ෆොන්සේකා හා සේනකට එරෙහි නඩුව කල්යයිJanuary 24, 2011 12:27 pm

පසුගිය ජනාධිපතිවරණ සමයෙහි යුද හමුදාවෙන් පලාගිය සෙබළුන් සේවයේ යොදවා වැටුප් ලබාදීම සම්බන්ධව චෝදනා ලබාසිටින හිටපු යුද හමුදාපති සරත් ෆොන්සේකා මහතා සහ ඔහුගේ ලේකම් සේනක ද සිල්වාට එරෙහිව පවරා ඇති නඩුව පෙබරවාරි මස 02 වන දින විභාගය සඳහා කැඳවීමට කොළඹ මහාධිකරණය අද(24) දින නියම කරනු ලැබීය.

අදාළ නඩුව අද කැඳවූ අවස්ථාවේදී සරත් ෆොන්සේකා සහ සේනක ද සිල්වා යන විත්තිකරුවන් දෙදෙනා බන්ධනාගාරය මගින් අධිකරණයට ඉදිරිපත් කර තිබිණි.

මෙහිදී දෙවන විත්තිකාර සේනක ද සිල්වා වෙනුවෙන් පෙනීසිටි නීතිඥවරයා ඔහුගේ සේවාදායකයා වෙනුවෙන් ඇප ඉල්ලීමක් ඉදිරිපත් කරනු ලැබීය.

එම ඇප ඉල්ලීම 02 වනදා සලකා බලන බව කොළඹ මහාධිකරණ විනිසුරු දීපාලි විජේසුන්දර මහත්මිය සඳහන් කළාය.

ඒ අනුව නඩුව විමසීම පෙබරවාරි මස 02 වන දිනට කල් දැමූ අධිකරණය එදිනට මේ සම්බන්ධව කරුණු දක්වන ලෙස විත්තියේ නීතිඥවරුන්ට නියෝග කළාය.

පසුගිය ජනාධිපතිවරණ සමයෙහි යුද හමුදාවෙන් පලාගිය සෙබළුන් 10 දෙනෙකු සේවයේ යොදවා ඔවුන්ට වැටුප් ලබාදී නවාතැන් පහසුකම් ලබාදීම තුළින් සරත් ෆොන්සේකා මහතා සහ ඔහුගේ ලේකම් සේනක ද සිල්වා යන අය රජයට එරෙහිව කුමන්ත්‍රණයක යෙදී ඇතැයි චෝදනා කරමින් නීතිපති විසින් මෙම නඩුව පවරා ඇත.