මාර්තු 1 ට පෙර කටවුට් නොකවුට්ලු..?February 27, 2011 09:00 am

පළාත් පාලන මැතිවරණයට අදාළව ප්‍රදර්ශනය කර ඇති පෝස්ටර් , කටවුට් සහ බැනර් සියල්ල මාර්තු මස 1 වැනි දිනට පෙර ඉවත් කළ යුතු බව පොලිස් මැතිවරණ මහලේකම් කාර්යාලය පවසයි.

දිවයිනේ ප්‍රදේශ රැසක පළාත් පාලන මැතිවරණයට අදාළව පෝස්ටර් , කටවුට් සහ බැනර් විශාල වශයෙන් ප්‍රදර්ශනය කර ඇති බව පොලිස් මැතිවරණ මහලේකම් කාර්යාලය භාර ජ්‍යෙෂ්ඨ නියෝජ්‍ය පොලිස්පති ගාමිණි නවරත්න මහතා ප්‍රකාශ කළේය.

මෙය මැතිවරණ නීතීය උල්ලංඝණය කිරීමක් වන බැවින් එම සියලු දෑ ඉවත් කිරීමට මේ වන විටත් උපදෙස් ලබා දී ඇති බව ගාමිණි නවරත්න මහතා පවසයි.

මාර්තු මස 1 වැනි දිනට පෙර එවැනි සියලු පෝස්ටර් , කටවුට් සහ බැනර් ඉවත් කළ යුතු බව ඔහු පෙන්වා දෙයි.

එසේ නොකළහොත් එම සියලු දෑ ඉවත් කිරීමට පොලිසිය කටයුතු කරන බව ද ගාමිණි නවරත්න මහතා වැඩිදුරටත් සඳහන් කළේය.