක කිරීමට නියමිතය.
එක් නිවාසලාභියෙකු වෙනුවෙන් රුපියල් ලක්ෂයක උපරිමයකට යටත්ව නිවාස ණය ලබා දෙන බව නිවාස සංවර්ධන අධිකාරියේ එල්.එස් පලන්සූරිය මහතා ප්‍රකාශ කළේය. ජාතික නිවාස සංවර්ධන අධිකාරියේ දිස්ත්‍රික් හා ප්‍රාදේශීය කාර්යාල හරහා මෙම නිවාස ණය ලබා දීමේ වැඩසටහන ක්‍රියාත්මක කරන බව පලන්සූරිය මහතා වැඩිදුරටත් සඳහන් කළේය.adaderana

"බාබුල්" සමග අසුවෙයි

නීතී විරෝධී මත්ද්‍රව්‍යයක් ලෙස සැලකෙන බාබුල් අලෙවි කළ පුද්ගලයෙකු මරදාන කදිරේශන් වීදිය ප්‍රදේශයේ දී අත්අඩංගුවට ගෙන තිබේ.
කොළඹ මධ්‍යම දිසා දූෂණ මර්ධන ඒකකයේ නිලධාරීන් සිදු කළ වැ‍ටලීමක දී මොහු අත්අඩංගුවට ගෙන ඇති බව සඳහන්ය. අත්අඩංගුවට ගත් පුද්ගලයා සතුව තිබී බාබුල් මත්ද්‍රව්‍ය පැකට් 210 ක් පොලිසිය විසින් සොයා ගෙන ඇත. අත්අඩංගුවට ගත් සැකකරු අද අධිකරණයට ඉදිරිපත් කිරීමට නියමිතය. adaderana

ලංකාව ආසියානු රග්බි තරගාවලියේ සුපිරි කාණ්ඩයට

ආසියානු කුසලාන රග්බි තරගාවලියේ පළමු කාණ්ඩයේ ශූරතාව දිනා ගැනීමට ශ්‍රී ලංකා කණ්ඩායම සමත් වෙයි. ඒ ඊයේ සිංග්පූරුව සමඟ පැවති තරගය ජයග්‍රහණය කිරීමත් සමඟයි. ලකුණු 23 ට 16 ක් ලෙස ශ්‍රී ලංකා කණ්ඩායම ජය ලබා ගත්තේය. ආසියානු කුසලාන රග්බි තරගාවලිය මේ දින වල සිංග්ප්පූරුවේ පැවැත්වෙයි. මේ ජයග්‍රහණයත් සමඟ ආසියානු රග්බි තරගාවලියේ සුපිරි කාණ්ඩයට සුදුසුකම් ලබා ගැනීමට ශ්‍රී ලංකා කණ්ඩායම සමත් වී තිබේ. adaderana

ඉදිරිය කෙසේ විය යුතුද?

අද පෙරවරුවේ එක්සත් ජාතික පක්ෂ නායක රනිල් වික්‍රමසිංහ මහතා, අරලිය ගහ මන්දිරයේදී ජනාධිපති මහින්ද රාජපක්ෂ මහතා හමුවූ බව දේශපාලන ආරංචි මාර්ග "අද දෙරණ"ට සඳහන් කළේය. වත්මන් දේශපාලන තත්ත්වය මෙන්ම නව පාර්ලිමේන්තුවේ සිදුවිය හැකි වෙනස්කම් පිළිබඳ මෙම හමුවේදී දීර්ඝ වශයෙන් සාකච්ඡා කළ බව ද වාර්තා වේ. අප්‍රේල් 08 වන දින පැවති මහ මැතිවරණයෙන් පසු රනිල් වික්‍රමසිංහ මහතා සහ ජනාධිපතිවරයා අතර පැවති ප්‍රථම හමුව මෙයයි.

යුරෝපයට තැපැල් එපා-තැපැල්පති ඉල්ලයි

නැවත දැනුම් දෙන තුරු යුරෝපය ආශ්‍රිත රටවල් සඳහා ගුවන් තැපැල් භාණ්ඩ එවීමෙන් වළකින ලෙස තැපැල්පතිවරයා මහජනතාවගෙන් ඉල්ලීමක් කරයි.
ඒ අනුව ගුවන් මගින් ප්‍රවාහනය කෙරෙන ලිපි, පාර්සල් ඇතුළු සියලු ගුවන් තැපැල් භාණ්ඩ එවීමෙන් වළකින ලෙස තැපැල්පති එම්‍.කේ.බී. දිසානායක මහතා මහජනතාවට දැනුම් දෙයි. ඒ අනුව ඔස්‍ට්‍රියාව, බෙල්ජියම, ඩෙන්මාර්කය, ප්‍රංශය, ජර්මනිය, ග්‍රීසිය, මහා බ්‍රිතාන්‍ය, ඉතාලිය, නෙදර්ලන්තය, නෝර්වේ, ස්පාඤ්ඤ, ස්වීඩනය, රුසියාව සහ ස්විට්සර්ලන්තය යන රටවලට අදාළව මෙම තීරණය ක්‍රියාත්මක වනු ඇත..
යුරෝපා ගුවන් ගමන් ඇනහිටීම හේතුවෙන් මෙම තීරණයට එළඹි බව තැපැල්පතිවරයා පවසයි. එසේම මේ වන විට ගුවන් ගමන් සඳහා යුරෝපා කලාපය වසා දැමීමට එම රජයන් ගනු ලැබූ තීරණය සම්බන්ධයෙන් ලෝක ගුවන් සේවා සංවිධානය විරෝධය පළ කර තිබේ.
එම සංවිධානයේ ප්‍රධානී ජියෝවානි බිසිග්නානි ප්‍රකාශ කරන්නේ එම තීරණය හේතුවෙන් ලොව පුරා කටයුතු අවුල් සහගත තත්ත්වයකට පත්ව ඇති බවයි. දෛනික ගුවන් ගමන් වාරවලින් සියයට 30 ක් පමණක් දැනට ක්‍රියාත්මක බව යුරෝපා ගුවන් සේවා පාලන අධිකාරිය පවසයි.
දුෂ්කරතාවයට පත්ව සිටින මගීන් වෙනුවෙන් මේ වන විට බ්‍රිතාන්‍ය රාජකීය නාවික යාත්‍රා 3 ක් ක්‍රියාත්මක බව ද විදෙස් වාර්තා පෙන්වා දෙයි. එංගලන්තය සහ පැරීසිය අතර ගමනාගමනය වෙනුවෙන් ප්‍රංශ දුම්රිය සමාගම අතිරේක දුම්රිය වාර සහ දුම්රිය ආසන වැඩි සංඛ්‍යාවක් ලබාදීමට ද ක්‍රියාකර ඇති බව වාර්තා වේ.
ඊට අමතරව දුම්රිය ප්‍රවේශපත්‍ර ගාස්තු පහත හෙළීමට ද එම සමාගම පියවර ගෙන ඇත්තේ අපහසුතාවයට පත් මගී ජනතාව වෙනුවෙනි. adaderana

