පූර්ව මැතිවරණයට අවධියට අදාල කිසි ම නීතියක් ක‍්‍රියාත්මක කිරීමට පොලීසිය හෝ මැතිවරණ දෙපාර්තමේන්තුව අපොහොසත් වූ මෑත ඉතිහාසයේ දූෂිත ම පූර්ව මැතිවරණ අවධිය 2010 පාර්ලිමේන්තු මැතිවරණයට අදාල පූර්ව මැතිවරණ අවධිය බව මානව හිමිකම් පිළිබඳ විද්වත් සංසයේ මැතිවරණ නිරීක්ෂණ ජාලයේ පවසයි. එම නිරීක්ෂණ ජාලය මේ බව පවසන්නේ පූර්ව මැතිවරණ ක්රියා සම්බන්ධයෙන් නිවේදනයක් නිකුත් කරමිනි.
එම නිවේදනය මෙසේය.
2010 මහ මැතිවරණයේ නිරීක්ෂණ කටයුතු සඳහා මැතිවරණ දිස්ත‍්‍රික් 22 ම ආවරණය වන පරිදි නිරීක්‍ෂකයන් 3781 ක් පූර්ව මැතිවරණ ක‍්‍රියාවලිය තුළ යොදවා ඇති අතර පූර්ව මැතිවරණ සමයේ සහ පසුගිය 2010 ජනාධිපතිවරණ සමයේ සිදුවීම් බහුල ප‍්‍රදේශ ඇතුළත්ව මැතිවරණ දිනය සඳහා අමතර නිරීක්‍ෂකයන් 1750 ක් යොදවා ඇත. ඒ අනුව මැතිවරණය පැවැත්වෙන අප්‍රේල් 08 වන දින නිරීක්‍ෂකයන් 5531 ක් යෙදවීමට මානව හිමිකම් පිළිබඳ විද්වත් සංසදයේ මැතිවරණ නිරීක්ෂණ ජාලය කටයුතු යොදා ඇත.
පූර්ව මැතිවරණයට අවධියට අදාල කිසි ම නීතියක් ක‍්‍රියාත්මක කිරීමට පොලීසිය හෝ මැතිවරණ දෙපාර්තමේන්තුව අපොහොසත් වූ මෑත ඉතිහාසයේ දූෂිත ම පූර්ව මැතිවරණ අවධිය 2010 පාර්ලිමේන්තු මැතිවරණයට අදාල පූර්ව මැතිවරණ අවධිය බව මානව හිමිකම් පිළිබඳ විද්වත් සංසයේ මැතිවරණ නිරීක්ෂණ ජාලයේ අදහසයි.
මැතිවරණයට ඉදිරිපත් වී සිටින දේශපාලන පක්‍ෂවල අපේක්‍ෂකයන් අත්තනෝමතික ලෙස නීතිය සියතට ගෙන මැතිවරණ ව්‍යාපාරය මෙහෙයවීමත් එහිදී මැතිවරණ නීතිය පමණක් නොව සාමාන්‍ය නිතිය ද උල්ලංඝනය වීමත් නිරීක්‍ෂණය කළ හැකි විය.
මැතිවරණ කොමසාරිස්වරයාගේ කාර්යභාරය
නිදහස් හා සාධාරණ මැතිවරණයක් සඳහා වූ කිසි ම ක‍්‍රියාමාර්ගයක් ගැනීමට මැතිවරණ කොමසාරිස් දෙපාර්තමේන්තුව අසමත් වූ අතර මැතිවරණ කොමසාරිස්වරයා විසින් නිකුත් කරන ලද සියලූ උපදෙස්, උපමාන හුදෙක් ලියවිලිවලට පමණක් සීමා වූ මැතිවරණයක් විය. මැතිවරණය ක‍්‍රියාත්මක කිරීම සඳහා අදාල නිළධාරීන් පත් කිරීම සහ වරින් වර පක්‍ෂ ලේකම්වරු කැඳවා සාකච්ඡා කිරීම දක්වා මැතිවරණ කොමසාරිස්වරයාගේ කාර්යභාරය ලඝු වූ මැතිවරණයක් බවට මෙම මැතිවරණය පත් වීම කණගාටුදායක ම අත්දැකීම බව මානව හිමිකම් පිළිබඳ විද්වත් සංසයේ මැතිවරණ නිරීක්ෂණ ජාලයේ අදහසයි. 17 වන ආණ්ඩු ක‍්‍රම ව්‍යවස්ථා සංශෝධනයෙන් පසු සාපේක්‍ෂ වශයෙන් කිසියම් බලතල හිමි මැතිවරණ කොමසාරිස්වරයා මෙම තත්ත්වයට පත් වූයේ ඇයි දැයි යන්න ගැඹුරින් සලකා බැලිය යුත්තකි.
