පසුගිය මැතිවරණයේදී ටී.එම්.වී.පීය තනිව තරග කරනු ලැබුවේ නැඟෙනහිර පළාතේ යළි ද්රවිඩ-මුස්ලිම් අරගලයක් මතුවන්නට ඉඩ දිය යුතු නැති නිසා බව නැඟෙනහිර පළාත් ප්රධාන අමාත්ය ශිවනේෂතුරෙයි චන්ද්රකාන්තන් මහතා පවසයි.
මඩකළපුව බස් නැවතුම්පළේ අලුත්වැඩියා කටයුතු වෙනුවෙන් මුල්ගල තැබීමේ උත්සවයටකට සහභාගී වෙමින් හෙතෙම මේ බව සඳහන් කළේය. ටී.එම්.වී.පී ය හැටියට තමන් එක්සත් ජනතා නිදහස් සන්ධානයෙන් තනිව තරග කළ නිසා එක් ආසනයක් දිනා ගැනීමට හැකි වූ බවත්,අනෙක් පක්ෂ සමග එක්ව තරග කළා නම් ආසන තුනක් දිනා ගැනීමට හැකියාව තිබූ බවත් ප්රධාන අමාත්යවරයා කියා සිටියේය.
ඒ අයුරින් තමන්ට ආසන තුනක් ලබා ගැනීමට හැකියාවක් ලැබුණේනම් එය ද්රවිඩ-මුස්ලිම් මතභේදයකට තුඩුදිය හැකිව තිබුණු බව ඔහු පැහැදිලි කළේය.
එක්ව තරග කළානම් පළාත් අමාත්ය හිස්බුල්ලා මහතාත්,හිටපු අමාත්ය අමීර් අලී සහ අලි සහීර් මව්ලානා යන තිදෙනාටම ජය ගැනීමට හැකියාව තිබූ බවත්,එසේ වන විට එක්සත් ජාතික පක්ෂයෙනුත් මුස්ලිම් ජාතිකයෙක් තරග වදින නිසාවෙන් මඩකළපුව දිස්ත්රීක්කයෙන් මුස්ලිම් ජාතික මන්ත්රීවරුන් හතරදෙනෙකුට පාර්ලිමේන්තුවට තේරි පත්වන්නට අවස්ථාව සැලසෙන බවත් චන්ද්රකාන්තන් මහතා පෙන්වා දෙයි.
ඒසේ වූයේ නම් මඩකළපු දිස්ත්රීක්කයේ ජනගහනයෙන් 25% ක් පමණ වන මුස්ලිම් ජනතාව නියෝජනය කරමින් මුස්ලිම්වරුන් හතර දෙනෙකු පාර්ලිමේන්තුවට තේරීපත්වෙද්දී මඩකළපු දිස්ත්රීක්කයේ 75% ක් වන බහුතර ද්රවිඩ ජනයා නියෝජනය කරමින් පාර්ලිමේන්තුවට තේරීපත් වීමට නියමිතව සිටියේ එක් නියෝජිතයෙක් පමණක් බවත්,එය අනිවාර්යයෙන්ම ද්රවිඩ-මුස්ලිම් ගැටුමක් ඇතිවීමට තුඩුදෙන කරුණක්වීම වැළැක්විය නොහැකි බවත් හෙතෙම කියා සිටියේය.
එබැවින් දුරදිග බලා තනිව තරග කිරීමට කටයුතු කළ බව නැඟෙනහිර ප්රධාන අමාත්යවරයා වැඩිදුරටත් කියා සිටියේය.adaderana