සන්ධාන නියෝජිතයෝ මැ.කො හමුවෙති

එක්සත් ජනතා නිදහස් සන්ධානයේ නි‍යෝජිතයින් පිරිසක් අද පෙරවරුවේ මැතිවරණ කොමසාරිස්වරයා හමුවී තිබේ.
හෙට දිනයේ පැවැත්වෙන නාවලපිටිය සහ කුඹුරුපිටිය ඡන්ද විමසීම සම්බන්ධයෙන් එම නියෝජිත පිරිස මැතිවරණ කොමසාරිස්වරයා සමග සාකච්ඡා කළ බව ශ්‍රී ලංකා නිදහස් පක්ෂය නිකුත් කළ නිවේදන‍යක දැක්වේ.
ශ්‍රී ලංකා නිදහස් පක්ෂ මහලේකම් මෛත්‍රීපාල සිරිසේන, පක්ෂයේ ජ්‍යෙෂ්ඨ නියෝජ්‍ය සභාපති නිමල් සිරිපාල ද සිල්වා, භාණ්ඩාගාරික ඩලස් අලහප්පෙරුම, එක්සත් ජනතා නිදහස් සන්ධාන මහලේකම් සුසිල් ප්‍රේමජයන්ත් යන මහත්වරුන‍් එම සාකච්ඡාව සඳහා සහභාගී වී තිබේ.
මෙහිදී එම නියෝජිත පිරිස මැතිවරණ කොමසාරිස්වරයාට දැනුම් දී ඇත්තේ එක්තරා දේශපාලන පක්ෂයක් විසින් නාවලපිටිය ප්‍රදේශයේ ඡන්ද මධ්‍යස්ථානයක් අසල ප්‍රචණ්ඩත්වයක් නිර්මාණය කිරීමේ සැලැස්මක් පිළිබඳ තොරතුරු ලැබී ඇති බවයි.adaderana

දුටුගැමුණු"ධර්මපාල"ට අඳියි-සුරාවට කණ කොකා හඬයි

කැලණිය ප්‍රදේශයේ සියලුම සුරාසල් වසා දමා ඇති බවත්, ඒ අනුව වයින් ස්ටෝර්ස්,බාර් මෙන්ම ෆුඩ් සිටි වල මත්පැන් අලෙවි කවුන්ටර් ද වසා දමා ඇති බවත් අද දෙරණ වාර්තාකරු සඳහන් කරයි.
හිටපු කම්කරු අමාත්‍ය ආචාර්ය මර්වින් සිල්වා පසුගිය 17 වන දින කැලණිය ප්‍රදේශයේ සියලුම සුරාසැල් වසා දමන ලෙස නියෝග කර තිබිණි. සුරා බදු දෙපාර්තමේන්තුවේ අවසරයකින් තොරව සුරාසැලක් විවෘත කරන්නට මෙන්ම වසා දමන්නට ද නීතියෙන් අවසරයක් නැතත් ඇමතිවරයාගේ දේශපාලන බලයට හිතුමතේ මෙවැන්නක් කරන්නට හැකියාවක් ලැබී තිබේ.
"නීතිය හොයල බලල මේවා කරන්න ගියොත් ඒකට සෑහෙන කාලයක් ගතවෙනවා.ඒ හින්දා දැනට බාර් වහන්න කටයුතු කරලා තියෙනවා.ඊළඟට නීතිය ගැන හොයල බලන්න කටයුතු කරනවා."අද දෙරණ කළ විමසුමකට පිළිතුරු දෙමින් මර්වින් සිල්වා මහතා පැවසීය.
තමන් හරක් මස් කඩ වහද්දීත් නීතිය බලමින් කටයුතු කළේ නැති බවත්,ඒ වෙලාවේදී මානව හිමිකම් බලමින් කටයුතු කරන්නට හැකියාවක් නැති බවත් හෙතෙම කියා සිටියේය.
මිනිසුන්ගේ මෙන්ම තිරිසනුන්ගේ හිමිකම්ද රැකිය යුතු බවත් මිනිසුන්ට ප්‍රථමයෙන් හරකුන්ගේ මානව හිමිකම් රැකීමට තමන් ක්‍රියා කරන බවත් හිටපු ඇමතිවරයා කියා සිටියේය.
අනගාරික ධර්මපාලතුමන් මේ අයුරින් ක්‍රියා කරන විට"පොට්ටනිකාරයා"ලෙස ඇතැමුන් නම් කළ බවත්,ධර්මපාලතුමන් තමන්ගේ ඥාතියෙකු බවත් මර්වින් සිල්වා මහතා වැඩිදුරටත් කියා සිටියේය. adaderana