දේශපාලන අධිකාරියට නතු වූ පොලීසිය
පූර්ව මැතිවරණ කාලය තුළ මැතිවරණ ප‍්‍රචාරක නීතිය තබා සාමාන්‍ය නීතිය පවා ක‍්‍රියාත්මක කිරීමට පොලීසිය අසමත් විය. නීතිවිරෝධී ප‍්‍රචාරක ද්‍රව්‍ය ඉවත් කරන අවසාන දිනය වරින් වර වෙනස් කළ පොලිස්පතිවරයාට අවසානයේ මැතිවරණ නීතිය ක‍්‍රියාත්මක කිරීමට පොලිස් දෙපාර්තමේන්තුව අසමත් බව ප‍්‍රසිද්ධියේ පිළිගැනීමට සිදු විය. දේශපාලන අධිකාරියේ සෘජු බලපෑමට පොලීසිය අවනතව කටයුතු කරන බවට අදාල සිදුවීම් රැසක් වාර්තා වී ඇත. පොලිස් නිළධාරීන් දේශපාලන ප‍්‍රචාරක රැස්වීම් ඇමතූ අවස්ථා පවා වාර්තා වූ මැතිවරණයක් බවට 2010 මහ මැතිවරණය පත් වී ඇත. එසේ ම පොලීසියේ පක්‍ෂපාතී ක‍්‍රියාකලාපය විශේෂයෙන් කැපී පෙනිණි. විපක්‍ෂයට අයත් දේශපාලන පක්‍ෂ සාමාජිකයෙකු මැතිවරණ නීති කැඞීමක් හෝ යම් ප‍්‍රචණ්ඩකාරී ක‍්‍රියාවකට සම්බන්ධ වූ විට කාර්යක්‍ෂමව ක‍්‍රියාත්මක වන පොලීසිය ආණ්ඩු පක්‍ෂයේ මැතිවරණ අපේක්‍ෂකයන් හා ආධාරකරුවන් ඉදිරියේ සිය රාජකාරී පක්‍ෂපාතීත්වය ප‍්‍රදර්ශනය කරන අයුරු නිරීක්‍ෂණය විය.
රජය හා එක්සත් ජනතා නිදහස් සන්ධානය එකක් බවට පත් වීම.
විධායකයේ ප‍්‍රධානියාගේ සිට ප‍්‍රාදේශීය සභා මන්ත‍්‍රීවරයා දක්වා ආණ්ඩු පක්‍ෂයේ සියලූ ම දේශපාලනඥයන් විවෘතව ම රාජ්‍ය බලය, රාජ්‍ය දේපල ආණ්ඩු පක්‍ෂයේ මැතිවරණ ජයග‍්‍රහණය වෙනුවෙන් භාවිතා කරන බවට තොරතුරු වාර්තා වී ඇත. අමාත්‍යංශ ලේකම්වරු ඇතුළු විධායක නිළධාරීන් පවා මැතිවරණ ප‍්‍රචාරක කටයුතුවල විවෘතව යෙදුනු අතර ඒ පිළිබඳව කිසිවෙකුට හෝ අභියෝග කළ නො හැකි බව ද ප‍්‍රකාශ විය.
