මාධ්‍යවේදී ප්‍රදීප් එක්නැලිගොඩ මහතා අතුරුදහන් කර අදට දින 100ක් පිරීම නිමිති කොට ගෙන මර්ධනයට එරෙහි මාධ්‍යවේදියෝ සංවිධානය විසින් අද විරෝධතාවයක නිරත විය. අද දහවල් කොළඹ කොටුව දුම්රිය පොල ඉදිරිපිට මෙම උද්ඝෝෂණය පැවැත්විණි. ප්‍රදීප් එක්නැලිගොඩ මහතා අතුරුදහන්වී දින 100ක් ගතව ඇතත් ඒ සම්බන්ධයෙන් සිදුකරන පරීක්ෂණ දිනෙන් දින ප්රමාද කිරීමට එරෙහිව මෙම උද්ඝෝෂණය පැවැත්විණි.
ඒ සදහා මාධ්‍යවේදී ප‍්‍රගීත් එක්නැළිගොඩ මහතාගේ බිරිඳ සන්ධ්‍යා එක්නැළිගොඩ මහත්මිය සහ ඔහුගේ දරුවන් දෙදෙනා ද උද්ඝෝෂණයට සහභාගි වී සිටියහ.
එහිදී අදහස් දැක්වූ මර්දනයට එරෙහි මාධ්‍යවේදීන්ගේ සංවිධානයේ කැඳවුම්කරු චන්දන සිරිමල්වත්ත මහතා "මාධ්‍යවේදී එක්නැළිගොඩ මහතා අතුරුදහන් කර අදට දින 100 යක් ගත වෙනවා. නමුත් ආණ්ඩුවට මේ වන තෙක් ඔහු පිළිබද කිසිදු කිසිදු තොරතුරක් රටට ඉදිරිපත් කර නැහැ. පරික්‍ෂණ කටයුතු දවසින් දවස මග හරිමින් විමර්ශන කටයුතු ප්රමාද කරනවා. අපරාධ පරීක්ෂණ දෙපාර්තමේන්තුව එක්නැළිගොඩ මහතා සම්බන්ධයෙන් ගෙන යන විමර්ශන කටයුතු ගැන සෑහීමකට පත් වෙන්න බැහැ. මේ සම්බන්ධයෙන් ජනාධිපතිවරයාට විශාල වගකීමක් තිබෙනවා. නමුත් කිසිදෙයක් වෙලා නැහැ. එක්නැළිගොඩගේ අතුරුදහන් වීමයි ජනාධිපතිවරණයයි අතර සම්බන්ධයක් තියෙනවා." යැයි ප්‍රකාශ කළේය.
මෙම උද්ඝෝෂණයේදී එක්නැලිගොඩ මහතාගේ වැඩිමල් පුත් සංජය එක්නැලිගොඩ සිසුවාද අදහස් දැක්වූයේය. " මගේ තාත්තා පැහැරගෙන ගිහිල්ලා අතුරුදහන් කර තිබෙනවා. එසේ කළේ ආණ්ඩුව නොවේ නම් ඒ ගැන සොයා බලා අපට කියන්න ආණ්ඩුවට වගකීමක් තියෙනවා. නමුත් ආණ්ඩුව අද ඒ වගකීම පැහැර හැරලා.
ආණ්ඩුව අපට කළේ ලොකු අසාධාරණයක්. මම ආණඩුවෙන් ඉල්ලා සිටිනවා මගේ තාත්තා මට මුණ ගස්වන්න කියා. අපට කළ දේ මේ රටේ අනෙක් දරුවන්ට නම් කරන්න එපා. " යැයි සංජය සිසුවා එහිදී පැවසීය. lankatruth
0 comments:
Post a Comment