දෙවෙනි යුද අධිකරණය හෙට යළිත්

ජෙනරාල් සරත් ෆොන්සේකා මහතා වෙනුවෙන් ක්‍රියාත්මක දෙවන යුද අධිකරණය අද පෙරවරුවේ රැස් කෙරෙණි.
හමුදා මාධ්‍ය ප්‍රකාශක මේජර් ජෙනරාල් ප්‍රසාද් සමරසිංහ මහතා පවසන පරිදි නාවික හමුදා මූලස්ථානයේ දී මෙම කටයුතු සිදුවී තිබේ. දෙවන යුද අධිකරණයේ කටයුතු දහවල් 11.30 ත් 12 ත් අතර කාලය තුළ අත්හිටුවනු ලැබුවේ හෙට දිනයේ නැවත රැස්වීමේ අරමුණින් බව ප්‍රසාද් සමරසිංහ මහතා වැඩිදුරටත් කියා සිටියේය.
ජෙනරාල් සරත් ෆොන්සේකා මහතා සක්‍රිය හමුදා සේවයේ සිටියදී සිදුකළ බව කියන මූල්‍ය ගනුදෙනු සම්බන්ධයෙන් මෙම දෙවන යුද අධිකරණය ක්‍රියාත්මක කෙරේ. adaderana

ලසන්ත ඝාතනයේ සැකකරුවන් තවදුරටත් රිමාන්ඩ්

මාධ්‍යවේදී ලසන්ත වික්‍රමතුංග ඝාතනය ඇතුළු අපරාධ ක්‍රියා කිහිපයක් සම්බන්ධයෙන් සැකපිට අත්අඩංගුවට ගත් පුද්ගලයින් දෙදෙනෙකු රඳවාගෙන ප්‍රශ්න කිරීමට අධිකරණය ත්‍රස්ත විමර්ශන අංශයට අවසර ලබා දී තිබේ.
පොලිසිය පවසන පරිදි රිවිර පුවත් පතේ කතෘ උපාලි තෙන්නකෝන් සහ"ද නේෂන්"පුවත්පතේ නියෝජ්‍ය කතෘ කීත් නොයාර් යන මහත්වරුන්ට පහරදීමේ සිද්ධීන් වලට ද මෙම සැකකරුවන්ගේ සබඳතා ඇති බව හෙ‍ළි වී ඇත.
සැකකරුවන් දෙදෙනා නුවරඑළිය ප්‍රදේශයේ පදිංචිකරුවන් වන බව සඳහන් වේ.
ඔවුන්ගෙන් තවදුරටත් ප්‍රශ්න කිරිමට අවශ්‍ය බව පෙන්වා දීමෙන් අනතුරුව කොළඹ මහේස්ත්‍රාත් අධිකරණය ඒ සඳහා අවසර ලබා දී තිබේ. adaderana

ප්‍රභාගේ අවතාරය ඉන්දියාවේ හොල්මන් කරයි

එල්. ටී. ටී. ඊ ත්‍රස්තවාදය සම්පූර්ණයෙන්ම තුරන් කර එහි නායක වේලුපිල්ලේ ප්‍රභාකරන් ඝාතනය කළ ද තවමත් ඉන්දියාව පුරා ප්‍රභාකරන්ගේ අවතාරය සැරිසරන බව පෙනේ.
පසුගිය සිකුරාදා දින මලයාසියාවේ සිට ප්‍රභාකරන්ගේ මව වන පාර්වතී වේලුපිල්ලේ මහත්මිය ප්‍රතිකාර ලබාගැනීම සඳහා ඉන්දියාවට පැමිණි අවස්ථාවේ බලධාරීන් විසින් ඇයට ඉන්දියාවට ඇතුළුවීම තහනම් කරනු ලැබීය. අංශබාග රෝග තත්ත්වයෙන් පෙළෙන පාර්වතී ඉන්දියාවට පැමිණ තිබුණේ මාස 06කට වලංගු වන වෛද්‍ය වීසා ගමන් බලපත්‍රයක් ද සහිතවය. නමුත් ඇයට ඉන්දියාවට ගොඩබැසීම පවා තහනම් වූ අතර ඇය පැමිණි මලයාසියාවට අයත් ගුවන් යානයේම ආපසු ඇයට මලයාසියාව වෙත යාමට සිදුවිය.
ශ්‍රී ලංකා රජය එල්. ටී. ටී. ඊ ත්‍රස්තවාදය සම්පූර්ණයෙන්ම පරාජය පත්කළ පසුව ද තමිල්නාඩු රජය 79 හැවිරිදි අසනීප තත්ත්වයේ පසුවන මහලු කාන්තාවක සම්බන්ධයෙන් මෙතරම් බියට පත්වන්නේ මන්දැයි සිංගප්පූරුව, මලයාසියාව හා ශ්‍රී ලංකාවේ බොහෝ වාරයක් සංචාරය කර ඇති 45 හැවිරිදි ව්‍යාපාරිකයකු වන සුමති නාරායනන් පවසයි. තමිල්නාඩුවේ ඩී. එම්. කේ රජයෙහි හිටපු සාමාජික පක්ෂයක් මෙන්ම නැවතත් කරුණානිධි වෙත සහය දැක්වීම සඳහා කැමැත්ත පළ කරන පී. එම්. කේ පක්ෂය ද පාර්වතී මහත්මියට රටට ඇතුළුවීම තහනම් කිරීම සම්බන්ධයෙන් විරෝධය දක්වා ඇත. එමෙන්ම විඩුදලෙයි සිරතහල් කච්චි පක්ෂය ද ඊට දැඩි විරෝධය පළ කර ඇත.
ද්‍රවිඩ ජාතික ව්‍යාපාරයේ නායක පී. නදුමාරන් සහ වයිකෝ යන මහත්වරුන් ද ගුවන් තොටුපලේදී පාර්වතී මහත්මිය හමුවීමට උත්සාහ කළ ද ආරක්ෂක හේතූන් මත මෙම දේශපාලඥයින් දෙදෙනාට ඇය හමුවී‍මට අවස්ථාව හිමි වී නොමැත. ද්‍රවිඩ නොවන වෙනත් දේශපාලන පක්ෂ කිහිපයක් ද පාර්වතී මහත්මිය පිටුවහල් කිරීම සම්බන්ධව විරෝධය දක්වා ඇත. මෙම මාසයේ ජනවාරි මාසයේ සිට පාර්වතී මහත්මිය ඇයගේ ඥාතියකු වන එම්. කේ. ශිවාජිලිංගම් මහතාගේ රැකවරණය යටතේ වාසය කර ඇත. ඔහු විසින් පාර්වතී මහත්මිය කැනඩාවේ වෙසෙන ඇයගේ දියණිය වන විනෝදනී රාජේන්ද්‍රන් වෙත යැවීමට යෝජනා කර ඇති අතර ඒ සඳහා වීසා සකස්වන තුරු ඇයව මෙසේ ප්‍රතිකාර සඳහා ඉන්දියාව වෙත එවීමට ශිවාජිලිංගම් තීරණය කර තිබුණි. adaderana

