එක්සත් ජාතික පක්ෂ ප්‍රතිසංවිධාන වැඩපිළිවෙලේ ප්‍රගතිය සම්බන්ධයෙන් පක්ෂ නායක රනිල් වික්‍රමසිංහ මහතා සමඟ අද සවස විශේෂ සාකච්ඡාවක් පවත්වන බව ජෝශප් මයිකල් පෙරේරා මන්ත්‍රීවරයා පවසයි. එක්සත් ජාතික පක්ෂය ප්‍රතිසංවිධානය කිරීමේ යෝජනා රැස් කරන සය පුද්ගල කමිටුව අවසන් වරට ඊයේ සවස රැස් විය. එහි දී පක්ෂ නියෝජ්‍ය නායක කරු ජයසූරිය, පාර්ලිමේන්තු මන්ත්‍රී දයාසිරි ජයසේකර යන මහත්වරුන් සහ පළාත් සභා විපක්ෂ නායකවරුන් තිදෙනෙකු සමඟ ප්‍රතිසංවිධාන යෝජනා සම්බන්ධයෙන් සාකච්ඡා කර තිබේ.
කෙසේ වෙතත් මෙතෙක් යෝජනා ඉදිරිපත් නොකළ කෘත්‍යාධිකාරි මණ්ඩල සාමජිකයන්ට ඒ සඳහා තවත් කල් ලබා දෙන්නේ ද යන්න ගැන අද තීරණයක් ගැනීමට නියමිතය. ප්‍රතිසංවිධාන යෝජනාවල අවසන් වාර්තාව ලබන අඟහරුවාදා පක්ෂ නායකත්වයට නිල වශයෙන් ඉදිරිපත් කිරීමට දැනට අපේක්ෂා කරන බව ප්‍රතිසංවිධාන කමිටු සභාපති ජෝශප් මයිකල් පෙරේරා මන්ත්‍රීවරයා සඳහන් කළේය. මෙතෙක් ඉදිරිපත් වූ යෝජනා පිළිබඳව රනිල් වික්‍රමසිංහ මහතා සමඟ සාකච්ඡාව අද පස්වරුවේ සිරිකොත පක්ෂ මූලස්ථා‍නයේ දී සිදු කෙරෙන බව සඳහන්ය. adaderana
0 comments:
Post a Comment