රාජ්‍ය නිළධාරීන් විශාල වශයෙන් මැතිවරණ ප‍්‍රචාරයේ යෙදුනු අතර පාසල් ළමුන් පාසල් පැවැත්වෙන වේලාව තුළ මැතිවරණ ප‍්‍රචාරක පත‍්‍රිකා සකස් කිරීමට යොදාගත් අවස්ථා වාර්තා විය. විශේෂයෙන් ශ‍්‍රී ලංකා වරාය අධිකාරිය, මිල්කෝ ආයතනය, මහවැලි සංවර්ධන අධිකාරිය, ශ‍්‍රී ලංකා ගමනාගමන මණ්ඩලය, නැවත පදිංචි කිරීමේ අමාත්‍යංශය, ක‍්‍රීඩා හා පොදු විනෝද කටයුතු අමාත්‍යංශය, පළාත් හා ප‍්‍රාදේශීය සෞඛ්‍ය කාර්යාල, කළාප හා කොට්ඨාස අධ්‍යාපන කාර්යාල, ලංකා ඛණිජ තෙල් නීතිගත සංස්ථාව, ලංකා විදුලිබල මණ්ඩලයේ ප‍්‍රාදේශීය කාර්යාල සහ නගර සභා යන අමාත්‍යංශ සහ ආයතනවල රාජ්‍ය නිළධාරීන් රාජකාරි වේලාව තුළ මැතිවරණ ප‍්‍රචාරක කටයුතුවල යෙදුනු බවට තොරතුරු වාර්තා වී ඇත. තව ද රාජ්‍ය ආයතන සතු වාහන, ගොඩනැගිලි හා අනෙකුත් සම්පත් මැතිවරණ කටයුතු සඳහා යොදාගෙන තිබිණි. එසේ ම රාජ්‍ය ආයතන තුළ මැතිවරණ අපේක්‍ෂකයන් සිය මැතිවරණ ප‍්‍රචාරක රැුළි පවා පවත්වා ඇති අතර ඒ පිළිබඳව බලධාරීන්ට පූර්ව දැනුවත් කිරීම් සිදු කළ ද මැතිවරණ කොමසාරිස්වරයා හෝ අදාල අමාත්‍යංශ ලේකම්වරුන් ඒවා වැලැක්වීමට පියවර ගෙන නො තිබිණි.
මැතිවරණ ප‍්‍රචාරක කටයුතු
මැතිවරණ ප‍්‍රචාරක කටයුතුවලට අදාලව කිසිම නීතියක් ක‍්‍රියාත්මක නොවී ය. අපේක්‍ෂකයන් කිහිපදෙනෙක් විසින් අති විශාල ධනස්කන්ධයක් යොදා මැතිවරණ ප‍්‍රචාරක වේදිකාව ආක‍්‍රමණය කර ඇති බව නිරීක්‍ෂණය කළ හැකි අතර ඇතැම් කලූ සල්ලි සුදු කිරීම සඳහා මැතිවරණ ප‍්‍රචාරණය උපයෝගී වූ බවට චෝදනා එල්ල වී ඇත. මැතිවරණ ප‍්‍රචාරක වියදම් සම්බන්ධයෙන් නීතිවල අවශ්‍යතාව දැඩිව අවධාරණය වූ මැතිවරයකි.
ප‍්‍රතිපත්ති පිළිබඳ සංවාදය වෙනුවට පුද්ගල ප‍්‍රතිරූපය ඉස්මතු වූ මැතිවරණයක්
2010 මැතිවරණය තුළ ප‍්‍රතිපත්තිමය කාරනා සම්බන්ධයෙන් ගැඹුරු සංවාදයක් ඇති නොවූ අතර ඇතැම් ස්ථානවල කුළවාදය, ජාතිවාදය සහ ආගම්වාදය ඉස්මතුව ප‍්‍රචාරක කටයුතු සිදු වූ බවට පැමිණිලි ලැබී ඇත. විශේෂයෙන් ම කොළඹ, මාතර, හම්බන්තොට, මහනුවර යන දිස්ත‍්‍රික්කවල කුළවාදය මුල්කර ගත් මැතිවරණ ප‍්‍රචාරක කටයුතු සිදු වූ අතර නුවරඑළිය, දිගාමඩුල්ල, වන්නි, මඩකළපුව, පුත්තලම, කොළඹ, මහනුවර වැනි දිස්ත‍්‍රික්කවල ජාතිවාදය පදනම් වූ මැතිවරණ ව්‍යාපාරයක් දියත් විය.
මැතිවරණ ප‍්‍රචණ්ඩ ක්රියා. lankatruth
0 comments:
Post a Comment