සේවා ස්ථානය දේවස්ථානයක් විය යුතුයි

සේවා ස්ථානය දේවස්ථානයක් සේ සලකා කටයුතු කරන්නැයි සබරගමුව ප්‍රධාන අමාත්‍ය මහීපාල හේරත් මහතා පළාත් රාජ්‍ය සේවකයින්ගෙන් ඉල්ලීමක් කර තිබේ.
අලුත් අවුරුදු නිවාඩුවෙන් පසු අද(19)පළාත් රාජ්‍ය සේවාවේ ආරම්භක වැඩ දිනයට එක්වූ පළාත් සභා සංකීර්ණයේ සේවය කරන දහසක් පමණ වූ සේවක පිරිස අමතමින් හෙතෙම මෙම අදහස් පළ කරන ලදී.
තිස් වසරක යුද්ධය නිමා කිරීමෙන් පසු ශ්‍රී ලංකාව ආසියාවේ ආශ්චර්යය බවට පත් කිරීම සඳහා ජනාධිපතිවරණයේදී ද පාර්ලිමේන්තු මැතිවරණයේදීද මහින්ද රාජපක්ෂ මහතාට රට වාසීන් ලබා දුන් විශිෂ්ට ජනවරමින් පසු එළඹි පළමු වැඩ කරන දිනය වන අද අධිෂ්ඨානයේ දිනයක් බවට පත් කර ගත යුතු බවද මහ ඇමතිවරයා කියා සිටියේය.
වසර දෙකක් තුළ මැතිවරණ දහයකට මුහුණ දෙමින් පසුව එළඹි මෙම සමාරම්භක වැඩ කරන දිනයේදී ශ්‍රී ලංකාව ඉහළට ඔසවා තැබීම සඳහා ජනපති දරන වෑයමට සබරගමුව පළාත් සභාවේ උපරිම දායකත්වය ලබාදිය යුතු බවද මහ ඇමතිවරයා වැඩිදුරටත් සඳහන් කර තිබේ. adaderana

රනිල් - මහින්ද හමුවක්

එක්සත් ජාතික පක්ෂ නායක රනිල් වික්‍රමසිංහ මහතා අද පෙරවරුවේ ජනාධිපති මහින්ද රාජපක්ෂ මහතා හමුවී විශේෂ සාකච්ඡාවක් පවත්වා තිබේ.
අද පෙ.ව 9.30 ට පමණ අරලියගහ මන්දිරයේදී මෙම හමුව පැවැත්වුණු බව දේශපාලන ආරංචි මාර්ග සඳහන් කරයි.
වත්මන් දේශපාලන තත්ත්වය මෙන්ම නව පාර්ලිමේන්තුවේ සිදුවිය හැකි වෙනස්කම් පිළිබඳ මෙම හමුවේදී දීර්ඝ වශයෙන් සාකච්ඡා කළ බව සඳහන් වේ. adaderana

හයිකෝප් ගැන නීතිපතිගෙන් උපදෙස්

හයිකෝප් මුල්‍ය වංචා සිද්ධියේ පරීක්ෂණ සඳහා නීතිපතිවරයාගේ උපදෙස් ලබා ගැනීමට අපරාධ පරීක්ෂණ දෙපාර්තමේන්තුව පියවරගෙන තිබේ.
එම දෙපාර්තමේන්තුව කොටුව මහේස්ත්‍රාත් අධිකරණය වෙත මේ බව දැනුම් දුන්නේය. මෙම මුල්‍ය වංචාව සම්බන්ධයෙන් අපරාධ පරීක්ෂණ දෙපාර්තමේන්තුව අංශ ගණනාවකින් පරීක්ෂණ පවත්වා ඇති අතර ඒ පිළිබඳව ජෙනරාල් සරත් ෆොන්සේකාගෙන් ද ප්‍රකාශයක් සටහන් කරගෙන ඇති බව සඳහන්ය.
මෙම ප්‍රකාශ සහ සියලුම පරීක්ෂණ වාර්තා නීතිපතිවරයා වෙත වැඩිදුර උපදෙස් ලබාගැනීම සඳහා ලබා දී ඇති බව අපරාධ පරීක්ෂණ දෙපාර්තමේන්තුව අධිකරණයට දැනුම් දී ඇත. නීතිපති උපදෙස් මත ඉදිරි පියවර ගන්නා බව එම දෙපාර්තමේන්තුව අධිකරණයට දැනුම් දී ඇත. adaderana

