වැස්සෙන් යළි යළිත් අවතැන්වීම්February 2, 2011 08:37 am

පවතින අයහපත් කාලගුණය හේතුවෙන් දිවයිනේ පුද්ගලයින් දෙදහස් හතළිස් තුන් දෙනෙකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි. තවත් පවුල් 363කට අයත් පුද්ගලයින් 1583 දෙනෙකු අවතැන් කඳවුරු වල රැඳී සිටින බව ද එම මධ්‍යස්ථානය සඳහන් කරයි. වැඩිම පිරිසක් පීඩාවට පත්ව ඇත්තේ ත්‍රිකුණාමල දිස්ත්‍රික්කයේ වන අතර එහි 1361 දෙනෙකු ජල ගැලීම් වලින් පීඩාවට පත්ව සිටින බව වාර්තා වේ.

මේ අතර මාතලේ , යටවත්ත සහ පල්ලෙපොල ප්‍රදේශවල නායයාමේ අවදානමක් හේතුවෙන් පුද්ගලයින් 102 දෙනෙකු ඉවත් කර ඇති බව ද අපදා කළමනාකරණ මධ්‍යස්ථානය පවසයි.

වව්නියාව ප්‍රදේශයේ වැව් 4ක වැව් බැමි කඩා දමා ඇති බව වාරිමාර්ග දෙපාර්තමේන්තුව පවසයි. වැව් කැඩී යාමේ අවදානමක් පවතින හෙයින් බැමි ඉවත් කළ බව එම දෙපාර්තමේන්තුව පෙන්වා දෙයි.

වැව් බැමි කඩා දැමීම හේතුවෙන් පහත් බිම් වල වාසය කරන ජනතාවට අවධානයෙන් පසුවන ලෙස වාරිමාර්ග දෙපාර්තමේන්තුව දැනුම් දෙයි.

මේ අතර බදුලු ඔය පිටාර ගැලීම හේතුවෙන් අන්දෙණිය පාලම ජලයෙන් යට වූ බව අද දෙරණ වාර්තාකරු පවසයි.

බදුල්ල - වැලිමඩ හා බදුල්ල - බණ්ඩාරවෙල මාර්ගයන්ට විටින් විට පස් කඩා වැටීම හේතුවෙන් එම මාර්ග වල වාහන ගමනාගමනයට බාධා සිදු වූ බව සඳහන් වේ.

එමෙන්ම ප්‍රදේශයේ දැඩි මීදුමක් පවතින හෙයින් විමසිලිමත්ව රිය පදවන ලෙස අදාළ අංශ රියදුරන්ගෙන් ඉල්ලා සිටියි.