මැදපෙරදිග සේවය සඳහා ගිය තවත් ශ්‍රමිකයින් පිරිසක් මෙරටට ගෙන්වා ගැනීමට නියමිත බව විදේශ සේවා නියුක්ති කාර්යාංශය පවසයි.. එම කාර්යාංශයේ අතිරේක සාමාන්‍යාධිකාරී එල්.කේ. රුහුණගේ මහතා පවසන පරිදි මැදපෙරදිග සේවයට ගොස් සිටියදී විවිධ ගැටලුවලට මුහුණදුන් සහ වීසා අවලංගු වී රැඳී සිටීමට සිදුවූ පිරිස් මෙලෙස ගෙන්වා ගැනීමට නියමිතය.
මෙම පිරිස ගෙන්වා ගැනීම සඳහා තානාපති මට්ටමෙන් ලබාගත යුතු අවසරය පිළිබඳ මේ වන විට කටයුතු කරමින් සිටින බව රුහුණගේ මහතා සඳහන් කළේය. ඒ අනුව ඉදිරි දින කිහිපය තුළ මෙම පිරිස ශ්‍රී ලංකාවට ගෙන්වා ගැනීමට හැකිවෙනු ඇතැයි සඳහන් වේ.
මේ අතර කාර්යාංශයේ සභාපති කිංස්ලි රණවක මහතා පැවසුවේ විදේශ සේවය සඳහා ගොස් අතරමංව සහ විවිධ ගැටලුවලට මුහුණ දී සිටින පිරිස් කඩිනමින් එවීම සඳහා කටයුතු කරන ලෙස සියලු තානාපති කාර්යාල වෙත මේ වන විටත් දැනුම් දී ඇති බවයි.
ගුවන් ගමන් තදබදය අවම කරගැනීම සඳහා ගිම්හාන නිවාඩු සමයට පෙර එවැනි පිරිස් එවීමට කටයුතු කිරීම වැදගත් බව කිංස්ලි රණවක මහතා වැඩිදුරටත් පවසයි. adaderana
0 comments:
Post a Comment