දුම්රිය ප්‍රමාදයෙන් මගීන් අපහසුතාවට

උතුරු දුම්රිය මාර්ගයේ දුම්රිය ප්‍රමාද වීම් හේතුවෙන් මගීන් දැඩි දුෂ්කරතාවට පත්ව තිබේ.
සතියක පමණ කාලයක සිට අනුරාධපුරයේ සහ වව්නියාව අතර දුම්රිය ගමනාගමනය මෙලෙස ප්‍රමාද වන බව අද දෙරණ වාර්තාකරු පවසයි. මේ සම්බන්ධයෙන් අදාළ අංශ කිසිදු පියවරක් ගෙන නොමැති බවට ද මගීන් චෝදනා කරයි. ඊයේ දිනය තුළද අනුරාධපුර හා වව්නියාව අතර මාර්ගයේ දුම්රිය එන්ජිමක් ක්‍රියා විරහිත වීමෙන් දුම්රිය පැය ගණනාවක් ප්‍රමාද වී ඇති බව සඳහන්ය. adaderana

මුල් තැන දිනූවන්ට ජනපතිගෙන් සුබ පැතුම්

2009 අ. පො. ස සාමාන්‍ය පෙළ විභා‍ගයෙන් මුල් ස්ථාන දිනාගත් ශිෂ්‍ය ශිෂ්‍යාවන් වෙත ජනාධිපති මහින්ද රාජපක්ෂ මහතා දුරකථයෙන් සුබ පැතුම් එක්කර තිබේ.
මෙවර සාමාන්‍ය පෙළ විභාගයෙන් දිවයිනේම ප්‍රථම ස්ථානයට පත්වූයේ කොළඹ දේවි බාලිකා විද්‍යාලයේ ශාමලී ගුණවර්ධන ශිෂ්‍යාව සමත් විය. දෙවන ස්ථානය අම්බලන්ගොඩ ධර්මාශෝක විද්‍යාලයේ චරිත් විමලරත්න ශිෂ්‍යයා හිමිකර ගත්තේය. ගාල්ල සවුත්ලන්ඩ්ස් බාලිකා විද්‍යාලයේ දිනිති රණවීර ශිෂ්‍යාව තෙවන ස්ථානය ලබාගත්තේය. adaderana

ලාංකික සිසුන්ට ජපානයෙන් නව ශිෂ්‍යත්ව ක්‍රමයක්

ජපානයේ ශ්‍රි ලාංකීය සිසුන් සඳහා නව ශිෂ්‍යත්ව ක්‍රමයක් ආරම්භ කිරීමට ජපානය පියවර ගෙන තිබේ.
උසස් අධ්‍යාපනය හැදෑරීම සඳහා මෙම ශිෂ්‍යත්ව ලබා දෙන බව සඳහන්ය. විශේෂ විභාගයකින් පසුව තෝරා ගන්නා පිරිසක් සම්මුඛ පරීක්ෂණය සඳහා කැඳවන අතර ජපාන තානාපති කාර්යාලය සහ උසස් අධ්‍යාපන අමාත්‍යාංශය මගින් සුදුස්සන් තෝරා ගැනීමට නියමිතය.
එමගින් තෝරා ගන්නා සිසුන් ජපානයේ විශ්ව විද්‍යාල වල උසස් අධ්‍යාපනය සඳහා යොමු‍ කිරීමට අපේක්ෂා කරයි. මෙම වසරේ සිසුන් 14 දෙනෙකුට ශිෂ්‍යත්ව ලබා දෙනු ඇත.adaderana

නාවලපිටියේ ප්‍රචණ්ඩත්වය උග්‍රයි

නාවලපිටිය ප්‍රදේශය ප්‍රජාතන්ත්‍රවාදය නොමැති ප්‍රචණ්ඩත්වයෙන් බහුල ප්‍රදේශයක් බවට පත් කර ඇති බව එක්සත් ජාතික පක්ෂයේ දයාසිරි ජයසේකර මහතා පවසයි.
මේ වන විට එම ප්‍රදේශයේ ඡන්ද දායකයකුට නිදහසේ ඡන්දය ප්‍රකාශ කළ නොහැති වාතාවරණයක් උද්ගත වී ඇති බව ඔහු කියා සිටියි.
නිදහසේ දේශපාලනය කිරීමට ඇති අයිතිය අහෝසි කර ඇති ප්‍රදේශයක් බවට නාවලපිටිය පත් කර ඇති බව දයාසිරි‍ ජයසේකර මහතා පෙන්වා‍ දෙයි.
මෙවැනි තත්ත්වයක් උද්ගතව ඇත්තේ මනාප පොරයේ ප්‍රතිඵලයක් ලෙස බව ද හෙතෙම කියා සිටියි.
නාවලපිටිය ප්‍රදේශයේ පැවති ජනහමුවක් අමතමින් ඔහු මේ බව ප්‍රකාශ කළේය.adaderana

නාවලපිටියේ ආරක්ෂාවට 2000 ක්

නාවලපිටිය සහ ත්‍රිකුණාමලයේ කුඹුරුපිටිය ප්‍රදේශවල මැතිවරණය සාමකාමීව පැවැත්වීමට සියලු පියවර‍ ගෙන ඇති බව මැතිවරණ කටයුතු භාර ජ්‍යෙෂ්ඨ නියෝජ්‍ය පොලිස්පති ගාමිණි නවරත්න මහතා පවසයි..
අද මධ්‍යම රාත්‍රියෙන් පසු මැතිවරණය පැවැත්වීමට නියමිත ප්‍රදේශවල සියලු මැතිවරණ ප්‍රචාරක පුවරු හා කටවුට් ඉවත් කිරීමට පියවර ගන්නා බව ඔහු කියා සිටියි.
නාවලපිටිය සඳහා ආරක්ෂක අංශ සාමාජිකයින් 2000ක පිරිසක් ආරක්ෂාව සඳහා යොදවා ඇති බව හෙතෙම පෙන්වා දෙයි.
නාවලපිටිය ප්‍රදේශයට පොලිස් නිලධාරීන්ට අමතරව පොලිස් විශේෂ කාර්ය බලකා සාමාජිකයින් හා යුධ හමුදා සාමාජිකයින් පිරිසක් ද අනුයුක්ත කොට ඇති බව ජ්‍යෙෂ්ඨ නියෝජ්‍ය පොලිස්පති ගාමිණි නවරත්න මහතා වැඩිදුරටත් කියා සිටියේය. adaderana

මීළඟ ඉලක්කය සංවර්ධනයයි

පාර්ලිමේන්තුවට තේරී පත්වු මන්ත්‍රීවරුන්ගේ මීළඟ ඉලක්කය විය යුත්තේ රටේ සංවර්ධන ක්‍රියාවලිය බව ජනාධිපති මහින්ද රාජපක්ෂ මහතා පවසයි.
පාර්ලිමේන්තුවට තේරී පත්වු එක්සත් ජනතා නිදහස් සන්ධාන මන්ත්‍රීවරුන් සඳහා අද පෙරවරුවේ පැවති වැඩමුළුවක් අමතමින් ජනාධිපතිවරයා මේ බව කියා සිටියේය.
රටේ ජනතාවගේ හදවත් තුළ ඇති සංවර්ධන අපේක්ෂා මල්ඵල ගැන්වීමට තේරී පත්වු සියලු මන්ත්‍රීවරුන් කැපවිය යුතු බව ද ඔහු කියා සිටියේය..
නවක මන්ත්‍රීවරුන්ට පාර්ලිමේන්තු සම්ප්‍රදාය , ස්ථාවර නියෝග සහ අනෙකුත් කාර්යයන් පිළිබඳ දැනුවත් කිරීම සඳහා මෙම වැඩමුළුව ජනාධිපති කාර්යාලයේදී පැවැත්විණි. adaderana

ආණ්ඩුවට නිසි වැඩපිළිවෙළක් නෑ

රටේ සංවර්ධන යුගයක් ඇති කළ හැක්කේ එක්සත් ජාතික පක්ෂයට පමණක් බව මයන්ත දිසානායක මහතා පවසයි. වත්මන් ආණ්ඩුවට නිශ්චිත සංවර්ධන වැඩපිළිවෙළක් නොමැති බවත්, මේ වන විට රට තුළ සංවර්ධනයට අවශ්‍ය ප්‍රමාණවත් මුදල් නොමැති බවත් හෙතෙම පෙන්වා දෙයි.
විදේශ විනිමය ලබා ගැනීමට හෝ විදේශ අයෝජන ගෙන්වා ගැනීමට පැහැදිලි සැලැස්මක්ද ආණ්ඩුවට නොමැති බව මයන්ත දිසානායක මහතා කියා සිටියි.
නුදුරු අනාගතයේදී එක්සත් ජාතික පක්ෂ ආණ්ඩුවක් පිහිටුවා රට නිවැරදි සංවර්ධන මාවතකට යොමු කරන බව නාවලපිටිය ප්‍රදේශයේ පැවති ජනහමුවකට සහභාගි වෙමින් ඔහු කියා සිටියේය. adaderana

2010 දී පවුල් 20,000 ට නිවාස

මහින්ද චින්තන ඉදිරි දැක්ම තුළින් 2010 වසරේ දී පවුල් 20,000 කට නිවාස පහසුකම් ලබාදීමට බල‍ාපොරොත්තු වන බව ජාතික නිවාස සංවර්ධන අධිකාරිය පවසයි.
පසුගිය සිව්වසර තුළ පවුල් 91,000 කට නිවාස පහසුකම් සපයා ඇති බව ජාතික නිවාස සංවර්ධන අධිකාරියේ සාමාන්‍යාධිකාරී එල්.එස්. පලංසූරිය මහතා සඳහන් කරයි.
මේ සඳහා රුපියල් මිලියන 4,127 ක් වැයකොට ඇති බව ත්,මීට අමතරව ගම නැගුම නිවාස වැඩසටහනට අනුකූලව ද නව නිවාස රැසක් ඉදි කර ඇති බවත් ජාතික නිවාස සංවර්ධන අධිකාරිය කියා සිටියි.
මේ අතර තමාගේම නිවසක් ඉදිකරගැනීමේ ශක්තියක් නොමැති ආර්ථික දුෂ්කරතාවයන් පවතින පවුල් සඳහා නිවාස පහසුකම් සපයා දීමේ අරමුණින් මේ වසරේ සිට"සෙවණ ආධාර නිවාස"වැඩපිළිවෙළ ක්‍රියාත්මක කිරීමට නියමිතව තිබේ.
එහිදී එක් නිවසකට රුපියල් 50,000 ක උපරිමයක් යටතේ මූල්‍යාධාර ලබාදෙන බව සාමාන්‍යාධිකාරී එල්.එස්. පලන්සූරිය මහතා ප්‍රකාශ කළේය.
මීට අමතරව 2010 වසර තුළ දී නගමු පුරවර වැඩසටහනට සමගාමීව මහල් නිවාස 1,500 ක් පිළිසකර කිරීමට ද බලාපොරොත්තු වන බව ද පලන්සූරිය මහතා වැඩිදු‍රටත් සඳහන් කළේය. adaderana

බ්‍රිතාන්‍යයෙන් කෝටි 2 ක ආධාරයක්

උතුරේ නැවත පදිංචි කිරීමේ කටයුතු සහ අවතැන් වූවන්ගේ සුභසාධන කටයුතු සඳහා බ්‍රිතාන්‍ය රජය විසින් රුපියල් කෝටි 2 ක ආධාර මුදලක් පිරිනමා තිබේ..
ශ්‍රී ලංකාවේ බ්‍රිතාන්‍ය මහකොමසාරිස් ආචාර්ය පීටර් හෙන්ස් මහතා පවසන පරිදි මීට පෙ‍ර අවස්ථා කිහිපයකදී ද රුපියල් කෝටි 25 කට ආසන්න ආධාර මුදල් ශ්‍රී ලංකා රජයට ලබා දී ඇත.
මුදල් ආධාරවලට අමතරව අවතැන්වූවන්ගේ ජීවිත යළි නගා සිටුවීම සඳහා අවශ්‍ය කරන තාක්ෂණික සේවාවන් ද බ්‍රිතාන්‍ය රජය විසින් ලබාගෙන තිබේ.
එම සහයෝගය ඉදිරියටත් ලබාදෙන බව ශ්‍රී ලංකාවේ බ්‍රිතාන්‍ය මහකොමසාරිස් පීටර් හෙන්ස් මහතා පවසයි.adaderana

සා/පෙ පළමු තැන දේවි බාලිකාවෙන්

2009 අධ්‍යයන පොදු සහතික පත්‍ර සාමාන්‍ය පෙළ විභාගයේ ප්‍රථම ස්ථානය හිමිකරගැනීමට දේවි බාලිකා විද්‍යාලයේ සචිත්‍රා ශ්‍යාමලී ගුණවර්ධන ශිෂ්‍යාව සමත් ව තිබේ.
දෙවන ස්ථානය අම්බලන්ගෙ‍ාඩ ධර්මාශෝක විද්‍යාලයේ චරිත් විමලරත්න ශිෂ්‍යයා විසින් හිමිකරගෙන ඇති බව විභාග ‍දෙපාර්තමේන්තුව නිවේදනය කරයි.
ගාල්ල සවුත්ලන්ඩ්ස් බාලිකා විද්‍යාලයේ දිනිති රණවීර ශිෂ්‍යාව පසුගිය සාමාන්‍ය පෙළ විභාගයේ දිවයි‍ෙනන් තුන්වන ස්ථානය හිමිකරගැනීමට සමත් විය. adaderana

ජාතික ලැයිස්තු සම්ප්‍රදාය ගැන එජාපය කියයි

සම්ප්‍රදායක් ලෙස ජනමතයෙන් තේරී පත් නොවූ පුද්ගලයින් ජාතික ලැයිස්තුවෙන් පාර්ලිමේන්තුවට ඉදිරිපත් කර නොමැති බව එක්සත් ජාතික පක්ෂය පවසයි. එම පක්ෂයේ සභාපති ගාමිණි ජයවික්‍රම පෙරේරා මහතා ප්‍රකාශ කළේ එවැනි ඉල්ලීමක් මේ දින වල තමාට අසන්නට ලැබී ඇති බවයි. එහෙත් මෙතෙක් ඒ සම්බන්ධයෙන් පක්ෂයේ කෘත්‍යාධිකාරි මණ්ඩලය සාකච්ඡා කර නොමැති බව ද සභාපතිවරයා අද දෙරණට ප්‍රකාශ කළේය. adaderana

වයිකෝ උද්ඝෝෂණයකට සැරසේ

එල්.ටී.ටී.ඊ සංවිධානයේ හිටපු නායක වේළුපිල්ලේ ප්‍රභාකරන්ගේ මවට ඉන්දියාවට ඇතුළු වීමට අවසර ලබා නොදීමට එරෙහිව උද්ඝෝෂණයක නිරත වීමට එම්.ඩී.එම්.කේ පක්ෂය තීරණය කරයි. එම පක්ෂයේ නායක වයිකෝ පවසන්නේ අප්‍රේල් 22 වැනි දින මෙම උද්ඝෝෂණය හා උපවාසය පවත්වන බවයි. පසුගිය සිකුරාදා වේළුපිල්ලේ ප්‍රභාකරන්ගේ මව වන පාර්වතී ප්‍රතිකාර සඳහා මලයාසියාවේ සිට ඉන්දියාවට පැමිණියේය. එහෙත් ඉන්දීය ආරක්ෂක අංශ ඇයට ඉන්දියාවට ඇතුළු වීමට අවසර ලබා නොදුන් අතර වහාම ඇයව මලයාසියාවට පිටත් කර හැරීමට පියවර ගත්තේය. මේ සම්බන්ධයෙන් නිවේදනයක් නිකුත් කරමින් එම්.ඩී.එම්.කේ පක්ෂයේ නායක වයිකෝ පවසන්නේ ඇයට ඉන්දියාවට ඇතුළුවීමට අවසර ලබානොදීම නීතිවිරෝධී බවයි. ඒ හේතුවෙන් දෙමළ ජාතික ව්‍යාපාරයේ නායක කේ.නැදුමාරන් සමග එක්ව ඉන්දීය රජයට එරෙහිව උද්ඝෝෂණයේ නිරත වන බව ද එම්.ඩී.එම්.කේ පක්ෂයේ නායක වයිකෝ වැඩිදුරටත් සඳහන් කරයි. adaderana

මුස්ලිම් කොංග්‍රසය සාකච්ඡාවට සූදානම්

ස්ථීර දේශපාලන විසඳුමක් ලබා ගැනීම සඳහා ඕනෑම අවස්ථාවක රජය සමඟ සාකච්ඡා කිරීමට සූදානම් බව ශ්‍රී ලංකා මුස්ලිම් කොංග්‍රසය පවසයි. දෙමළ සහ මුස්ලිම් ජනතාවට පිළිගත හැකි දේශපාලන විසඳුමක් සඳහා සැමවිටම තම පක්ෂය එක් වන බව මුස්ලිම් කොංග්‍රසයේ මහලේකම් නිසාම් කාරියප්පර් මහතා අද දෙරණට ප්‍රකාශ කළේය. adaderana

රත්නපුරට සුළං

රත්නපුර, කුරුවිට ප්‍රාදේශීය ලේකම් කොට්ඨාශයේ ගම්මාන කිහිපයක් හරහා තද සුළං තත්ත්වයක් ඇති වී තිබේ. රත්නපුර දිස්ත්‍රික් ආපදා කළමනාකරණ මධ්‍යස්ථානයේ සම්බන්ධීකාරක ප්‍රියංකර අ‍ෙබ්රත්න මහතා සඳහන් කළේ ඊයේ පස්වරුවේ මෙම තද සුළං තත්ත්වය ඇති වූ බවයි. සුළං තත්ත්වය හේතුවෙන් නිවාස 10 ක් පමණ හානියට පත් ව ඇති බව ඒ මහතා සඳහන් කළේය. adaderana

විපක්ෂ නායකයා රනිල්

විපක්ෂ නායක ධුරය හිමිවිය යුත්තේ විපක්ෂයේ බහුතර මන්ත්‍රී ආසන සංඛ්‍යාවක් ඇති පක්ෂයේ නායකයාට බව එක්සත් ජාතික පක්ෂය පවසයි.
ඒ අනුව ඉදිරි පාර්ලිමේන්තුවේ විපක්ෂ නායකවරයා වන්නේ එක්සත් ජාතික පක්ෂ නායක රනිල් වික්‍රමසිංහ මහතා බව එම පක්ෂයේ සභාපති ගාමිණී ජයවික්‍රම පෙරේරා මහතා සඳහන් කළේය. ඉදිරි පාර්ලිමේන්තුවේ විපක්ෂ නායකවරයා තෝරාගැනීම සඳහා රහස් ඡන්ද විමසීමක් පවත්වන ලෙසට නව සිහළ උරුමය පක්ෂයේ සරත් මනමේන්ද්‍ර මහතා ඊයේ ඉල්ලීමක් කළේය. එවන් රහස් ඡන්දයක් අවශ්‍ය නොවන අතර විපක්ෂයේ පක්ෂ නායකයින්ගේ තීරණයට අනුව විපක්ෂ නායකවරයා තෝරාගන්නා බව ගාමිණී ජයවික්‍රම පෙරේරා මහතා වැඩිදුරටත් සඳහන් කළේය. adaderana

යුද්ධයේ වියදම බිලියන 600කට වැඩියි

යුද්ධය සඳහා පසුගිය වසර 4 ක කාලය තුළ රජය රුපියල් බිලියන 600 කට අධික මුදලක් වැය කොට ඇති බව ශ්‍රී ලංකා මහ බැංකුව පවසයි.
2006 සිට 2009 දක්වා කාලය තුළ පමණක් යුද වියදම රුපියල් බිලියන 605 ක් බව මහ බැංකු වාර්ෂික වාර්තාව පෙන්වා දෙයි. ගුවනායානා, නැව්, යුද ටැංකි ඇතුළු යුද උපකරණ මෙන්ම ආරක්ෂක සෙබළුන්ගේ නිල ඇඳුම්, ආහාර සහ වැටුප් ගෙවීම සඳහා මෙම මුදල් වැය කොට තිබේ.
මේ අතර අමෙරිකාව විසින් ඉරාකයේ හා ඇෆ්ගනිස්ථානයේ ත්‍රස්තවාදය මර්දනය සඳහා පසුගිය වසර 4 ක කාලය තුළ අමෙරිකානු ඩොලර් මිලියන 910 ක් වැය කොට ඇති බව වාර්තා වේ. ඒ අනුව අමෙරිකාව වියදම් කළ මුදලින් 0.5% ක් වැනි ඉතා සුළු මුදලක් ශ්‍රී ලංකාව යුද්ධය සඳහා වැය කර ඇති බව විචාරකයින් අවධාරණය කරයි. adaderana

ළමයින් ගැන පැමිණිලි ඉහළ ගිහින්

ළමා භාරකාරත්වය සම්බන්ධයෙන් ලැබෙන පැමිණිලි සංඛ්‍යාව ශීඝ්‍ර‍ ලෙස ඉහළ ගොස් ඇති බව පොලිස් ළමා හා කාන්තා කාර්යාංශය පවසයි.
පසුගිය දින කිහිපය තුළ එවැනි පැමිණිලි විශාල වශයෙන් තම කාර්යාංශයට ලැබුණු බව පොලිස් ළමා හා කාන්තා කාර්යාංශයේ නිලධාරියෙකු සඳහන් කළේය. ඊට අමතරව ළමයින්ට සිදුවන විවිධ අපයෝජන සම්බන්ධයෙන් ද පැමිණිලි වාර්තා වන බව ඔහු පෙන්වා දුන්නේය.
දෙමව්පියන් අතර ඇතිවන ආරවුල්, ළමා භාරකාරත්වය සම්බන්ධ පැමිණිලි වැඩිවීමට හේතුවී ඇති බව සඳහන්ය. එම පැමිණිලි පිළිබදව සලකා බලා අවශ්‍ය නීතිමය පියවර ගැනීමට කටයුතු කරමින් සිටින බව පොලිස් ළමා හා කාන්තා කාර්යාංශය වැඩිදුරටත් අවධාරණය කරයි. adaderana